Sawihawnna:
Ministry of Panchyati Raj, Govt of India-in ServicePlus Portal hman vek tura a ruahman chu Mizoram nena Village Council kalpui dan nen a inmil loh avangin Mizoram chhungah bik chuan Service Portal awmsa DC Online Portal chu hman mai nise tiin Local Administration Department te, Information & Communication Technology te, National Information Centre, Mizoram unit te meeting chuan ruahmanna a siam a. Hemi bawhzui nan SIRD&PR leh ICT ṭangkawp chuan Village Level Entreprenuers (VLEs) tan DC Online Portal chungchangah Training a ko a. A hmun tur chu SIRD&PR Building, Durtlang Leitan, Aizawl a ni. Training hi ni khata zawh tur a ni nain a hmun hmain a zawh loh avangin Batch hnihah min ṭhen a, First Batch Training tur 38 zingah ka tel a, training thei hi 18 kan ni.
 |
| DC ONLINE TRAINING FIRST BATCH |
Inpuahchahna:
LAD Department, Champhai lam aṭangin Call ka dawng a. Training turin kohna ila dawng ang tiin min hrilh. Kan khua hi Mobile Network-a harsatna a awm zeuh zeuh avangin ka Phone No pahnih chu ka report a. Tichuan, hriattirna lokal tur chu ka nghak ta a ni.
Dt. 27.01.2025 chuan WhatsApp Link min rawn thawn ta a. Chu chu Training turte tan Information inpekna tur a ni. Ka join a. Training Programme leh a tel turte hming list an rawn post a.. Kan khua leh Hostel-ah kan riak dawn nge dawn lo, zanriah chhumkep ka ngaih leh ngaih lohte kan report a.
Nikum kum tawp lam atanga kumin kum tir lam chu ka NU a bawrhsawm deuh a. Kumhlui pawh Aizawlah a inentir a, Krismas a hmang nghe nghe. Kan hnung kalta khan a MIT-a awm Lungte chu Ebenezer Hospital-ah zai a ni. Ka pa hi tun VC inthlanah Candidate anih ve avangin campaign-in a ṭul bawk si a, chuvangin Aizawla awm hahdam rei hman lovin kan khaw lamah a rawn haw hrih.
Chu chu kan chhungkaw dinhmun anih avangin kan Training hun dawna chhuka training zawha haw leh deuh nghal mai turin ka rilru ka siam a, ka inpuahchah ṭan ta a. Aizawl hi hman kuma Motor laa ka pa nen kan kal tih loh ka kal leh mai hrih loh avangin kal chu ka chak angreng. Kan training ni chuan min kalpui turin ka ṭhiannu Rempuii, Aizawla Class XII Arts zirlai chu a hman theih dawn avangin kan inbe fel a. Aizawlah chuan ka nau Nuteite In, ITI Vengchhak Biak In bula thleng turin ka inruahman a.
Kal lam:
Puilo kan thlenin Nguri Variety Store-a Serthlum an zawrh chu ka tute tan ka leisak.
Hello, Aizawl:
02 p.m velah Aizawl kan lut. 5 p.m velah ka thlenna tur hmun ka thleng. Training-naa min kalpuitu tur hnenah pawh ka thlen tawh thu ka hrilh a. Eng eng emaw ka tih hnuah ka mu.
Training Day:
Dt. 06.02.2025 (Nilaithawhṭanni); 09.30 a.m chu Training ṭan hun tur anih avangin leh ka thlenna chu ITI Vengchhak anih avangin Traffic Jam hmaa Training-na hmun thleng tur chuan engkim kan intihma a. Ka naute Taxi min biaksak chu 09 a.m rik hma deuhin ka thlenna in bulah a rawn in-turn-up a. Tichuan, ka ṭhiannu awmna Bethlehem Vengthlang panin kan tlan a. Kan in-pick-up zawh chuan World Bank Road-ah kan tlan a. Thuampui thlen hma deuhin Serthlum ka lei. Bawngkawn luh hma aṭangin Traffic a Jam!
Training-na hmun tur kan pannaah hian Google Map kan ring a! Durtlang pan chuan kan chho ta! Leitan kan thlen a, Google Map min hruaidan ang zelin kan tlan a. Engemawchen hnuah chuan kawng alo tawp a! Kan dinna bula awmte chu kan zawh chuan 'in rawn tlanpel thui tawh lutuk, kir leh ula; Leitanah khan Signboard intar in hmuh loh pawhin mi in zawt dawn nia,' min ti a! Training lah ṭan a hun der tawh mai! Kan tlanlet a. SIRD&PR-a thawk, WhatsApp link min petu ka phone a. A sawi angin Leitanah chuan Signboard a lo intar a. Ka tum ram ka thleng ta chu ka thaw huai a!
Ka ṭhiannu chuan Training-naah chuan min ṭhutpui renrawn a. Mahse, a hnuah pawn lamah min lo nghak ta zawk a.
10 a.m hnuah chuan kan Training chu kan ṭan dawn ta a. Self Introduction-te kan nei. Mizoram District hrang hranga awm kan ni. Training ṭan hmain Group Photo lakna kan nei. Course Director hi Pu Lalchhandama Lailung, Core Faculty (IT), SIRD&PR a ni a, Dr. Khawlsiamthanga Khawlhring [Selection Grade Faculty/Associate Professor (Village level Planning)] chuan Training hawnna a nei. Training min petu hi CSC Aizawl District Manager a ni. Chawhma lamah CSC nihphung leh CSC-ten an tih theihte min hrilh a. Chawhnu lamah kan training chhan ber DC Online chu a tihdan tur min zirtir. Training kan neih hi a hlawkthlak hlein ka hria. Training-naah hian CSC ni lo, VC Secretary an tel nual.
Current a awm lo zeuh zeuh a. Mahse, Training a bahlah lo. Vawi 3 break kan nei. Kan ban hma hian Training-naa kalte hnenah TA/DA chu SIRD&PR Norms anga pek kan ni.
Chhunah hian Chow/Rice leh thingpui an siam a, Chow kan ei.
SIRD&PR Hostel-ah hian a duh chu a riah theih a, chaw pawh a ei theih. Mahse, kei chu thlenin nei ka nih avangin ka ti ta lo.
Ban:
Kan ban chuan kan training-na bul aṭanga Leitan thleng ka training pui 1 telin Auto Rickshaw-in kan chho. Leitan kan thlen chuan kan kal duhna ka sawi a, Fare zat tur ka zawt nghal. Leitan aṭangin ITI Vengchhak chu Taxi ka hmang (Bethlehem Vengthlang kawn chhiar telin). Ka training pui, kan Taxi chuanpui chu Chandmary-ah a chhuk a. Ka ṭhiannu chu Bethlehem Vengthlanga awm anih avangin thlah hmasak ka duh viau na a, kan thlah hmasa ang che an ti tlat si a, Treasury aṭangin kan tlanthla a. ITI Vengchhaka ka thlenna bulah ka chhuk ta a. Ka chhuk dawna Fare pek pahin. "Ka pu, ka ṭhiannu hi charge belh suh ang che," ka ti a. Taxi chuan Bethlehem Vengthlang kawnah ka ṭhiannu chu a va drop a.
In ka thleng:
Ka thlennain hi Step chho deuh kalna tur a awm a. A bul lawk kawng-ana awmte nau pakhat chuan 'ka paw thla ang che' min ti a, min paw thla. Tichuan, Aizawl ka kalchhan chu ka tifel ta a ni.
Thubelh:
1. Durtlanga Skywalk tawite khu Bawngkawn pana kan tlan laiin ka hmu.
2. Bazar Bungkawna Flyover chu ka vawikhat hmuhna a ni.
3. Ka Serthlum lei kha ka ṭhiannuin a ei ṭha peih si lova, midang lahin ka pekin an duh lo zel si a; keiman ka ei ka ei ringawt! Haha!
0 Comments