Thu hma:
A hmasain Govt. Zirtiri Residential Science College Magazine-a thuziak tura min sawmtu Madam Lalzahawmi Chenkual, Dept of Zoology chungah lawmthu ka sawi nise. Thuziah hi thiltih namai a ni lo a, a raua chen a ngai. A raua chen loh chuan sentence hnih khat pawh ziah a har a ni. Hmangaihte hmangaih nih hi a va nuam em tiin hlaah an phuah a. Hmangaihte hmangaihte nih baka nuam a awm awm lo e. Chutiang ni pha lote tan chuan khawvel hian nawmna leh dam hian hlutna engmah a nei si lo. Chutiang dinhmuna dingte chu an dinhmun ka hriatthiam pui a, an tan he Article hi ka hlan a ni.
College-a ka kal lai tlem:
Govt Zirtiri Residential Science College-ah hian Bachelor of Computer Application (BCA) chu a 3rd Batch-na (2005-2008) ni turin ka zir a. Ka zir lai chuan kan Principal chu FJ Ralzuala a ni. Ka luh laia thawk, tuna la thawk mekah Teaching Staff chu Computer Science: Sir Lalrinawma (Marina) te, Sir Lalhruaitluanga te; kan chhuah ṭepah rawn lut Madam R Lalmawipuii te; Zoology: Sir Lalrinmawia te, Miss R Lalramengzami te, Madam Lalzahawmi Chenkual te; Chemistry: Sir Zirlianngura (tuna Principal) te; Electronics: Sir B. Zoliana te; English: Madam Lalrinsangi Nghingloa te, Madam Lalmalsawmi Chhangte te; Physics: Sir Lawrence Zonunmawia Chhangte te, Botany: Sir R. Lalengmawia te, Bio Chemistry: Madam Fanai Lalsangzuali te; Teaching Staff-ah pention tawh English Subject: Madam Laltluangkimi Hnamte te; Non Teaching Staff zingah tuna pention tawh Pi Lalrinzuali, UDC te; Nu Zoi (Librarian) leh boral tawh Pa Zira (Driver) hi ka hriat theihte an ni. Tin, ka luh laiin tuna thawk mek Home Science: Miss Rebecca Lalnuntluangi hi a lut ve bawk.
 |
| BCA, 3rd Batch |
Khatih hun lai khan College Campus hi Ramthar Veng-ah, Govt. Republic Higher Secondary School Campus chhakah a awm.
First Semester ka nih kum kha hun nuam a ni. Ka tan chuan thil thar a ni vek mai. First Semester ka nih kuma nuam ti tak kha ka chhuah dawn meuh chuan a hma ang ka ni tawh lo hlein tun hnuah hian ka hre ṭhin. Students' Union inthlan kha vawi khat chiah ka hria! Chu chu Magazine Editor post ka chuh ve ṭum kha a ni. A hmain ka hre lawk si lo, hmelhriat ka la nei vak si lo! Tikhan sawi ve reng turin ka tlingtla ve ta anih kha! Thil tih neuh neuh a awm ṭhin a: Students' Union inthlan te, College Week te, Inter College te, NSS Special Campaign te., adt.
 |
Vanzau khuaa kan Tuikhur siam |
Govt. Hrangbana College-in eng Jubillee nge mawni an lawm ṭumin Inter College Quiz an buatsaih a. Kan College kan tel lo. Khawilai aṭangin nge ka hriat, ka kal ve a; mipui tana zawhna chhan tur ka chhan dik avangin ₹50 ka hlawh kha ka la hria! Khawi College nge i nih tia Quizmaster min zawhna chu Govt. Zirtiri Residential Science College tiin ka chhang.
Ka sawi hmaih hauh loh tur chu NSS-in Chennai-ah Solakia (Sarlamkai) kan show dawn a. Chutah chuan Sarlamkai thiam leh kal duh turte a in-report theih a. Kei, Sarlamkai thiam ṭhaṭhum lo kha ka in-report ve a! Tichuan lam kan zir ta tlauh tlauh a. Mumangah hial ka lam a ni! Kan kal ni tur alo thleng a. Phur fahranin Lengpui Airport chu Taxi-in kan pan a. Mahse, flight an cancel hlauh mai! Miss Mazami’n Rel-a chuan a peih si lo a, lungawi zan lovin kan haw ta anih kha!
 |
| Rihdil kam |
NSS Campaign-a 4th- 13th Sept, 2006-a ka kal ve ṭuma an Leithum Community Hall-a kan riah a a bula Zunin kan siam te, Vanzau khuaa Tuikhur kan siam te, Rihdila kan kal te, Ṭhasiama seno neihnaa kan kal te, Lianchhiari lunglen tlanga kan kal te, Vaphaia Fiara tui kan tlawh te, Hla-kungpui-muala kan kal te kha ka la hrereng! Theih se, kan khuaah hian NSS-in Special Campaign rawn nei ula. Hnahlan ram chhungah Vanapa Thlan te, Winery te, a bul lawk Tualcheng khuaah Lungnokhawhthla te, Lungphunlian khuaah Lungphunlian te tlawh tur a awm asin.
 |
| Lianchhiari lunglen Tlang |
Ka tan kha chuan College Bus a hlu khawp mai! Tun thleng hian mumangah Govt. Zirtiri Residential Science College hi ka hmu. Nu Zoi phei chu mumangah hmu ngun tak ka ni! Library-ah khan hun ka hmang tam bawk a, mumangah pawh Library-ah ka kal ziah! Mizorama Master of Computer Application (MCA) zirna hawn anih khan First Batch zingah ka tel a. Mahse, Chuap TB avangin 2nd Semester thleng chauh ka kal. Ka kal laklawh laia ka chhuah avang a ni ang, pass tawh mah ila tun thleng hian MCA chu ka mumangah ka la zir reng nia!
 |
| Thasiama Seno neihna |
Kan khua hi Hnahlan niin Champhai District-ah a awm a. Kan khaw mi Govt. Zirtiri Residential Science College aṭanga Graduate hi an awm nual tawh a: Ka hriat theihah Malsawmdawngzeli d/o Taiṭhuama, 2015-2018 Batch te; Mary Lalnunfeli d/o KK Manga, University 10th Position, 2021- 2024 Batch te; tuna kal mek pawh an awm.
Alumni PAN CARD siam tura inbuatsaihna:
14th February, 2025 (Valentines Day) chu BCA ka zir lai atanga ka ngainat em em Computer Games, Laptop-a Age of Empire-II chu khelh pahin tun hma chuan mi pangngai anga awmin hna rumte ka thawk thei a, tunah erawh chuan dam lohna avangin India ram dana Locomotive Disabled Person ka lo nih tak avangin mi tan ka ṭhahnem lo si a; miin min hriatreng theihna tur engemaw tih theih ka nei em aw tiin ka ngaihtuah a. (Project IGI nen hian ka khel ning thei lo). Ka tihtheih, mi nazawngin an tih theih loh ka duh. Chupawh hman reng theih tur a ni tur a ni. (Tunah hian chet velnaa harsatna ka neih avangin kan khuaah ka awm).
Ka natna a ziaawm aṭanga ka tih chak em ṭhin chu Common Service Center (CSC) tih hi a ni. Kum 2022 tawp lam aṭang khan CSC ka ti ṭan a. He ka thil tihah hian Permanent Account Number (PAN CARD) siam hi Service pakhat a ni. Society PAN CARD hi chumi zingah chuan a tel a. Ka College kalna Govt. Zirtiri Residential Science College Alumni Association PAN CARD siam ila a chi dawn riauin ka hre ta! Tin, ka thlakhlelh em emi College kalna a a ni chuan phurna min pe a.
PAN CARD hi a la pawimawh dawn chauh. A tel lovin Bank aṭangin ₹200000 chin chunglam a puk theih loh a, ₹50000 chin chunglam Bank-ah a dahluhin a lakchhuah theih loh bawk.
Sawi lan duh ka neih chu, PAN CARD chhuak hma; Aadhaar Card leh Phone No in-link hmanga siam mai theih hi mipuiin kan bawh hle a. Mahse, Smartcard-a convert a har em em a; PAN CARD neitu hminga Initial awm chu Correct har tak a ni. Chuvangin, PAN CARD la siam turte tan: Smartcard anga chhuak turin PAN CARD siam hram rawh u.
Alumni Association PAN CARD ka siam:
GZRSC Alumni Association WhatsApp Group-ah 'Alumni Association-in PAN CARD kan nei tawh em aw? Kan la neih loh chuan ka lo siam ang e,' tih ka post a. Alumni Association Secretary Wycliff Lalchhandama nen kan inbia a. Document min pek ngai a awm avangin chuti maia siam theih a ni lo.
 |
| Alumni Association PAN CARD |
Alumni Association Lecturer Incharge Chairman Madam Lalremruati Hmar nen kan inbia a. Alumni Association Registration Certificate Original thlalak min rawn thawn turin ka ngen a. Ani chuan Alumni Society Registration Certificate Original chu Scan-in min rawn thawn a. Alumni Association Secretary chuan ama mimal leh chhungkaw lamah harsatna a nei chungin ṭhahnem ngai takin Alumni Association Seal a buaipui a. Ka zu nawr reng a. Ka inthlahrung ṭhin! Ka va Call loh leh WhatsApp message ka thawn a. Alumni Association Seal chu min rawn thawn ta a.
Alumni Association Seal ka hmuh ve leh ka Apply ta a. Ka Apply ni hi 24.02.2025 a ni. 27.02.2025 khan Alumni Association-in ṭangkai taka an hman turin a chhuak hmasa ePAN (PDF) a rawn chhuak ta a. PDF chu Alumni Association Secretary leh Alumni Association Lecturer Incharge ka thawn. Smartcard erawh chu Dak aṭangin thla khat chhung velah Alumni Association Secretary hnen a thleng ang. (Tunah hi chuan a thleng tawh ang.)
Thildang:
College ka chhuah hnu hian College Campus tharah, Building tharah kan insawn ta a. Smart Classroom, Projector-a thil kah-lan mai theih kan nei ta hi kan hunlai khan awm tawh se ka tih viau rualin ka lawmpui a che u. Function nikhuaa han parade a, khual han lawm tur NCC hial kan nei tawh a, a lawmawm hle. Mipa leh Hmeichhe tan Hostel a awm ta bawk. Tin, NAAC ‘A’ Grade Accredited kan ni hi ka lawm hle bawk.
Tlipna:
Govt. Zirtiri Residential Science College Alumni Association (GZRSCAA) hi tluang taka a kalchhoh nan leh hma a sawn zel theihna turin duhsakna sang ber ka hlan a. Tin, College Magazine pawh a la chhuak zel turah ngai ila, Mizo ṭawng tihmasawntu pakhat anih ka duhsak bawk e .
- 060320252032 -
