Human Trafficking kan tih chuan 'mihring taksa hmanga sum leh pai a lakluh theihna kawng tinrenga lakluh' tihna a ni thei ang.
Human Trafficking Movie ka en atangin Human Trafficking chungchangah hian ka ngaihtuahna hmangthiam ve tan ta. Human Trafficking i la en lo a nih chuan lo en ve la, an Traffick te chan ang kha i chan tur emaw, i unau leh i laichin, i thisen zawmpuite chunga thlengtur ni ta se i duh bik ang em?
Human Trafficking hi tunah chuan Mizoram ah ngeipawh a mikhual tawh lo tih kan hria. Chutih rualin tunai hian ala nasa telh telh dawn tih ka sawilawk ngam. Hemi avang hian Mizo Mipuite hi Human Trafficking lamah hian kan thanharh a, kan ngaihtuahna kan sen a ngai takmeuh a ni.
Tunhma chuan khawvela thilsual liantham nia ngaih chu Drugs hralhruk leh ralthuam tawlhruk a ni a. Mahse, tunah chuan Human Trafficking hi sumdawnna hlawkber a nichho tan ta mek. Heihian Mizo te helam kawngah hian min tiharh thar se ka ti takzet a ni.
He Film, Human Trafficking ah hian an Traffick thenkhat chu anmahni hringtu nu leh pa ten an phalna ang ngeia an hralh an ni a. Thenkhat chu rukbo niin, a dang chu sumdawnna leh thildangte hmanga thlemchhuah an ni. Mizovin kan hriatlar Spa leh Beauty Parlour vela thawkthei tura Interview te huaihawtin, miin an rinhlelh loh nan a tak ang thei ang berin engkim an ti a. Mahse, an sahimna chinah chuan pawisak an nei tawh lo.
Human Trafficking hi sual lianber zinga a tlar hmasa pawla thu turah ka ngai. Mihring taksa, a neitu phalna ni hauhlova engemaw avanga neihsak/ chhuhsak ang chi a tih hi Pathianin Mihringte min siamdan pawh a ni lo hrim hrim. He thil hi a rapthlak a, tuna ka Blog tlawhtute zingah hian Human Trafficking lama inhnamhnawih in lo awm a nih chuan nangmahni thisen zawmpui ngei tuemaw ber kha Traffick in awm ve rawh se' ka ti hial teh ang. Mihring dikna chanvo puitling hi Pathianin mitinte chan atan a dah avangin chu chu mitinin kan chang vek tur a ni dawn lawm ni?
Mizote zingah pawh sawirik a nih tak fovah chuan, nakina la hluar tial tial tur a nih bawk si ah, hetiang kawng hian i laichin leh unau, nangmah ngei pawh Traffick i nih loh nan hetiang kawng hian hma ila dawn ang u hmiang?
a. Dan leh thupek kengkawhtute tanpui that:
Human Trafficking chungchangah hei hi thil pawimawh tawpkhawk niin ka ngai. Dan leh thupek kengkawhtuten dan leh thupek awmsa an bawhchhiat lohva, a bawhchhe tute an hrem ngam a nih chuan a tluka hlu a awm lo. Chuvang chuan, he Human Trafficking lama inhnamhnawih, sualna neite hi kan hria a nih chuan a chiangthei ang berin Dan leh thupek kengkawhtute i hrilh ngam ang u. 'Mi hektu dinhmuna dinna a ni lova, kan mihring puite lakah kan tihtur diktak kan ti niah i ngai ang u'.
b. Phailam leh khawdanga thiltih chak nazawng tia kal leh hnathawk tura chhuah loh tur:
Nia, kan Mizo Nula thenkhat chu Hotel leh Spa ilo vela thawhna tur zawnsak theia insawi hi an awm tawh thin a. Mahse, chung chu a tamzawk hi tunah hian he Human Trafficking lamah hian an hmingchhe tan mek a, an la hmingchhe chho zel bawk ang. Hetianga hmun danga kal leh awm turte chuan mahni awmna tur leh kalna tur hmunte ngaihven chian hmasak a thain a pawimawh tawh takzet a ni. Hetianga tih nachang hre lo Mizo Nula thahnem takin humsual an lo dai tawh a. A zankhatna intihhlum duh hial khawpa hmang pawh an awm nual tawh ka ring. Mihring dikna chanvo intihchhiatsak zawnga khawsak hi keini Mizo hnam, mi tlemte zingah tunah pawh a darh nasat tawh em avang hian mahni thisen zawmpuite pawh rinngam loh hun kan la nei ta hial ve ang! Chuvangin, humsual i dai lohnan khawngaih takin i zuan hmain i tlakna tur en hmasa thin ang che.
c. Human Trafficking that lohzia inzirtir uar:
Hei hi thiltul leh tihmakmawh a ni. Mizoramah pawh International Levela Day leh engengemaw huaihawt kan nei ta zeuh zeuh va. Tun aia nasa leh ngun, khunkhan zawk hian Mizoram Zirna In tinah te, Mahni Inchhungkhurah te, Kohhran leh Khawtlang ah te pawh kan inzirtir thar fo a tul takzet a ni.
Human Trafficking hi a tenawm a. A tihbaiawm bawk. Awlsam tea AIDS leh HIV+ kai theihna a ni a. Kumtling lo Serh leh Sang thuhla-a inkhawihchhiatna hmanraw pawimawh leh rapthlak tak a nih avangin keini Pathian nung betute chuan hethil kaihhnawih ang chi reng reng hi i hnualsuat ngam ang u. Pathianin a duhtaka a siamte theuh kan ni si a.
Hun dangah a kip-a kawiin Human Trafficking chungchang hi ka la rawnziak tha leh ang. A tul chuan mahni thiam ang angin Wikipedia-a inziak te pawh kan letling mai ta lawng! Englekhawle, Human Trafficking (Mihring hmanga sumdawnna) chungchangah i ngaihtuahna i lo sen ve ka beisei a. Chu chuan Mizote leh Mizoram mipuite tan hamthatna engemawtal thlen ngei se tih hi a ziaktuin ka duhdan leh ziahchhan a ni e.
0 Comments