Ramngaw humhalh kan tih chuan, ‘ramhnuaia thing leh mau awm chhunte a riral mai lohva, a lo awm belh zel theihnana humhalh leh a awmbelh theih nana theihtawpa hmalakna’, hi a huam thei ang.
He Leia kan awmchhung rei loteah hian Pathianin Mihringten kan enkawl tura a siam Ramngaw hi keini Mihringte hian a riral zawng leh a suat chereu zawnga kut kan thlak lohva; a lo pun leh a lo awmbelh zel theihnana theihtawp chhuaha \an kan lak hi a ngai takzet a. Chu chu Mihringten he leia kan damchhan pakhat niin, kan tihtur diktak a ni.
Ramngaw hi Mihringte tana Nunna hnar pawimawh tak: tuihna leh Oxygen boruak siamtu pawimawh tak a ni a. Khawvel thiamna hmanga siamchhuah tui leh Oxygen te ai chuan he hmun a\anga lo insiam kan hmuhtheih hi a thlawn liau liau a nih bakah, a hlu bik em em a ni. Boruak thinghlim pechhuaktu tur thing leh mau kan suat nasat avangin kan khaw awmdante pawhin mu leh mal pawh a nei lo \an a, kan sik leh sa awmdante pawh tunah chuan a chiri tawh hle.
Mihringte hian kan chakkhai leh mamawh tamtak nitin ramngaw a\ang hian kan lachhuak \hin, a \ha e. Mahse, mi pamham \henkhat; ramngaw humhalh \hatna hre lo tamtakten ramngaw a tichereu zawnga kut an thlak fo te, mahni mamawh bak la a, thing leh mau an suat \hinte hian nasa takin kan Mizorama ramngaw awmte hi an tizim tial tial a nih hi! A pawi hle mai.
Mizote chu tlangram loneiha eizawng \hin kan nih thu kan sawi chamchi. Mahse, a thlakna tur thildang kan ngaituah lem hlei law! Kan ngaihtuah pawhin tlangram loneih ah bawk kan tlulut leh fo \hin. Hei hian nasa takin ram a ti chereu a ni. Lo atan ram zau tak tak chu kan vât a, kan hâl kàng duai duai a. Chu vângin kan ramngawte hi a lo chereu zo va, boruak vawngdaitu thing leh mau a tlêm tial tial a. Chuvangin tui hnâ a lo tlêm a, khua a lum telh telh a. Ramngaw hring dup hmun chu a lo ro rê rû a nih hi. Chu lovah, hetianga ramngaw kan vah a; kan hal hian a ngai awh leh turin hun a duhrei hle.
Ramngawah hian Mihringte chauh ni lo; ramsate pawhin an nunna atana mamawh an zawngin an hmu ve a. Chen nante an hmang ve a. Mihringten chu chu hrereng chung siin, an awmna hmunte kan \hiatdarh \hin. Tunah phei chuan ramsa tamtak Mizoramah a awm loh phah hial tawh nia!
Ramngaw kan \hiahdarh nasat avangin boruak a lum telh telh a. Natna chi hrang hrang a lo pung a, mihring nunna thlengin a tuar chho ta zel a ni. Boruak nuam tak min pe a, min vawngdaitu ramngaw hi; a humhalh kawnga theihtawpa \an kan lâk a ngai a ni.
Mizoram chengte hi kan khawsak kawng engkima thing leh mau tel lova khawsa thei lo deuhvek kan nih avângin thingphun kan uar a \ul ta hle. Ramngaw humhalh lama hma kan sawn zel theihna atan ramngaw tichereutu hremna hi tûn aiin na zâwk se a \ha ang. Thing leh maute pawh tûn aiin a phun inzirtir uar ila, sikul naupang zirlaiah ramngaw humhalh a \ulzia hi tun aia tam zâwk telh nise, thing leh mau kit mai maitute hi an kihzat lêt phuntir ila, nakin lawkah kan ramngaw hi a lo zau tial tial ang.
Keini Mizote pawh tunhma aiin tlem chuan ramngaw humhalh nachang kan hre\an chho ta niin alang. Tlawmngaipawl ten kumpuanah te neiin, theihtawp chhuahin hma an la \hin a. A lawmawm hle. Thingphun uar te pawh kan inzirtir \hin a, a t\a. Mahse, kan enkawlzui loh chuan thingphun satliah ringawt hian thing a puitling thei lo. Tun aia kan thingphunte pawh kan enkawl uluk chu a ngai a ni.
Tin, Sawrkar Department lamte pawhin he lam kawnga mipuite kan harhchhuah theihnan Programme leh intihsiakna ang chi a buatsaih \hin ta a. Hei hi a lawmawm takzet a, tihfo tlak a ni.
Ramngaw hi tu ta bik mah a ni lova. Nang leh i chhungten in humhalh chuan in khawtlangin humhalh nachang an la rawn hria ang. Naupangten a pawnga taka thingkih a \hat loh zia an hriat chuan nakin zelah ramngaw humhalh \hatzia an la rawn hrechiang deuh deuh vang. Kan rama thil awmte hi Pathianin veng a, enkawl a, tipung turin min duh a ni tih i hrereng ang u.
Mizorama ramngaw awmte hi Mizote ta a ni. A riral loh nan nang leh kei hian mawh kan phur a ni. Chu i mawh chu hlenchhuak turin ke rawn pen ve ta che?
2 Comments