Monday, June 8, 2015

Ka Accident

7th May, 2015 Pathianni Zan Zanin chu ka accident hlauh mai. Keimahin inah ka awm a. Midang an inkhawm vek a. Kan zawhte hian Uchang a man a, sehhlum mai lovin a chhaih phawt a. Nidang a Sazu man a tihchhuah anga a tihchhuah leh ka hlau a, tihhlumsak ka tum a. Tiang hmangin ka hawlh a. Chutihlai chuan a rawn sawt thut mai a. Uchang chuan min rawn zuanfuh dawn emaw ka tia, ka hlau ltk chu ka TLU SUAL ta a. Ka ke chhelam chu a kheimit bawrah hian ka tipelh a. Na ka tihzia chu. Tumah dang an awmlo nen, ka mangang asin aw!! Chumi hma chuan Film, a pekchhuahna lama volume an tihzawih vangin ring deuhva ka en chu a tawp a, a dang an rawn pek leh chuan a thawm a ringthut thei si a, tihzawih ka duh si. Ka Tv enna hmun, ka thutna leh ka tluksualna inkar hi 10 mtrs vel a ni ang, phone lah ka Tv enna ah chuan ka dah si. A na ti chung chung chuan min tanpuitu tur ph ka duh avangin ka tluksualna atanga ka Tv enna chu bawkvakin ka pan ta a. Ka thleng a, kan thenawma mi te ka va ph a. Mahse, an lo inkhawm si. Ka nu inkhawm kalpui chu Sms ka thawn a, ka missed call bawk a. Mahse, awmzia a awmlo. Ka chetsual atanga Darkar khat hnuah ka chhungte inkhawm an rawn bang ta. Ka pa a lo haw hmasa ber a. Ka chanchin ka lo hrilh a. Ka ke a han en chu 'a pelh a nih hi' a ti ta mai. A na em em a, a vungbur bawk si. Chumi hnuah ka nu a lo haw leh a, ka pa chu mi zut thiam ko turin a chhuak ta a. Nupui ka neih a Best a ka hman Mother a rawn hruai a. A ni chuan min hmet ta a. A VA NA TEHLUL EM!! A hmet ri deuh rawp rawp a, a ziaawm ta deuh. Tuivawtin a han hmet zui a. Aspirin leh Diclowin ka eibawk a. Chumi hnuah chuan mi min pek puan in ka ke chu a tuam leh a. A ziaawm ta deuh. Mahse, ka ke dinglam chuan chhuat ka rap ngam hrihlo. Ui.. Ka pian a hnua ruh pelh a ka awm vawikhatna a ni a, a va na tehlul em!! Tichuan, ka ke a damdeuh tawh hnu chuan kan inlengte bula ka chetsual chhan report te ka pek zawh hnuah, ka khumah ka mu ta a ni.

Monday, November 19, 2012

KA DAMLO!

16th Dec, 2012 atang khan ka damlo tan a. Thluak TB ka ni. 15th March, 2013 atangin ka ke leh kut, dinglam ve ve a che theilo. Tunthlengin engmah titheilovin Hnahlanah ka la awm.

Friday, November 16, 2012

Mizoram under CCTNS Project


CCTNS (Crime and Criminal Tracking Network and Systems) hi India ram pumpuia Police Station puitling chinte Internet kaltlanga an inthlunzawm vekna tur Software hming a ni. He Software hmang hian Police Station zawng zawng chu inthlunzawmin, General Diary atanga Final Form thlengin Police te chuan Paper Work tel lovin Data Entry hna an thawk tawh dawn a ni.

He Software hi Wipro Company siam a ni a, Java Language hmanga ziah niin, MySQL Server a hmang. Tin, Linux OS ah run a ni ang a, OpenOffice.org Software chu Microsoft Office aia hman a ni bawk ang.

He CCTNS hi Mission Mode Projects (MMPs) 27 zinga Pakhat niin, State Sector a awm a ni. Mizoram hi India ramchhunga State awm zingah a hmang hmasa ber tur kan ni a. Tunah hian Mizoram Police (MRP) zawng zawng chu he CCTNS atan hian Training pek mek an ni.

He CCTNS Training hi Batch hrang hranga then niin, SCRB chuan Routine a siamfel vek a. Batch pakhat hian Ni 15 chhung zel an zir a ni.

He an Trainingah hian CCTNS Software hman dan bakah, Computer chungchang te, ICT pawimawhna te, Paper Work aia 'e'-work thatna te bakah, OpenOffice.org Software hmandante an zir a ni. Training pek lehchhawn dante bakah, Networking lampang pawh zirtir an ni a. An Training chhung hian Test Conduct thin a ni bawk.

Tunah hian Champhai District ah chuan 5th Batch ten Training nei mekin, 22nd Nov, 2012 ah an zo vang.

Kei hi System Integrator Rolta Company ten Local Partner atana remna an ziahpui ACCENT hnuaia Trainer niin, Champhai District bika Trainer tura Contract a lak ka ni. Keimah ang hi Aizawlah 3 leh, District dangah 1 theuh an awm ve bawk.

He Training ah hian Champhai District SP Pu Brajesh Kumar Sing te, SDPO Pi Vanlalzawni te, DSP Pu Zothlamuana te bakah, SI te, ASI te leh, COnstable engemawzat an tel tawh a, engemawzat dang an la Training leh dawn a ni. He Training kan pek hian Nakum August thla thleng a awh ang.

He Training bakah hian Data Digitization chu tan mek a ni bawk a. Hemi hnuaih hian FIR leh Police Case zawng zawng chu 'e'-Forms a dahvek tur a ni bawk.

He CCTNS Project hi a taka hman anih hunah chuan India khua leh tui tupawhin Internet hmangin Complaints leh FIRs a thehlut thei tawh dawn a ni. Chubakah, khawii Police Station a Case reng reng NCRB chuan an lo en thei vek tawh dawn a. Police te tan pawh Case pending rei lutuk ang chi a ngamawm tawh dawn lo. Mipuiin Police te hnen atangin kan mamawh angte awlsam zawkin kan dawng zung znug tawh dawn a ni. A thatna ber tur chu India ram chhunga misualte leh an thiltihsual zawng zawng record khawi hmun atang pawha hmuh leh en theiha a awm tur chu a ni.

Tuesday, October 16, 2012

Champhai North Presbytery Inkhawmpui Vawi- 7 na Report

Khaile, Champhai North Presbytery Inkhawmpui Vawi- 7 na chu Hnahlan Presbyterian Kohhranah hlim tak leh kham lo takin hmanzawh a ni ta. He Presbytery huamchhunga Kohhran mipuite Inkhawmpuina a kal an thahnem hle. Kei ngei pawh Chmaphaiah hnathawkin awm mah ila, mahni khuaah chuan tangkaina ka neih ve ringin ka haw phei ve a. Ka awmchhunga he Presbytery hman anih dan tlangpui rawn ziak ila a tha awm e.



Champhai North Presbytery huamchhung:
Pastor Bial panga: Zote, Kahrawt, Vengthlang, Bethel leh Hnahlan te a awm.

Mikhual kaldan tlangpui:
A then chu langa rawn kal; tlai lamah emaw, zan lama haw leh ta an awm nawk a. Lang hrim hrim hi mi 1000 vel an niin ka hria (Inrinni - Pathianni). Riaklut hi mi 1200 vel an ni bawk.
Zaipawl
Inkhawm kaldan:
A tlangpui thuin mi 1200 vel inkhawm ang kan ni a. Thawhlawm hi Rs. 18000 chuang a ni deuh ziah.

Mi langsarte:
He Inkhawmpuiah hian Moderator chu Hnahlan Kohhran Upa; Upa Lalbiakliana a ni. Sakrament thehtu hi Pastor Rammawipuia, Kahrawt Bialtu Pastor a ni. Upa thar pathum: Tualcheng Kohhran atangin nemngheh an ni bawk.

With Tlankima and Zirtea at Our House
Keimah:
Min duhsaktute zarah Usher- ah ka va tang ve a. Hnahlan ka thlen zan atanga Duty ve nghalin, a tiakzan thleng ka va inhmang ve a ni. A bik takin Pathianni chawhma Inkhawm ban a Thingpui semtu pawla min pawhpenna- ah ka hah ve roh khawp mai! Ni a sa bawk si, thingpui ka'n semkual a, kan tlan kawi zar zar chu hahthlak ve duhtak a ni! Mahse, a nuam a, a hlimawm khawp mai.

Keimahni:
Kan Inah hian Vapar Kohhran atang leh Vengthlang Kohhran atangin Rorel Palai pakhat ve ve kan thleng a. Hmunhmeltha Kohhran atangin mi 3 kan thleng bawk. Ka nau thiante 3 an rawn thleng bawk a. Anni bakah hian langa rawn thleng hi 30+ an awm bawk. Heihi a chhan chu: Kohhran Upa thi tate sunna hun (Tuemawni chuan 'Vuina Hun' a ti! Hehe!!) hman anih dawn avanga rawn kal an awm nual vang a ni.

Kan Mikhualte:
Kan mikhualte an fel hlawmin an taima a, zakthei lo an awm lova, a tul tul an thawk a, an fakawm ka ti khawp mai. Mikhual rawn riaklut zingah hmeichhia pakhat chiah kan thleng.

Inkhawmpui boruak:
Grape khawpuia Inkhawmpui thleng mah ni ila, tumah rui leh buaina siam hmuh tur an awm lova, a lawmawm takzet a ni. Chutih rualin Electrict lamah kan hnianghnar lem lo erawh a pawi. Sound lam pangah buaina tenau deuh a awm leh thin erawh a pawi ka ti bawk. Pathian biak Inkhawm pangngai a nuam a, zai a nuamin lamtual a tawt thei khawp mai. Inkhawm bana Programme dang awm thinah erawh kal kan thahnem ngai lo hle. Inkhawmpui tan anih dawn atangin ruah a sur nasa hle a. Mahse, mipui puala hun hman anih hnuah erawh vawi hnih vel chiah ruah rei lo te te a sur thung.

Zaipawl:
He Inkhawmpuiah hian Zaipawl engemawzat an zai a. A then chu Sound Track tel miah lovin an zai a, an fakawm khawp mai. Inkhawm tan zanah Hnahlan Kohhran Zaipawl zaiin, Sakrament theh hunah tuna ka awmna hmun: Bethel Kohhran Zaipawlte an zai thung. Upa thitate Sunna hunah Vengthlang Kohhran Zaipawl an zai bawk.

Hnahlan Vengthlang Kohhran:
Hnahlan Kohhranin he Presbytery hi thleng mahse, Hnahlan Vengthlang Kohhran chu inlahrang bik lovin an theihna ang angah an chhak lam Kohhran tan an rawn inhmang in, an rawn inpe a, a lawmawm hle.

Nakum Presbytery thlenna tur:
Tlangsam Kohhran chuan Champhai North Presbytery Inkhawmpui Vawi- 8 na chu an thleng dawn a, a hun hi October thla chhung tho a ni dawn a ni.

Returning Home:
Champhai lamah hnathawh ka neih avangin Thawhtanni zingkar; dar 6:00 ah Govt. Champhai College Principal Motorin Champhai lam panin ka let leh ta a ni.

Thubelh:
He Inkhawmpui atan hian Hnahlan Kohhran chu nasa takin kan inbuatsaih a. Mikhual pawh 20 chuang thleng thei turin kan inruahman hlawm. Mahse, riak lut awm mumal lova let leh an thathnem avangin kan inpuahchah ang hu erawh chuan mikhual rawnkal an thahnem lo hle. He Inkhawmpuiah hian kan unau thumin kan Usher vek a, chuvang chuan Selam lam atangin kan Unaunu pakhat kan chah phei a, azarah kan mawi phah hle. A hminga Dawr chhete kan siamve avangin kan chhungte an tul khawp mai!

Thursday, October 4, 2012

Champhai North Presbytery Inkhawmpui vawi- 7 na!

Champhai North Presbytery Inkhawmpui vawi- 7 na Hnahlan khuain a thlen tur hi tisa leh thlarau lama hlawkna engemawtak i neih ve theih nan rawn chhim ve ta che?

Hnahlan chu khawiahnge?
Mizoram chhung kilkhawr ber berah pawh Hnahlan khaw hming hre lo hi an tlem tawh viauvin ka ring; a chhan chu: Grape chinna hmunpui leh, hemi khua leh a chhehvela Grape chingtute avanga Mizoram Legislative Assembly in MLTP Acts pawh an Adment hial phahna kha a nih vang a ni. Geographically chuan: 23' 41' 0' North, 93' 23' 0' East a ni a. Mizoram leh Myanmar (Burma) inrinna bula awm (Boundary Village) a ni. A chhehvelah hian Tualcheng te, NE Diltlang te, Vapar te, Lungphunlian te, Khuangphah te an awm. Tlema hla hretah Selam te, Vaikhawtlang te, Rabung te a awm bawk. Burma lampangah chuan Darkhai leh Bapui an awm.

Kalkawng:

Hnahlan khua hi CHK (Champhai - Hnahlan - Khuangphah) BRTF Road chuan a tantlang a. Tunhmaa kawng pawh awm mumal lohna hmun; Jeep leh Jonga bakah, Jeepsy te hmanga mi thahnemtakin an nunna hlutak an chan tawhna kawngpui chu TRUCK kal theihin Metalled a ni ta hial mai! Hemi bakah hian, Mizorama Helicopter rawn Service tirtute leh thuneitute i biakthiam chuan Helicopter tumhmun tha tak leh rinawm tak a awm bawk. I duh chuan Helipcopter hmang pawhin he Presbytery hun hi i rawn chhim ve thei dawn tihna a nih chu!

Khawchhung awmdan tlangpui:

Hnahlan khuaah hian veng hrang hrang panga (6): Mualveng, Damveng, Tlangnuam, Ramthar leh Vengthlang bakah, Darnam a awm. Tin, kawngpui a rawn luh dawna kawngpuii a rawn sutchhiatsak In neitute tan Tlangram hmun chu theh niin, hengah hian chhungkaw engemzawzat an awm a. Heng mite awmna hi Electrict Veng tiin an ko fiam bawk.

Hnahlan khua hian Khelmual zau thatak mai; Artificial Grass phahchawp ngai miah lovin Natural Grass in a phahchhuah kan nei a. Hemi hmunah hian Hnahlan leh a chhehvela Tournament liantham engemzawzat lo khelhtawh thin a ni. Hnahlan khua hian kumtin; 'Ball pet pui' kan tih mai chu hemi hmunah hian kan hmang thin bawk. A bul velah YMA ten thing an phun a, a hlima han thut hahchawlh veng vengte hi nuam thei tak a ni.

Sawrkar hmun pawimawhte:

Hnahlanah hian Damdawi In (PHC) a awm a. MO in a thutchilh bawk. Staff NUrse hi 2 an awmin ka hria! Tunah hian Building tharah awmin; rei loteah Inaugurate theih thuai beisei a ni. Tin, Health Sub- Centre a awm bawk. He kan Damdawi Inah hian Khum 30 a awm.

Electrict Department pawh Complex neia rawn awmin tunah hian 132 KV Line Sub- Station Hnahlanah a awm a. He Sub- Station hian Tualcheng, NE Diltlang, Lungphunlian leh Khuangphah bakahm, Vaikhawtlang a chawm. Electrict JE in a thutchilh.

Supply Department pawh awmin, Store Keeper in a thutchilh a. Godown pawh sei tha zet mai a awm bawk.

PHE lam pawhin hnianghnar takin Tui min Supply chho ta a. Hei hian Tuikhur tui kan tlan nasa lutuk pawh engemawchen chu a ti ziaawm turah ka ngai. Tuithing Tui hemi a tan hian lak a ni.

AH & Vety Dept. pawh awmin, Vety Doctor in a thutchilh a. Vety Complex ah a awm. He Complex ah hian Ran dam lote enkawl a ni thin.

Forest Department pawhin hmun rawn neiin RO in a thutchilh a. An ni pawh hi Complex neiin an awm. An ni hian Guest House an nei.

Tourism Department pawhin Lal Tlanghuanah Tourist Lodge rawn siamin mikhual engemawzat a thlentheih bawk.

Zirna lamah pawh khawdangte ai chuang changkang lutuk lem lo mahse, High School 1 awmin. Middle Schoo; hi 2 a awm a. English Medium hi Class- VIII thleng 2 a awm bawk. Primary School hi 3 a awm.Heng bakah hian Aganwadi pawh a awm nual.

Thil dang:

MST Bus chu Mizoram Sawrkar chuan rawn Service tirin Aizawl atangin Nilaithawhtanni apiangin a rawn chhuak thin a (Tunlai bikah hian!). Krismas dawnah chuan a kalzing ve deuh thin. Champhaiah hian nitin Bus 1 leh Sumo 3 vel a Service reng bawk. Aizawl Direct hi 2 an awm.

Presbytery leh Pandal chu!

Inkhawmpui thlennan hian Pandal a hranpaa sak ni lovin, Biak In sakthar hlim chu a bang chhuthlaa zauh a ni a. Hetah hian mi 2000 vel chu lengthei tura ngaih an ni. A thlengtu Kohhran hi kan inbuatsaih nasa hle. Mikhual pawh thahnemtak rawnkal turin kan beisei a che u. Chhungkaw thenkhat chuan Vawkte talh an tum a, thenkhat lah Ar vulhin tan an bawk a nia! Mahse, tunlai hi ruahtui a tlak nasat avang hian Nihliap kentel ngei chi a ni ang.

G?

Grape khawpuia ilo zinin rui buai turin rawn kal suh ang che. Chuti lo zawng, mualpho takin i awm hlauh dah ang e! Miten thingpui in angin in mahse, Pathian be tura rawn kal inih kha hrereng la, inkhawm lamah tan lain, hawh teh u: kan thlen chin atang hian hmalam i pan zel ang u.

Champhai North Presbytery Inkhawmpui V- 7 na hmang turin keima mimalin he ka thuziak chhiartute hi ka sawm takzet che u a ni e. Kan in chu Community Hall bul, Nutei Variety Store awmna kha a ni e.

Monday, August 6, 2012

Vana Pa nge Vanapa?

- Ngurthansangi Pa

Mizote hi mahni hnam \awng humhalh \ulna leh pawimawhna hre lo hnam kan niin ka hria. Tunlaia thiamna lo sangchho tial tialah hawrawp kim pawha thuziak zo hleithei ta lo te, SMS pawh type hleithei lo te leh, hnamdang hawrawp mahni hminga lo vuahta chawtte kan kat ta nuk mai! Kan hming han ziahdan hrim hrim a\angte pawh hian a hriat hle hi! Tun \umah chuan ka vei ni lovin; ka ngaimawh em em mai 'hming ziahdan leh lamdan' chungchang; a bik takin Mizo Pasal\ha hmingthang Vana Pa (Ka sawisel turte chuan Vanapa in ti!) hi han thl<rbing ta ila.

Mihring hian inhriathranna turin hming kan nei vek a. Chu kan hming chu hming atana lohmang ve midang awm mahse, kan hming a nih loh na a awm chuang lo. Khawvela mihring hmasa ber kha Pathian chuan Adama tiin a kova, Adama'n ama anpui hmeichhia chu Evi tiin a ko tih kan hriat kha.

Mihringin Fa a neih chuan, a fa hming chawiin thenkhat chu kan inko \hin a. Entirnan: Zova fapa chu Mawia a ni a, ‘Zova’ tia ko lo khan ‘Mawia Pa’ tiin ko ta ila, ‘Zova’ a nihna a bo chuang lova, Zova fapa chu Mawia a ni tih pawh a tilang chiang hle. Chutiang bawkin ‘’Thangzachhinga’ fapa chu ‘Vana’ a ni a, a fapa hming behchhana kovin, 'Vana Pa' an ti a ni.

Mizorama Hall lar ber chu 'Vana Pa Hall' hi a ni awm e. Mahse, a hming hi an ziakdik lo \hin a, a pawi hle. Vanapa (Va-napa) hi a awm lova, Vana Pa @ Thangzachhinga erawh chu a awm. Chumi hming chawia he Hall hming an phuah hi a hlut rualin, a hming hi a dik lo tih kan hriat a \ul ka ti a ni. Thangzachhinga hriatreng nana he Hall hi a hming kan phuah a nih chuan, ‘Vana Pa Hall’ kan ti tur a ni.

State Sawrkar hian hmun hming leh kawng hming te, khua leh veng hmingte a phuah \hin a. 'Vana Pa Hall' tiin tuna mi tamzawkin 'Vanapa Hall' an tih saw thlak se ka duh a, chu chu ka rawn auchhuah pui a ni e. Tin, Vanapa tia kan ziah \hin leh koh \hin pawh a dikzawk: Vana Pa tia hmang turin Mizo Ziakmi dangte pawh ka sawm che u a ni. Mizo |awng hi namnul a, tihdaz^t mai atan chuan a uiawm lua e!

Tuesday, June 19, 2012

Facebook- a mi chi hrang hrangte

- Ngurthansangi Pa

a. Mahni nihna lanchhuahpui ngam lo:
Profile Picture pawh nei mumal lo, mahni awmna pawh ziaklang ngam lo, mahni piankum pawh ziakdik ngam lo awmna a ni.

aw. Midang hminga Profile siam hmang:
Nia, a Profile neitu ni tur awma ngaihten an hriatpui hauh lova siam Profile suak a tam. Hetianga tithin te hian an thlalakte an hmansak a, an hriat lohvin an siamsakte tan hmingchhiat rukna an siamsak thei.

b. Tawngkam uluk lo:
Thenkhat chu tawngkam an uluk lo hle. Inhnial nikhuain an pawr thei em em a, invuakhlum hial pawh an cho thin ta ve ang! Thenkhat zahmawh bawlhhlawh tak takin an rak thin bawk.

ch. Sawiselna zawng ngawr ngawr:
Thenkhat chuan midang thiltih hi sawisel an tum char char a. Mi thil Post te kha a Post tu ngaihtuahna thlirpha lovin an lo sawisel ve ringawt zel bawk.

d. A hmun leh a hun hre lo:
Tunah chuan Group te pawh a tam ta hle. Chanchinthar Group- a mahni ngaimawh zawng kha 'vei zawng' tia rawn Post nulh nulh hmang an tam.

e. Mahni hnampuite zahpui:
Hnamdang ngaisang zawk, hnamdang Comment pawh haw miah lo; engtiang pawhin Comment sakse Delete pawh tum chuang lo hi an tam a nia aw! Chung mite Profile chu han check sak mah ula, an thiante hmingah 'Kumar, Sing,' adt. a tam mai!

f. Thlalak uchuak:
Midang hmuh turin a itawm thei ang bera an in Post- na an Post a, comment lamah lah an moderate leh chuang lova. A hnuah khawi emawlaiah hmuse, an zakin an thin a rim leh a. Hetiang hi an awm ve chawk a nia!

g. Mahni hlawkna atan:
Hmanni lawk khan Facebook Group pakhata an Member or Admin pakhat chuan Lehkhabu a siam a. Khami Group- a Resources kha a Lehkhabuah chuan a dahlut hlawm a ni. Ama irawm chhuak vek a ni lo. Khami Group Memberte khan hlawkna an hmuh ka hre lova, ama mimal hlawkna leh lar tumna vang a ni. Hetianga tih ching hi an la tam tial tial ang.

ng. Midangte tana malsawmna:
Facebook- a Group hrang hrang Memberten midangte tanpui an intihhmuh chho mek a, a lawmawm hle. Thenkhat chuan Thisen te pein, mi chumchhiate Pawisa leh thildangin an tanpui thin a, a lawmawm hle. Hetiang thil ngaihtuah nachang hriate pawh hi an awm teuh.

h. Mi thil ruk hmang:
Mi thuziak sa te, thu Post sa te, a ngai ngaia lachhawng a, Post hmiah hmiah thin an awm. Jokes hi chu Copyrighted a nih loh avangin ka lakhawm thin a. Chunga ka lakkhawm sa chu a zavaiin mi pakhat chuan hmun dangah a lo Post hmiah mai a, a zakthei lo khawp mai. Athen azar chu nise ka hrethiam a, a zavaia han lakchhawn pawp mai chu 'em em a!' ka ti ve deuh. Chuvangin hetiang mite lakah hian kan fimkhur a la tul dawn chauh a ni.

i. Mahni nihna hai:
Hei hian Mipa nisi; Hmeichhe Profile siam duh tlat, Hmeichhia nisi; Mipa Profile siam duh tlatte a kawk a. Hetiang mite hian mi tamtak an bum a, an hunawl leh pawisa an luanral tir a ni.

Mizote zingah Facebook hian hmun a luah thuk tawh em em a. Thenkhat chuan mahni in-awm-tlei-nan kan hmang tawh a ni der mai a! Chutih rualin thenkhat, a chunga kan sawitak mizia pute pawh khi an rawn awm belh zel bawk a. Chuvangin kan thian neih danah te, kan thil dahluh ah te hian kan fimkhur chu a ngai chho tial tial a ni. Tunah pawh FIR thehluh thawm kan sawi kan sawi ve ta a, hei hian Mizote pawh Facebook in min run nasat takzia leh, Facebook in a tumtak kan hmuhthelh nasatzia a tilang chiang hlein ka hria.

Ka sawitawh thin angin, Facebook atanga inchhar a, innei ta hial pawh Mizo zingah kan lo awm ve nial a, hei hian a tha zawnga hman chuan Facebook hi thiltha tak awmna hnar a ni tih a tilang chiang hle. Mahse, FIR thehluh thawm kan hriat tak fovah chuan thiltha lo hnar pawimawh tak pawh a ni ngei tih a chiang a, kan fimkhur a ngai hle.

Tunah rih chuan Mizoram State hian Copyright leh Piracy chungchangah dan mumal tak kan la neih loh avang leh, a chhuithei tur Department chak kan la neih loh avangin mahni theih ang tawka him leh fel nia kan hriat chinah, midangte tibuaitu ni lova Facebook mai bakah, Social Networking Site dangte pawh kan hman a ngai a ni.