Inbuatsaihna:
14th August, 2026 chu Mizoram Cooperative Apex Bank hnuaia Business Correspondent-ho Meeting/Training hun tura ruat anih thu ka hriat ve leh kalna tur Sumo Seat ka hauh nghal. Tin, kan thiltihna hmuna min kalpuitu tur ka be fel nghal bawk a.
Aizawl panin
12th August, Nilaini-ah Muanzual Sumo, David-a khalhah Aizawl panin 06 a.m velah kan khua atangin kan chhuak a. Zotlangah chaw kan ei. Selingah ka tute eitur Apple ka lei. Tluang takin 3 p.m velah Aizawl kan thleng.
13th August,2026 (Nilaithawhtanni) chu ka chawl hahdam a.
Meeting/ Training
Kan Meeting/ Training ni tur (14th August, 2026: Zirtawpni) a lo thleng a. A hmun hi Head Office, Tuikual-ah a ni. A hma zana ka biak Taxi Driver chuan ka thlennaah min rawn lam a. A hmun ka thleng chu min hruaitu tur chuan min lo nghak tawh. Chhawng lina velah kan chho a. A Step chu step pangngai ni lo, tliak ta se tlak theihna tur a ni. Mi pakhat hian min kuah chho a. Men pawh ka meng ngam lo.
Meeting/ Training hmun kan thlen chuan Id Card lak tur an lo chhawp a. Hming sign-na tur nen. Id ka lak a hming ka sign zawh chuan thutna tur an lo remah kan thu a. Min hruaitu chu ka veilamah a thu a. Kan District ami ka dinglamah a thu bawk. Chair-a thu ngam ngai lo kha Chair-ah ka'n thu anih kha. Programme hman chhung zawngin ka invuan, thlamuang takin ka thu thei lo. Chhun chawfak huna eitur an rawn sem chu a hnunglamah chhuatah thuin ka ei.
Infuihtharna bakah Suspense Account chungchang te, Micro ATM chungchangte, Documentation chungchangte bakah zawhna leh chhanna hun hman a ni. Kan nitin hnathawhnaa harsatna kan tawh hrang hrangte kan sawi. Meeting-ah hian BC 34 kan kal a ni.
Meeting/ Training-ah hian Mizoram Cooperative Apex Bank Chairman, CEO, Director leh Head Office-a Senior Officers-te an tel a. CSC atangin Pu Vanlalremkima, FI a tel bawk. Engemawchen hnuah chuan ban lam kan hnaih ta a. TA/DA min pe. Kan bang ta a.
Kan bana min hruaitu hnenah a lawmman tura ka inrin pek ka'n tum chu a la duh hauh lo mai a! Ka cousin Lalhmingmawii, Vaikhawtlang khua a ni. A lakah ka lawm em em a ni. Treasury Square-ah chuan Traffc Duty Taxi kan phar din tir a, Taxi chuan hmun danga kal lovin ka thlenin ka pan ta a ni.
I5th & 16th August, 2026 (Inrinni leh Pathianni) chu ka awm.
17th August, 2026 (Thawhtanni) chu ka College kalna, Bachelor of Computer Application Degree ka lakna Govt. Zirtiri Residential Science College, Durtlang Leitanah ka kal a. 2024 College Magazine-ah ka thuziak a awm ve avangin College Magazine lak ka tum a ni.
Ruah a si deuh seng seng a. A hmun kan thlen chuan Library-ah kan lut nghal a. Nu Zoi hnenah a hma niin kal ka tum thu ka sawi lawk a. College Library chu a lo zauin Lehkhabu pawh a lo tam tawh nangang mai. Nu Zoi pawhin Paper works hna thawk thin kha Computer a inchhawp a. Han fan vel ka duh viau nan ka tum ta lo law law. Student's Union hruaitu pakhat chuan College Magazine chu min rawn pe a. A hnu rei vak loah College Canpus chu kan chhuahsan ta a ni.
18th-19th August, 2026 (Thawhlehni & Nilaini) chu Inah ka awm a.
Ka birthday
20th August, 2026 (Nilaithawhtanni) chu ka Birthday a ni. Durtlanga Skywalk chu a hmuna hmuh hrim hrim ka duh avangin kal ka tum a.
Bethlehem Vengthlangah ka cousin kan sawm a. A hmun kan thlen chuan kal ngam lovin a hnuai atangin ka en ringawt. Hemi hnu hian Bawngkawna thingpui dawr ka chawlhna thin Apollo Restaurant-ah ka ngainat em em Soup ei turin ka kal. Hemi ni atang hian ka hritlang khuh deuh. Chuti chung chuan zingkarah ka inbual.
21st August, 2026 (Zirtawpni) chu ka nawm loh deuh avangin Inah ka awm a. Nilengin ka mu. A tuk chu ka haw tum ni a ni.
Ka haw
22nd August, 2026 (Inrinni) chu Driver nen 3 chuan 6 a.m velah Azawl atangin Hnahlan panin Muanzual Sumo-in kan chhuak a. Keifang-a VL Restaurant-ah kan chawl a. Anni hian chawei man min free a ni.
Tluang takin kan tlan a, kan khua kan thlen hian 3 p.m vel niin ka hria.
Tlipna
Ka zin chhung hian Mizo Film ka en nasa!
