Infiamna lamah hian ka ṭhan hi a ṭhut deuh vang nge, theih alawi hi ka nei tlem hle! Mahse, Badminton hi nuam ka tiin, ka naupang deuh lai pawhin keima tawkin ka khel ve nasa thei khawp mai. Hnahlan Community Hall-ahte pawh ka ṭhiante nen kan lo vaw ve zak zak ṭhin tawh a ni.
Tin, Infiamna han ti mai ila, Inelna a ni ber ang chu: Debate leh Quiz tih ang vel, Oral-a tihtur chi hi ka tui khawp mai! Keima tawkah pawh Lawmman ka lo la ve nual tawh a ni. Chung zingah chuan Govt. Hrangbana College, Aizawl, Chanmari, Silver Jubillee lawmna peng pakhat, Inter College Quiz Competition-ah a mimalin lawmman ka lo la tawh. Tin, Entertainment lamah pawh LPS Vision-in Huapzo Program an huaihawt laia khan kan College-a an rawn kal ṭumin ka awm ve hlauh mai a, Participant turin kohchhuah ka han ni kher bawk a; tichuan engengemaw lawmman ka la ve ṭeuh a ni. Hemi avang hian a lawm, min ngamtlaktute leh ka chhungkhat lainaten 'Chhangthawp heh' min tih!
Khawdangah hian Class- X zir dawn aṭangin ka awmhrang ṭan a. Aizawl North High School, Bawngkawn Chhimveng ami neitu Pi Zachhungi leh Pu Lalbiakṭhuamate chuan Miss Zothansangi (Sangtei), D/o K. Lalkhuma kaltlangin a thlawn veka an chawma an enkawl turin min sawm a. Class- X seat Full vek tawh, Pu K. Zaluta of Govt. Mizo HSS Principal-in seat awm lo min siamsak hnuah a thlawna an School-a kal a; Hostel-a a thlawna awm tura sawmtute hnenah chuan Class-X chu ka zirchhuak ve ta a ni. Heta ṭang hian Vengchhung (Bawngkawn leh Bawngkawn Chhimveng) Chanchinbu heng- FINNA leh Chhimveng Kohhran Chanchinbu (ENTU)-ahte Article ka thawh ve ṭhin a. Mahse, ka sawitak ang khan mipui tam zawk chhiar theih tura ka thuziak hmasa ber chu The Aizawl Post-a chhuak, AIDS lampang hawi kha a ni.
