Hnahlan Welfare Committee (HWC)- ah hian kum 2008 chho vel atang khan ka inhmang ve tan ti ila ka sawisual vak lovang. A hminga thiante leh zirlaipuite duhsakna a zarah General Headquarters thutchilha Lehkha zir ve manah te pawh a niang, OB zingah min thlangtling ve a. HWC Committee Member zinga Ex- Officio Member ah Hnahlan Student's Union (HSU) General Headquarters OB zinga President leh General Secretary (GS) te chu an awm tel avangin kei pawh hemi kum hian GS ka nih avangin HWC Committee Member ah ka tel ve a ni.
Hemi kum hian Agriculture Department Conference Hall-ah HWC hruaitu turte thlanna hun kan hmang a. Tin, inhmelhriat tirna te pawh kan nei bawk a. Ka vawikhat telna a ni a, ka zak ve deuh dawn dawn a. Mahse, pu te ho an lo awm nual a, hlim tak chuan ka tlingtla ve a. A nuam hle mai.
Tichuan, hunte a lokal chho zel a. Kum dang a lo inherchhuak a, a hmingin GS ah bawk min thlang leh a. Tichuan, HWC ah mikhual lo takin ka tel chho ve ta a. Committee na- ah te pawh ka tel ve ta zauh zauh va. Vawikhat pawh Zarkawta Pu ? te Inah Committee kan nei a. Tlaiah chawhlui kan kil ho nghal a, a nuam khawp mai.
HWC a ka tel chhung hian HWC hmingin thiltih pakhat ka nei ve tawh a. Chu chu Hnahlan khawchhuak Aizawl leh hmun hrang hranga awmte awlsam zawka kan inbiakpawh zung zung theihna tura Telephone Directory siamna tur leh Welfare Fund khawnna tur List siam a ni.
HWC hi HSU aiin kumkhatin a upa a. Cuvang chuan HSU lakah hian u chan a changthiam hle. Hruaitute pawh an felin an tha tlang a, a nau zawk HSU hi a dawmthiam hlein ka hria. Tunhma pawhin HSU hian a pawisa leh a neih angte a lo hmansak fo tawh thin a. A chang chuan HSU hian a rulhtheih lo leh zauh thin nain, chungte pawh a chang chuan a ngaidam fo thin.
Tin, HWC hian HSU hi a hmang tangkai ve viau tawh thin a. HWC hminga Pawisa khawn leh thil han puanzarna kawngahte a hmang tangkai thei hle. HSU peng pawimawh ber Hnahlan Entu pawh Sum elh paiin vawitam a lo pui tawh thin bawk a. Hetianga u fel leh tha, naute ngaihsakna chang hria kan nei hi HSU chuan kan chhuang takzet a, he ka Article kaltlang hian lawmthu ka sawi mawlh mawlh bawk a ni.
HWC hian a huam zau hlein ka hria. Tin, hna pawh a thawk nasa tawh hle. Chhiatni Thatni-ah nise HSU tel lo pawhin amahin vawitam Hnahlan khawtlang tan hna a lo thawktawh thin a. A theihna ang angah Hnahlan khaw mi leh sa te tan a tha leh tui a lo hmang tawh thin a ni. Vawitam Hnahlan khawtlang thatna leh hmasan theihna turin Sawrkar lama kan hotute a lo be tawh thin a. A zarah Hnahlan pawhin kawng tamtakin hmasawnna pawh kan hmu reng a ni.
HWC hmalakna avangin tum hnih (ka hriat theih chinah) Hnahlan khaw mi leh sa te tan Picnic/ inhmuhkhawm a huaihawt tawh a. A hmasa zawk chu hman deuh lawka kangchhia Multipurpose Building- ah khan huaihawt a ni. Chumi tum chuan tlaiah ruaite kan theh a, a nuamin kan awmdan vel te pawh ka mitthla- ah a la chamreng mai. Chumi tum chuan Pu B. Lalthlengliana @ Thangkura te pawh an che nasa hle a. A hlimawm takzet a ni. A vawihnihna erawh Sihhmui lamah a ni a, mahse hemi tum hian ka kal ve ta lo.
HWC hi Hnahlan khawtlang tana peng pawimawh tak pakhat, a tul huna HSU, a tul huna YMA ni thin a ni a. A theih angin Hnahlan khua leh tui tanpui ngaite tana tanpuitu Samari mitha a ni thin.
1 Comments