A KHAW AWMNA
Kan khua leh ka nute khua (Selam) inkarah Lungphunlian khua a awm a. Tun hma Lirthei van lai chuan ke ngatin Selamah kan kal ṭhin. Zingah kan khua kan chhuahsan a, chhun velah Lungphunlian khua kan thleng a. Chhunchaw kan fak a. Kan inhnawh puar hnuah Selam panin kan kal leh a. Zanriah chhum hun pelh hretah kan thleng ṭhin. Kan kal a ni tih an hriat chuan kan Cousin-hoten Thlanmualah minlo hmuak ṭhin.
Kan khua aṭangin Tuisa thlen hma zawng kan chhuk ngar ngar a, Tuisa aṭangin kan chho leh ngar ngar. Lungphunlian aṭangin kan chhuk leh ngar ngar a, Dimphai aṭangin kan chho leh ngar ngar ṭhin.
Lungphunlian hi Mizote tana khaw pawimawh tak, hmun pawimawh leh hriatreng tlak awmna khua anih avangin Mizote tan chuan ngaihhlut tlak a ni. Amaherawhchu, Lirthei hian a tlawhpawh ṭha lo hle. Tunah hian Tualcheng aṭangin Jeepable Road a kal a. Chu chu Lirtheiin a kalpawh theihna awmchhun a ni.
Champhai District chhunga khaw pakhat, Champhai North A/C Constituency huamchhunga khaw pakhat a ni. Geographical Co-ordinate 23° 45' 0" North, 93° 18' 0" South-a awm niin, 2011 Cencus-ah khan In 81 awmin, mi 384 an cheng. Tunah hian Presyterian Church of India leh Salvation Army Kohhrante awmin chhiatni ṭhatniah anni Kohhran hi Biakin kharin an inṭawiawm tlang dial dial ṭhin.
A KHUA
YMA hi Branch pakhat awmin Veng hrang hrang hi pathumah an inṭhen a. VC Member pathum an nei. Middle School leh Primary School-te awmin Anganwadi pakhat a awm bawk.
A san lam hi Sea- Level-in 1,466 M (4,810 Ft) a ni. A boruak a thiang ṭha hle. Nikuma ka kal lai chuan khua a lum khawp mai. Tuikhur panga an nei. (Update on 02.04.2023: Tunah chuan Jal Jeevan Mission hnuaiah In tinah tui an herhhaw thei tawh.)
A mipuite hian Thingtlang lo neih hi an eizawnna ber a ni. MHIP hi Branch pakhat awmin MUP pawh Unit khat (tunah chuan Branch an ti tawh) a awm bawk. Dry Village (Zu zuar awm lohna khua) a ni bawk.
Electrict hi Hnahlan-a 32 KV Sub- Station aṭanga lak an nei a. Cable Television a awm lo nain Antenna leh Dish TV hmangin anmahni duh Channel an en thei. Hnahlana Airtel leh Jio Mobile Signal a man pha. Tunah hian Jio Mobile Tower chu a awm tawh a, a function em tih ka hre chiah lo.
An khuaa Branch YMA-ten Kartin Chanchinbu an siam chu Media lamah an chhawr ṭangkai hle.
Ka thlenpui Tluangtea nen khawlai kan fang
Nikuma Hnahlan Pastor Bial Inkhawmpui a thlen ṭum khan Rorel Palai tura ruat ni lo mah ila, ka kal khat tawh vang leh a khaw awmdan mita ka hmuh lohna a rei tawh avangin Kohhran Zaipawl zingah ka tel ve.
Hemi ṭum hian thlenpui tura a hmaa ka biaksa Ramdintluanga (Tluangtea) bulah, an chhungte inah kan thleng a. Keini pahnih lo chu kan khua aṭangin hmeichhe pahnih an thleng bawk. Khuangphah khaw mi nufa an thleng bawk a. Vaikhawtlang aṭangin pa pakhat nen. Tichuan, ni hnih chhung chu kan va inhnawhkhawm ta raih raih a ni.
KAN THLENG:
Kan thlennate chuan vanneihthlak deuhin BAWNG SACHEK TUI anlo nei a. Zanriahah ka ei chu a nuam dangdai khawp mai. Kan thlennate chu Member 3 chiah an lo awm a. An fate 2 chu khaw danga an awmlai alo ni.
An in a lian ṭha khawp mai. Television an nei a. Mahse, Cable a awm lem loh avangin Television en lam kan rilruah a awm lo. An chhuat a fai tliang ṭha khawp mai. Chuktuah huan zau deuh an nei a. An huanah chuan Rua a tam khawp mai!
He ka zin hian Lungphunlian khaw hming put chhan 'Lungphunlian' taka ka hmu thei ta lo erawh pawi ka ti hle. Mahse, khawlaiah chuan tawkfang chu kan leng ta tho!
KA SELFIE- STICK:
Ka hmang ṭangkai hle. Mahse, ka haw dawnah ka hmu zo ta tlat lo! Ka thleninte chu an fel bawk a, ka hnutchhiah ta ringawt mai a ni.
INKHAWM:
Inrinni chhunah rorel a awm a. Rorel palai ni ve lote chu duh leh an leng a. A lum em avangin ka thlennain bathlarah ka ṭhu. Rei vak lo chu ka thlennate kawmchhaka School Compound-ah ka han ṭhu thlandai.
Pathianni Chawhma Inkhawmnaah kan Kohhran Zaipawl kan zai.
Ka thlenpui Tluangtea nen
PATHIANNI CHAWHNU INKHAWMBAN FELLOWSHIP:
Biakin thlangah Sunday Sikul Building a awm a. Chutah chuan KṬP Member-te kan Fellowship. Ka sawihmaih hauh loh tur chu he Fellowship hma Inkhawm banah ka Pheikhawk bun (Smart- Shoe) chu a keartuiah a tla hlawk mai!
KAN HAW:
Thawhṭanni alo thlen chuan zing karah kan chuanna Pick Up pawh a rawn in-turn-up thuai a. Ngai tak chungin leh hun engemawchen atan hmu leh ngai tawh lo turin Lungphunlian khua chu kan mangṭha ta a ni.
Lungphunlian khaw hming put chhan LUNGPHUNLIAN
KA THLENNATE:
An pa ber chu an Branch YMA-ah Finance Secretary a ni. Ka thlenpui Tluangtea chhungte an ni. An nupain mi kawmhlim dan an thiam a, an titipui theih fu! Mi an Welcome danah ka lawm takzet a ni.
0 Comments