Kal lam:
Ka pi (ka nu nu) Damzaluani w/o Nengzaena (L), Selam a hriselna dinhmun a ṭha vak lo nia kan hriat avangin amah kan turin ka nu leh pa nen kan pathumin kan Motor-in Dt. 23.05.2025 (Zirtawpni) khan chawhma lamah Selam khua panin kan chhuak a. Kalkawngah ruah a tla deuh siar siar ṭhin a, Selam khua kan luh laiin ruahpui-van-awn a sur.
Kan thlen hma aṭangin Current an lo nei lo a. Mahse, tlai lam aṭang chuan vanneihthlak deuhin Current a rawn awm.
Ka pi:
Ka pi chu khumah a mu a. Biak dawn pawhin a beng bulah ring deuha biak a lo ngai tawh a, a mit-in khua a hmu tawh lo. Oxygen an pe reng. Current awm loh apiangin Generator an On.
 |
| Ka pi Damzaluani |
Chaw eia sawmtu ka nei:
Inrinni chuan an Ina tukṭhuan ei turin Selam High School Headmaster u Chhuana (Lalhmachhuana) chuan min rawn sawm a. Vawksa leh ka chawhmeh ngainat em em Zemathingthupui (Asparagus) min hmehpui. An nu u Mawii pawhin nimin tlai khan chawei turin min sawm, Sanghal sa kan hmeh. Zinnaa duhsaka chaweia sawmtu ka nei hi vannei ka intiin ka lawm em em a, an chhungkuain lo dam ṭha zel se; lo hmuingil zel se tih hi ka duhsakna a ni. Zawhte note hmelṭha deuh 2 an nei nghe nghe. An Zawhtete chuan mihring an ngaina. Fanu 2 leh Fapa 2 an nei, kan cham lai hian Mo an nei.
Ka pi dinhmun chu a danglam tak tak thei lo a. Khawsikin a thlah thei lo. Thawhṭanniah ka pi dinhmun a zira haw/ haw loh kan rilruk a.
Thawhṭanni alo thlen chuan a hriselna dinhmun chu a tlahniam hle. Zan dar 10.30-ah phei chuan amah thlahlela ngaitute chu kum 99 niin min kalsan ta a ni.
Tlaivar zanah hian Arsa buhchiar an siam a, an siam thiam khawp mai. Thingpui thlum nen kan in.
Aizawl aṭangin ka putea (LB Sanga) nupui Mawitei te, ka nutei (V Lalsangpuii) leh a fapa Benjamin-a te, ka nu Kimi (Chinngaihkimi) fanu Biaktei leh Helen-ite chu ka pate Zoduhahoin Car-in zanlai pelhah an rawn chhuak a, hunderh hman hmain an rawn thleng a. Ka nutei fanu Nubawihi chu rokhawlhna avangin an rawn kal lo. Khuangphah aṭang te, Vaikhawtlang aṭangin ka pu Siana fate leh midang te, Champhai aṭang te, Ngopa aṭangin ka nu Liani pasal Khawla, a fanu Rochani leh midang te (Ka nu Liani [Chingngaihliani] chu inentirin Aizawlah a awm), Kawlbem leh Vaivet aṭang tein an rawn kal bawk a, hunserh an rawn nang vek. Mahse, ka pu Gena (V Thangzagena) fapa Krosmawia erawh chuan a rawn nang hman ta lo, a fanu Melody-i pawh phai lamah a awm. Ka nu Kimi fate zingah Biaktei leh Heleni tih loh an lokal thei lo. Ka putea fate 2 an rawn kal thei lova. Ka naute pahnih an kal thei lo bawk.
 |
| Kan chhungkua : Sangtea leh Nutei an awm lo |
Selam Branch YMA-te ka puten an ngenna angin ka pu thlan bulah a ruang chu thlahliam a ni ta a ni.
Keyboard, Khuangte leh Khuangpui hmangin kan zai a. Lengkhawm an ṭhahnem bawk a, zai a nuam khawp mai.
Ka pa'n khuang a pu a. Keyboard, Khuangte leh Khuangpui hmangin kan zai a. Lengkhawm an ṭhahnem bawk a, zai a nuam leh hle. Nitin ka hnenah awm reng che, Lalpa tih hla ka thlang.
Kan kal ni aṭanga chhiara a kar khatna chiah 29th May, 2025 (Zirtawpni) zing dar 07.30 velah chuan kan haw ta a. Ruah a sur duh si! Engtikah tak Selam khuaah kal leh ang i maw?
Ka pi hi Aizawl lamah ka pu Thlunga (Upa Lalthuthlungliana, Lily Venghovin ka nau Nutei te, Maruati te, Ka nu Liani te, Nubawihi te chuan ka nutete In, Lily Veng, Chaltlangah a thlan ṭhutna an lo hmang a ni.
Selama kan cham chhungin ka Cousin Eli-i te, ka Cousin Rotea fapa Sangsanga te, u Chhuana fanu Zari te, ka ṭhiannu Romawii (Rotei)-ten min thlahthlam lo a, an chungah ka lawm em em a ni.
Kei hi ka pi Damzaluani tu hmuh hmasak ber ka ni.
Ka pi DAMZALUANI chanchin tlangpui
(Ka putea [LB Sanga] ziak, tlema ka tihdanglam hret leh kaihtawi a ni)
1. Pian leh murna:
Mualnuam, Myanmar-ah 1926-ah a piang a. A tet laiin Japan ral (WW2: 1939-1945) len vangin Selamah an pem thla a ni.
1. Niangzaawii,
2. Chinkhawlanga,
3. Chinkhanthanga
te an ni a, an boral vek tawh a ni.
A pasal (Nengzaena [L]) nen an inneih hnuah Selam, Kawlbem, Lungchuang, Suangphuh, Vaikhawtlang, Selam-ahte a lo khawsa tawh a, a thihni thlengin Selamah hian a khawsa ta a ni.
A fate:
1. Thangsianpauva, Vaikhawtlang
2. Lianngaihchina (L) h/o Ngaisiani, Tahan
3. Chinngaihmani (L)
4. V. Thangzagena h/o Laithangpuii, Selam
5. Chingngaihliani w/o Khawlrosiama, Ngopa
6. Ngaihawihi (Ka nu) w/o Lallianchhuanga Sailo, Hnahlan
7. Khawlzachingi (L) w/o K. Thangzangura, Selam
8. Chinngaihkimi w/o S. Gena, Selam
9. V Lalsangpuii w/o Zoduha, Aizawl
10. LB Sanga h/o Ngairomawii, Selam
 |
| A thlahnaa a fa awm theite L-R Standing: LB Sanga, V Thangzagena Sitting: V Lalsangpuii, Ngaihawihi, Chinngaihkimi |
2. A mizia:
Mi taima, nun nem leh zai dam; mi inngaitlawm, mi chanchin chhe lam sawi duh lo mi a ni. A fate tumah vawi khat pawh a beng lo. Hmangaihna ngah tak mai a ni a, a ei ai a tu leh fate mai ni lo; hmelhriat loh Burma sumdawng pawh pe phal ṭhin a ni. Pasalte hlau thiam, an thu thu a awm tawp mai chi a ni. Midangte care em em mi niin, a la chet peih chhung zawng inlengte lo dawngsawngtu; tui lum in tur lo petu, a neih chuan tuibur pawh ṭhehtu ber a ni. A tu leh fate tumah thlei bik a nei ngai lo. Thil tihsak leh pek a lawm thiam em em, lawmthu sawi ngei ngei ṭhin a ni. Entirnan: Zin haw thil hawn,., adt. A damloh a chaw an hrai ringawtah pawh lawmthu a sawi ngei ngei zel. Mi inthlahrung mi, mahni in ah pawh chaw thleng a sa suah maite hreh a hel deuh tlat zel ṭhin a ni.
 | |
|
3. Rinna:
A phak tawka Pathian ring tawp mai, lam leh kut bente ngainaa Pathian fak nuam ti a inkhawm ngai pawimawh em em mi; Pathian ram thilpek pawh ngai pawimawh em em a ni.
 | ||||
A tu leh fa, amah thlahnaa awm theite Ka nutei (V Lalsangpuii)te chhungkua, Nubawihi a tel lo.  Rosangate chhungkua  Ka nu Liani (Chingngaihliani) pasal Khawla leh an fanu Rochani Amah leh a fanu pakhat zawk Rempuii an awm lo
|
 |
| Aizawl aṭanga amah thlahnaa lokal theite |
 |
| MHIP, Selam Branch aṭanga amah thlahnaa awm theite |
Damdawi In han luh pui em em ngaia damlohna nei ngai lo a nih rualin, pum lam insawiselna a nei ve reng ṭhin a. Kum 2007-ah kal ṭha lo a nei tih hriat a ni a. Pathian zarah damdawite eiin zual lam a pan lutuk lo a. 23rd Feb, 2023 zanlai a mu chu tho â ang deuhin a awm a, puanthuahte pawmkhawm hluaiin; khawiah emaw kal chhuah tum angten a awm a. A thil han sawi vel pawh a mumal lo ruai mai a, a awmna khumte pawh a hai a. Doctorte an rawn hnuah Alzheimer tih an hrechhuak a; damdawite ei chhoin zia chho deuh mahse, reh hlen tak tak a awm ta lo. A room-ah a chhuak tawh loin, chhunzanin a tawm chho ta deuh a ni. Khum sira daikalna an siam sakah chuan a mahin a la inthiar peih hram hram zel a.
 |
| U Chhuanate nupa |
 |
| Vaikhawtlanga aṭanga amah thlah tura lokal theite |
Khatia mu ta reng chu a khel leh lam ve veah Bedsore a nei a, Pathian zarah an enkawl dam leh a. Alzheimer anih tirh aṭangin, a bikin zana a rilru mang lo chhuak ṭhin; a naute thi tawh hming lama han ṭah te, khawi lai emaw kal tum ni awm tak ṭawng chhuah te; a nu a koh a koh mai te avanga han mut theih loh chang pawh a nei tam chho ṭhin hle a ni.
 |
| Ngopa aṭanga amah thlaha lokal theite |
 |
| Amah thlahnaa MUP, Selam Branch Member awm theite |
 |
Khuangphah aṭanga amah thlah tura lokal theite Tualcheng aṭanga amah thlahnaa rawn kal theite |
 |
| U Chhuanate Zawhte pakhat zawk, a duhawm reuh hle |
