Mumang (Dreams)

Mizote'n Mumang kan tih, English tawnga 'Dreams' tia an vuah hi a changa mihringte min tihlimtu pakhat, a changa min lungngai em em theitu; mahse, a tak hmuhtur awm miah si lo a ni a. A chang phei chuan lawm tih hriat taka muthilh laia min auchhuah tir thintu, lungngaih leh hreawm tawrh vanga min tahchhuah tir thintu a ni bawk. Thenkhat chuan, duhtaka an then takte an hmuh lehna hun pawimawh tak a ni.

Mumang hi kan neih hun a zir hian an thenhrang niawm tak a ni. Mahse, midang ziak ka chhiar hmasak lem loh avangin chutiang chuan ka then tehnuaih dawn lova, mumang chungchanga ka ngaihdan ka ziak mai dawn a ni. Inlarna kan tih nen erawh a inang lo tih hre hmasa thung ila.

Mumang hi mithiamte chuan nausen hian a senlaiin a nei nasa thei hle niin an sawi a. Engtak hmu thin ang maw?

Mumang hi Pathianin mihringte hah taka hna kan thawh hnua kan hahdam hun: kan muthilh laia kan ngaihtuahna kalvel tana thilthlawn min pek a ni. Thenkhat chuan an chhun hnathawh leh chhuahvahna hmuna an hmeltha tihte kha an hmuzui chawk a. Midangin an rilru kap deuhtu Result te an lo hre bawk thin. Mahse, an han harh chiah khan a bo ta vek thin a, thawm ang maiin a thamral leh thin.

Mumang hi thenkhat chuan kan ring thin. Kei ngei pawh ka mumang hi vawihnih a dik chiah chiah a. Mahse, thihna chungchanga Zualko-ah a ni thung. Kan chhungte an lo thi a, zualkovin min rawn kaihthawh hma chiah hian ka mumangah ka lo hmu lawk ve ve a ni. A mak ve khawp mai.

Mumangah hian kei chuan hmuh ka chak em em hi ka hmu ngai lova. Tawngtaina-a ka dilte pawh ka hmu ngai hek lo. Mahse, ka dil loh hian a chang chuan ka hmuh duh tak kha ka hmu nawlh thin.

Ka mumangah achang chuan ka duh em em leh ngainat em em; mahse, min haw em em tute hi ka hmu fo thin a. Chungte nen chuan hlimtakin kan lo awm thin a. Inngeih leh inhmangaih tak angin kan lo awm dun fo thin. A chang erawh chuan, a nihna diktak anga hmuin; nasa takin min tim a, min ngeizia an tilang thin. Mumang theuh theuh hian ka zingtho nunphung hi a khawih danglam dan a dang thei khawp mai.

I mumangah i hmangaih em em nena hlim taka in lendun chuan i harh hunah khan i ngaih a tha veng vengin ka ring a. In lo inhauh leh intihthiam loh chuan i ngaih a tha tehciamin ka ring lo. An lo boral a nih lekphei chuan i mumangah i tap dawn tih a chiang a; i harh hnuah i va hmu emaw; i va be chungin ka ring. Chutiang taka mumang avanga mihring rilru hi nuam leh hreawm thei anih avang hian muttui leh muttui loh te thleng pawhin nghawng a nei thei zu nia!

Thenkhat chuan: Mumang; a chhawnga vawithum ngawt inzawm zata neih hi a tha lo, an ti thin a. Keipawh hetianga mumang chhawng ka neih chang chuan ka intiharh lui a, mumang dang neih tumin ka rilru thil dangah ka pe lui hram hram thin.

Mumang lama thil tha lo hmuh avanga lungphu chawla thita hi an awm ngei ka ring a. Muhlum kan tihte pawh hi mumang lama mual liam; a taka kal zuita an nih ka ring.

Engpawhnise, vawiin Dt. 15th April, 2012 Pathiannni Chawhnu Inkhawm lova ka mutlaia ka duh hnehtheih loh ka mumanga ka hmuh avanga he thu hi rawn ziakta duah ka nih hi! I mumang a zirin nang pawhin Ni i hman nawm phahin i hman nawm loh phah ve fo thinin ka ring. Mumang hi chu ni e, a tak a awm lo tlat hi mihringte kan vanduaina chu a ni teh meuh mai. A takin han thleng se, duhtakte nen hlim takin hun han hmangdun thei ila chuan: hlim taka kan lo awmna mumang kha Mumang duhawm tak a ni tur!

Mumang hlimwm tak neih laia harh hnua tah vak hi a chang chuan a nuam khawp mai!

Zantin atan mumang tha leh nuam, hlimawm bawksi hmu ziah thin turin he thu chhiartute chu ka duhsakna sang ber ka hlan a che u.

4:51 PM 4/15/2012