Thawnthu tawi: Nghilh har Zotei Zûn

NGHILH HAR ZOTEI ZUN

- J Lianhmingthanga Sailo (Ngurthansangi Pa)

 

 

1

Ṭum khat chu Thlatin chhuak Chanchinbu pakhatah hian 'Sms Matchmaker' leh 'Zawnglai huang' awmna ka hmu a. Ngaihzawng ka neih loh avangin 'ngaihzawng ka tawng mahna' tiin ka duh zawng ka thawn ve a. Chu ka thiltih chu miin anlo hmufuh a ni ang, hmeichhe pakhat hian min rawn text a. Chumi nena kan chanchin ka sawi dawn a ni.

Ka hming chu Lalmuanpuia a ni a, Puia tiin min ko ṭhin. Ka pa hming chu Lalfela a ni a, Fela tiin anko a. Ka nu chu Hrangmani a ni a, Mani tiin an ko. Farnu 2  ka nei a, a tlum ber ka ni. Ka nu leh pa hi thingtlang loneia eizawng an ni. Ka farnuteah hian a upa zawk chu Lalṭhazuali niin Ṭhapui tiin an ko a. Health Worker a ni a, a naupang zawk hi Lalṭhakimi niin Kimte tiin an ko. XII (Arts) zirlai a ni. Kan khuaah hian Higher Secondary School a awm loh avangin kan khua aṭanga mel nga vela hla Lungleiah School a kal a. Hostel-a awm lovin ka nu nau, ka nuteite inah XI (Arts) a zir aṭangin a awm a.

Govt. Aizawl North College-ah B.A (Geography) ka zir mek a. Kan College-ah chuan Evangelical Union (EU)-a Secretary ka ni. Lily veng, Chaltlangah in keimahin ka luah a

Ka College kalpui zingah chuan Tlanmawia a awm a, ka ṭhianpa ber a ni. Ka inluahna chhak lawka anmahni Inah a chhungte nen an khawsa. A pa hi Health Worker a ni a, a nu hian DIET, Aizawlah Lecturer hna a thawk. Keimah ang bawkin farnu 2 a nei a, an unaua a tlum ber a ni.

***

Zanriah ei kham, ka einate ka fihfel hnu; ka ṭhu mai mai chu ka ngaihtuahna aṭangin ka Phone-a message thleng chuan min ti harh zawk mai a.

"Puitea i ni em aw?" tih message hi alo awm a. "Aw ni e, e nge ni ta?" tiin ka chhang a.

"Chanchinbua i thil chhuahtir kha kalo chhiar a!"

"A zahthlak e!"

"Zahthlak lo e."

"Luck lo min ti awm!"

"Ti hran lo e. Puitea i ni tak tak maw?"

"Aw." ka ti a. Min rawn text-tu chu Call-a biak ka chak khawp mai. A number chu ka dial chhin a. Mahse, alo reject zel a.

"Tu nge i hming?" ka ti a.

"Zomuanpuii, Zote tiin min ko ṭhin."

"E nge i tih ṭhin?"

"School ka kal ṭhin. Govt. KM Higher Secondary School-ah XII(Arts) ka zir mek. Nang e nge i tih ṭhin?"

"I va zir sang tawh ve? Kei chuan Govt Aizawl North College-ah BA (Geography) ka zir mek."

"Kei aiin i zir sang zawk a nih chu! Khawiah nge i awm?"

"Lily Veng, Chaltlangah. Nang?"

"Kahrawt veng, Champhaiah."

"A nih chu. Kahrawtah chuan chhungte kan nei asin."

"Tute nge?"

"Pu Rodailovate kha."

"B.C. English Academy neitu kha maw?"

"Aw, ni e."

"Engtin nge i hriat?"

"Kan chhungte an nia. A nupui kha ka pa nau a ni."

"A nih chu mawle. Aizawlah khawiah nge i awm?"

"Ka pateate inah."

"Chu chu khawi laiah nge?"

"Dinthar vengah."

"Ka lolen i phal em?"

"Ilo leng duh dawn ami?"

"Duh ang."

"Bialnu i nei em?"

"Nei lo. Nang, bialpa i nei em, nge pasal zawk?"

"Ka nei lo ve ve."

Engtik kumah nge i pian?"

"Sawi hmasa la?"

"Min hrilh leh duh si lo ang a!"

"Min hrilh phawt la, ka hrilh ve ang che."

"1998"

"Nang aiin kum khatin ka naupang anih chu."

"Dinthar vengah chuan khawilai velah nge in awm?"

"Presbyterian Biakin bulah."

"Naktukah e nge i tih dawn?"

"Inah ka awm ang a, ka insuin ka ring."

"Kalo leng dawn a nia. Tu nen nge inah awm dawn?"

"Tumah nen. Ka pateate chhung inneihnaah an kal a. Lo leng rawh."

"Facebook i khawih ngai em?"

"Ngai e. 'ngati nge?"

"E nge i proname?"

"Muantei Khupno."

"Muantei Khupno an awm ṭeuh ang."

"Ka propic-ah chuan thingkung bulah ka ding."

"Awle. Message-te i dawng hnem viau ṭhinlo maw?"

"Teuh lo. Tin, ka Active vak lo a!"

"E nge i tuina?"

"A tam mai. Zai te, ṭhiankawm te, lehkhabu chhiar te leh a dang te pawh."

"Television i en ngai em?"

"En zauh zauh."

"E nge i en ṭhin?"

"English Love Story."

"Korean i ngaisang em?"

"Ngaisang hran lo a ni ang, an Film pawh ka en peih lo! Nang?"

"Kei pawh ka ngaisang lo. English Thriller Movie ka en ṭhin a."

"Duhtawk phawt ang. Naktukah chuan ilo leng dawn a nia. Mangṭha muttui phawt aw, u Muante?"

"Awle, nangpawh. Zingthawh nuam le."

Chutia kan in-text zo chu ka Presentation pek tur rehearshal ka nei a, ka zawh hnuah ka mu. Ka mut hmunah chuan min rawn text-tu chu ka ngaihtuah zui neuh neuh a.

 

 

 

2

Holiday anih avangin hemi ni hi thil ṭul tih tur dang ka nei lem lo bawk a, Dinthar vengah tukṭhuan eikham chuan ka chhukthla a.

Bawngkawn aṭangin City Bus-ah ka chuang a. Zodin Square-ah ka chhuk a. Mi khawlaia veivak leh lirthei a tam ang reng a.

Zodin Square aṭang chuan 'Outing a ni pahfawm alawm' tiin kein Vaivakawn panna Main Road-ah chuan ka chhuk thla a. Dinthar kawn ka thlen chuan Wai Wai leh Kuhva hring ka lei.

Dawr nghaktu hnenah chuan, "Khawi lai nge Zomuanpuii, Zoteite in hi?" ka ti a. Ani chuan min kawhhmuh hnuin 'Ka lawm e' ka ti a, ka kalsan ta a.

Zoteite in ka thlen chuan kawngka chu chhunglamah alo inkalh a. Doorbell ka hmeh chuan tleirawl pakhat, kawr fual sendang ha hian kawngka a rawn hawng a.

"Ka pi, Cooker chhia siam tur in nei em?" ka ti a, ka nui duh miah lo a. Ani chuan, "Nei lo. Kan Cooker hi a chhiat pawh ka la hre ngai lo." a ti a.

Chu tleirawl kawrfual hak chuan ka mit ala khawp mai. A malno chu a khuh pha lo chiah chiah a. A sam chu a su zo chiah a ni tih hriat takin ala huh deuh hliam a. Towel a keng a, chu chuan a in hru mawlh mawlh a. T-Shirt pawl a ha. A sam rim chu a tui chem chem khawp mai. A ṭawng zawnga a ha var rual ṭhat mai chu ka hmuh hmaih lo.

'Zotei a nih chuan min duh emaw duh lo emaw ka bem hrim hrim ang' ka tih rilruk lai mek chuan, kawngka a khar tur chu 'Zote' tiin ka ko a. Ani chuan, "E nge ni? Tu nge i nih?" min ti a.

Kei chuan, "Muantea ka nia. Nizana kan in-text kha!" ka ti a. Chibai tumin ka kut dinglam ka pharchhuak a, kan inchibai a.

"Midang emaw ka ti che alawm."

"Khatia han tih che kha ka chak riau a!"

"I sual em mai!"

"Inchhungah min luhtir dawnlo em ni?"

"Nui sang chungin, "Dawn e. Lo lut rawh." a ti a.

A kut ka humna ka kut chu ka hnim a, a rimtui hle.

"Ka lu ka su zo chiah a." a ti a.

"A ni ang, i rimtui em mai!" ka ti a.

An Sitting Room-ah kan ṭhu a.

"Ka beisei aiin i hmel a ṭha!" ka ti a.

"A awihawm loh e, min bawl!" a ti a, a sam chu a zut a zut a.

"Engangin nge min hmuh ve?" ka ti a.

"Ka beisei aiin i hmel a ṭha."a ti a, a nui sak a. A va nui mawi chiang tak!

Live-a ka hmuh tawh hmeichhiaah chuan a lakah ka tuiral a ni ber. Ṭawng pawh ṭawng lo leh che chang loin ka bula tleirawl duhawm tak ṭhu chu ka en eng a.

"Khatin min en reng lo la, ka zak ve thei tho a nia!" a ti a.

"Zote, i hmuhnawm em a ni" ka ti a.

"Hmeichhia i hmu ngai lo ami?"

"Hmu ngai e. Ka nu te, ka pi te, ka nutei te, kan Class-ah pawh an awm ṭeuh!" ka tih lai chuan za em emin a rawn nui chhuak a. "Mahse, nang aia hmelṭha hi ka la hmu lo." ka ti a.

"I luck ngawtin ka ring. A dik bawk ang." ka ti a.

"Luck lo e. Kei aia hmelṭha an tam alawm!" a ti a.

"Zote, Darthlalanga i inen a i mi hmuh kha minlo biak dawn a nia aw?" ka ti a.

"I ti tak tak lovang!"

"Ka ti tak tak alawm."

"Nang hi i luck ngawt ang. Min rawn lem i tum a ni lo maw?"

"Teuh lo mai. Luck ila chu chanchinbuah khatiangin ka ti lovang."

"Bialnu nei chung pawhin a chhuah theih tho alawm!"

"Chutiang ang mi ka ni lo."

"U Muante, insuk tur ka nei nual a. Ka va nuai leh lawk ang aw? Chutih chhungin Chanchinbute hi lochhiar la?" min ti a. Kei chuan a Photo Album en ka dil a. Chanchinbu leh a Photo Album min rawn pe a. Chung kan en chhung chuan a insu a. A insuk pah chuan a zai rat rat a.

Thlalak chu ka en hmasa a. Zotei chu thlalak aiin a takah a hmelṭha daih zawk. An Class thlalakahte chuan a hmel a langsar nalh mai a.

Darkar chanve dawn ka rilru kalo kawm hnu chuan a rawn hman ta a. "I khua alo har em? Ka insu zo ta!" tih pahin a thaw huai a."Khawhar khawp mai. Thlalakte lah a ṭawng ve thei mang si lo!" ka ti a.

"Thlalak hi ka uar lutuk lo a. Mahse, i hmuh ang hian tlem azawng chu ka nei ve a nih hi." a ti a.

"Ka mit a titlai khawp mai!"

"I ti lawmawm e."

"Remchangah ka inluahah ila rawn leng ve dawn a nia." ka ti a.

"A zahthlak awm e!"

"Tuvakmahin an hre dawn hlei nem che." ka ti a.

Zotei bula awm chu hmangaihna biahthu inhrilh hma hauhvin ka awm chu a nuam veng veng mai.

"Thingpui ka lum ang che aw?" a ti a.

"Thingpui hi ka ngaina vak lo a. Thingpui lum ai chuan Wai Wai kalo ken hi chhum la?" tih pahin ka Wai Wai ken chu ka phawrh a.

Wai Wai a chhum lai chuan inchhung vel chu kalo melh kual a, banga an thil tarte chu ka en a. Banga thlalak intar aṭang chuan an ina cheng chu mi 6 an ni tih ka hre thei a.

"I chhungte inneihnaa an kalna chu khawilai nge?"

"Thingsulthliahah. Ka nutei nau fapain nupui a nei dawn a."

"I chhungte hi heta awm vek ami an nih?

"Ni lo e. Ka nuteite nupa nen chiah kan awm. Fapa pakhat an nei a, chu chuan Bangalore-ah Civil Engineer a zir mek." a ti a.

“I nuteite nupa chuan eng hna nge an thawh a?"

"Ka nutei hi Nurse a ni a, Civil Hospital-ah khian a thawk. Ka patea hi Civil Hospital-ah tho Doctor a ni." a ti a.

"Nang, in chhungkaw eizawnna vel min hrilh ve rawh le?" atih zawm a.

Kei chuan, "Thingtlang hna an thawk ṭhin." ka ti a.

"In khuaah chuan eng nge in chhungkaw eizawnna?" ka ti a.

Ani chuan, "Ka nu chu ICDC-ah a thawk a. Ka pa hi Primary School-ah Zirtirtu a ni." a tih chuan ka dinhmun nen ka khaikhin a, ka insit ru hle mai a.

"Kei ni ai chuan in hausak dawn chu!" ka ti a. "Ka u pahnihten phaiah lehkha an zir a, mamawh neuh neuh an nei avangin pawisa thawn reng an ngai a. Kan hausa lo!" a ti a.

Wai Wai a chhum hmin hnu chuan Dawhkan kilin kan ei a.

Kan ei lai chuan a kut tin sei sal mai leh hmul tlemtein a khuh a ban no tak chu ka en leh ṭhin a. A changin ka mit leh a mit a intawng a, kan innuih leh seih ṭhin a.

"Bialpa i nei tawh em?"

"Neih chu nei tawh e. Mahse, a rei vak lo!"

"Engtia rei lo nge?"

Kum khat pawh a tling lo! Nang, bialnu i nei em?"

"Ka nei lo."

"Ka awih lo."

"Tak tak. First Love chu ka nei tawh, min duh lo a!"

"A va zia lo ve?"

"A, khawvel dan a nia. Nangin min duh loh leh phei chuan a hreawm dawn e!"

Wai Wai kan ei kham hnu chuan hun danga leng leh turin Zotei chu ka ṭinsan ta a.

 

 

 

3

Ṭum khat chu kan College Evangelical Union leh Hrangbana College Evangelical Union-ten Joint Fellowship kan nei a, a nuam hle.

Kan College-ah chuan min Star-tu pakhat a awm a. A hming chu Lalrinsangi (Rini) a ni. Amah hi hmelchhe lo tak, hausa chhungkua aṭanga chawrchhuak a ni. Kan Class a inang a, Thanmawia hnenah keimah chu 'min lo biak rawh aw?' a ti fo ṭhin. Mahse, Zotei zûn chuan ṭawn lohvin min phuar tlat a!

A chenpuite an awm dawn loh chuan phone-in min hrilh a, ka leng ṭhin a. A mizia chu hriatthiam har ka ti ṭhin. A changin ṭhian angin, a changin a bialpa angin min en ṭhinin ka hria.

Vawikhat chu a ṭhiannu pasal neihnaa kal ve turin min sawm a. A ṭhiannu hi Dawrpui Vengthara awm a ni. A ṭhiannute in thlang lawkah chuan amah Star-tu a awm a. Chumi chu a ṭhiannu u ṭhianpa anih avangin a ṭhiannu pasal neihnaah a tel ve dawna a hriat avangin Zotei chuan a Chhas anga kal ve turin min sawm a. Ka va lawm tak em! Ka beisei phak loh thil a ni. A sawmna chu ka pawm a.

"Yes. Naktuk chu ka bialpa i ni dawn a, hlim takin min siam ang che aw?" a ti a.

Kei chuan, "Naktukah bialnu ka nei dawn a, ka hlim. Chumi chu a ruka ka hmangaih em em a ni!" ka ti a. "Naktuk chu inngaihsak hle ang aw?" ka ti a. Ani chuan, "Ni e. Min ngaihsak loh chuan ka haw tau a ni mai!" a ti a.

Chutia kan in-text mek lai chuan, "Tunah i rilru kha hrilh mai rawh. A duh che leh i vannei a ni ang a, a duh loh che leh ngai i awh a ni mai!" tih chu ka rilruah alo lut a.

Zotei chu, "Zote, ka thinlung zawng zawngin ka hmangaih che." tih ka text a. Zotei chuan, "U Pui, naktukah ka chhang ang che. Muah Muah." a ti a. Hmeichiate hian an ngamtlak leh an bialpate chu an 'Muah Muah' ṭhin tih ka hriat avangin min haw lo tih a chiang a, ka lawm rilru hle a.

A tukah chuan Dinthar venga Inneihna chu chhim turin ka kal a. Biak In bulah Zotei chuan minlo nghak a. Puanchei a bih a, lace kawr sendang a ha. A sam chu a pawt a ni tih chu a ngil danah ka hre mai a. Chu chuan a hnungzang a vaw hnap a. Bag a khai a, pheikhawk sang a bun bawk. A tawk chauhin lotion a inhnawih a. Dar hmasa a rik tawh avangin, 'lut ila?' ka ti a, kan lut a. Tlar hnung lamah kan ṭhudun a.

Zotei chu a hmelṭhain a pian a nalh bawk a, mitin mai mit chu a chungah a fu ṭhupin ka hria a. A bula ka ṭhu chu ka intithei rilru hle.

Inneihtirtu a Sermon lai chuan, "Nang leh keia inneih ni ni tase ka hlim awm!" ka ti a. Ani chuan min nuihsak pahin, "Alo la thleng mai thei asin!" a ti a.

Inneih Programme a zo a, inneite chu Biak In kawtah thlalak puina a awm a. Zotei nen chuan thla kan lakpui ve a.

Mo lawmna hun chu KṬP-in an kaihruai a. Zotei chuan amah Star-tu chu min hrilh a. A hmel en ringawt chuan a fel hmel khawp mai. Mahse, mi hi an hmel en ang ngawt anlo ni lo!

Chupa chuan Zotei chu a rawn melh leh reng ṭhin a. Zotei chuan melh pawh a melh duh lo. Kei chuan ka mitmei reng a. A en deuh reng a ni tih ka hriat avangin, "Zote, a rawn en ngun lutuk che a nia." ka ti a.

Chutia a rawn en reng tih ka hrilh hnu chuan Zotei chuan, "U Pui, min hrethiam rawh aw?" tih pahin ka hmuiah chuan min rawn fawp ta! Ka beisei loh thil a ni! Ka mur chuaih chuaih a, chhan let nachang pawh ka hre lawk lo!

Rei vak lo kan infawh hnu chuan, "Min la en em?" a ti a. Kei chuan chupa lungawi lo hmel pua a ṭhu chu ka hmuh tir a.

Zotei min fawhna chu ka khawih ka khawih a. A nuam ka ti veng veng a ni. A kam kha a rim tui bawk si! Infawh ṭhat leh ka nap a! Mahse, min ngaizawng tak tak em tih ka la hre si lo!

Programme duanlawk ang chu kan hmang zo a. Ṭhiante tana Moneituin Programme a siamah chuan tihtur pawimawh dang kan neih hran loh avangin kan awm a.

Chutah chuan mipui nawlpui an tel tawh lova. A awm chhunte chu Zotei ṭhiannu u (Moneitu) ṭhian te leh Mo ṭhian te kan ni. Music an play a, kan lam a. Zotei nen chuan kan lam ve a. An music play chuan a zir bawk a, kan lam tui khawp mai. A kawngah ka kuah a, anin ka banah a vuan a. Kan lam pah chuan kan inen reng a. A mit chu a de der a. A heh chu fawh chak awm tak a ni. Nakinah chuan ka darah a rawn bei a, a phun sep sep a.

"U Pui, zak thei lo min ti awm!"

"Engvangin maw?"

"Ka fawh rikngawt che kha!"

"Ti lo e. Kei chuan englai pawhin min fawp la ka ti!"

"I over."

"Over pawh a pawi ka ti lo. I fawh ka duh a lawm!"

"Tak tak?"

"Aw."

Min fawp leh ta!  Tun ṭum chu kan lam tawp hma chu kan inkeih a!

Kan inthlah chuan, "I va zei ve?" min ti a.

"Eng chu?"

"Hmeichhe fawp chunga lam kha!"

"Nang zawk alawm!"

"Hmeichhia engzat nge i fawh tawh?"

"Pakhat mah!"

"Ka ring chiah lo!"

"A ni alawm. Nang engzah nge?"

"Ka duh thu ngeiin pakhat. Ka bialpa rei lote kan inngaizawng ka tih kha!"

"Naktukah ka chhang ang che i tih kha min chhang tawh la?"

"Vawiina ka awmdanah hian i hre mai lo ami?"

"I aw ngei hriat ka duh."

"A nih, U Kim, min hmangaihna chu ka pawm a. Kei pawhin ka hmangaih che."

Ka thil hriat chak em em chu ka hre ta! "Ka hmangaih che, Zote." tih pahin a hmuiah chuan ka fawp a.

Ruai kan ṭheh a. Ruai chaw leh sate chu kan inbarh a, kan hlim hle. Hemi ni hi ka theihnghilh tawh lovang.

 

 

4

Pathian zarah ka zirlai chu ka passed a, Zotei pawhin ṭha takin a passed. Kar tawpah Thanmawia'n Zoteite inah chuan min lenpui ṭhin a. A phawk deuh roh a, fiamthuna duh avangin Thanmawia bula awm hi a nuam thei hle.

Leng leng ta na na na, a nuteite nupa hmel chu ka tawng ta zeuh zeuh a. An chapo lo a, kawm an nuam nupa hle.

Zan khat chu School chawlh laiin Zoteite inah ka leng am A nuteite nupa chu an chhungte lungphun turah rorelin an kal a.

Khaw awmdan chu a vawt lam ṭep a ni. Mahse, vawt ka tih vak loh avangin kawrlum emaw Jacket emaw ka ha lo a. Kamis ban tlawn ka ha. Kekawr bul hak chak chu a nalh lo e tiin kekawrtlawn ka ha bawk a.

Zoteite in ka thlen chuan tumah dang an awm lo tih ka hriatin a kawngah ka pawm a, a room-ah ka luhpui a, khumah ka bawhbet a.

"U Pui, tho teh. I rit lutuk!"

"Ka zang viauin ka hria asin!"

Ka bawhbehna ata chu tal chhuah a tum a.

"Tal tal suh. Engtinmah ka khawih dawn lo che." ka ti a.

"Chu pawh nise, ka chhungte anlo haw ang. Kawngka pawh kan kalh si lo."

             A tidik khawp mai. A chungten min rawn phawk hlauh se chuan ka chan a chhe ngawt ang.

"A nih, ka thil tihtum min dal lo la, ka bawh bet tawh lo ang che!" ka ti a. A remti a ni tih lantir nan a lu a bu nghauh a.

Ka fawp a. A irno te, a beng kawm te ka fawp a. A awm pawng chu a kawr chhanah ka khawih a.

"U Pui." a ti a, a thawk dan chu a dik lo tih ka hria.

A taksa mawi tak chu ka khawih zel a. Ka fawp chu kan uar dun hle. Ineizawh tum niawm tak hian kan inkeih bawrh bawrh a.

Kan kal thui dawn lutuk a ka hriat avangin ka hmui ka phawi a.

Zotei chu a insiam ṭha a. Min nuih sen sen a. Ka bula awm chu nuam a ti tih hai rual a ni lo.

A room aṭang chuan ka pawm chhuak a. Tekevision a On a. Television en chung chuan kan titi a. A chang leh kan nui a.

Chutia kan awm lai chuan a ṭhiannu ṭhianpa, amah Star-tu kha a rawn leng a. Jacket dum a ha a, Farstar a rawn zu lut a.

"Khaw nge midangte hi?" chupa chuan a ti a.

"An chhuak lawk anih kha." Zotei chuan a ti a.

Zotei'n 'Ṭhu rawh' a tih hmain Zotei bulah a ṭhu a. Zotei chuan, "E nge i duh ve teh mial a?" a ti a. Ani chuan, "Eng ni lo e, ka rawn lenglut ve mai mai." a ti a.

"Lenna tur dang i hre lo em ni?" ngei hmel zetin Zotei chuan a ti a. "Hria e. Mahse, rawn len ka duh a!" a ti a.

"Keini in aia in nuam leh nula hmelṭha awmna a tam nen!" Zotei chuan a ti a.

Chupa chuan a Cigarette chu a pak khu luih luih a. "Ṭhiana, he inah hian zial zuk an phal lo!" ka ti a. Ani chuan, "A ni maw? Tu nge i nih a?" chapo deuh hian min ti a. Kei chuan, "I nula rim kha zawt ta che?" ka ti a.

Zotei chu a biakbawr sur sur a. Ani chuan, "Nakin lawka ka pasal tur a nih hi." a ti a. "Rawn leng tawh miah suh. I rim leh i hmel a chhiat teh lul nen. Zu rim nam hisn kan in hi rawn dai tawh suh. Nang ai chuan kan kawmchhakte Vawkpui pawh ka hmangaih zawk! Chhuak nghal rawh!" thinrim leh thupe aw chuan a ti a.

Chu mihringa chu a chhuak ta hnu hnu a.

A chhuah hnu chuan, "I tiṭha lutuk!" ka ti a.

Rei vak lovah chuan a nuteite nupa chu an rawn haw a, a inleng neih chungchang chu alo hrilh a.

 

 

5

Tunah chuan 3rd Year ka ni tawh a, Zotei pawh 2nd Year a ni. College hmun khatah kan kal a. Thanmawia chuan an venga nula pakhat hnenah sawn a thlak a. A sawn thlakna nu chuan a luhkhung a.

Govt. Aizawl North College hi a hmun hma a nuam lo hle. Compound zim tak a nei a. Outdoor Items, Sport kan neih dawnin hmun dangah tih zel a ngai a. Govt. Aizawl West College nen College Campus leh Infrastucture-ah chuan unau kan ni.

Zotei chuan, "Kan pahniha kan Graduate hunah kan inbei dawn nia." a tih avangin Graduate thuai thuai a, Zotei nen chuan chhungkaw din ka chak tawh hle.

Ṭum khat chu ka Class kalzo haw tur hi Zangena Petrol Pump bulah mi pathumin minlo au a. An bul ka va thlen chuan an zinga pakhat chu ka hmuh tawh hnu a ni. Zotei lo star-tu, inneihnaa ka hmuh leh hmanzana Zotei'n a hnar haw tak kha a ni.

An zinga pakhat chuan ka kawrawmah a ṭham a. Local rim a nam hle. "Zomuanpuiite inah khan vawi khatmah i kal tawh tur a ni lo. I hria em?" min ti a.

Ka kawrawm a ṭhamtu banah chuan ka la lawk a. Ka herh a, a inbin ṭhuai mai a. Pakhat chuan a bul hnaia thung bung a la a, min vuak a tum a. Kalo bum a, a thingbung ken chu ka laksak a, amah chu ka hlap ṭhuai a.

Zotei Star-tu chuan, "I va thei deuh ve? Khawi nge keiman kan nuai teh ang che!" a ti a, min rawn pan a. Ka lo back-kick hlawm tawp a.

Min tibuaitute chu tumah thochhuak an awm lo, an let reng a. Pakhat thing bung lak chu ka la a, 'Zotei tan' ka ti a, an ngal ka khawn sak hlawm a. An na ti chu a ṭe chul hlawm a. Mipui anlo kalkhawm a, thil awmdan dik tak kalo sawi a.

6

Ka bialnu, ka nupui tura ka hual Zotei chuan America-a lehkhazir theihna tur form a fill-up a. Interview-ah a tling a.

Chu thu ka hriat chuan ka lawmpui rualin ka hmu khat tur chu ka lunghnur ru viau a ni. A chhan chu, midang ngaihzawng a nei ang tih ka hlau a ni.

A kal hma chuan a ṭhiannute inah kan inhmu a.

"Zote, kal lo mai rawh?" ka ti a.

"A thlawn vekin kalna tur, awmchhung mamawh engkim leh zirna sensote a awm dawn a!" a ti a.

"Chu pawh chu nise?"

"Ka dam chhung hetianga hun ṭha hi ka tawng tawh lovang!"

"Anih, ka tan i rinawm reng ang em?"

"I tan ka rinawm reng ang. Kalo haw hunah kan innei ang a?"

"Ka va ngai dawn che e aw! Dam chuan kuminah hian ka Graduate tawh dawn a. Nang pawh nakum kum chanve hmalamah i Graduate dawn tawh a!"

"Kan ruahman ang vek hi a ni ṭhin lo. Mite pawh rei tak tak an innghak ṭhin alawm!"

"Min ṭhen mai ang tih ka hlau a ni!" ka ti a.

"Ka rin ngam loh i ti tihna a ni maw?"

"Khualah chuan chanchin engkim a inhrilh theih lohva!"

"Chupawh chu nise?"

"Hausa, hmelṭha deuhin an bem ang che a. Min theihnghilh thei a ni."

"I ngaihdan mai mai anih chu!"

"Min hmangaih tak tak em?" ka ti a.

"U Pui, ka hmangaih che. Ka damchhung kawppui atan ka duh che. Ka rawn haw ve leh kan innei dawn a nia." a ti a.

America-a a kalna tura thil ṭulte a tih fel hnu chuan a kalni tur alo thleng a. A ṭhiannu leh Thanmawia nen Lengpui Airport-ah kan thlah a. Kan ṭhiante chuan min thlahfal a, duhthawh takin kan infawp ning thei lo a ni. Min hriatreng nan Zopa Goldsmith-a ka chhertir Zungbun ka bun tir a.

An thlawh chhuah hun alo thlen chuan Thlawhna chhungah a lut a. Thlawhna chung aṭang chuan Flying Kiss min rawn pe a. Rei vak lovah an thlawk liam ta a.

Engtinemawni ka awm! Ka hmangaihi chu ka ngai em em a, haw kawngah vawikhatmah ka ṭawng lo.

7

Zotei kal hnu chuan a chanchin engmah ni thum chhung chu ka hre lo. A ni linaah chuan number ka hriat ngai loh hian min rawn bia a.

"U Pui, Zotei ka nia."

A number chu ka save a. WhatsApp-ah ka be nghal a.

"Duhtak, min tirethei em mai!" ka ti a.

"Min ngaidam rawh!"

"Lo haw la, ka zirlai ka chawlhsan ang a. Kan innei dawn a nia."

"Ka lo haw thuai ang. Ka thil zir hi han zo phawt ila." a ti a.

"E nge i awmna chanchin?"

"Pensylvania-ah ka awm."

"Engtin?"

"Kan zirnaah hian Hostel a awm a. Mizo dang an awm lova, a khawhar thlak khawp mai!"

"Sapho chu an fel em?"

"Hnampui an ni bawk a, an fel khawpin ka hria."

Zotei chuan a zir zawh hnuin a zirnate chuan Facebook Company-ah hna an hmuh sak a. A hna chu a hautak avangin Hostel-a awm lovin amahin Flat a luah a.

A flat luahna bulah chuan Japanese tlangval pakhat hian flat a luah ve a. A ni chu Coca Cola Company-ah a thawk.

Ṭum khat chu Zotei Office kal tur chu Japanese tlangval chuan, "Kan Office lam a ni a, ka thlah ang che." tiin a Car-in a phur a. Chura ṭang chuan an inhrechho ta a. Chupa chuan Zotei chu a ngaizawng a. Chumi thu Zotei'n min hrilh chuan, "Vawikhat mah kawm tawh suh." ka ti a. Mual za kar danah kan awm a, tu ve ve pawhin eng pawh tawk ila kan inrinawm loh san tur a ni lo." ka ti a.

Rei tak chhung chu chupa chungchang chu min hrilh ngai ta lo a, kei pawhin ka zawt zui duh lo. A laka ka rinawm em avangin ka lakah rinawm turah ka ngai a.

***

Tuk khat ka zing tho chu ka tho sual deuh a ni ang, ka lu a hai deuh a. Chuvangin ka mu leh a. Ka muhil thei si lo. 'Zotei hi e nge a chanchin ni le? A dam em aw?' tiin WhatsApp ka hawng a. Zotei nena kan inbiak na ṭhin ka hawn chuan Display Picture-ah Japanese tlangval nena an inkuah lai thlalak a hmang a. A status-ah 'I love you because you love me' tih a hmang bawk a.

Ka rilru a na em em a. Engmah lah tihtheih ka nei si lo. Amah lah ram dangah a awm daih bawk si! A nuteite hrilh chu ka ti chiah bawk si lo!

Kan inhriat ṭan aṭanga kan in-text-na chu ka Save avangin ka en let thei a. WhatsApp-a kan inbiakna pawh ka backup avangin ka en let thei. Chungte chu ka chhiar nawn ka chhiar nawn a. Min fawhna ka hmui chu ka khawih ka khawih mai. Ka birthday-a Slambook min present, aman min Sign sak hmasak ber chu ka en a. 'Hei hi ka hla duh ber a nia' tia ka phone-a hla a dah chu ka play a. Tuma hriatpui lohin ka mittui chu a sur zung zung a.

Zotei chu ka dem em lo. A chhan chu, a bialpa chu mual za tam kar danah ka awm a, Live-in kan inhmu thei tlat lo. Chu mai ni lovin, amah ngaizawnga zar rengtu nen an inṭhenawm. An Office kalkawng ala inang zui!

'Tunah chuan a heh vam sen ham kha hnamdang tlangvalin a fawp tawh awm si a' tiin lungchim taka ka fawh lai ka mitthla a, ka rilru chu a na a ni.

A thusawite ka ngaihtuahnaah alo lut zut zut a. "Ka zir zawh ve leh kan innei dawn nia." a tih te, "Ka hmangaih che." a tih te kha! Zanah pawh muhil thei lovin ka let ka let a. A va hreawm tak em!

Hmana ka inluaha chawlhnia a rawn len kha ka la hre reng mai. Mawlmang, nalh siin a inchei a. Amah chauhin a ni. Kawng kan inkalhkhum a. Khumah kan ṭhu dun a. Kan inkuah a. Nupa kan nih huna fa kan nei anih chuan kan fa hming tur te kan sawi a. Kan hlim dun hle a. Tlema tlemah kan chesual lo chauh a ni.

A tukah a ṭhiannute inah ka leng a. Min rawn biak tawh ngai loh thu te, WhatsApp-a ka Voice Call a lak duh ngai loh thu te, WhatsApp-a ka biakna chu a Seen ṭhin a, min chhan let ngai loh thu te ka hrilh a, a Dp leh Status pawh. A ṭhiannu hnena ka sawi ang chu Thanmawia ka hrilh a.

 

8

 

Zotei nen kan inṭhen hnu chuan rei tak chhung pawn chhuak lovin ka inkhung bo (College ka kal leh mamawh ngaihtuaha ka chhuak tih loh) a. Chutianga thla thum vel ka awm hnu chuan 'Hmeichhe pakhat vangin maw hetianga ka awm ang?" tih hi ngaihtuah turin ka ṭhianpa Thanmawia chuan min rawn a. Chuta ṭang chuan pawn pawh ka chhuak ve leh ta a.

Vawikhat chu Zonet Zawlbuk channel-ah Chanchinthar ka en a. Chutah chuan Mizo nula pakhat America-a a thih thu leh a ruang chu naktipa Mizorama an rawn phurh thlen tur thu an puang a.

Ka han ngaithla chiang deuh a. Ka rei leh! Mitthi hming chu Zotei hming ang chiah a ni! A thlalak an rawn tihlan pawh ka hmangaih Zotei kha a ni! A thlalak ka hmu chiah chu ka mit sulh a. Ka khur der der a. Ka thinlung chu a rum a ni! Chutih lai chuan ka phone alo ri a, ka en chuan Thanmawia a ni. Ka pick-up a. Min bia. Mahse, ka ṭawng chhuak thei lawk lo. Nakin deuhah chuan aw lawi rutin, "Ṭhianpa, hnem ka ngai e!" ka ti a, ka dah ta a.

Thanmawia alo thlen chuan, "Nangmah phatsantu a nih kha!" a ti a.

"Mahse, ka la hmangaih alawm!"

"A chanchin an ziahna Internet-a mi kan chhiar a. I hre duh em?"

"Hre duh. Han sawi teh?"

"Chanchintharah khan a zawng a zain an puang lo anih kha. Miin an pawngsual a, an that zui a ni. Tunah hian chutianga titu chu Police-ten an zawng mek."

***

Zotei ruang rawn thlenni chuan ka hmuak ve a. Chawhnu lamah a nuteite inah a ruang chu a thleng a, zanah Champhai lam panin phurh chhoh tur a ni.

An phurhchhoh hma chuan a chanchin an han sawi a. Police Evidence aṭanga a landan chuan mi pakhatin a pawngsual a, a rekhlum zui ta a ni. Champhaiah chuan ka kal ve lo. Inah ka haw a, Zotei thil tawn chu ka ngaihtuah a. Ka muhil thei lo. Ka tho a, ka chhuak a. Black-in Rum Um hnih ka lei a. Um khat chu ka in a, ka chatthla der mai a. Ka harh chuan ni alo sang tawh viau. Ka lu chu a rit luk a. Mahse, ka thinlungah Zotei mawlh chu a awm.

***

Zotei thih aṭanga a kar khatnaah chuan Thanmawia'n Zotei ṭhiannuin an ina leng tura min duh thu min hrilh a. Ka zu leng a.

Chuta ka thil hriat chuan min ṭhawng hle mai! Mahni ka inhuat phah reng dawn a ni.

Zotei khan midang minlo kawpsan hauh lo mai! Japanese tlangval, amah kherh rengtu khan a phone a chhuhsak a. WhatsApp-a a Dp pawh a thlalak leh Zotei thlalak a Edit a dahsak a. A status pawh a thlak sak alo ni a! Ka mobile number kha Zotei chuan a tira a hriat bel nen a theihnghilh tlat mai a. Chuvangin, min be ngai lo alo ni. Tin, WhatsApp-a ka message pawh amahin alo seen ṭhin alo nih chu! A hrethiam awm der si lo, ava sual tak em e aw! Chung chu Police hnena Zotei chuan complaint a tum a. Mahse, a complaint chuan thahah a vau si! Chung chu Zotei Diary-ah a inziak vek a ni. Zotei Diary chu a ṭhiannu chuan min pe a. Mahse, kei chuan ka rilru tina zualtu mai anih avangin ka halral a.

"Zote, kalo ring chhe lutuk che a ni. Min ngaidam mawlh mawlh rawh." ka ti a. Ka ṭap a. A ṭhiannu hnenah chuan, "I ṭhiannu kalo ring chhe lutuk a, min ngaidam ang che." ka ti a.

9

Ka in luahna vengah chuan nula hleitling deuh a awm a. A hmelṭhain a pian a nalh khawp mai. Kan inhmuh changin min nuih saih ṭhin a. Mahse, ka thinlung kawngkhar chu tutanmah ka hawng hrih lo a ni.

A hming chu Rody Vanlalruati a ni a. Rody tiin an ko ṭhin. Zan khat chu an inah intihengthawl nan ka leng a. A chhungte an awm lo hlauh.

"Rody, i hmel ṭha si a. I luck ngawt ang a?" ka ti a.

"Luck lo e. Mipa hi ka ngaihtuah lo lutuk a!"

"I ngaihtuah ṭhin tho a!" ka ti a, ka nui hak a.

"Ngaihtuah ngai meuh lo."

"Ngaihzawng i nei em?"

"Nei chiah lo!"

"Nang berin i neih loh chuan!"

"E nge?"

"Kei pawhin neih ka rikruk zet nain ka nei lo mai ang." ka ti a.

"Eng vang chuan?"

"Eng vang vak nge ni ang? Ka ngaihzawn tumin ngaihzawng neih a tum si lova!" ka ti a. Kan nui a.

***

Rody-i'n 'Ilo leng fo dawn nia' min tihna a ṭawngkam ṭha umin a tuk zan aṭang chuan ka hman anih phawt chuan an inah ka leng ta ziah a.

Ka nu leh pate chuan College kal nan Bike min leisak a. Bike chuan kan inphur a, kan lengdun ṭhin a. A chhungte chuan kan chanchin chu an hria a, an kamkhat lem lo a.

Vawikhat chu Chapchar Kut, Lammuala hman anih ṭumin kan kal a. Tlai lamah Chawnghnawt hun alo thleng a, Artui chhum hmin an inbarh a. A nuam ka tiin ka hlim hle.

***

Thanmawia chuan I.R-ah hna a hmu a. Lalrinsangi (Rini) khan Sawn a pawm. Kei chu ka bialnu chu an pawngsual a, an that a ni. A va runthlak bik tak em!

***

Zotei ṭhiannu Apuii chuan vawikhat chu min rawn phone a. 'Inhmu ang' a tih avangin an inah ka leng a. Kan inhmu khat a, alo thau deuhin ka hria.

"Ka rawn biakna chhan che chu thil pek duh che ka nei a." tih pahin ka hming inziahna Envelope min pe a. Ka han hawn a, ka chhiar chuan:

"Ka hmangaih em em U Puia,

Ka ngai thei lutuk che. Kan inbe thei si lo! Ka awmna bula Japanese pa khan min tibuai reng a. Rawn haw ka duh. I thu ka awih lo kha ka inchhir khawp mai. Ka hmangaih che a, ka hmangaih reng ang che.

Kan intawn leh hma zawng atan mangṭha.

I hmangaih,

       Zotei"

tih alo inziak a.

Ka mit sulh a. "Engtin nge he lehkha hi i hmuh theih?" ka ti a. "Kan Japanese pa inpuanna aṭang khan an hrechhuak a. He i lehkha pawh hi alo thukru a." a ti a.

"Tunah a phone chu khawiah nge a awm?" ka ti a. "Kha." tih pahin Zotei phone chu min pe a. A phone locket tura ka leisak chu a inkhai va a. Phone chu ka hawng dawn a, Password chhut a ngai a. Ka hming ka han chhu chhin a, a inhawng ta a.

Zanah chuan ka mu thei lo. Ka let ka let a. A chang leh 'Zote, ka hmangaih che. Min ngaidam rawh. Kalo ring chhe lutuk che a ni' ka ti a.

A tukah Apuii nen chuan amah hriatreng nana lung an phunah kan kal a. Ka insum thei lo. Apuii pawh a ṭap a. Kan haw lamah a awmna ṭhin a nuteite inah chuan kan kal kawi a. Zotei room ṭhinah kan awm a.

Zotei nuteite nupa chuan, "Puia, tuar thiam rawh aw? Zotei chuan vanramah, hreawm awm tawh lohna hmunah alo nghak che tih hrerengin Pathian ṭih takin i nun hmang la. Zotei nen inṭhen tawh lohna hmunah in intawng dawn nia." a ti a.

Apuii chuan thil engkim alo hrilh a ni.

***

Tun hnua ka ngaihtuah chang hian Zotei khan min hmangaihin ka hre ṭhin. Tunah chuan mumang mai a chang tawh si! Nghilh har Zotei zûn chuan min kiansan ni reng a nei lo.

***mm***

17.05.2019