Bible chang chhiarturte: Hebrai 11:1, Heb. 12:2, Jak 2:17, Sam 37, Eph. 2:8-10
Awle, Bible-a thu mal pawimawh ber berte thlang dawn ta ila ‘rinna’ tih hi kan thlang tel ngei ang. He thu mal hi la bo ta vek ila, Bible hian awmzia a nei lo mai dawn a ni. Rinna chu thil eng emaw a hrana neih nawlh ang chi a ni lo va, ringtu nun pum pui nen inzawm tlat a ni (Eph. 2:8-10). Rinna chu thil pahnih, mihring chet chhuahna leh Pathian hnathawh hi a ni fo. Ni tin nun leh chetzia pawh hi rinnain a ni zel. Pathianin ringtu nun chhunga thlarauva a thawh ang zelin a tak a lan chhuahtîr thîn a ni .
Rinna chu ringtu mihring tan kawngro su tak, rin tur Pathian lam thlengphak lova a mala neih theih hauh loh si a ni. Rinna tak zet chu Thlarau Thianghlim hnathawh nena inkawp zel, then hran har tak a ni. Hebrai ziaktu pawh hian kan rin tur leh kan rinna siamtu leh tifamkimtu chu Isua a ni tih a tarlang a, en tlat turin min fuih a ni (Heb. 12:2).
Pathianin mihringte min siamchhan hi ngaihtuah chian a ngai hle in a hriat. Amah ring a, Ama tana nung tura min duh avang chauhva he khawvela awm ve kan nih hi ringtu, Amah ringtu, Amaha rinna neitute chuan kan hriatchian a ngai hle. Rinna chungchang hi vawi tamtak mi thahnemtakin an lo sawiin Pulpit tlangah an lo auchhuahpui tawh a. A awmzia pawh hi kan hre fu tawh ngei ang. Mahse, rinna awmzia hria a, amah zuitu intite hian Amah kan rinna a nep thin em avangin hlawhchham ta angah kan inngai fo thin.
Kan Pathian Lehkhabu Thianghlimah ‘Tin, rinna hi thil beiseite awm ngeia hriatna, thil hmuh lohte hriatfiahna a ni’ tih inziak kan hmu a (Hebrai 11:1). Mihringin beisei kan neih chuan kha kan thil beisei kha a awm ngei anga kan ngaih thin bakah, mit ngeiin hmu lo mah ila, engnge a nih kan hrechiang hle thin. ‘Chutiang bawkin rinna chu thiltih nei lovin amah chauhvin a awm chuan thi a ni’ tih kan hmu bawk (Jak 2:17). Rinna chu thiltih nena inkawptlat, lakhran theih loh a ni. Tehkhin nan: Zirlai chuan a zirlaia a Pass a inrin hle chuan, chutianga inring tur khawp chuan a lo zir nasa tawh a. Thiltiha bultanin, rinna chuan a hmalama hun lola thleng tur chu a hriat lawktir thei a ni.
Pathian Lehkhabu Thianghlim ah hian ‘I awmdan tur chu Lalpa chungah nghat la, Amah chu ring la, Aman a then then a ti ang’ tih inziak a awm lo. ‘I awmdan tur chu Lalpa chungah nghat la, Amah chu ring la, Aman a ti vek ang’ tih inziak a awm (Sam 37). Pathian chuan a then then emaw, a zatve lekin emaw, hlen chhuak lovin emaw, min thawh sak dawn lo; kim tak leh felfai takin a hlen chhuak dawn. Chuvangin A duhtaka A siam mihringte hian Pathian hi ring mai tur kan ni.
Pathian Lehkhabu Thianghlimah hian rinna chungchanga mi thahnemtakin Pathian Malsawmna an lo dawn tawh dante, an thiltihna leh hmalakna kawng hrang hranga rinna an neih tlat avanga a puih dante a inziak nasa hle. Kan hriat angin Jeriko Kulhte pawh Josua hovin ni sarih an hual hnuin a chim a (Hebrai 11:30). Mite nuihzat pawh pawisa lovin Pathian thu angin Nova chuan Lawng a tu a. Pathian a rin avanga A thu a awihna chuan tuilet lak ata amah leh a chhungte chu a humhim tih kan hria (Hebrai 11:7). Abrahama chuan Pathian thupek chu a rin tlat avangin mahni Inlum ngei kalsanin Pathianin ram a pek tur lam panin a chhuak a (Hebrai 11: 8). A nupui Sari ngei pawhin rinawm taka a hnena thutiamtu Pathian chu a rintlat avangin mihring ngaiha upa a nih hnuah fa a nei nghe nghe (Hebrai 11: 11).
Pathian Lehkhabu Thianghlim ah hian Rinna thu pawh mi rinawm kalta tam takte hming tarlangin a pho chhuak a. Rinna avanga an tuarzia te, thilmak leh ropui an tih te, fak an hlawhzia te ngaihnawm takin a ziak bawk. Rinna thiltihtheihzia hi C. H. Spurgeon pawhin a sawi uar hle, “Rinna te tak te pawhin i thlarau vanah a hruai ang a, rinna ropui tak phei chuan i nunah vanram a rawn hruai lut ang,” a ti.
‘Rinna avanga khawngaihnaa chhandam’ thu Tirhkoh Paula’n a sawi uar a, Jakoba’n ‘Rinna chu a takin a lang chhuak tur a ni’ tih a sawi fiah ve thung. Lak hran chi loh, inkawp zel tur a ni. Rinna lovin eng mah tih theih a ni lo va, thiltih tel lovin rinna ringawt chu eng mah a ni lo bawk. Tumna ringawt phei chu tihzui a awm loh chuan a tlaktlai lo vang. Patti Labellea chuan, “Thiltih te tham ber pawh tumna ringawt lian ber aiin a la lian zawk,” a ti.
Thenkhat chuan Pathian hnenah chuan rinna kan nghat thin tak na a, mahse kan rin angin Pathian chu A lo che leh si lova, kan vui a, Pathian zawk hi kan thiam lo zawk lek lek thin. Pathiana rinna nghat tak tak chuan an chungah an duh loh zawng tak pawh thleng se Pathianin an thatna tura a remruat a ni ang tih an ring nghet tlat a, nun hahdam takin thil tha lo ni a kan ngaih pawh an tuar thin. Pathian a rinna nei tak tak mite chuan engkim chan huam leh thih huamin Pathianah rinna an nghat. He khawvela an thil neih hlu ber chan mahse, a let tam tak aia ropui zawk an hmu let dawn tih rinna nghet tak an neih avangin he khawvel ropuina leh nawmna te hi ngainepin hrehawm tuar an hlau lo fo. Mosia khan Pathian hre lova reilote atana ropuina leh nawmsakna chen ai chuan Pathian mite nen tihduhdah tuar a thlang zawk anih kha. Kha tawrhna kha rosum tam takah a chhiar zawk a ni. Nakina chatuan atana a ropuina leh a lawmman tur a awm a ni tih rinna a neih vang a ni.
Tunlai Mizorama Ringtu intite hian kan rin nia kan sawi thin Pathian hi kan ring tak meuh em? Kan nunah kan lanchhuah tir em? Kan bula mitten enganginnge Pathian kan ring tih an lo hriat theih ang le? Ringtu chuan a nunah a rinzia a tilang tur a ni dawn lawm ni? Ringtu chuan a rin chu a rinngheh viau chuan a rinna kawngah humsual a dai ngai loving. Kan hmangaih takte pawh kan rinngam tlat chuan engmah sawi lem lovin kan ngaih a tha veng veng thin a ni lawm ni?
Hawh the u, kan rin kan Pathian hi kan tihbeidawn hma ngei hian tun aia nghet leh tak zawk, uluk zawk hian amah i ring ang u. Nakina kan lawman tur min siamtu a ni si a. ‘Ringla i nung ang’ tiin hla siamtuin a sawi nghe nghe kha. Kan nun theih nan rinna dikin Pathian ring ila, kan chantuan hmun tur Vanram kan chan theihnan Pathian tan i inhlan thar leh ang u. Lalpa’n a thu malsawm rawh se. Amen.
-END-
3 Comments