Ref: 1 John 4:12
Pathian hmangaihna thukzia leh sawifiah thiam a harzia hi ilo ngaihtuah ve tawh thin em? Engtiang chiaha ril nge ni ang aw? Nula leh Tlangval inhmangaihna te, Unau inhmangaihna te hi a rilin a thuk kan ti a ni maithei; mahse, ngaihtuah chian chuan tawpchin nei a lo ni. Pathian hmangaihna hi a hrilhfiah phak chuang lo. Pathian hmanaihna nena an tehkhin tak ber chu 'Nu hmangaihna' an ti thin. Nuin afa a hmangaih a; mahse, Nu: mahni fa ngei hmangaih thei lo te, chutiang chiahin, Fa: mahni Nu te hua leh hmangaih thei miah lo te an la awm; tawpchin ala nei tho a nih chu. Pathian hmangaihna hi chuan tawpchin alo nei lova, Hla phuahtu sawi angin Thu leh Hla hian ahril seng lo alo ni! Chuvang alawm mi thahnemtak hian Pathian hmangaihna chu hmangaihna zawng zawng zingah pawh 'a tawp khawk a ni', an lo tih thin! Mahse, chu A hmangaihna chuan phutlet a nei a ni.
Pathian hmangaihnaa sawithiam harsa leh ropui ka tih ber chu A Fapa mal neihchhun kan tana A pe hi a ni. Ilo ngaihtuah ve ngai em aw: kan hmangaih ber hi midangte tan an nunna hlanin hreawm tinreng tuar turin kan pe phal ve ang em? Thing kawkalh chunga A Fapa mal neihchhun kan tana tuar tur leh, A nunna hlan tura A tihlai khan Pathian thinlung nat turzia hi aw! Chhanhim thei reng khan A Fapa tuarlai A hmuh a ngai si! Mahni fate rum aw ngaihthlak reng aia rilru hreawm tur a awm dawn em ni? Khami avang khan Vantirhkoh sang tamtakte kha an tah ve ka ring tlat! Rev. Dr. John Stott- a chuan, 'Pathian hian A fapa aiin min hmangaih zawk a. A Fapa Isua Krista hian Amah aiin keini min hmangaih zawk bawk,' a lo ti hial nghe nghe a ni. Chuti taka min hmangaihtu Pathian chuan A siam Mihringteah hian phutlet A nei tlat. Chu chu Amah hmangaih let ve a ni.
Isua kha mihring ve tho A ni a, na A hreve a. A taksaah nasa takin kut an thlak a. Hliam A tuar a. Diriam namenin an diriam lova! Hlinglukhum A khum a. Min hmangaih vangin kan tan A tuar a. Kross lera natuara A awmlai khan A Pa A ko a, 'Ka Pa, Ka Pa, Engahnge min kalsan?' tiin thlaphang takin A au anih kha. A Pa khan A hrereng. A duh chuan A Vantirhkoh sang tamtak pawh kha Amah chhan turin A tirthei. Mahse, keini misual ten nun tam kan neih theih nan A Pa Pathian khan A kalsan a ngai tlat si a ni! Khatia A mangang authawm hrereng chunga kan tana tuartirtu hmangaihna kha Hmangaihna vawrtawp ngei chu alo ni!! Chu hmangaihna chu kan theih ang tawka thuk leh nasain hmangaihna veka kan chhanlet hi Pathianin kan hnena A phut a ni.
Mahse, engtinnge kan hmuh ngai loh chu kan hmangaih theih ringawt ang? A thilphut chu kan tihlawhtling theive dawn lo a ni maw? Ni love, Johana khan, "Tuman Pathian an hmu ngai lo na a, kan inhmangaih tawn chuan Pathian keimahniah A awm reng a, A hmangaihna pawh keimahniah tihfamkimin A awm a ni", tiin. Pathian kan hmangaih let dan tur chu a chiang mai awm e.
Engkim hi hmangaihna vang alo ni! Pathian hmangaihna hi i vah bosan mai dawn em ni? A Fapa pawh ui lova min petu Lalpa chu enge kan pek ve ang? Engtinnge nang leh kei hian kan thungrulh ve ang le? Engtikahmah kei chuan ka rul seng lovang. Pathianin A hmangaihna kan chunga A lantirah hian vui lova, lawmthu sawi mai tur a lo ni! A thupekte kan zawm hian Amah kan hmangaih let ve tihna a ni!
8:25 AM 5/29/2012
4 Comments
Pathian rawng kan bawlna kawngah hian chak loh changte leh chak chak te kan nei thin ang; chutiang hunah chuan hnunglam hawia thu mai lovin, chakna thar kan neih theihnan kan theih ang tawka kan inbuatsaihsaih a tul hle. Pathian hian Amah hmangaih turin min ko lawm lawm thin si a! A duh anga kan awm loh chuan kan tawrhai A fapa tuartirtu rilru hi A na ve thin asin!
Kan nitin nun kawngah harsatnate kan tawk fo thin. Kan eizawnna kawngah pawh a kawtawpa kan tan a tul chang a awm fo. Chutiang hunah pawh chuan Amah phatsan lova, Amah hmangaih tlat turin Pathian hian min duh a ni.
Kan thisen zawmpui nimiah lote kan hmangaih a, chhungkua kan insiam thei anih chuan; chung aia nasa leh thuk zawka hmangaihna neitu, kawltu, pe theitu hmangaihna chu hmangaihna vekin kan chhanglet dawn lawm ni? Pathian hian i theih ang anga i hmangaih let hi A phut a ni e.
Lalpa’n A thu malsawm rawh se. Amen.