Thupek pawm apiang chuan engmah a tuar lo vang a, mifing rilru chuan ningkhawng a hria a ni.
-J. Lianhmingthanga Sailo (Ngurthansangi Pa)
Tunlai khawvel a changkan chhohzel rual hian mihringte pawhin mahni hmakhua kan ngaihtuah sawtin; mahni tanghma kan haithiam ta hle! Hei hian nasa takin kan mimal zalenna neihte hi hmandan tur dik takin min hmantir lo fo thin niin a lang. Chu chuan kan tawrh loh tur kha min tawrhtir ta fo va; harsatna leh manganna tawk miah lo tur khan thupek kan pawisak loh miau avangin kan phurhzawh loh nghawngkawl keimahni kan inbah chawptir thin a lo nireng mai!
Pathian Lehkhabu Thianghlimah chuan, 'Mi tin an chunga roreltute thu thuin awm rawh se. Roreltute hi Pathian ruat an ni’ tih inziak kan hmu a. Roreltu chu a fing emaw, a a deuh emaw pawh nise, Pathian ruata kan pawm ngam a ngai a. Roreltute thu thua awm tur a ni. Chu roreltu chuan a rorelna hnuaia mite kan inantlan theih nan zawm harsa lo tak Dan leh Hrai an siam thin. Chu Dan leh Hrai chu mihringten kan chunga roreltu kan hmuhtheih; kan aiawha kan thlante mai bakah Pathian pawhin kan zawm tura a duan a lo ni! Hetianga Dan leh Hrai siamte hi a zawm thei lo mihring chu khawtlang mithmuhah leh ram mithmuhah 'misual' a ni mai thin. Chu chuan a lakah hremna a lekkhawh tir thin.
Diktak chuan, Khawtlang leh ramin 'misual’' nia kan ngaih leh sawi thinte hi anmahni ngau ngau chuan an sual kher lo. Mahse, anmahni thununna tura Dan siamsa kha an zawm theih miau loh avangin midang ngaihah 'sual' nihna an hlawh thin. ‘Engvanga midangte mithmuha misual nih hlawh nge kan nih?' tih hi thenkhat tan chuan inenfiah a va ngai tak em!
Bible changthlana ka ziahlan ang khian Thupek zawmtu apiang chu engmah tuar tur a ni lo tih a chiang viau a ni.
Khawvel hi mihringte tan; Pathianin kan khawsak a, kan lo thanlen a, midangte nena inngeihtlang taka kan khawsak a, kan thih hnua a lam pana kan haw lehna hmun atan min siamsak a. Chutih rualin he hmunah hian thawkrimte tan lo chuan nuamtaka khawsak a theih loh tur zia pawh Genesis-ah Adama leh Evi-te nupa thiltihsual a zarah kan hmu nghe nghe. Chu chu hre peih lovin mi thahnemtak chuan a nuam thei ang leh awlsam thei ang bera khawsak an tum thin a. Midangte tana hnawksak nih phahin; Dan pawnah an che fo thin. Mahse, hetianga an nawmchen theih chhung hian nirei a daih loh avangin a aia na zawkin an tuarlet leh fo. Chu chu Leilung Dan a ni tlat.
Kohhran hian Pathian kaltlangin Pathian thikthu chhiatna a Kohhran mi leh sa te hnenah A lantir thin tih kan hria. Hengte hi a chhan chu, awlsam taka kan zawmtheih Dan kha kan bawhpelh thin vang a lo ni! Thuawihna rah hi a tha a, tawrhna a awm lohzia lantir nan leh, he khawvelah hian lo tuarphah pawh nise; nakina Vana lawmman kan la hmuhturzia amah ngei Mihring (Isua)-a rawn changin khawvelah A rawn kal a nih kha.
Pathianin ningkhawng hre tura a siam mihringte hi fing inti viau si hian, kan lo a ru hle a lo ni mai lo maw? Pathian chuan mifingin ningkhawng a hriat thu a sawi si a! Khawtlanga roreltute Dan siam hi kan zavai tana that tlan zawk nana tih a ni thin. Pathianin thu a pekte pawh a siam mihringte tana malsawmna hnar tur a ni thin. Chuvangin, kan chunga roreltute hi mihring ve bawk an ni emaw, Pathian A ni emaw; an thuawih hi tuar lohna a lo ni.
'Tuarna pawh ka tan hlawkna' ti thei mihring ni turin tun atang hian Kohhran mipuite i insiamthar ang u. Thupek chu kan zawm lohva, kan bawhchhiat si chuan kan tuar dawn si a! Lalpa'n a thu malsawm rawh se. Amen +
0 Comments