Thawnthu tawi: Khuanu Samsuih

 

KHUANU SAMSUIH
- J Lianhmingthanga Sailo (Ngurthansangi Pa)

 

KAM KEUNA

Mi ina awm leh Hostel-a awm hi kei, thingtlang aṭanga khawpui lama zirna in sang zawk oate tan chuan thilmak a ni hauh lo. Mi in emaw Hostel-a awm lote chuan In an luah ṭhin.

Hostel-a ka awm hmasak ber chuan Class- X, Aizawl North High School, Bawngkawn Chhimvengah ka zir a. Hostel awm nghal a ni. Hei hi Hostel nun ka tem ṭanna a ni.

Class-XI (Sc) chu Mary Jones School, Chanmari-ah ka kal a. Hemi ṭum hian ka pa u ka pa Rama (Lalramthanga Sailo) In, Zohnuai, Vaivakawnah engemawchen ka awm. A hnuah Bawngkawn Bazar pui, kawngpui ana Hostel-ah ka awm.

Class-XII (Sc) ka zir chhungin Chaltlang Road-a awm, Grace Hostel-ah ka awm a. Mahse, ka beihnawn avangin Venglai, Champhaiah in ka luah.

Bachelor Of Computer Applications (BCA) ka zir hun chhung zawng Bawngkawn Bazar bula Blessed Hostel-ah ka awm leh a. He Hostel-a ka awm hma hian ka Cousin Dingtea of Selam nen Lily Veng, Chaltlang-ah in kan luah a. Mi inhnuai chhungkaw hnihin kan inphel a ni.

Master of Computer Applications (MCA) ka zir chhungin PZ Middle School hnuaia Dingtea inluah lai chu ka fin a. Mahse, Dingtea chu Hostel-a a awm avangin keimahin ka luah ta a ni. Hetih lai hian Govt. Republic Higher Secondary Secondary School-a Higher Section-ah ka thawk pah.

Champhai District Police-te Champhai Police Station-a Crime and Criminal Networks and Systems (CCTNS) chungchanga Computer hman dan tur Training ka pek avangin Bethel veng, Champhaiah mi inhnuai ka luah bawk.

Tunah hian Mizoram Sawrkarin Hostel siam tura zawm ngai dante a siam ta a, in luah tur neite tan pawh. A mamawhtute tana Dan ṭangkai tak a nih ka beisei.

                Chhiar nuam le.

 

 

 

 

 

 

 

 

 

1

Hostel chhunga kan va luh chuan a neitute chu chhawng chunglama an awm avangin chhawng chunglamah chuan chho va.

"In awm em?" kan tih chuan nu pakhat, la upa lutuk lo; ka nu rualpui awm vel hian kawngkhar a rawn hawng a. "Awm e. E nge ni? Lo ṭhu rawh u." a ti a.

Min kalpuitu ka pa chuan, "Ka fanu in Hostel-ah ka rawn dah dawn a mi ka tia." a ti a.

"E, rawn dah rawh. Duat takin kanlo enkawl dawn nia."

"Ka pi chu tu nge i hming?"

"Sangpui minti mai dawn a nia. Nangni le?"

"Ka hming chu Lalnuntluanga a ni a, Lalnuntluanga ka nia, ka fanu hi Lalmalsawmi a ni. Sawmte tiin kan ko ṭhin."

"Pawl engzat nge a zir dawn?"

"Kumin hian Pawl Sawmpahnih a zir ve dawn a nih hi."

"Khawiah nge in awm?"

"Seling. Pi Sangpui, thlakhata chawi ngai zatte min hrilh thei em?"

"Thei e. Mess Fee hi ₹ 1000 a ni a, Room Rent-ah ₹ 500; Security atan ₹ 1000 a ngai bawk. A vaiin ₹ 2000 a nih chu."

"Engte nge ken luh ngai?"

"Mahni mamawhho a ni ang a. Thleng leh Fian, No, Bucket pakhat ṭheuh; mutbu pawh."

"Chutizawng chu maw?"

"A ni mai e. In hriatchian loh chu min zawt hreh lo ula?"

"Tunah hian naupang engzat nge in neih?"

"Sawm."

"Mipa nge Hmeichhia?"

"Hmeichhe chauh awmna a nia."

"Engzatin nge awmpui che u?"

"Eirawng bawltu nen a ni mai."

"A nih, pathian thu lamah hian?"

"Zawhna awm tak a ni. Zantin leh tuktin Devotion kan neih pui ṭhin. A changin Sunday Sikul hi Kohhran lam aṭangin min rawn neih pui ṭhin. A changin Kohhran inkhawm kan chhim ṭhin bawk."

"Thil dang min hriattir tur i nei em?"

"Hostel naupangin ruihtheih thil a khawih kan phal lo. Card den te, inchawina lam chi reng reng te pawh."

"Kan han Bazar ang a, zanriah eisain kan rawn indah lut dawn nia."

"Thil ziahfel tur a awm a." a ti a. Pi Sangpuii chuan a ziah fel hnuah chuan Bazar turin kan chhuak a.

***

Ka thil mamawhte kan lei fel hnu chuan kan inngahna, ka nite inah kan chawl hahdam a.

Zan tirah Hostel-ah chuan ka invawmlut ta a. Ka pain min hswsan dawn chuan ka ṭap a.

Ka pa chuan, "Mate, hreawm tuar hmasa lo chuan a nawmsak theih loh. I lunhleng anih pawhin tuar hram hram rawh. Kan rawn kan ṭhin ang che." a ti a.

"Min rawn kan hunah Instinct-a rawn hruai rawh u aw?"

"Awle."

Instinct-a hi ka ui hming a ni. A felin min ngai thei em em a. Ka hmu lo char char tur chu ka rilru a na khawp mai!

'A pa?"

"E nge ni, mate?"

"Instinct-a ka ngai. Hostel thuneitute hi bia la. Kawl a rem chuan kawl ka duh!"

"Awle."

Kan khuaa ka awm laiin Instinct-a chu ka bual ṭhin.

"Mate, i unaute nen inkawm tawh rawh u. Kan sawi ang khan fel tak leh Pathian ṭih takin i awm ṭhin dawn nia." a ti a. Ka lu chunga kut nghatin a ṭawngṭai a, min hawsan ta a.

Ka pa haw hnu chuan ka bungruate ka rem fel a. Ka zawh hnu chuan ka khumah ka bawk thlawp a, ka ṭap char char a. Ka insut thawm hriain ka room piaha mi chuan ka room kawngka a rawn kik a. Ka mittui ka hruk hul zawha ka va hawn chuan, "Bc-i ka nia. Tunah lungleng mah la, nakinah a i lunglennate chu areh mai ang." a ti a. Kan inkawm a, a fel khawp mai! Ani chu B. Com, Second Semester zirlai a ni. A hming chu Biakhmingthangi a ni a, 'Bc' emaw 'Biaksen' tiin an ko ṭhin.

Zanin chu ka luh vang a ni ang, Devotion chu zantira nei lovin mut dawnah neih a ni a. Chutah chuan min lawmlut a.

Min lawmluh chuan Interview ang reng, inhmelhriattirna hun kan nei a. Zawhna zawttu hi Pi Sangpuii a ni.

"Tu nge i hming?"

"Lalmalsawmi, Sawmte tiin min ko ṭhin."

"Eng ti turin nge he Hostel-ah hian i rawn luh?"

"Thiamna paw chhuak turin."

"Khawi khua nge i nih?"

"Seling."

"Kum engzat nge i nih?"

"17"

'Pawl engzat nge i nih dawn?'

"XI (Sc)"

''X khawiah nge i zir?"

"Kan khuaah."

"Hostel-ah i awm ngai tawh em?"

'Ngai lo."

"Eng Kohhran nge i nih?"

'"Presbyterian Church."

"Ngaihzawng i nei em?"

"Nei lo."

"He Hostel-ah hian naemsakbawl tur ni lovin lehkhazir turin i rawn lut a. Hostel dan leh dunte zawm hram i tum dawn nia. Awle, in unaunu thar hi rawn chibai ru le?" a ti a. Midangte chuan min rawn chibai a. Chumi kan hun hman chu kan zawh chuan mahni room lam kan pan a.

Mize inang lo kan nih hlawm avangin inhauh chang te a awm lo thei lova. Ruwitheihthil khawih leh lerh uchuak kan awm lova, min enkawltu nu Sangpuii chuan min duat hlawm hle. Bc-i nen chuan room inṭhenawm kan ni bawk a. Thiltihna kawng tinrengah kan inkawp chawt a ni ber. Kan Class a inang na a, ani chu Govt. Chaltlang Higher Secondary School-ah a kal. Board Exam zawh thlengin Hostel-ah chuan ka awm.

 

 

2

Class-X chu First Division-a ka passed avangin leh ka Marksheet Principal-in a en chuan 'Direct Admission' tih min phalsak avangin Govt. Mizo Higher Secondary School-ah Hostel-a ka luh hmain Admission kan ti a. GMHSS-ah chuan School naupang Admission tihtum an ṭhahnem khawp mai. Ka chhungten Doctor nise min duh avangin leh ka Mark hmuhin a lak phak avangin Science Stream-ah Admission ka ti a. Science lak duh, Admission chang lo a awm nual mai.

Kan Stream hian Building kan nei hrang a, Mizo chhiara chhawng thum a ni. A chungberah XII leh XI kan awm a, a hnuai chiahah kan Zirtirtute leh Laborarory. A hnuai leh chu thil dahkhawmna a ni. School Campus hi a zau ang reng. A bulah mimal leh Sawrkar Office a awm nual a. Chung zingah chuan State Museum te, Dir. Of Art and Culture Office te, Dir. Of Higher and Technical Office te a awm. Campus bulah hian School chuan Field/ Playground kan nei a. Tah chuan Sport leh Outdoor Functions kan nei ṭhin. Tin, indoor tihna tur Hall lianṭha deuh mai kan nei bawk. Kan School-ah hian Stream hrang hrang pali: Arts te, Science te, Commerce te, Vocational (Computer) te a awm. High School leh Stream hrang hrangte chuan Building hrang ṭheuh kan nei. Kan ṭhathnem deuh avangin Inspection Parade kan neih hian hmun ngaah kan nei ṭhin. High School chuan Headmaster an nei a. Mahse, Principal chu a pumpuia thuneitu sang ber a ni. School-ah chuan Zirlaite tihchhuah kartin chhuak chanchinbu a awm a, Zirlaite tan a ṭangkai hle. National Service Scheme (NSS) pawh a awm. High School Zirlaite zingah Band Party a awm a, chumite chuan a changin kan School Field-ah Band an zir ṭhin.

XI (Science) chu ka zir chho ve ta a. Kan Class-ah chuan kawm ṭhin pakhat ka nei a. A hming chu Lalnunpuii a ni, 'Nunun' tiin an ko ṭhin. Ani chu Bawngkawn Hmarvenga awm a ni. School kal tur hi City Bus Stand, kan Hostel kawtah chuan kan innghak ṭhin. A thau lutuk lo a, a cher em em hran lo. San lamah kan inchen tawk viau a. Kan Class amite chuan 'nangni unau hi' min ti ṭhin. An inah chuan kal tura min sawm ṭhin avangin ka leng zeuh zeuh a, a chhungte chu ka chungah an ṭha hle. Terminal Exam zawh chawlh kan neih laite hian ka chhungte bula chawlh hmang lovin an inah chuan chawlh ka hmang ṭhin a. Laizawn dang a neih loh avangin a laizawn ang chiahin min en a, a nu leh la pawhin fanu angin min en. A nu leh pa nen an khawsa.

Kan Class-ah chuan min Star-tu pakhat a awm a, a hming chu Lalventluanga (Mavena) a ni. Ka be chhe lem lo a, ka be ṭha lem lo bawk. Amah chu pa lian lutuk lo, sa ṭha lampang a ni a. A ngo a, titi a thiam; a zaidam bawk. Kan School-ah chuan a luck hle a, amah hre lo pawh an awm lo. Kan Class Representative (CR) a ni nghe nghe. A chezia aṭangin min Star tih ka hria, Letter em chu min thawn lo a. Mahse, ka ṭhiannu Nununi hnenah 'minlo biak rawh aw?' a ti a. Mahse, ka la tleirawl deuh avangin leh zirnaa ka bahlah avangin ka chhang lem lo.

Vawikhat chu Mavena chuan an Veng, Sikulpuikawn aṭang chuan Bawngkawnah rawn pheiin ka School kal tur minlo chang a. 'Inrualin ka kal dawn?' a ti tlat a. City Bus-ah a hnungber tlarah kan pathum chuan kan ṭhu a. A laiah Mavena chu a ṭhu a.

Kan Class chuan Field Trip kan nei a. Speciment kan lakhawm a. Biology Subject la lo pawh an kal a. Mavena chuan Biology a la lo. Speciment kan lakkhawm lai chuan Biology Subject la ve lote chu tuiah anlo cheng a. Kan hlim phian a.

Kan thil lakkhawm zawh chuan tui kan cheng ve ta a. Mavena chuan, "A thuk lamah ka hruai ang che aw?" min ti a, "Awle" ka tih chuan min pua a, a thuk laiah chuan min hleuh pui a. Hemi ni hian Nununi chuan Digital Camera a keng a. Mavena tui min hleuh pui lai chu thla alo la char char a. Kan haw kawngah Nununi chuan, "Vawiin chu i hlimin ka hria!" a ti a. Kei chuan, "Ka chhungte lak ata ka awm hran hnua ka hlim ni ber niin ka hria!" ka ti a.

A tuk School kalnaah Nununi chuan kan Fieldtrip nia kan thlalak chu a rawn keng a, kan tlan sap sap hlawm a.

Vawikhat chu kan School NSS chuan Hnuchham Rûn kan tlawh a. Fahrahho ka hmuh chuan ka lainat hle a. A theih hram chuan Fahrah ka siam lovang tiin ka intiam a.

Nununi chuan lehkha zir a taima hle a, a zir deuh reng mai niin ka hria. Hmeichhe ze zawi tak niin ka hre ṭhin.

 

 

 

3

Ka chhungte chuan a khat tawkin min rawn tlawh ṭhin a. Ṭum khat chu kan unaua a teber Nûnû-i (Zonunsangi) leh ka nu (Lalthlamuani) an rawn kal a, Instinct-a (Ui) an rawn hruai a. Ka hmu chu ka ṭap hial a. Mahse, Hostel-ah Rannung vulh an phal loh avangin ka kawl thei si lo. Min ngai ve khawp mai a ni tih a chezia aṭang chuan ka hre thei a. Nûnûi nen chuan kan Bazar a. Instinct-a kan hruai a, ka pua a. Ka nu chu Nu Sangpuii nen anlo inkawm a. Kan kir chuan Nûnûi nen ka Room-ah kan awm a, Instinct-a chu ka khumah ka muttir a. A hnu rei vak loah chuan Nununite inah ka lenpui a. 'Zanriah ei nghal rawh u' an tih avangin kan Hostel enkawltu Nu Sangpuii hnenah chaw kan ei tur thu kan va hrilh a.

Nununi chuan Nunui chu a kawm a. An inkawmngeih hmel khawp mai. An titi ka hriat theihah chuan ngaihzawng chungchang an inzawt a ni. "Nunu, bialpa i nei tawh em?" Nununi chuan a ti a.

"Nei lo, Star chu ka nei."

"An hmelṭha em?"

"Hmelṭha a ni ang chu! Hmelchhe deuh tu nge Star duh ang?

"Ni ngawt mai tiraw? An hausa em?"

"Hausa e. Classmate kan nia.'

"A va nuam dawn ve?"

Chawei khamah chuan ṭhu muang lovin Hostel-ah min thlahphei a. Nunui hnenah chuan duat tak leh ṭha taka Instinct-a lo enkawl turin ka chah a. Ani pawhin, "A u, lo ngaihtuah suh. I duat ang khan ka duat vetho a nia!" a ti a. Remchang hmasa bera rawn kal leh an tum tur thu ka nuin a sawi a. Inngaitak chungin kan inthlah ta a

***

Ka thlatin hunbi chu khel lovin alo thleng a. Ka tai a na thei em em a. Lehkha pawh zir peih lohvin ka tai nat zual chang chuan ka mu tawp ṭhin. School pawh ka kal lo tawp ṭhin a. Mahse, ni rei a awh ngai lo. Visiting Day-ah Mavena leh Nununite chuan min rawn Visit ṭhin a. Ei tur an rawn keng ṭeuh ṭhin. Mavena hian ruihtheihthil a ti lova, a theih ang tawkin kohhran keh khawtlangah a inhmang ṭhin tih Nununi kam aṭangin ka hria.

Zankhat chu ka mumangah Mavena nen chuan kanlo lengdun a. Hmun nuam deuhah hian kan ṭhudun a.

"Sawmte?"

"Eih, e nge ni?"

"I duhawm ka ti!"

"Min bawl!"

"Ka bawl lo che. Dawt ka sawi thiam lo, thudik hi ka sawi phawng mai zel!"

"A nih, tak tak maw?"

"Ka tiderah ring chhin la?"

"Lem ang inder vel ka duh lo!"

"Sawmte, i ṭhiannu hnena ka sawi kha min chhang tawh la?"

"Ka rilru hi ngaihzawng nei turin ala inpeih lovin ka hria."

"Ka hmuh tirh aṭang che khan midang lakah rilru ka pe thei lo. Lo inngaituah la, nangman i sawi zak anih pawhin i ṭhiannu hnenah losawi mai ang che." a ti a.

Ka mumanga Mavena ka hmuh aṭang chuan keimahah danglamna a awm ta a. Nidanga ka biak ve fo chu ka be zak ta tlat a.

Ka inngaihtuah ṭhin a. 'Ngaihzawng nei rual ka ni tawh alawm' tiin Mavena chu Nununi hnenah chuan 'Ani pawh le a ti' loti turin thu ka chah a.

 

 

4

Vawikhat chu Holiday a ni a. Mavena chuan an inah min hruai a. Sikulpuikawna awm an ni. A chhungte bulah chuan ka kal tur thu a sawi avangin a chhungte chu anlo chhuak lo a. Kan thlen chuan, "Sawmte, loleng rawh." Mavena nu (nu Dingpuii) chuan min ti a. "Paa, Mamate anlo thleng e." a tih chuan Mavena pa (pa Kunga) chuan, "E, loleng rawh. Ilo inchibai ila?" a ti a, Mavena nu leh pate chu ka chibai a.

Mavena nu leh pa nen chuan an Sitting Room-ah kan inkawm a.

"Mavena hi kan fa neihchhun, inpui changtu tur a nia." nu Dingi chuan a ti a.

Ka chanchinte min zawt a, kei pawhin an chhungkaw chanchin ka zawt ve bawk. A hnuah Mavena chuan a Room-ah min hruai a. Kawngka chu chhunglamah a kalh a, Computer-ah Daduhi hlasak a play a.

"Kei chuan Daduhi zai hi zin kawnga play a inhmeh ber mai!" ka ti a. "Zin kawng loah pawh a inhmeh tho alawm." Mavena chuan a ti a.

A khumah kan ṭhu a. Mavena chuan, "Sawmte, ka hriat chak em em ṭhin chu min chhan tak avangin ka lawm e." a ti a. A vawikhat nana mipa ka fawhna turin min fawp ta a. Ka zei lo hle mai. Ka khur deuh. Ka sam chu a chul a chul a, ka kut chu a khal bawk a. "Ka hmangaih che a ni. Midang ta i nih ka phal ngai lovang, Sawmte." a ti a. Ka kawrawm chu a rawn zen a. Tumahin ka hnute an la khawih ngai loh avangin a za chem chem a. Ka hnute hmur chu dim tein a hrual a. "Maven, duh tawk ang." ka ti a. Ani pawh chuan a thiltih lai chu a bansan a. A hlim a ni tih a hriat khawp mai!

***

Student's Day (Zirlaite ni) a ni. Chawhma lamah a huhovin School Hall-ah Function kan nei a, chawhnu lamah kan chawl a.

Chawhma banah chuan Nununi nen kan pathumin Davids Kitchen-ah kan chawl a.

"Vawiin chu e nge i hmang nuam em?" Nununi chuan Mavena chu a zawt a. Ani chuan, "Stage-a ka ding, kan Stream aiawha thu ka sawi kha ka zam ṭep a ni. In bulah ka ṭhu lo chu nuam pawh ka ti hran lo." a ti a. Nia, ani chu kan Class CR a ni a, Students Weekly Newsletter Editora ni bawk a; Programme-ah pawh chanvo nei tur a ni alawm! Kan ṭhutlang thei lo chu kei pawhin nuam ka ti bik chuang lo!

 

 

5

First term Exam kan neih zawh chuan Study Tour cum Expedition chu MZP huaihawtin Mizoram hmarchhak tlangdungah neih a ni a. A tel turte chu a duhte zing aṭangin Zirtirtuten an thlang. An thlanchhuah zingah Muantea nen chuan kan tel a. Kan kalna tur hmunte chu Champhai District-a Hnahlanah (Grape chungchangah) te, Lungphunlian (Historical Item chungchangah) te, Khuangphah (Indopui pahnihnaa Japan hovin an Flag an tarna hmunah) te kan kal dawn a ni.

Aizawl khaw chhunga School hrang hrang aṭangin pali ṭheuh kal tur min thlang a, Bus 5 kan hmang. Kan kalna khuate tan phurrit kan nih lohna turin Buhfai leh Alu, Dailuah, adt., kan keng bawk. Kan chhuahni chuan tluang takin Hnahlan kan thleng a. Community Hall-ah Mipaho an riak a, Hmeichheho chu YMA Information Building-ah kan riak thung. Hnahlanah hian Grape chungchanga Survey neiin nikhat kan cham a. Chhunah In tinah kan lut a, Questionaire kan chhan tir a. Zanah Public Meeting chu Community Hall-ah kan nei. Khaw mite chu kan chungah an ṭha hle.

A ni hnihnaah chuan Lungphunlianah kan kal a. Motor lian a luh theih loh avangin leh kea kal kan chak hlawm avangin zing khawvar rualin Hnahlan aṭangin Bus-in Tualchengah, Tualcheng aṭangin kein kan kal a. A khaw awmna a kilkhawr hle mai. Tualcheng aṭang chauhin Jeep Road-in a tlawh a, chu chu lirthei hmanga khawdang nena inkalpawhna an neihchhun a ni. Mizoram Historical Item pakhat, Lungphunlian awmna a nih avangin a hmingthang hle a. Mahse, Mizoram Sawrkar hian a ngaihsak vak lo a ni ang, an Motor kawng neihchhun pawh ṭah ti chhuak tawk vel a ni, a chhe lutuk!

Lungphunlian kan thlen chuan fehrehsan hun vel a ni. An YMA leh VC-te hnena kan kal hmaa min hruaituten lamkal an tirh avangin kan tukṭhuan ei tur Chaw anlo siam chu kan ei a. Kan eizawhah Lungphunlian awmna lamah kan kal a. Khua aṭangin a awmna a hla lo hle. A panna kawngpuite pawh Sawrkar hian ṭha taka siam awm a ni a! Lung inphunte chu a lian hlawm hle a. Thlate kan la a, nuam kan titlang hlawm hle. Chawhnu lamah chuan Tualcheng panin kan let leh a.

Tualcheng aṭangin Hnahlan kan pan leh a. Kea kan kal chauh deuh avangin a zan chu Programme dang nei lovin kan awl a. Ṭhenkhat chu khaw chhungah an leng a.

Hetia kan zinnaah hian Muantea nen chuan kan inkawp chawt a. Mahse, midang mit kan tihkham kan hlauh avangin an mit tikham tur zawngin kan awm ngai lo.

***

Second term Exam kan neih chuan Mavena chu pakhatna a ni a, Nununi chu pahnihna niin Kei chu pathumna ka ni. Thla tawp apiangin kan test ṭhin. Kan Class-ah chuan a thiam pawl leh a nungchang ṭha pawl ka nih avangin kan zirtirtute duhsakna pawh ka dawng nasa hle.

Nununi chuan XI (Arts)-ah bialpa a nei a, a hming chu Lâna a ni. A sang khawp mai. Nununi chuan chen lo tak a ni, a dar vel a pha ṭawk a. 'Nangni pafa hi!?' kan ti ṭhin. An induhin Lâna chuan a duat hle a. Nununi pawhin a duh hle niin ka hria. School velah chuan an inzui hnak hnak ṭhin a.

Mavena nen chuan tluang takin kan la inngaizawng zel a.

***

Vawikhat chu Holiday a ni a. Mavena chuan State Library-ah min kalpui a. State Library chu Khatla kawn chhak lawk, kawngpui sira awm a ni. State Library ve meuh si, Mizo Lehkhabu a awm ṭha lo hle! Mimal Buiding an luah a. A chhawng hnuai ber chu Nitin Chanchinbu chhiar tur awmna a ni. A chung chu Stack room leh Mizo Lehkhabu bik awmna a ni. A chung lehah chuan State Librarian Office leh Lehkhabu chi hrang hrang hawh tur awmna room a awm. Mavena chu Member a ni a. 'Member ni ve rawh?' min tih avangin Membership Fee leh ka Membership dilna form chu Officer kan Attest tir hnuah kan thehlut a. Tunah chuan keima hmingin Lehkhabu ka hawh ve thei ta.

A vawikhatnan Guiness Book of World Record ka hawh a.

 

 

6

Promotion Exam-ah chuan Pakhatna ka ni a. Mavena chu pahnihna a ni, Nununi chu pathumna a ni a. Krismass leh kumthar chu kan khuaah ka hmang a. Krismass leh kumthar hmang tura ka haw hi 'Kan khuaah lozin ve rawh?' ka tih avangin min zui a. School Session ṭan a hun chuan ka awmna ngai Hostel-ah ka awm leh a. Mavena leh Nununi chu School danga insawn bik lovin Class khatah kan ṭhuho leh dal dal a.

Vawikhat chu Hosteller-chu Biak Inah kan inkhawm a. Nula hmelṭha deuh hian a Testimony a sawi a.

"Ka tleirawl chhuah chuan hmelṭha tak ka ni, luck pawh ka luck; mipa chu ka duh duh a ni mai.

"Ṭumkhat chu ka ṭhinten 'ti ve chhin rawh' an tih avangin Ganja ka zu a. A tirah chuan ka duh lo viau. Mahse, ka han tihchhin takah chuan alo nuam viau a.

"Lehkha lam hi ka ti thei vak lo. Class-XI (Commerce) ka zir laiin ka ṭhiannuin 'Pocket Money awlsam leh hahthlak lova hlawhchhuah dan ka hria a nia' a ti a.

"A vai chuan sawi lo mai ila. Call Girl kan tih ang hi ka ni. Mahse, min siamtu chuan min thlahthlam ngai lova. Hun rei tak ka kalbosan hnuin ka let leh ta a ni.

"Tunah khan i sual a ni thei. Mahse, nangmah siamtu Pathian chuan a ngaidam thei reng che. Inlamleta a hnen lam pan turin a duh a che!" a ti a.

 

 

 

7

Board Exam hmachhawn tur kan nih avangin ka zirlai chu theih ang tawka ngawrhin ka zir a. Nununi nen pawh School-a kan inhmu tihloh chu an inah pawh ka leng ngai meuh lo, Mavena nen pawh. Mahse, inngaizawng ang chu kan ni reng. Mobile Phone ala awm lova, kan inhmuh chu kan inbiak theih hun a ni mai. Bc-i pawh hmun danga insawn lovin ala awm a.

Kumtawp Exam kan zawh hnu chuan School chawlh a rei deuh dawn avangin Hostel aṭang chuan ka inla chhuak a, kan khuaah ka haw a. Hosteller-ho chu kan inngai hle. A bikin Bc-i nen kan inkawp tam avangin kan inngai zual.

Ka haw dawn zan chuan Mavena, Bc-i, Nununite chuan kei chu Nununite inah min thlah a. Ar kan kang a, a nuamin kha hun kha a ngaihawm dawn hle mai.

Hemi ṭum hian ka ṭhiante hriat laiin Mavena chuan inneih puiah min sawm a. Ama dinhmun ka enin fapa mal a ni a, an chhungkaw khawsak danah a ngaihtuahawm lo ka tih avangte, nuamsa lutuk lo mah ila nuam taka ka awm theia ka rin avang te, kan inchhyng dinhmun aṭanga pasal neih chu ka chhungten an remtih mai ka rin avangtein,' XII (Sc) kan passed chuan Palai rawn tir rawh.' ka ti a.

***

Kan result chu a chhuak ta a. First Division-ah ka passed a. Mizo leh Biology-ah Letter Mark ka hmu a. Mavena pawhchu First Division-ah a passed. Nununi chu Distinction-ah a passed a. Physics, Chemistry leh Biology-ah te Letter Marks a hmu. Mavena chuan palai a rawn tirh dawn avangin engkim ka chhungte chu ka hrilhlawk a.

Kan result chhuah aṭanga kar khatnaah chuan Mavena palai hmel kan hmu a. Palaite aṭanga Mavena nu leh pa thu an dawn 'Sawmtei hian pasal nei mah se, College a kal chhunzawm duh chuan a kal chhunzawm thei ang' tih ṭha an ti a, kan inneih hun tur leh man inhlan hun turte an ruatfel a. Pasal ka nei dawn ta a ni.

Ṭhian atan Nununi ka be fel a, ani nen chuan Aizawlah kan bazar a. Mavena chuan ṭhian atan a Cousin Malawma, an venga mi hman a tum.

Kan inneih hun, June thla tir kan thlen chuan Sikulpuikawn Presbyterian Church Biakinah kan inkutsuih a. Ka Hostel awmpuite hnena ka pasal neihnaa lokal vek tura ka sawmna chu an lokal vek thei a, an chungah ka lawm hle a ni. Tlaiah Mo lawmna ruai an siam a.

Thil pakhat, ka sawi hmaih hauh loh chu kan inthuam dan a ni. A Mizo thei ang berin kan inchei. Mahse, Siapsuap chu kan feng lo! Kawrchei hi mawi ka tih loh avangin ka ṭhiannu pakhat Design ka ṭhiannu nen chuan kan ha a, Hmaram kan bih. Mipa lam chuan Kawrchei an ha a, pawndum an veng a. Iptepui an ak bawk. Kan vaiin Inneih orogramme kan hman chhung xawng Pheikhawk lam chi kan bun lo.

***

Ka nau Nunui chu ka bula awm turin ka chah thla a. Kan bul aṭang chuan Class X, Sikulsenah a kal a. Lehkhazir a taimain a lerh lova, ṭhian erawh chu a hunawla kawm ṭhin tura ka tih avangin a kawm ve ṭhin. Ka pasal nu leh pate chuan College kal chhunzawm ka duh leh duh loh min zawt a. Ka duh thu ka hrilh chuan Govt. Pachhunga College chu ka tan kalna a hnaih avangin chutah chuan Muantea nen kan kal a.

***

Kan fa hmasa ber chu Hmeichhia a ni, a hming ka nu kan saktir a. Lalnunfeli a sa. Second Semester, B Sc (Zoology) ka zawh dawnah Mipa kan nei a, Mavena nuin a hming Lalrinfela a sa. Final Semester ka zir laiin Hmeichhia kan nei leh a, a hmingah Mavena chuan Zodinpuii a sa. Fa pathum kan neih hnu chuan fa nei thei tawh lo turin ka insiam a.

Nunui pawh kan bul aṭangin Class X chu First Division-ah a passed a. Home Mission School-ah XI (Arts) leh XII (Arts) a zir. XII (Arts) chu First Division-ah a passed a. Hrangbana College-ah BA (Economics) a zir mek a ni.

Hun kaltawha thil thleng zawng zawng, X ka passed aṭanga XI (Sc) zir tura Aizawla kan chhuk hnua Mavena nena kan intawn dan te, kan inngaihzawn chhunga thuchhia kan nei miah lo te, kan inneihna tura harsatna engmah kan tawk lo te, fa tluang taka kan duh ang zat kan nei thei te, Nunui'n kan bul aṭanga Class X aṭanga College thleng a kal thei te chu 'Pathian malsawmna, a thlawna kan dawn a ni' ka ti lo thei lo.

A reng reng thuah Mavena leh kei chu Khuanu Samsuih ngei chu kan lo ni.

**mm**