Independence Day

Sawifiahna:

Independence kan tih chuan mihring emaw ram emaw, adt., midangin emaw ram dangin emaw, adt., in an thunun loh leh zalen sawina a ni. Day kan tih chuan Ni khat (24 Hrs) sawina a ni. Tichuan, Independence Day chu midang/ ram dangin a thunun loh ni emaw mi dang/ ram dang laka a zalenna ni ti ila kan sawisual awm lo e.

15th August, 1947 khan British (England) rorelna ata chu India ramin zalenna a hmu a. Hemi ni hi ropui thei ang berin Independence Day atan India ram chuan hmang ṭhin a. India ram chuan vawi 75-na atan kumin 15th August pawh khian rokhawlhna dang a awm loh chuan kan lawm leh dawn a. India rama a lawmna pui ber chu Red Fort, Delhi-ah neih a ni ang. 

A lawm dan tlangpui:

Kumin (2022)-a India ramin Independence Day a lawm tur hi India ram zalenna sualtute zah leh chawimawinan 'Azadi Ka Amrit Mahotsav' a vuah a. Independence Day thlen hma 21st March, 2021 atangin Independence Day lawmna kawng hrang hrangin neih a ni a, kar 75 chhung a awh dawn a ni. In tinin Hnam puanzar kan neih theihna turin India sawrkar chuan ‘Har Ghar Tiranga’ campaign  a nei mek a ni.

Hemi ni hi India ram pumah Chawlh (Holiday)-a puan a ni. India ram leh kan State-in Independence Day alo lawm tawh ṭhin dan leh lawm dan tur sawi ila: 15th August-ah India rama State leh Union Territory awm zawng zawngah Independence Day hi a lawmna neih a ni ang. Independence Day hma chiah tlaiah India ram President of India chuan India ram mipuite hnenah thuchah a sawi ang. Chu chu ‘Address of the Nation’ tih a ni. 15th August-ah chuan India ram Prime Minister chuan Red Fort, Delhi-ah India ram hnam puanzar a pawtpharh ang. Chumi zawhah kum kaltaa hmasawnna chi hrang hrangte leh hmachhawp neih mekte a sawi ang. India ramin Independence theih nana sulsutute zahna chibai a buk ang. India ram hnam hla 'Jana Gana Mana' chu sak a ni ang. Thusawi chu sipai parade te, Ralthuam chi hrang hrang entirna te leh Tableu entirnaten a zui ang. Tlai lamah Cultural Programme chu Sawrkar hmunah leh Sawrkar hmun kher loah India ram pumah neih a ni ang. India ram chhunga State hrang hrangah State Capital-ah Chief Minister-ten Hnam puanzar an pawtparh ang. (1947 - 1973 thleng State Governor-ten Hnam puanzar an pawtparh ṭhin a. 1974 aṭangin State Chief Minister-in an pawtparh).

                                                 

Mizoram State-ah pawh State Capital Aizawl-ah, Hnam puanzar chu Chief Minister chuan a pawtpharhin Parade Contingent-te chibai a chhanglet ang. Mizoram chhungah kum kalta chhunga hmasawnna chi hrang hrang leh hmachhawp hrang hrangte a sawi ang. Mipui vantlang tana Independence Day lawmna neih zawh hnuah Mizoram State Governor chuan a chenna Bungalow-ah sawmbikte thingpui ruai a buatsaih sak ang.

Independence Day hma kar aṭangin Independence Day Football Tournament a awm ṭhin.

Ram danga India mi awmte pawhin an theih angin he Independence Day hi an lawm ve ṭhin a. New York, USA-a awmte chuan India Day tiin an lawm ṭhin.

 

Venhimna:

Terrorist beihna ata te, misual ralthuam keng beihna ata heng buaina tamna khawpui Delhi, Mumbai leh State ralmuang lo, tuna State pahniha ṭhen tak Jammu and Kashmir-ahte hemi ni hian venghimtu Sipai leh Police ṭhahnemtak Duty tir ṭhin an ni. Red Fort chung leh a bulhnai boruak pawh chunglam aṭanga beihna lak invennan ‘no-fly zone’-ah puan a ni bawk. Tin, Closed Circuit Television (CCTV) pawh engemawzat bun a ni bawk.

Media lamah:

Independence Day hian nilengin Television leh Radio hmangin ṭawng hrang hrangin ram ngaih hla leh Film-te pekchhuah a ni ṭhin. Doordharshan Kendra chuan Delhi-a a lawmna pui ber chu a Live thin.

Independence Day hma leh tun:

India ramin Independence a hmuh hma chuan British (England) hnuaiah rethei takin a kun ṭhin. Lehkha ziak leh chhiar thiam lo an tam lutuk. Retheihna a nasain a tlangpui damrei lam chu kum 32 a ni. Ram danga lehkha zir a harsa. India ramin Independence a hmuh hma chuan ei leh barah kan harsa. Inbiakpawn leh intlawhpawh a harsa.

India ramin Independence a hmuh hnu erawh chuan mahnia ro inrel leh ramdang thuhnuaia a ni lo bawk a, nasa takin a ṭhang. Mi maktaduai tel retheihna ata chawikan an ni. Van thengreng lam leh Nuclear Power lamah hma a sawnin ram dangin an chung-en mek a ni. Ei leh barah hma a sawnin mite pawh an dam rei ta. Zeng hri natna umbo a ni. Independence a hmuh hnu erawh chuan ei leh barah kan hnianghnar ta. Inbiakpawhna leh intlawhpawhna a tha tawh.

 

Thildang:

Indian Postal Service chuan India ramin alenna a neih theih nana beitute hriatrengnan hemi ni hian Stamp a tlangzarh ṭhin. Google chuan Indian ram Independence Day hriatrengnan a pualin hemi ni hian India rama a homepage-ah 2003 aṭang khan a bika lemziak a hmang ṭhin. All India Radio, Aizawl chuan Art & Culture Department nena tangkawpin India zalenna kum 75-na lawmna ‘Azadi Ka Amrit Mahotsav’ kal zelah Quiz with AIR News tih a buatsaih mek a. Inrinni zan dar 6.30 apiangin he programme hi hman thin a ni. Ngaithlatuten heng quiz-a zawhna chhanna hi sms, whatsapp emaw email hmangin an chhang thei. Nakum August, 2022 thleng he programme hi Inrinni zan apiangin an nei thin dawn a ni. Quiz-a tithate hnenah lawmman leh certificate pek thin an ni.

Kan khuaah:

Tun hmaa Administrative Officer (AO) awm lai chuan AO Office kawtah emaw Independence Day hi an lawm ve ṭhin. Sipai awmte an rawn kal ṭhin bawk. AO awm loh hnuah chuan Field sangah an hmang ṭhin. School hrang hrang aṭangin Parade Contingent an awm a. (Republic Day nge Independence Day zawk ka hre tawh lo: Middle School ka kal laiin Field sangah kan lawm a. Hemi tum hian kan School Parade Contingent ka hruai ve!) Independence Day lawmna hun a zawhah School naupangte hnenah Sweet an sem ṭhin. Ṭhangkhat lian zet  chu Independence Day hi mumalin kan hmang tawh lo.

 

India ram mipuiite tan a hlutna:

He ni hi India ram mipuite tan a hlu. Ramdangin an awp leh an thununna hnuai ata amaha kea din/ zalenna a hmuh ni anih avangin a hlu a, He ni hi nidang ang lo takin hriatreng tlak a ni. Ramdang miten intithunei taka kan rama kut min dawhtirna ata kan zalenna ni anih avangin a hlu takzet a ni. Independence Day lawm hi ṭhangtharten zalenna sualtute an theihnghilh loh nan leh, ram leh hnam an hmangaih nan thil ṭul tak a ni.

 

India nena Independence Day inangte:

Ram dangte hi ram dang thuhnuaia awm, Independence Day nei ve an ni hlawm. Chung zingah chuan The Republic of Congo, South Korea, North Korea, Liechtenstein leh Bahrain ramte nen an Independence Day a inang.