Selam khua- ah i kal tawh em?

Selam khua hi Mizorama Tlangsang hmingthang zinga chhiartel Lengteng Tlangdunga awm a ni a. Ngopa leh Kawlbem te, Vaikhawtlang leh Lungphunlian bakah, Tualcheng te nen a inṭhenawm. Helai khua ah hian Vaiphei leh Paihte an ṭhahnem hle a. Manipur buai avang khan raltlan engemawzat luh belhin tunah phei chuan In 300 khua laia chhiartheih a ni tawh. A awmna hmun hi a rem lem lo hle. Awihpangah a inchhep thla ti mai ila, hmun ṭhenkhat lai chu han zawl ṭha ve deuh awm mahse, khaw hmun nuam ve tak a ni. He khua hi ka Nu te khua a ni.

Selam khua hi tunhma deuh aṭang tawh khan Hnahlan nen hian Assembly Constituency pakhat hnuaiah a awm ṭhin a. Tuna Champhai North Assembly Constituency a a awm hma hian Ngopa Constituency-ah a awm ṭhin. A khuaah hian Zirna In tlem a awm a. Chungte chu: Govt. Primary School leh Govt. Middle School te a ni. High School hi mi ṭhahnemngai ten an din a. Kum engemawchen hnuah Mizoram Sawrkar hian a Grand-in-Aid ve ta nitur a ni, tunah hian ka Nu te unau zinga a naupang ber LB. Sanga pawh Zirtirtu niin a thawk mek.

Selam khuaah hian Sub- Centre a awm a. Tunhma chuan a thawktute awmna hmun pawh a lun ve thei hle. Mahse, tunhnai lawkah khan thawktute awmna tur Quarters sak ṭhat a ni a, mahse; bungrua a la thleng lo tluk a ni. Thawktu hi a tamberah 2 dah an ni ṭhin. An ni hian khawdang aṭanga damlo pawh an lo buaipui ve fo ṭhin. He Sub Centre hi tuna an Field laihthar sir chiahah hian a awm.

Selam hi a tlangram angreng viau na a, tui an lakna a ṭhat avangin tui lamah erawh chuan an hnianghnar viau thung a. Tlanga Tanky aṭangin tui an semdarh a. Chu chu zingkarah an hawtir a, chu chu khaw mipuiten an chawi ṭhin. Tin, tuikhur a awm nual bawk.

Field (A sira Tile bang In var saw Sub-Centre)

Selam hi a boruak a dangdai angreng hle a. Thlasikah chuan a vawt ve thei hle. Nipuiah pawh a lum. Tunhma deuh kha chuan Electrict eng la awm hek lo, Solar Plate-te Sawrkarin a pe a. Chung hralh lova, mahni chhungkaw tana hmangte erawh chuan an vanneihpui viau thung. Tun hnua Mobile Phone a lar hnuah phei chuan Solar chu an hman nasat ber a lo nita hial mai! Kawngpui ṭhain a paltlang loh khua anih avangin Dawr mamawh leh Damdawi mamawh angte puakphur hmangin khawdang atangin an lalut ṭhin a. chuvang chuan he khua-ah hian thilman hi Mizoram hmundang nena tehkhinin a sang fal hle.

Dak pu a awm a, hei hi an chhawr ṭangkai hle. Tin, Library pahnih- Adult Education Wing leh YMA ta a awm bawk. Kohhran hi a awm kim ve ang reng a. A mi ṭhahnem ber chu Presbyterian an ni. UPC of Mizoram an awm a. Isua Krista Kohhran (Ori) an awm bawk. Seventh Day hi 2000 velah khan an awm ve ṭan a. ZBC leh AG te hi 2005 velah an awm ṭan niin ka hria. ( Kohhran dang pawh an awm mai thei. Tin, an awmtan hun hi ka ziaksual thei bawk a, a dik loh chuan a dikzawk min hrilhhre turin chhiartute ka ngen a che u.)

Tunhma deuh aṭang hian a khaw hmun hi ramngaw a ṭhat avang leh ramsa awm tamna hmun  anih avangin Forest Department chuan Sanctuary-ah a puanhnan hmiah mai a. Hemi hnu hian khaw mipuite chu khawdanga sawnchhuah tumin an bei ṭan ta. An sawirik ka hriat dan chuan Chhungkaw khat zelin nuaih 10 an dawng dawn tih a ni. Mahse, hemi chungchang hi tunah hian engchen nge hmalak a nih tawh tuman an sawi thei rih lo thung. Tunah phei chuan Electric Wiring In tin deuhthaw-ah an ti tawh a. Current a lut ve dawn ta. Kawngpui pawh PMGSRY hmangin Tualcheng atangin Truck Road a tlang tawh bawk.

Ka Nu te khua, ka Nu pa lu-nghahna hmun he khua- Selam khua hi ka tan chuan 'ka khua' tia ka chhiar ve tur a ni. vawi engemawzat ka tette atanga vawiin ni thlengin ka kal tawh a. Ka kal tam zawk tum hi Ke-in a ni. Selam atang hian Khuangte te, Uite te Hnahlan ah ka hawn tawh nghe nghe.

Ka pu Gena te In aṭanga thlanglam lan dan

Tunhma deuh chuan ka nute unau zinga upa ber V. Thangzagena S/o V. Nengzaena (L) hian Damdawi Dawr a siam ṭhin a. Kan zin chang hian chu Dawr chu ka nghak chawt ṭhin. Kuhva te an zuar tel ṭhin a. Selamah hian ka kut zungchal veilam hmawr hi kuhva ro kawr ka thel dawn tumin ka chep thla hlawk nghe nghe.

Selam khua-ah hian Vaikhawtlang aṭangin Tuisa kanin ke ngatin ka thleng tawh a. Km 25 vel bawr a ni. V shape ang deuh hian kan kal. Ngopa aṭangin V shape ang deuh bawkin ke in ka kal tawh bawk a. Hnahlan aṭangin Lungphunlian paltlangin W shape angin ka kal fo tawh a. Hnahlan aṭangin Tualcheng paltlangin Bike-in vawikhat ka kal tawh a. Hemi tum hian tuna kawngpui hi an lai mek a. A la tlang chiah lova. Kawng a chhe si, a nal bawk si. Kan tlu zing khawp mai. A chang chuan tuihawk luankawrah an tlulut a. Chuti khawpa kawng hreawm a nihlaite chuan ka kal ve tawh a lo ni! Pickup hmangin Hnahlan-Selam ka kal a, Gypsy Hardtop Savawm bawma mu-in Selam-Hnahlan ka thleng zak tawh bawk.

Presbyterian Church Biak In hlui

Biak In thar: 26.04.2026

Selamah hian Aidu-sen-til a tam khawp mai. Vawikhat pawh kan ramvah ṭumin kan hawn ṭeuh nghe nghe. Selam rama luiah hian Chakai a tam bawk, vawikhat pawh ka nute unau zinga hmeichhe lama a naupang ber V. Lalsangpuii (W/o Zoduha, Lily veng, Chaltlang) pasal, ka pate Zoduha te nen, ka nu u Liani of Ngopa pasal te nen Chakai kan khawrh tawh nghe nghe.

Tawngtaina In

Selam hi lui pahnih Dimphai leh Tuisa inkarah a awm.

2020: Tunah chuan Electrict Current a lut tawh a. Cable Television hi a khua amiten Dish TV leh Antenna hmanga an man Channel an pe chhuak. Concrete Building a awm tawh. Champhai - Selam Sumo Service a awm tawh bawk. Truckabled Road laih mek a ni.

Dt. 05.01.2026