Fellowship Secretary

Dated: Hnahlan The 22nd Sept, 2024: Vawiin tlai chu kumin chhunga a vawikhat nan KTP Fellowsip-naah ka tel ve! Khua a lum a, tunlai mutmu ka tuah that vak loh avangin ka Inkhawmin ka Fellowship lo tep a! Mahse, Tunkar chhoah khan KTP-te Inhlawhna angreng ka neihpui avangin an lawmman pek ka duh a. Chumi atan hun tha nia ka hriat avangin a hma atangin Inkhawm leh Fellowship turin ka rilru ka siam lawk a ni.

Chawhma inkhawm:

Dar rik hmain Biakin kan thleng a. Zirlai chu an khaikhawm. 

Chhunah ka muhil a. Chawhnu inkhawm ban hma deuhvin ka harh a. WhatsApp Message-ah 'Vawiin tlai chu kan ti dawn ta em? tih kan Branch KTP Leader Tluangtea hnen atangin alo ni a. Ani nen hian a hmain Pathianni tlai Fellowship-naa hun hmang turin kan inthawtlawk tawh a ni. Kei chuan, 'I thulh anih loh chuan tih awm tak' tiin ka chhang a. 'Anih chuan ka rawn sawm ang che' tih message a rawn thleng leh a. 'Awle' tia ka chhan hnu 02.05 p.m chuan Fellowship turin ka insiam ta a. 15 Mins hnu velah Tluangtea chu a rawn thleng a, Fellowship-na tur hmun kan pan ta a.

Fellowship:

Tan hun dawnah chuan Fellowship Secretary pawh a rawn thleng ve ta. Kan thutna chu a inhnaih viau mai. Ka thutna atang chuan a langchiang em em a. Thlalak aiin a takah a hmeltha zawk. A fuke han invuah dan vel pawh 'chuti chuan nita zawk se' tih tur a awm lo, a invuah dik vel vek a. A nui hmelte chu a tha ngawih ngawih a ni. A rawn thlen hlim chuan a lum deuh bawk a, a thutna bula chanchinbu hlui chuan a inzap a.

A hnu deuh chuan Fellowship chu zai kan tan a. Chairman-in Secretary chu puan turte puang turin a sawm a. Secretary chu a rawn ding a, Programme a chhiar a. A aw chu a va mawi em! A incheina a inhmeh si! Hlaphuah thiam han ni ila ka ti vawng vawng a! A engmah hre lo ni ila chuan 'Khawilam lanu nge maw i nih le? Tu hraileng chawi nge maw i nih le? ka ti ngei ang!

A hmel ka hmu chu ka lawm em em a, ka thinlung chuan tawngtaiin lawmthu a sawi mawlh mawlh a. Hetiang ang hun hi ka la tawng ngai lova, ka tawng  tawh bawk hek lovang. A kuttangah chuan Engagement Ring a awm lova, Bengbeh a beh a, a ban veilamah Sana a bun. Puan a bih bawk. A kawr hak chuan a hmel a chawi hle. 

Ka thinlung chu a lakah chuan a tuiral a ni. A thla han lak vel ka chak viau na a, ka zak deuh si a! Tan hmain a thla latu tur ka lo be lawk lo a ni te ka ti a! 

Zaihona te, Bible Memory Verse te, ka lawmman pekna hun te kan hman hnu chuan Thingpui leh Bakery chhang kan ei a. Refreshment kan eia kan in lai chuan pawnah a chhuak emawni, khawiah nge ni a kalsawn lawk a. A rawn let chuan Dildar leh Elaichi a ei a. Ka hawi kual chuan Fellowship thlengtute Almirah Darthlalangah an thianho thlalak ka print alo intar a! Hla thu kan saksual thin pali nga kan zir hnuah Hla pakhat kan sa a, ban alo hun ta der mai a! A rei lo hle mai! 

Lalpa tawngtaina kan sawi zawh chuan kan tin ta sang sang a. Fellowship Secretary pawh chuan a thutna chu a kalsan ve a. Ka thinlung chu a ruak huai mai!