- Ngurthansangi Pa
A hmasain Pi Nuchhungi Renthlei (L) hlaphuah, Primary School- a kan zir thin hian a thu hi bul ka’n tan ang e:
Ka Nu, ka Nu duhtak mai chu!
- By Nuchhungi Renthlei (L)
1. Ka nausenin tu nge mi kawl?
Ka nu, ka nu duh tak chu!
Tawng thei lovin tu nge mi pawl?
Ka nu, ka nu duh tak chu!
Ka dam lo va, a tlaivar a,
Ka tap a, min lo chawi mu thin.
Hah takin, chak lo chung pawhin,
Ka nu, ka nu duh tak chu!
2. Ka lian deuh deuh tu nge mi zilh?
Ka nu, ka nu duh tak chu!
Thenrual awm dan tu nge mi hrilh?
Ka nu, ka nu duh tak chu!
Ka thu pawi tham lo a ngai zo,
Ka ei tur tumin a awm fo,
Ka sin tur a hmaihthelh ngai lo,
Ka nu, ka nu duh tak chu!
3. A tihzia dawnin mi tinem,
Ka nu, ka nu duh tak chu!
Tihsak ve thung ka va duh em!
Ka nu, ka nu duh tak chu!
Chet danin ka tilawm zel dawn,
Ama thawh phal lovin ka fawm.
Ka nu hi zah ber tur alawm!
Ka nu, ka nu duh tak chu!
Nu dinhmun hi alo hautak dawn hlein ka hre thin. Mizo chhungkuaah Hmeichhiain Pasal a neih hian ama Nu leh Pa te bakah, a unau te leh a thiante zawng zawng a thlahhmak a ngai ang tluk a ni a. Chumai ni lovin, a mutna hmunte a sawn a lo ngai a, a ngainat lohte pawh a ngainat a lo tul ta miau va! Chutah mai pawh la tawk lovin, Fa a neih hmain a han pai te te a, hah takin chaw pawh eitha hleithei lovin leh zanah pawh mu hleithei lovin a awm a. Chumi piah lamah Fa a han hring dawn a, a hrin dawnah na hahthlak tak a tuar leh a. Huiham, Nu te hian kan pianhma hauh pawh hian keimahni vang hian hreawm hi an lo va tuar hnem tak em!
Pasal an neih a zirin an vanduaiin an vannei thei hle awm e. Zuin mi an neih chuan an rethei dawn tih chu tlang hriat! Zuin ngai lem lo; thinchhia leh Nupui kutthlak hmang pasala nei an nihin an chan tur pawh chiang sa a ni! Mizo chhungkaw dinhmunah chuan, 'Chhuak rawh,' tiha chhuak thei reng dinhmun luahtu chu Hmeichhia; Pasal neia midang Ina va lawite hi an ni. Fa an lo neih tawh phei chuan an tan hreawmna hian a kalsan ngai hauh lovang le! Hlim tak leh lawm tak; nuamsa taka pasal fanaute enkawl hi an chak ve thei ngawt ang: hetiang dinhmuna ding thin Nu te hian!
Nu tamtak chuan an Fate an enkawl danah an thiam thin lo tih hi thuchiang a ni. Nu thenkhat chuan, 'Hmangaihna lantirnan' tiin pawisa leh an duhzawng zawng mahni Fate pek an ching a, hei hian chhungkaw tamtak chu a tichhia a, a tichhe mek zel a, ala tihchhiatbelh zel dawn bawk a ni. Nute hian mahni Fate tana thatur thil an hai hauh lovang; mahse, nakina an rawn hanlen huna an chin dawklak tur ang chi thiltha lo lak ata an naupan lai atanga an lo zirtir lawk hi a ngai khawp mai. Nu thenkhat chuan an faten khawlai emaw khawi emaw laia mi thil duhlai an hmuh an lo la a, 'Ka chhar,' an tih a, lawm taka an lo pawmsak fo chuan, nakinah mi thil duhlai; a neitu awm lai ngeia lakte pawh an la ching ang. Nu tamtakte hian mahni fate-ah nundan tha lo leh tihdan tha lo hi an tuh a, keutkem nei tamtak pawh hi anmahni vang a ni thei awm e.
DL Moody-a khan midang Nute khan a Nu kha chhun sela chuan 'Tanin a awm a ngai lovang' a lo ti hial a. A nu khan a enkawl tha a, a hmalam hun a sialsak nasa tih a langchiang reng a ni. I Nu kha DL Moody-a Nu nen han tehkhin teh le?
Nu thenkhat chu anmahni leh anmahni intihreawm chawp an ni. Pasalte zah lo leh chhang zawt zawt thin hi Mizo chhungkua-ah chuan Mipa hian an ngaithei miah lo. Pa berin, 'Tawng tawh suh!' a tih chuan ngawih chuh mai kha a finthlak zawk chang a awm fo. Mahse, chutiang ni lova, a awmnem zawk leh dinhmun hniam zawk anga ngaih annihna hi hmuhthelh a, an hnial ve pang pang hi chuan kut hi an tuar leh lo thei thin lo. Nupui pasal inneihna thutiam chham dawna an chhamte hi an theihnghilh ta remrum thin a nih zawng hi maw!?
Mizo chhungkua-ah chuan Nu hian dinhmun sang tak; rorelna lamah ni lo an chang kan ti thei ang. Inlengte lo kawmhlim te, Pasalte lengchhuak leh kalchhuak lo chiauau te, fate enkawl te, eirawngbawl leh thawmhnaw bakah Inchhung tihfaite hi an hna tlanglawn a ni a. An tihtur awm tak an tih loh hian chhungkaw zahawmna hmel kha a hem ta thin a, chu chuan chhungkua-ah rek a siam a, a tawpah phei chuan chhungkaw kehdarhna a thlen fo.
Hmanni chu City Bus-a ka thutpui hmeichhe pakhat hian, 'Mipa tih ang hi chu Hmeichhiain kan tithei vek,' a ti. Dik ka tih rualin, Mipa tihtheih; tihtheih loh tamtak an nei a ni. Chhungkaw Pa berah tang dawn ta sela? Mipa mawhphurhna leh Hmeichhe mawhphurhna hi a hrang a, in chuh chi a ni lo. Hemi hre lo Nu tamtak chuan an Pasalte lak atangin 'Makchhiat' an tawk fo thin reng a ni.
Engpawhnise, Mizo chhungkua pawh kan changkang chho zel a. Dan hmangin Hmeichhiate tan hamthatna siambelh a ni zel bawk a. Tunah phei chuan Nu te dinhmun pawh sang tak a han ni ta. A pasalin a tihduhdah emaw; kut a thlak fo thin emaw a nih chuan Court-ah a zualko thei a, a Mipa zawk kha a hrem theih ta. Chumai ni lovin, Rokhawm chungchangahte pawh an tan kawl a rawn eng tan chhota a, a lawmawm hle.
Mahni chhungkaw dinhmun thlir ila, midang chhungkaw ziaa a thalai awmte entawnin kan chhungkuaah la lut bawk ila, kan Nu leh Pa te inkara kak awm theite hi kan chhilhbo thei a ni. Kan chhungkaw kehdarh tur pawh tuna Nu leh Pa la ni ve lote hian kan veng ve thei: An inhauh nikhuatea lo khap a, inremtir hram dan ngaihtuahte hi kan tih ve tur a ni.
Mahni hringtunu ngei maiin a thihsan mi tamtak an awm ang; chung mite tan vawiin ni hian thlamuanna ka dilsak a. Mahni hringtunu ten an la dampuite erawh: Mahni Nu te rilru tihlimtu leh thlamuantu ni tura ke penthar turin ka ngen thung a ni e.
Ka Nu, min hringtu ‘Ruthi Ngaihawihchingi Vaiphei’, midangten ‘Ngaii’ emaw, ‘Nu Ngaite’ emaw tia an koh; ka pa'n a koh changa 'My Dear' ti emaw, 'Hmingtea Nu' emaw, 'Matea Nu' emaw tia a koh thin hian tun thlenga min la dampui avangin Pathian hnenah lawmthu ka sawi a. Ka Nu hian ka tan thil tangkai chhiarsen loh min tihsakin min ngaihtuah sak thin. Pi Nuchhungi Hla: 'Ka nu, ka Nu duhtak mai chu!' tih hla khan ka tana a inpekna chu a la sawifiah zo lo zawk mah a ni. Engpawhnise, Vawiin Nute Ni (Mother's Day) puala ka thuziak chu ka duhtawk phawt mai ang e.
2 Comments