Thawnthu Tawi: Hmangaihna Nunrawng

A hmain a lo inngaihtuah lawk fe tawh a. A chhungte tan leh tuna a thiltih chhan ber tan hian thu hnuhnung a ziak sa thlap a. Chu chu an awmpui hnenah, a pa hnena lo pe turin a pe nghe nghe a.

World Bank kawng chu an hawn tawh avangin a kawng a la mamtha bawk a, a lun angreng viau va. Tin, kawngchhak lamah Lungbang a awm deuh thluah bawk a. Chung hmunlai chu a thiltih tumna hmun atan a remchang dawn riauvin a hria. 

A duhna hmun a thlen dawn hnaih chuan a Motor- a Car Tape- ah chuan Malsawmtluangi Zai awmna Cassate ngei mai kha thunin, Khuanu ruat loh Di maw ka lo tawn, A na ngei e... tih hla a han play a, a ngaihthlak zawh chuan Sawmtea mit atang chuan  mittui a rawn farchhuak zawih zawih a. A motor khalhlai pawh chu khalh hleithei lovin a duhna lai tak ni chiah lo deuh, kawngsirah a dintir a. Chhuak em emin a tap ta hawk hawk a. Nakinah chuan a Car pawnah chuan a chhuak a. A ngaihtuahna a kal thui hle.

Diktak chuan, mitthi tawh avanga amah hmangaihtu nia a hriatin a phatsanna thu a han hriat meuh chuan a a lek lek ni berin a hriat theih. Chaw a ei thei lova, a muthei lo bawk si! A tap reng a, a tan chuan khawvel hian mawina leh nawmna a nei lo reng reng a ni!

A hmangaih nen khan a hma lawk karah inthlahlel em em in Chawlhni tlaiah an leng dun a. Puan an inzawn a. Hun lo la awm turte an hisap dun a. Inngeih leh inngaina hliah hliah khan an awm si. Khami tlaiah phei kha chuan Sawmtea chu Zualtei te Inah chuan chaw a ei ve nghe nghe. 

Sawmtea leh Zualtei te hi kumkhat deuhthaw lai an lo inhmelduhin an lo inzui tawh a. Chanchin a chhia a tha, chhungkaw boruakte thleng pawha inhrilh tawn, mizia pawh inhre tawn tak an ni. Khua hmun lovah an awm nachungin SMS hmangte, Phone Call hmang tein hmangaih biahthu an inhlan reng thei a. A changte chuan Zanah tlaivar lek leka inrim chang an nei fo thin.

Sawmtea tan chuan Zualtei chu a hlu tak meuh va. A khawharna lak ata khawhar lova siamthintu a nih mai bakah, a nunhluite ngaihtuah lova, hmalam pana ke pentirtu a ni. Tin, Zualtei hian nu na leh duhawmna riau a nei a, chu chu a awphawi hi a ni bawk.

A hmel atanga teh chuan Lady Diana te, Maryline Monroe te a iang hauh lo! Mahse, Sawmtea mitah chuan an ni aiin a hlu zawk si! A aia hmeichhe hmeltha zawk hi Mizo zingah tamtak an awm nghe nghe. Mahse, chung mite chuan Sawmtea thinlungah hmun an chang lova, a them pawhin an luah hek lo. Sawmtea chuan Zualtei chu hmangaihna mita a en miau avangin a hmelin puak han ti em em lo mahse, a kumtluang nuthai atan a iai hauh si lo!

Zualtei pawh hian Sawmtea hi a hmangaih ve thin hle niin Sawmtea chuan a ngai a. Dikna chin pawh a awm thei awm e. Khati fakauva thuka lo innel leh lo inpawh an nih avang khan Zualtei tan pawh Sawmtea han thinthlak ngawt pawh kha thil fel tak a ni lo thei. Mahse, Sawmtea hi Tlangval fel tak, ruihtheihthil khawih lo, khualkhua- ah pawh chhungte rinngam khawpa mahni- a inluah hrang thei, mi rilru tha a nih miau avangin hun lola awm zel turah an pahnih inkarah inhmelhuatna te pawh lo awm mahse, Sawmtea chuan Zualtei chu tihhmingchhiat leh tihmualpho a tum hauh lo bawk.

Khaw hmun lo, tlang leh mual inkar hlat taka awm na na na chu hmeichhia tan rinawm a lo har ngang a ni ang e. Tin, a hmeichhia pawh hian a mipa tana rinawm tluanchhuah thak hi a tum lo pawh a ni maithei. Sawmtea erawh chu chutiang lam a rilru- ah dah lovin, a hmeichhia tan hian a inhlan pumhlum thak thung.

An inbiakna ber chu SMS a ni mai a. A chang chuan Phone Call te pawh ka tih tawh kha. Mobile Phone te chu a Inbox khat thuai thuai thei a ni a. Chu chu hrereng chung siin a hmeichhia zawk hian a tiruak duh mai lo thin. Ngaihzawng nei rengchung si khan a tunlai tawng takin 'a lo ck' thin a. Chuvang chuan a inbox te chu a khat thuai thuai a, a pawimawh ber tur zawk SMS pawh thleng thei lovin a indangkhawm thin a ni. Chuvang chuan an pahnih hi an inhnial ve fova, han inbakkaih leh han in- break changte pawh kumkhat chhunga an huntawn ah hian an nei zeuh zeuh nghe nghe.

Tin, a chang chuan Mobile Phone te chu, Call a ruala chhan theih ni hek lo, Call Waiting- ah pawimawh lemlo zawk kha be reng si in, a pawimawh zawk kha a dah char char thin a. A chang leh a SMS chhan let a tum lova, Call pawh a tum chuang ngai lo. Heti chung hian Sawmtea hian 'Zualtein a biak theihna tur a nih phawt chuan' tiin, a ma hman ai Top Up te a thunsak a. Mahse, chung pawh chuan amah chu va be lovin, midang biak nan a hmangral leh thin. A chang chuan Sawmtea rilru chu a baihvai thei khawp mai.

Sawmtea leh Zualtei te inngaihzawn hma hian Zualtei chuan Bialpa 4 vel a lo nei tawh a. Sawmtea pawh hian bialnu 2 vel chu a lo nei ve hmantawh mahna! Zualtei bialpa pakhat chu Thiltlang khua- a awm a ni a. Chumi chu an khawtlang in inhlawhna an neih na- ah vanduaithlak takin, thingtlu- in a delh hlauh mai a. A nunna chhan tumin an bei nasa hle. Mahse, Sawmtea tana vanduaina tur hrimin a boral ta nghe nghe a ni.

He tia Zualtei Bialpa hlui thihna hian rinloh tak maiin thil kallai chu a rawn her danglam ta bawih mai a ni! Ama tana inhlan pumhlum tawha a hriat, a bialnu, 'rinawm takin aw?' a lo tihpui tawh, Silver Bengbeh a leisak a, a behtir ngei mai khan SMS dengkhawng tak mai a rawn thawn ta mauh mai si! Chu a SMS chu hetiang hi a ni:

"Tunah chuan mi nungte ram chu ilo chhuahsan ta a. Engtinnge ka awm pawh i ngaihtuah der si lo. Nangmah ngaiin ka van ruai reng dawn a ni. I tan ka thinlung hi ka hlan tawh a. Mahse, nang chuan min kalsan ta si! Lunglohtui chu dawnin, Hawilopar chu thliak tawh mahla, hei erawh chu min lo tihsak ve ta che- Hawilopar chu min lo thliah kep dawn nia. I rualin i thlanah chuan ka thinlung chu phumin a awm ta. Ka tel lovin i sakruang chuan he lei ram hi a chhuahsan ta si" tih ang deuh a ni.

He thu hi i dawn ni ta se, i dawnna nen khan la inngaizawng ta ula, engtinnge i awm ang le? Induhtawn em em ni ta ula, inrinhlelh tawnna pawh nei lo bawk ta ula? Sawmtea tan chuan Tsunami tenau a ni ringawt! A chhiar zo chu a mitsulh a, a Mobile kenlai a thlauhva, tah pawh a tap thei lo...

Engvanginnge a hmangaih khan khati tak maia mitthi kha a ngaih pawimawh le? Mak deuh mai a ni. Hmana a bialpa hlui a ni lehnghal! sawmtea tan chuan mak tih leh thinrim, rilru nat bak han tihtur a awm chuang lo!

'Duat' ti ngata a koh thin, a koh changa lo 'eih' lauh thin a hmangaih Zualtei chuan minung damlai thlang lovin mitthi ta thlarau chu a thlang ta zawk a! Engang pawhin lo let dawn se, a sms ngei maiah, 'phumtel- a awm tawh chu a thinlung a nih thu' a ziak miau si a! Chuvang chuan han inlamlet tura insawm vak pawh a harsa khawp mai! Mahse, Sawmtea chu ka sawitak ang khan a rilru a tha a, 'kir leh tura a ngen lawm lawm pawhin, Zualtei chuan, 'hawilopar' chu nungchungin a thliahsan ve ta'.

An hun kaltawhte a thlirkir a. sawmtea chu a rilru a na ngawih ngawih fo thin. Hmanah chuan..tihtur kha a nei ve tlat si a ni! Khatiang tak khan hun te lo hmang dun lo se, lo inhre tawn lutuk lo te chu nise, a zia tur! Mahse, 'nuthai' tura vawitam a sawm hnu khan 'zaldi challo' a tihsan ta si a..

Zualtei nungchang chu Sawmtea tan chuan a ngaihthat thlak lemloh sa hrim hrim bawk tak a. Ka sawi tak ang khan a Inbox a khat deuh reng a. Call Waiting ah a dah emaw, a Switch Off san thul. Chutih lai akarah amah a biak peih loh chang pawhin midang a be peih hle thova. Vawikhat pawh Sawmtea hian Zualtei hi a rinawm leh rinawm loh SIM CARD dang hmangin a fiah ngat tawh a, a duh chu a hmuchhuak chiang khawp mai! Midang a lo be zeih zeih thin a lo ni!

Rinawmna hi Sawmtea chuan hlu a ti a. Rinawmlohna erawh a hua a, a ten hian a ten ngawih ngawih. Chuvang chuan a hmangaih Zualtei bula rinawm taka awm a, a hmalam huna a pasal nih ngei pawh a tum. Chutih lai akarah Zualtei chuan tuilairapah a chhuah ta der mai si!

A nun chu a han dawn thin a. Hmangaihtu a neih chhunten kar lovah an kalsan zel si! Amahin thiam lohna hranpa pawh a nei ngai der si lo! A nun a beidawng ta hle.

Sawmtea chuan Pathian lam a han hawi a, mahse Pathian chuan chuti maiin a rawn thlamuan bawk si lo. A hringnun chu a khirh takzet a ni ber. A hawina lam apiangah thiktur tawka lo chetla inngaizawng an awm zel a. A rilru- ah lah hliam a awm tawh bawk si!

Sawmtea chuan a nunhluite chu a theihnghilh mai thei si lo. Tunah pawh hian chuvang chuan lungngai em emin a tap a ni. Mahse, nakin deuhvah chuan a mittui chu a hru sawk sawk a, rilru na tih hriat tak, lungngai tak chuan a Motor chhungah a lut a. A motor chu a han tinung a. A gear chu a han kuai sawk a..

A motor chu a Clutch a rap bet a, a han ti rum ham ham a... Thawklehkhatah a maka maka chakin a Motor chu a han leu tir ta a. A hma deuh fe a kawngchhak lama Lungbang chang tha tih hriat reng reng chu na tawkin a va su ta bur a! Sawmtea bek atang chuan thi a rawn far zaih zaih a.. A mit atangin mittui leh thisen inpawlh a lo luangchhuak bawk a. Thaw leh tur a awm tawh lo. Engtintak Zualtei chuan a chanchin a hriat hunah lo ngai ve ang maw?

Amah avanga a lo intihlum ta a nih apwhin a ruang a kil loh tur thu thlenga hrilhtu Zualtei vanga rilru na chuan thlafam dairial chu Sawmtea chuan a lo chang ve ta! Tunah chuan Lunglohtui dawnin Hawilopar pawh a thliak ve tawh ngei ang.

1:15 AM 9/24/2010