Kum 2009
khan ka nak hi a na a, engemaw natna vang a nih ringin leh, Chuap Tb ka nei tih
inhre lovin Civil Hospital, Aizawl a Opd ah ka inentir a. Doctor chuan ka
chuapah tui a tling tih a hrenghal. A hnuah ka nutei te, ka pi te, ka nu Tlani
telin Casualty ah kan kal a. Doctor mipa pakhat, a hmel ena la naupang tih
hriat, internship ti mek chuan min lo check a. Ka kawr a hlim a, a lawngin tui
awmna awm chu a zawng risk ta a. Syringe pangngai ang hi hmangin a awmna awma a
ngaih laiah chuan a vit ta a. Hmun hrang hrangah a vit a. A na hle. A thi nasa
hle bawk. A tawpah chu Doctor-inti-zira chu a beidawng a. Civil thlanga clinic
pakhatah chuan Ultrasound ti leh turin kan kal a. Ka huphurh hle. Ka vawikhatna
a ni a, ka zuam lo khawp mai. Ka u Hrangchhuana Sailo leh a nupui U Mami an lo
thleng bawk a, ka thla a muang sawt. Chutah, X- Ray kan ti hmasa a. A hnuah
Ultrasound. Doctor chuan ka Chuapa tui awm chu siakchhuahsak min duhpui thu a
sawi. Keichuan ka huphurh takzet a ni.
Doctor
chuan a nat vak loh tur thute a sawi hnu chuan, tap chungin, Mipa fa na na na
chu tiin, ka in ngaihtuah a. Tichuan, mutna tura an siam Khumah chuan a saisir
zawngin min muttir ta a. Ka bul lawkah chuan Monitor a awm bawk a. Doctor chuan
Siai ang deuh hi ka taksa ah chuan a tat a. Khawla a han deh khan Monitorah ka
pumpui chhung chu a lo lang thei a. Tichuan tui awmna hmun chu Penin ka
taksa-ah chuan a chhinchhiahna zel a. A chhinchhiahna zawnah tak chuan Hriau
pangngai aia lianfe hi a rawn vitlut ta mai a! A rawn lut tur chu a na a, a luhchiah
erawh chuan ka nak hi a thawl hawkin ka hria. Tichuan a han siak chhuak a,
Saidawiumte khat dawn lai mai tui fim tle rel mai, Zun ang deuh chu a
siakchhuak ta a. A hriau a han phawi chuan a kua a ni awm e, ka hnungzang vun
chu!
Tichuan,
hemi hnu hian Thisen Test turin a piahdeuhvah kan kal leh a. Anni chuan ka
thisen chu Syringe khat an lo la a. Phaia an thawn tur thu leh a hnu
nihnih-khat hnua a Result lam turin min hrilh a. Kan haw ta a.
A hnu ni
hnih-khat ral hnua ka thisen Test result kan va lam chuan ka Chuapah TB hrik a
lo awm ngei tih a chiang ta a. OPD lamah chhovin TB Damdawi lachhuak tur chuan
kan chhova. Registration te tiin kan buai hle. Tichuan TB Damdawi, Damdawi
azawnga ei nuam lo ber pawl chu a Case a Case-in min lo pe ta a. Ka eina hmun
atan Chaltlang Sub- Centre ka thlang a. Hemi hmunah hian ka damdawi chu dahin,
nitin a eiturin ka kalziah a ni.
Ka Chuap
TB chu kan hriatchhuah hma avangin a lo la nasa lova. Chuvang chuan a Stage
anga an thenah pawh a First Stage ka ni. Tichuan, thla ruk Course chu ka han ei
ta tlauh tlauhva. A changin ka luak a, a changin ka lute a hai thin. Chuvang
chuan ka chhungten Bawnghnute min laksak a. Chu chu nitin ka In thin.
Hetia ka
Chuap a TB avang hian Mizorama MCA (Master of Computer Applications) zir
theihna hmun hmasa bera tling ve a, kal ve chu ka chawlh a lo ngai ta a. Ka hriselna a that vak loh takah chuan ka chhuak ta a. Mahni In lamah ka
inenkawl ta a ni.
Thla ruk
chhung tling lo deuh hlek Damdawi chu ka ei a. Pathianin mal min sawm a, ka tha
chak hle. Chuvang chuan a Course kim taka ka eizawh chuan ka damtha ta hle. Hun
engemawchhung chu ka Nu in min awmpui. He ka Chuap TB inenkawl chhung hian thenrual thate leh Chhungkhat hnaivaiten min ngaihsak viauva, ka lawm takzet a ni.
TB natna
i vei a nih ve hlauh chuan a Damdawi kha ei tha la, a hun takah, a nih dan tur
ang thlapin i ei dawn nia. Chu chu damna bulpui pakhat a ni e.
3 Comments