Kan ṭhianhoa kan awmkhawm tawh chuan tuemawin tuemaw chanchin sawi tur a hre chawk a, kan nui dar dar zel! Kan ṭhianho hian a mimal inkohna hming bik kan nei ṭheuh! Kan ṭhianhoa rawn lut thar apiang kan ṭhianho zinga an hming bik tur kan phuahsak ṭhin. Silai kahtir pahin 'chumi khami chu ka ni e' kan tihtir ṭhin. A hming chu duh lo eng ang mahse, a hming thlakna tura Ran ke pali nei a talh a ni ngawtte anih loh chuan thlak theih a ni tawh lo. Chu chu kan ṭhianho kum khaw ziak loh dan a ni.
Kei pawh ṭhianhoa min lawmluh tlai kha ka la hrereng mai. Silai kap puak dur pahin chumi chu ka ni e ka tih ve kha! Chu ka hming chu a tirah chuan ka duh lo viau na a, tihdan awm hek lo le; lungawi takin ka pu ta a ni! Kan ṭhian pakhat chuan ka nu bulah, "Min lawmluh chuan Silai kap puak dur pahin chumi chu ka ni e" ka ti a. Ka bulah ka nupui fanaute an awm ṭhap si a! Ka zak ang reng khawp mai!" a ti!
Nikumah khan Krismass dawnah Pawisa thawhkhawmin mi harsate ṭanpuina hun kan nei a. In hrang hrangah kan kal. Kan ṭhianhoah chuan a hlantu tur kan inruat a. A dawngtute an lawm ve ṭhin khawp mai. Hetiang hian kum engemaw chen chu kan titawh a ni.
Nikum chhung zawng khan post danga ka ziahtawh angin kan ṭhianho chuan Damlai Lungphunna turin Project lian tham, daih rei tur kan ngaihtuah a. Waiting Shed sak ṭha kan ti. Mahse, a hmun tur chungchang kan ngaihtuah nasa hle. Tualcheng Penga miin Waiting Shed an sak chu a satute dil a, ṭhiah an phal chuan ṭhiah nise kan ti ta a.
A satute hi kan khaw bul lawka awm an ni a. Annin anlo remti a. An remtih thu kan hriat chuan kut kan thlak ṭan nghal.
Hnatlan ni khatnaah In ding awmsa kan ṭhiat a. A chak vel chu a satuten min pek avangin kan phur haw a. A ni hnihnaah a ban tur laiin a ban kan phun nghal a. A ni thumnaah a chhuat thlen hma, awih chinah Lung kan rem a. A ni linaah khuarah lei kan chhung nileng. Khuara lei chhun tur hi a chhaka Kawngpui chhak lama lei kan lai thla a. Khami ni kha a thawk ate an hah ngawt ang.
A ni nganaah chuan a beam tur leh a ban tur kan chhung a. A hnuah a chung tur Rangva chih a ni. A chung tur hi ni hnih kan bei pek a! A ni khatnaah chuan Chimney nei tur angin kan ruahman a. A dawta hnatlangten an lo ṭhiat leh a, a pangngai anga awm turin an siam. A ni sarihnaah lei chunga a bang awm tur angte kan siam. Ṭhutna tur pawh siam nghal a ni. Hnatlan leh hmasak berah rawng kan hnawih a. Hemi hnu hian a Board kan siam. Tichuan, kan chawl ta vang vang hrih a, kumin kum laihawl velah khan Official-in a hawnna chu Ui talhin kan hmang a, a hlimawm hle!
Nikum chhung kha he kan Project buaipui avang hian kan inhmu ngun hlawm hle. Ṭhenkhat khaw danga nupui pasal fanau neia an awm tawh hlawm avangin Pawisa lamah an rawn ṭang a. Tumah 'a thawh tam bik/ a thawh tlem bik' kan inti lo a. Buaina awm loin kan Project chu kan zo thei a ni.
Ka la hriatreng pakhat chu, Pa pakhatin kan hnatlang tur innghakkhawm lai chu, 'A ban pakhat pawh in phun lovang!' min tih kha a ni! A ban pakhat chu sawi loh, a In kan sa thei a; mipui hman tura kan hawng thei hi ka lawm reng fo dawn a ni!
Kan hnatlan hian Eirawngbawltu atan ka tel ve ṭhin a. Mahnia ka chet theih loh avangin a ṭul zawng zawng ka ṭhianten min ngaihtuahsak a. Hna an thawh mawlh mawlh laiin eirawng bawl ni awm ang takin thuk bulah ka lo ṭhu ṭhin.
Vawikhat chu chaw kan fak dawn kan insingsak lai mekin Thuka Chawhmeh tur kan chhuan chu khaikan mai ka tum a, ka tibaw ta a. Ka inthlahrung khawp mai! Mahse, ṭhianteho chuan fiamthuin an chhilh zui a. Tui ti tak chuan kan ei ta tho a ni.
Kan hnatlannaah hian Inhliam an awm awm ka hre lo. Thim hnua kan haw te, Ruah sur hnuaia kan thawh leh kan hawte kha nakina ngai tak chunga kan la sawi tur a ni.
Kan ṭhianpa Lalhunmawia Chawngthu nupui tur hruai tura Ngopaa Car 3-a kan kal kha ka sawi lo thei lo. Zingkarah Hnahlan aṭangin kan kal a. Vaikhawtlangah kan chawl det a. Kawlbem Thlanmualah rei vak lo kan chawl. Ngopa chu chawhma chhungin kan thleng.
KAWLBEM THLANMUAL
Mo tur chhungkuate chuan Mo hruaituho chawei tur anlo buatsaih a. Vawksa leh eng eng emaw ni kha le? Chaw kan eikham chuan Petrol la turin Petrol Filling Station, khua aṭanga hla em emah chuan kan kal. Kan tihturte kan tihzawhah kan ṭhianho zing ami C Lalrinfelite inah kan kal leh. Ani hian Thingpui Sen hang leh Kurtai minlo hlui a. Kan inhnawhpuar hnu chuan kan haw leh ta a ni.
C LALRINFELI IN
Thim hmain khua kan lut a. Mo hruaiho chuan chawte kan eizawhah mahni in lam kan pan a. A tukah an innei. Ka thawmhnaw neih nalh ber nen ka inkhawm. Inneih Programme zawhah kan ṭhianho bik chuan Ringaihna Tlangah Shooting (Thlalak) kan neihpui a. Thla kan lak zawh hian Mo hruai niin Mo lawmna Programme kan hmang. Kan ṭhianho chu zanlai pelhah kan ṭin darh chauh a ni. Hemi ni hi a nuam dangdai khawp mai! Tunah an inneihna chu malsawma awmin fanu hmelṭha tak an nei tawh a ni.
LALHUNMAWIA CHAWNGTHU NUPUI NEIHNI (RINGAIHTLANG SHOOTING)
Kan ṭhianpa pakhat hi Vapar High School-ah Zirtirtu a nih laiin Teacher's Day ka va hmanpui tawh a. An School thil buaipuiin ka kal tawh bawk. Mahniin insaseng thei lo niin, India ram dana Rualbanlo ni mah ila; min thinhrik hauh lova min dawmtu ka ṭhian FREEBOOTERS CLUB: HNAHLAN hi khawvel awmchhung chu inṭhen hauh lovin ding reng rawh se!
0 Comments