KA HMANGAIH, KUMTLUANG ATAN MANGTHA LE..
Tunhma aṭang tawha thleng ngei ngei tur a ka rin; ka huphurh lawk em em mai, tunhnai lawka thleng tur a awm a, chu chu ka hmangaih ber, min hmangaih ve lotu ‘pasal neihni’ a ni.
Kei chang ni lo, midangte pawhin hetiang ang hun hi an lo tawng tawh ṭhin a, an la tawng zel bawk ang. Tun chauh lo hi kei pawhin ka la tawng lo vang tih a sawi theih hauh loh!
Lengdang tawna vul mai tur, he ka hmangaih em em hi, he chanchinbu hlutak chhiartuten in mi hriatpuina-a thlahliam ka duh a, he Article tawite hi ka han thai ve a ni e.
Nia, hmangaihna hi a lo mak khawp mai. Kan hmangaih em emten min hmangaih ve lo va, min hmangaihtute kan hmangaih ve thei lo tlat mai te, min lainat em em tute kan lainat ve thei lo te hi mak danglam tak niin ka hria.
Mihring rilru hi a lo mak khawp mai. Kan hmangaihte tana kan inhuam zia te, kan inpekzia te hi chhuichian theih rual pawh a ni lo. Kan hmangaih em emten min hmangaih let ve lohva kan tuar zia leh kan rilru nat ṭhin dante hi!
Ṭhenkhat chu an rilru a buaiin, an hmangaihten an duh lo emaw, an chhungten an duh lo emaw anih chuan mahni nunna hialte pawh an titawp mai ṭhin.
Hmangaihna chungchangah rau rau hian ngaihdan tamtak a awm thei ang, Mitam tak chuan, ‘min duh lotu chu eng ang mi pawh nise, duh loh ve mai tur, lengdang an tam em!' te pawh an ti ṭhin. Chutih rualin, 'engahmah min ngai lotute chu engahmah ngaih ve loh mai tur' te pawh an ti ṭhin bawk. Engpawhnise, min duh lotute lak rilru ṭhatak pu hi chu kan tam lutuk hran loin a lang.
Mahse, han ti teh ang: Kan hmangaih tak tak(?) te tana kan lo inpumpek zawh zia leh kan lo inhlan (Sacrifice) zia hi mak deuh a nia! Kei ngei pawhin engahmah min ngai lotu chu kum nga(5) dawn thaw ka lo hmangaih ngawih ngawih a. Mahse, chu ka hmangaihna chu chhanlet lohvin pasal min neihsan dawn ta chu a ni a! Val hi rilru ava na ve!!
'Pasal a nei dawn' tih ka hriattirh a min han den zia kha aw! Ka hit mum mum a, ka lu a hai deuh chhalh mai. Ka lung a zing chuai chuai a, ka thinlung bawm a kehchhia a ni ber e. Ka khawhmuh a phe ruai a, mittui a hnai a, hnap a tui ṭan!
Lenna hmuna thil hriat nuam lo tak hriat han hreawm zia hi aw! Mahse, khami zana ka lennate kha chhungkaw fel tak annih avangin leh 'ka ui, ka ar' min ti thei tura ka ngaih, ka 'family' anga ka ngaih an nih avang in tlema tlemah ka mualpho lo chauh! Hmun harsa leh hreawma min lainattute lo ṭhatzia leh hlutzia hi aw!!
Tichuan ka han haw a, ka muhil thei hlawl lo! Ka let, ka let a, chhingmittui far chungzelin ka lo muhil ve theita hram kha a nia!
Engpawhnise, hriatreng nana ka hmanna tur ka e-mail ID-a telve, he tleirawl hmelṭha leh duhawm hi thil a nihtur angin a ni fel vek tawh a, a 'nipuini ber' tih chauh lo chu engkim a fel vek tawh a, karlovah fanau an chawidun dawn bawk nen, kei zawng rilru na tak chunga thlahna thuziah bak tihtheih ka nei ta lo ve.
'Lunglen chu khuareiin a hnem ber' an lo ti ṭhin bawk a, hun te han inher liam zel se, rilru pawh a dam ve tial tial mahna! Mahse, rinlawk deuh, la ni chiah lo- hi ka hmangaihber pasal neihni hi ngahthlen a chakawm lo khawp mai. Dam takin lengdun se, a pasal tur nen chuan kumtluanga fanau maltluan chawia an lendun ka duhsak tak meuh meuh va, he Article tawite hmang hian ka'n thlah ni teh se.
(He Article hi Zalen Weekly Magazine- in an inneih hma chiah kar Chawlhni chhuakah min tihchhuah sak a, an chungah lawmthu ka sawi mawlh mawlh a ni e)
0 Comments