Ka SMS ṭhian kha

Thawkkhat lai khan SMS ṭhian fel deuh mai, Lungleia mi ka nei a. A tira kan inhriatna bul pawh Lelte Weekly emaw ni, Zozam Weekly/ Zoram Today zawk nge maw ni, thian zawnna huangah ka hming leh Mobile No ka thawn ve a, chu chu lo hmuin min rawn sms ta a ni.

Kan inhriat ṭantirh laite kha kum li vellai a liam tawh na a, lung a tileng ṭhin khawp mai. Keilah khan a chang khan ka lo ṭahkhum a, a ni pawhin min ṭahkhum ve fo ṭhin. Mahse, kei aiin a upa a, mi dawmdan te kha a thiam ṭhin zawk a, tun thlengin inhmelmak phah lovin kan la inbe fo ṭhin a ni.

Amah hi ka sawitawh ang khan ṭhian angin min enbakah a nau angin min en a. Ka dinhmun min hriatthiam pui a, a chang chuan ka nawm loh hlauvin Top Up te pawh min rawn thunsak ve hial ṭhin a. A pawisa ang pawhin ₹ 300 lai chu min rawn thawn tawh nghe nghe.

A thlalak min rawn thawn tawh a, ka thlalak ka thawn ve tawh bawk. Keichuan eng thilhlu mah ka la thawn ve lem lova! Roll Film pakhat ka thawn kha a man a tam ber awm e!! A ni erawh chuan pawisa fai mai bakah, Silver Case Lighter min thawn tawh bawk. Tin, ka sawi tak ang khan Top Up pawh min thunsak tawh ṭhin nghe nghe.

A ni nen hian a hring a hranin la inhmu lo mah ila. thlalak aṭangin kan inhmu tawh a. Kan inhriat tirh laite khan kan inbe zing mawlh mawlh bawk a, a chhungte pawhin ka aw kha chu an hai lo khawp mai!!

A pa hi School pakhata Headmaster a ni a. An unau hi an rual angreng phian bawk.

He ka ṭhian chhar hi Mobile Phone ka neih hnua Mobile Phone ka chhawr ṭangkai berna niin ka hria. Tunhnu kum li ral hnuah pawh kan inbe zauh zauh va, mahse kar te a hla a, inbiak nan sum leh paite leh hun te a lo ngai leh zel nen, tunah erawh chuan kan inbe ngai tawh lutuk lo!


Ka sawilan duh pakhat chu, ka SMS ṭhiannu hian hmangaihna kawng hi a zawhpelh ve nasa hle a. A pasal nen an inṭhen chhan pawh a pasal hian Zu a in nasat vang a ni. Inṭhen tawh mahse, a pasal hian a la duh em em a, koh leh a tum fo ṭhin. Mahse, an inkarah Zu chuan daidanna bang a siam tawh tlat si a!!

A hun tawn tawhte ka ngaihtuah pui chang chuan ka lainat thei khawp mai. Tunhma kan inbiak ṭhin lai chuan a chanchin a chhia leh a ṭha min hrilhhria a, ZawlaiDi- a ziahsak turin min ti a; mahse, tunah hian ka rawn ziak theita chauh a nih hi!!

Kan inbiak ṭhinlai kha chuan a chang chuan a lungchhia hi a ṭap a, hnem a ṭulfo ṭhin. A pasal nen an inṭhen avangin eizawn nan Puan a thui ṭhin a. Amah mai bakah a fate pahnih a chawm a ngai bawk a. A pa Inah an khawsa ve nawk nawk a, an lo rualkhat bawk nen, a hringnun chu a eng lo ve khawp mai! Hemi avang hian a chang chuan a fa te muhil lai hmel pawh a hmuṭha ngam lova, a ṭap ṭhin hial a ni. Zu tak hi chu aw, hmangaihte nen inṭhenna dar vawtu a ni ṭhin hi a buaithlak khawp mai!!

He ka ṭhiannu pual hian ZawlaiDi Chanchinbu ah hian thu pakhat tal ziah loh chu nitheia ka hriatloh avangin leh, hun lola kal zel turah ka huntawn tawh- amah nena hun kan hmandun tawhte kha la theihnghilh thei ka nih avangin heti hian ka rawn ziak ta a ni. He ka thuziak hi a ma tan liau liau ka rawn hlan bawk e.

A fate pawh Phone- ah chuan ka be ve tawh nghe nghe. An chunnu a fel bawk a, nakinah an lo ṭhanlen hnuah pawh, Lunglei khawtlang tana mi ṭangkai leh chhawr nahawm an la nih ngei ka beisei tlat a ni.

A eizawnna ber Puanṭhui a ni chung hian a SMS ṭhian mai mai pawh minlo ngaihsak thiam hle a. Harsa taka a rahvir chhuah pawisate pawh min rawn thawn tawh hial a. Dik tak chuan ka chunga a ṭhatna hi engtikahmah ka rulh theih ka ring lo!!

Tunlai ṭhangtharte hian SMS hi kan hmang ṭangkai thiam lo hlein ka hre ṭhin. Thuho deuh leh ṭawngkam bawlhhlawh tak tak inthawn nan kan hmang a. Ṭhenkhat chuan mi bawl nan an lo hmang mek bawk a. Kei leh ka Ṭhiani erawh chuan kan harsat laia inṭanpui nan leh inhnem nan kan hmang ṭhin!! Fiamthu pawh kan thawh ve fo va, mahse ṭawngkam tlahawlh zawngin engmah kan inthawn ve ngai lo!!

Kan inbiak chang pawhin tunlai ṭhangtharte angin, chumi khami chu ka Star, ka duh e, tih nan te, midangte rel nante kan hmang ngailo!! Ṭhenkhatte anga zahmawh thu sawi nan kan hmang ngai lo bawk!! Tunlaia ṭhangthar tamzawkte hi chuan kan rilru lo pui pui sawi nan SMS leh Mobile Phone-te hi kan hmang a. Kan thawhchhuah ni lo tawp Mobile Phone kan nei a, a Top Up-na tur kan nu leh pate kan la dil zui!!

Kristian 100% inti ramaha hian ṭhangtharte chauh lo pawh, Nu leh Pa, Pastor etc., thleng hian midangte va bawl nan leh va rel nana SMS leh Mobile Phone hmang kan tam lutuk!! Hemi avang hian alawm, kan ramah hian ṭul lo taka Sex Video te an siam a, a lo leak out ṭhin ni!!

Chanchinbu khawi khawi emawa Zawnglai huang leh Ṭhian zawnna an siam hi a tha viau na a, mihring nun leh moral tichhe thei a ni tih erawh chu keimah hian ka chian tawh a, chuvangin hengahte hian intilang ve mai mai suh!! I duh ang chu anlo kal a ni maithei, mahse, rei an rial ngai lo vang che!! Hetianga i tiha rawn be pawhtu chu chu eng mipawh nise, mahni nihna zahpui, mahni neih aia sanga khawsak tum lerh leh hur, pawisa duh an ni tlangpui!! Ka va chiang tak em!!

Thawkkhat lai khan hetiang lamah hian ka rilru ka pe khawp mai a. ZawlaiDi Chanchinbu- ah pawh keimah vang liau liauvin Zawnglai Huang (matchmaker) siam a nih kha!! Tichuan, ka duhzawng ang kha an lo kal ta tak tak a, ka ṭhiannu ka sawitak anga fel leh ṭha hi tuna midang pakhat tih loh chu tumah an awm lo!

Nia, hetia ka Mobile No ka han tlangzarh taka khan hmelhriat pawh ka ngah ta sawt a. Tin, an hmel pawh ka hmu tawh hlawm a. Chung zinga ṭhenkhat chu an ngam loh tur pui ti niin ka hria!! Ka sawi awmzia chu, khatia ṭhian tur ka va zawn a, min rawn contact a, kan han inhmuh khan hmel leh zia thliarhrang lo ni a insawi kha a tukah chuan thehhmeh angin an reh vang vang ṭhin a ni.

Thawkkhat lai khan Reiek- ah, a chhas neih vanga Class-X repeat pakhat nen kan inhria a. Lehkha min thawn a, a thlalak nen! Keipawn , lehkha ka thawn ,a ka thlalak nen!! Mahse, a hnuah chuan a reh ta daih a!! Kum hnih vel hnuah kan inhmu leh a, hmuh pawh min hmu ngam lova!! A thlalak atanga ka hriatchian em avangin ka be hmasa ta zawk a nih kha. He thu hi a lo chhiar a nih chuan a inhrechhuak rauh rauh ang chu!! Ka Top Up sak ṭhin laite kha a hrechhuak ngei ang!!

Tin, Kolasib- ah ṭhian ka nei bawk a. Thlalak kan inthawn tawn a. A hnuah Aizawlah kan inhmu a. Mahse, hmeichhe lerh tak a lo ni e. Republic Vengah pakhat ka chhar bawk a. An Inah ka leng a. Mahse, a ṭhiante min kawm san!! Ka haw daih!! Edenthar- ah inla KTP ve tak mai pakhat chu ka chhar bawk a. A tirah chuan a SMS pawh a thlum thei hle!! Mahse, chanchin ka han hrechiang a, an In ka han luhchilh meuh chuan khawilamah!! Tin, Tuna MZP Pisa pui bul lawkah sawn ṭhian ka chhar tawh bawk a, min hmu ngamlo vel!! Chuan, Khatla- ah pahnih ka chhar tawh bawk. An Inah ka kal ve ve tawh bawk!! Diktak chuan hetianga chanchinbu- a kan hming leh Mobile No kan pek a, kan tih lan a, min rawn bepawh tute hian kan laka an rilru an hlan tak tak ngai lova, ṭhianah pawh an tlak loh!! Kan sum chiah an duh a, chumi atan chuan fawh te mai mai chu...an awlsam lutuk!

Ka ṭhiannu nena kan inhriat atang hian SMS leh Mobile Phone hi a ṭangkai zawnga hman chuan a hman ṭangkai theih tih ka hrechiang khawp mai!! Mahse, Mizo Ṭhalai- Tleirawl leh Rawlthar tamzawk hian kan hmang dik lo va, tul lova sum khawhral nan leh mi rilru tihnat nan kan hmang mai mai zawk a ni.

Pathian zarah ka SMS Ṭhiannu hi a damchhoh zel a. Zu In mi nilo Pasal ṭha tak, a fa te tana PA nih tling a la neih ngei ka duhsak a. A puanṭhui khawlte pawh a lo ṭhatzel a, amah leh a fa te mai bakah, an chhungkua a chawm theihnan ka duhsakna sang ber ka hlan a. Kan damtlan chhung zawng thian kan nih reng theih nan leh, he ka thuziak lo chhiartuten SMS leh Mobile Phone kan lo hmanthiam tawh zawk nan, tiin ka thuziak hi ka tlip mai ang e.