MY COLLEGE DIARY ( 2005 -2008 )

Ka tum ka tum ṭhin a, mahse a tih a tih-luih loh chuan ziak tikni ka neidawna  ka hriat loh avangin he Article hi zanreh tawh, ka mu tawhhnu ka thova, ka’n ziak ta poh a. Zanrei lamte a nih tawh avangin ka ziak buhnuaih mai thei a, chhiartuten min lo hrethiam mai dawn nia (Hetia ka han thliarhran dan hi a  mumal chiah lo maithei. Mahse, a engemaw lai bik hi thlurbing ka duh avangin hetiang hian ka han ṭhenhrang deuh hlek a ni). 

 

FIRST YEAR 

Admission 

Awle, kum 2005 kha ka la hrereng mai. Ka pian a hnua College ka rah vawikhatna a ni. Nia, khami kum kha tunah hian ka thinlungah a la chamin, kha kuma thilthleng tam takte kha ka mitthla-ah hian a la fiahkhawp mai. Ka zirna lamah tlema ka hnungtawlh ve deuh avangin ṭhiante ruala Engineer pawh zir tum ve ran khan zir hmanlovin Computer zir tumin he kan College tia ka chhal ve kumkhua tawh tur Govt. Zirtiri Residential Science College hi ka rawn pan ta kha a ni a. 

Vanglaini Chanchinbu ka chhiar a, B.C.A. a zirtheih thu ka hriat veleh kan khua (Hnahlan) aṭangin kan Principal ka phone a, amah a lo awmloh avangin annu hnenah zawhfiah ngaite ka zawtfiah a, tichuan kawnghmang engvakmah hre lo chuan ka rawn sezawl chhuahthla ve tawp a nih kha! Ka rawn thlen hnu chuan a hma thei ang bera in-admit ka duh avangin in-admit tum chuan mahniin ka kal ta rawih a. 

Engtiang chiaha tam nge Fee chawi ngai tih ilo fahran pawh ka hriat loh avangin kan neih loh chu thukhat, pawisa ka keng tam lo. Mahse, ka rinphak miah loh a tam kha Fee atan chawi a lo ngai a, ka pawisa kenin a daih ngang si lo. 

He College-a nei lo chung chunga ka in-admit theihna chhan pakhat chu kan College Accountant, Pi Rinzuali vang a ni. A lakah hian lawmthu sawisen loh ka sawi mawlh mawlh ni tehse. Ama min buaipui na zarah tun thlengin ka la kal ve thei zel a, a lawmawm takmeuh a ni. 

Tichuan, kan Principal hnenah hian Application Form ka thehlut a, anin a zahngaihna ka lakah a lantir a, ka lawm hle. Semester engemawzat chu Installment-a Fee payment in ka lut ve ta Tunah chuan Zirtirians ka lo ni ve ta reng mai!! He College-a ka luhdawn, ka in-admit vellai bawra ka buaidan leh ka nikhua lohdan chu sawivek sen a ni lo, mahse ka theihnghilh ngai lovang (A duh chuan Pi Rinzuali zawt mai teh u)!! 

Students' Union OB Election

College Students Union O.B. thlan a lo hun ta a. Kei pawh chu ka tuina lampang- Article ilo fahran ka lo ziah ve tawhte ngaihtuahin Magazine Editor atan chuan Fresher Student khan ka han chuh ve ta rawih mai a! Khami kuma ka khingpui kha a hmalawk kuma an Editor lo nitawh a ni a. A ding nawn leh a, a tling leh reng bawk. Fresher ve si khan khatia ka han chuh ve takah leh, ka han tlak dawp hnu phei kha chuan ka zak chem chem thei khawp mai. Ka tlin loh aleiah tlaikhaw hnu feah a chhuah phah ta a, kan First Year kuma kan College Magazine chu kan Final Year kumah kawng hrang hranga beih anih hnuah a chhuak ta chauhva! LPS-a Ka vei zawng Programme-ah kan Editor tlingta zawk chu ka han kah ṭhuai mai kha!! 

College Week

College Week ka vawikhat hmanna kha aw, a va nuam vawng vawng em!! 

Khami hun, ka pian a hnua College Week hman vawikhatna kha ka tan chuan rahbi thar kaina pawimawh tak a ni. House-ah min han ṭhen a, ka awmna House aiawha a theihna apianga tel kha ka duhdan a ni a. Tichuan, ka awmna House aiawh chuan Debate, Extempore Speech, Essay Writing, etc., ahte ka tel.

Hengah hian endiktute duhsakna zarah lawmman pawh ka hmu ve hlawm. Hemi Week kan hman laia kan Sir Marina hova Vaivakawn Field sira Khuang benga kan au dar dar laite kha ka mitthla-ah hian a cham reng ṭhin. 

He College Week hman min tihnawm tirtu pakhat chu C. Lalrempuii kha a niawm e. A ni kha Lunglei lam a nia, a chhe lo reuh zek. A hmel a ṭhat mai bakah  engkim mai kha a hneh vel vek mai a. A Table Tennis khelte kha ka enning thei lo. Mahse, ani chu ka banphak a ni si lova. Tichuan, ka vanneih asiamin Miss Contestant zingah alo tel ve hlauh mai! Kan House a ni em kha aw, ka chiang ta lo. Tichuan, Extempore Speech-a sawitur ka pawhna-ah khan 'Kan College Students zinga hmeltha ka tihber chu..' tih kha ka pawtfuh a! 

Tichuan, kei chuan zak tak chung chuan Rempuii chu ka han sawi ta a!! Midang khan an lo lawm phian mai a. Endiktu lam chuan Rempuii chu a ṭhutna tang chuan an rawn dinchhuah tir a, a nuam ve khawp mai, mahse; a zamawm!! 

Hemi hnu hian Miss Contestant-te chu zawhna pakhat, 'I pasal duh zawng?' tih an zawt a, Rempuii chuan keimah kha min rawn thur ve leh nalh mai a, awiha!! a nuamin a va hlimawm tak em!! Khang hunte khan tunah chuan zamual min liamsan ta si a, kohkir leh ka chak kumkhua dawn a ni!! 

Computer

Computer kan han zir ṭan, First Semester kan han kal chiah kha ka tan  chuan hun hlimawm tak a ni ve reng reng. Mi pakhatin Computer pakhat kan  hmang a, kan duh dan danin kan han khawih vel a. Kei pek chuan Password an dah lohna Computer ah chuan Password ka lo siam a, a hmang ve duh kan Senior-teho khan Class kan neihlaiten min rawn kochhuak a, Password chu ka zu hrilh a, a chang leh min han zilh deuh va, mahse Password chu ka lo siam ve  leh ṭhin a. Chuvang chuan kan Sir Marina pawhin fiamthuin, 'Kan College Computer ah chuan Virus a awm a, chung zinga pakhat chu Hmingtea Virus a ni,' a ti ṭhin! Tun hnu thleng hian khatih hunlaia kan awmdan kha ka la hrereng ṭhin. 

Inter College Week

College Week a han liam a, Inter College Week alo hun leh ta. 

Participants nilem lo pawh a bo a bang awm lova kan College kan Participate-na Items an tihna hmuna kal zel kha keini Students nazawng tan kha chuan kan duties a ni a. Tichuan, kan College Bus Driver Pa Zira hovin a tamthei ang ber kha Bus-ah kan han inhnawh a, tichuan Aizawl khawpui chhungah a changin Vaivakawn, Bawngkawn velah kan han inphur kual a, kan Hmeichhiate lahin Pa Zira an lo chhawnchhaih a, Motor kan tawh chang pawhin, 'Pa Zira a back ngai lo' ti tein Pa Zira an lo fuihpawrh a. A nuamin a hlimawm thei ṭhin khawp mai. 

SECOND YEAR

Awle, First Year chu tluang taka kan exam zawh hnu chuan Result chhuah hmain Second Year/ 3rd Semester chu kan lut leh ṭan ta. Keini aia Junior an lo lut ve ṭan ta a. Tunah chuan tlemin kan lo Senior ve ta. Laboratory enkawl pawh an kutah a awm ta deuhva, tlemin kan thu ve ta deuh. A kum hnihna a ni bawk a,  kan zirpui ṭhenkhatte chuan an zirna an chawlhsan a, a then DOEACC lamah te an kal a, tichuan kan peng darh ta nual mai. Tlemin kan Class pawh kan tlem ta deuh. Mahse, Attendance lamah pawh kan Lecturer-te an khirh ṭan ta deuh bawk. 

College Week

First Year kan nih kum ang kha chuan a nuam ka ti ta lo hle. Hemi kum hian engahmah ka chhuak ta lo. Mahse, kan duty chu Sport na hmuna kal ve zel kha a nih vang erawh chuan ka hriselnain a tlin chuan ka kal ve ziah. A changin College Bus-ah ka lo ṭhu a. Department dangah Students thar an rawn luh nual avangin anmahni chuan Sport pawh a huhang a tinuamin ka hria.

Second Year hi ka tan chuan kum pawimawh tak pakhat a nihna a awm a. Chu chu ka hmangaih leh duhber, tun thleng pawha ka mang lama ka la hmuh ve deuh reng L.V. Zothankimi a lo luhve kum a nih vang a ni. Amah avang hian ka nunah hian thil kaltawh tamtak a awm a, sawivek sen a ni lovang. Mahse, min duh lova, pasal min neihsan tih erawh chu ka han thailang teh ang. Nia, a pasal neih hma lawk kar-a ZALEN Sunday Issue ah amah thlahna thu ka ziah kha!!! 

Pasal nei tawh ni mahse, ka tan chuan a danglam vak lova, ka hmangaih reng thova, a ni lahin min haw reng tho? va! Mahse, ka hmuh chang hian lungawina engemaw tak leh rilru nat vanga nat ngawih ngawihna thlarau hian min thunun ṭhin! Hetia College Week vel laite hian amah ka hmuh theihna tur a nih phawt chuan ka dam lo pawh ka kal hram hram hram ṭhin a nih kha. Khang hunte khan zamual liamin tunah chuan thawnthu ang mai a chang zo ta. 

Chuvang chuan ziak ngeia khang hun ka hman dante kha dah hi ṭul ka ti a, ka rawn ziaklang a ni e. 

NSS Special Camping

A hun leh ni kha ka hre ta mai lova. Mahse, College Week zawh hnu, Inter College Week lai ani tih erawh chiang takin ka la hria. Last Hours-ah kan NSS Programme Officers Sir Zira te, Sir Lowrence te, Miss Mazami te, Sir Rinmawia te duhsakna a zarah Leithum leh Vanzau khuaa NSS Special Camping chu Department of Computer Science aiawhin ka chhim ve a nih kha. He kan NSS Special Camping hi a nawmzia leh tun thleng pawha ka tana chhinchhiah tlak a nihzia chu Last Year Magazine lamah ka ziah tawh avangin sawizui vak lo ila a ṭha awm e. Mahse, kan chuanna City Bus Darthlalang pakhat erawh chu ka harh lutuk vangin ka tikeh a, ka kut ka tipem tih erawh ka ziahtel loh avangin ka han thailang hram teh ang. Rihdil-a Natalia-i zun te, a kama Playing Card kan den te kha chu sawitawh lo mai ang. 

Picnic/Farewell: 

Kan College Students Union hruaitute an chak bawk a, Farewell deuh roh, Picnic deuh rohvin Sihhmuiah kan kal a, a nuam khawp mai. Khami ṭum a nawmzia leh tun thleng pawha kan la sawinin loh zia chu!! Kum dangah pawh hian Farewell emaw Picinic emaw tal nei ziah thei ila a duhawm hle. 

Huapzo Programme

LPS Vision buatsaih, Huapzo Programme chu kan College-ah Pi Mali hovin an rawn huaihawt a. Keini Department of Computer Science lam chuan kan hre hauh lo. Mahse, ka vanneih asiam nge, an thiltihna hmunah ka zu kal ve a, vanneihthlak takin Item pakhat Chhangthawp ei turin Pi Mali chuan min rawn kochhuak ta hlauh mai a. 

Pawisa hlawh tur a awm avang khan thei leh thei lo khan Chhangthawp pum lian tawk phel kha 1 minute chhungin ka han ei tak tak mai a! Tui a awm silo, tui intur kha ka dil a, time ka dil belh bawk. Tichuan, engengemaw ka hlawh ta nual a, ka vannei teh a sin aw, khami ni zet kha chu(h)!! Hemi Item ka tilai hi kan khuate hovin anlo en a, a hnuah kan khua-ah LPS Sub-Distributor-ten an tichhuak ve leh a! Kha Video khan Mizoram dung leh vang a lo fangvel a, khawlai  vela hmelhriat tawh pawh a phurawm loh phah lek lek a ni! Mahse, a nuam ve deuh roh bawk si a!! 

THIRD YEAR

Fifth Semester kan ni ve ta! Hemi tum hian kan NSS hotute duhsakna zarah Department of Computer Science lam aṭangin Chennai kal tur min thlang a. 

Keia pek chuan kan kalchhan tur Solakia thiam uk lo chuan thiam anga inchhalin kalve ka tum a. Kan hotute chuan min 'YES' liamsak ve leh mai a. Tichuan, theihtawpin lam chu ka han zir ve ta a. Ka lammawi thei ngang lo a niang, Khuang bengtu atan min han tinzawn tituai a. Tichuan a zir lampang chu kan han zo ta a.

 

Kan han kalchhuak dawn a. Kal kalna tur senso tlangpui chu tumsak kan nihdawn piahlamah, hun kan heh loh nan leh a nawmzawk avangin Air Route hmanga kal kha kan tum a, a senso tur pawisa pawh kan thawh khawm a. 

Tichuan tha-tho leh phur takin, hmalam hun suangtuah neuh neuh chungin, Chennai kal tur chuan Lengpui Airport chu kan pan ta a. Vanduaithlak takin, tun thlenga Chennai ka la thlen loh phahna ni turin chumi ni chuan Thlawhna a lo thlawkthleng lo ta hlauh mai! Air Deccan -ah kan lo Book si lo. Kan Miss Mazami a hah khawp mai. Khami ni kha chu keimahni mai  kha kan rilru a buai lo, kan Programme Officer te pawh an rilru a buai a ni. Hunbi tuksa vek a nih a nih avangin nidangah i kal ang u' tih kha a theih ve tawh siloh!! Tichuan, Sumo hire te kan han rilruk a; mahse, kan tithlu ta lova. Tichuan, zingkara Chennai pan tura Lengpui kawnga hlim taka Taxi-a inphur te kha ngui nghiaiin leh thinrim teuhvin Taxi bawkin mahni In lam panin kan tlan haw leh ta a nih kha! Khami tuma Sir Rinmawia riru buai te, Sir Zira rilru buai hmelte, Miss Mazami rilru hah hmelte kha tunah hian ka mitthla-ah a la lang thei nia!! Theihtawp chhuahin lam kan zir a, chawhma Class kalin chawhnu lam lam zirin kan buai a. Hmun hrang hrangah lam kan zir a. Nutei te Inah kan lam bawk a. A theihna hmun hmun hmunah lam kan zir a, kei phei chuan Hostel-a ka Room-ahte ka zir a!! Mahse, hah taka kan lo zirtiam ave Solakia chu Chennai-ah zu Show lovin, tihian kan paiṭawih vel ta mai mai a nih ber hi! Vai ho vang vek!! 

Vaiho hi kei chu ka hua a nia!! ( Sawiawm leh awmloh a ni em aw, ka hre chiahlova, Vai han sawikai takah chuan khulama ka Mizo pui zirlai tam tak rawn hawte tawngka ka dawn tam berah chuan VAI an SUAL thu hi a ni. Chuvang chuan kei chuan Vai hi ka ngaithei lo ve tawp! Ka sual thei khawp mai-Footpath-a ka kal a, ka lam pana an lo kal changte hian ka lo nekthla tawp zel!! A chang leh an hnungah ka zuiru a, an hriatloh hlanin ka kalh zeuhva, an petek nawlh thin!! Sual min ti viau maithei, mahse Vai huangtau zia hi ka hrechiang ve khawp a sin!! Chuti ni lose, ka enliam ve mai mai ngei ang!!) 

Pathian khawngaihna azarah tluang takin Semester 5-na kal lo kalsan ta a. 6th Semester kan lut leh ta. Hemi kum zet chu Department of Computer Science-te tan chuan MARRIAGE YEAR a ni ngawt mai!! A hmasa ber atan Lalngengpuia of kan Batch leh Vanlalruati of kan Junior te Tuikual Presbyterian Biak Inah an han inkutsuih phawt a. A nuam khawp mai. Kan Class leh kan Junior te Class an kal tha a, a hlimawm khawp mai!! Tlaiah puar nalhin Vawksa kan ei bawk a, ka tlai khawp mai!! 

Baby R. Lalhlimpuii of kan Batch leh Valpuia of kan Junior-te an han innei veleh a. Hemi tum erawh chu Semester exam kan neih vellai a nih avangin ka kal ve hman lo. Anni pahnih hian lo haw lo se, fiamthu a, 'Tuman an thik lovang' kan tih thin an ni. 

First Year kuma kan Sir Marina pawh tunah chuan a lo senior ve ta hle a. 

Kawm pawh kan kawm pha lutuk ta mang lo!! Tunhmate kha chuan Vaivakawn Field kamah Khuang a beng a, keini phur in kan lo aurual thin kha a nia!! Tunah chuan a ni pawhin NUPUI lam a ngaihtuah ṭan ta nge, tunhmate chuan kan in-SMS zak zak thin kha a nia, a reh ta khawp mai!! 

Engpawhnise, B.C.A. ka zirchhung zawng hian, ka Student puite lakah emaw, kan Lecturer-te lakah emaw, he College-a Teaching Staff or Non- Teaching Staff zawng zawngte, in lakah thil tihsual leh tawngsual palhte ka lo nei mai thei a. Chung chu a awm anih chuan chutianga ka lo tihnaah chuan min ngaidam turin ka ngen takmeuh che u a ni e. 

Tin, Nakin lawkah kan College hi a Residential thuai turah ka beisei a. He kan College hi tluang taka a kal a, Model Institution ṭha tak a nihchhoh zel theihnan Student tinte pawhin kan zirchhuah leh he College kan chhuahsan hnuah hian hrereng ila a ṭha awm e. Zirtirians kan nih ang ngeiin Zirtiri College  hmasawnna atan leh College dangte elphak a nihreng theihna turin Student te hian ke kan pen ngam tur a ni dawn lawm ni?

Zirtirians zawng zawngte, in zavaiin, Final Semester, Department of Computer Science Department, 2005 Batch hmingin chibai a tawp ber nan ka buk a che u. 

Ka lawm e. 

(Thubelh: Khi Article khi 2008 Annual magazine-a ka thuziah, ka edit nawn leh a ni.

Tin, he Article ka edit leh ka enlarged lai hian kan Batchmate Vanlaltlani, Mission veng pawhin hmanni lawk khan kan Junior Francis-a of Electric Veng chu a kumtluang pasal atan a neita bawk. Baby-i te pawhin fanu hmelṭha tak mai anlo nei tawh a, a chumin a nu ang main a thau hle. Ngengpuia te pawhin fanu hmelṭha tak an nei ve tawh bawk! Ka lawmpui e. 

Engemawchanga kan han inhmukhawm ṭhin chu a nuam thei khawp mai! 

University Convocation-ah kan kal ta em ka chiang lova, Degree Certificate kan dawnte khan a va hlimthlak tak em! Hemi hnu hian J. L. Picnic Spot-ah kan Zirtiri Lecturer-te nen kan Picnic a, a hlimawm dan a dangdai khawp mai!

Kan chhuahhnu lawk hian Lecturer thar 2 an lo nei a. Tin, Library pawh an Computerised ṭan tawh bawk. Building erawh chu a ṭhin ngaiin a la ṭhing reng a. 

College dangte angin Campus ṭha leh nuamte neihve chu a hun tawh khawp mai! 

Kan Lecturer Original ho erawh kan la ngamtlak reng thung! 

Tunah chuan Melody Lalnunsangi (Melo-i) pawhin hna ṭhatak mai a hmu tawh a. Ngengpuia pawh SSA hnuaiah hna a hmu tawh bawk. Kan Batchmate Saizamliana (Saia) erawh chu phai lamah a awm thung. Tin, tunah hian tlem azawngin Master of Computer Applications kan chhunzawm a, a tamzawk an chawlin, hna engengemaw an thawk tawh hlawm!)