Thawnthu tawi: Ruattei

RUATTEI
- J Lianhmingthanga Sailo (Ngurthansangi Pa)

 

1

Pawl 12 (Science) ka zirzawh hnu chuan kan khuaa a chunglam zir zawm zelna tur a awm loh avangin Aizawla ka patea'n an in aṭanga College kal turin min hruaithla a.

Ka pateate hi Venglaia awm an ni. Physics Subject hi ka tuina a nih avangin chulama inthlurbing ka duh avangin Govt. Zirtiri Residential Science College-ah ka in-admit. Ka pateate chuan Millenium Centre-ah Readymade dawr an nei a. Chu chu ka patea nupui chuan a nghak ṭhin a. An fanu College kal ve thoin Class a kal loh ni chuan a nghak ṭhin. Ani hi Hrangbana College-ah kalin, B. Com a zir a.

Ka patea hi First Class Constructor niin thingtlang lamah hna a thawk ṭhin a. Thla khat chuangte a zinbo ṭhin. A hming chu Lalhminghlua a ni a, Hlua tiin an ko ṭhin. An nu chu Ramsangpuii a ni a, Sangpui tiin an ko. An fa neihchhun, B. Com zir ka tih kha Lalengmawii (E.M-i) a ni bawk.

Ka pateate hi anmahni Inah an cheng a. Veivahna turin Car 2 leh Scooty 1 an nei. Scooty chu E.M-i'n Class kal nan a hmang ṭhin a. An Car pakhat zawk chu pa berin a hawl chhuak ṭhin a. A pakhat zawk chu nu berin Bazar nan a hmang ṭhin. Tin, kei pawhin a chang chuan ka khalhchhuak ve zauh zauh, E.M-i pawhin. E.M-i chu a hleitling a, a chhiat vak loh avangin an College-ah hre lo pawh an awm lova. 2^nd Year anih kumin College Miss-ah an thlang nghe nghe.

Ka patea chuan 'Ka awm lo deuh reng si a. I nutei lahin dawr a nghah a ngai ṭhin si. In unau lah College hranah inkal si a' tiin Redmi Smartphone min leisak a. E.M-i chuan Smartphone a nei nain a hmang ṭangkai lo hle. Rawn rim tumtu pawh an awm ṭhin a. Mahse, mipa a ngaihsak vak loh avangin 'Lehkha zir a ngai' tih chhuanlamin a room-ah a inkalhkhum hmiah ṭhin. Ṭhian hi a kawm tam lem lova. Mahse, kan inbula awm, a College kalpui Lalengpuii (E.P-i) nen chuan an inkawm zeuh zeuh.

Kan College-ah chuan ṭhian ka chhar a. A hming chu Lalrotluanga a ni. Tluanga tiin an ko ṭhin. Mahse, kei chuan 'Lr' tiin ka ko. Armed Veng N-a awm an ni. A nuin eichawp dawr a siam a, a pa erawh chu UDC a ni. An fa neihchhun a nih avangin a nu leh pa chuan an duat hle a, a kum 19 pianchamphaphak lawmsak nan R15 an leisak a. Hunawl kan neih chuan kan inhrilh a, kan lengdun fo ṭhin. Ani hi chuan B. Sc (Hons) a zir. A nu leh pa nen chuan an khawsa a. Chanmari West-ah bialnu a nei a. Chutah chuan kan leng fo a. A bialnu chu 'Dingding' tiin kan ko.

Vawikhat chu Chanmari West-ah Mitthi an awm a. Chuta lengkhawm ve turin a bialnu chuan Lr-a chu a sawm a. Lr-a chuan min rawn sawm chhawng a. Ka lu a nat deuh riai riai avangin, a nat lutuk hmain 'tihdam aiin inven a ṭha zawk' tih pahin Nachhawkna ka ei a, ka muzal a. Kartawp chawlh lai anih avangin ka zirlai lamah rilru ka pe lutuk duh lova.

Ka phone chu Test Message (SMS) a dawng a ni tih hriat takin a rawn Vibrate a. Ka en chuan Lr-a'n, "Kima, zanin e nge i programme?" tih min rawn thawn hi a lo ni a. Ka chhanglet nghal a. "Engvakmah. Nang?"

"Chanmari West-in mitthi an nei a. Chuta lenkhawm chu ka rilruk deuh."

"In nuin a sawm che a ni maw?"

"Aw. Tihtur pawimawh i neih lem loh chuan min han kalpui la ka ti a?"

"Awle."

"A nih, lo insiam rawh aw? Ka insiam ang a, ka rawn chho nghal a ni mai."

Ka insiam peih hnu rei vak lovah chuan Lr-a chu a rawn thleng a. Ka nutei Car chuan a bialnute in lam kan pan a. A bialnute in kan thlen chuan Dingdingi chuan, "Car in rawn keng bawk a, ka ṭhiannu Ruattei sawm ve ang u?" a ti a.

An in piah deuh lawkah chuan Ruatteite in chu a awm a. Kan thlen chuan Dingdingi chuan, "Ruatte" tiin a ṭhiannu chu a ko a. "Eih" tih pahin hmeichhe pakhat hi inchhung aṭang chuan alo chhuak a. "Khawhar ina lengkhawm turin kanlo sawm dawn che a?" Dingdingi chuan alo ti var a.

5.7 ft vela sang, ria lutuk lo, thau lutuk lo, ngo lampang, tarmit vuah; chu hmeichhia chu kalo en reng a. Varanda Light hnuaiah chuan a eng no set hian ka hria a. Ka hmeichhe hmuh tawhah chuan ala hmelṭha ber ang. A taksa lang laite chu a no chek a.

"Ka'n insiam ang e. Min lo nghak r'u aw? Lo lut rawh u." tih pah chuan inchhungah a lut a, kan lut ve nghal a.

Engtin emaw ka awm tlatin ka hria a!

"Dingding, tu nge a hming pum?"

"Lalremruati, Ruatte tiin kan ko ṭhin."

"Ka hmelṭha tih zawng tak a ni!" ka ti a. "I star a ni maw?" Dingdingi chuan nui hak hak chungin a ti a. "Ka duh reuh e. Minlo biak rawh aw?" ka ti a. Dingdingi chuan nuihsak pahin, "Tehreng mai!" a ti a.

Ruattei chu a rawn insiam zo a. "Kal ila?"a tih chuan kan chhuak a.

Kan Car dahna kan thlenin Dingdingi chuan, "Nang Ruatte, a hmaah hian ṭhu la? A hnungah U Tluanga nen kan ṭhu ang." inlazei deuhva min siai zeuh pah chuan a ti a.

Ruattei chu ka bulah chuan a ṭhu a. Tarmit phena a mitmeng mawi takah chuan ka tuiral a ni. Ṭawng ve ngaihna pawh ka hre lova. A khat tawkin ka va melh leh ṭhin.

Rei loteah khawhar in bul kan thleng a. Car ka Side ṭhat chhung ka ṭhiante chuan minlo nghak a. Ka hman chuan kan inzui lut a.

Lo ṭhu hmasate chuan min en duh viau a. Tlar hnungber chu a la awl avangin chutah chuan kan ṭhu a. Kei, Ruattei, Lr-a, Dingdingi. Chutia kan lengkhawm chu nuam ka va han ti tak! A khat tawkin Ruattei nen kan mit a intawng zauh ṭhin a. A lai ru ve a ni tih a awmdan aṭang chuan ka hre thei.

Dingdingi hnena 'minlo biak rawh' ka tih kha 'Awle, a ni pawh minlo biak dawn nia' a ti lo ang a, min ngei phah ang tih ka hlau rilru hle.

Lengkhawm kan ban chuan Dingdingi chuan min rawn nuih sak pahin, "La haw mai lo ula, Ruatteite inah thingpui i in ang u?" a ti a. Kei chuan pawi ka ti lo hle. Ruatteite thlahpah chuan thingpui inin kan ṭhu khawmuang zawk a.

Kalkawngah Lr-a chuan, "Dingding, Ruattei chuan Thingpui lum nachang a hria ang maw?" a ti fiamthu a.

"Thiam lutuk! Anite chu nula fel alawm a nih!" a ti a.

Ruatteite ina kan ṭhut lai chuan fiamthute kan sawi a, kan hlim hle a. Thingpuite kan inzawh chuan zan danga leng leh tura min sawmtu chu a bula la awm chak hle mah ila, kan ṭinsan ta a.

Dingdingi chu an inah kan thlah a. Dil ngai hauh lovin Ruattei phone no min pe a. Min pek pah chuan, "Tibo miah suh aw?" a ti a. An inbul kan thlen chuan Dingdingi chu a chhuk a. Inthlahlel taka Lr-a nen an infawp lai chu Car Side Glass aṭang chuan ka hmu thei a. Tichuan, kan inmangṭha a.

Kan in kan thlen chuan ka room-ah kan lut a.

"Lr, Ruattei kha hmelṭha i ti em?" ka ti tawl a.

"Hmelṭha vetho a ni lawm ni ka ti mai a!"

"Ka hmangaihin ka hria!"

"Chuti anih chuan i tan kan kherh anga ni mai alawm!"

"Naktuk zanah i leng leh ang aw?"

"Awle han ti ngawt ila thil hmanhmawhthlakte awm thei a ni a, kan la inzai leh dawn a nia!" a ti a.

A haw hnu chuan mu turin ka insiam a. Ruattei chu ka Text (SMS) ta a.

"Hmelṭhatei hi a mu tawh em aw?" ka ti a.

"Tu nge aw? Hmelṭhatei ni lovin Ruattei a nia i text!"

"Min la hre mai ang. Ruattei i ni ang tih chu i no min petu aṭang khan ka ringhlel lo. Hmelṭha ka tih vang chein Hmelṭhatei ka rawn ti che a nih kha!"

"Tu nge i nih insawi tawh la?"

"Kima, Dingdingi bialpa Lr-a ṭhianpa. Zanina i ṭhutpui kha!"

"E, ni dawn tak. Min rawn text duh a, i va fel!"

"Kei tak hian a nia fel ti che. Ka text min reply duh a!"

"I mu tawh em?"

"Aw, ka mu meng a!"

"Ka SMS hian i mitmeng mawi tak kha a hmu bik awm si a!"

"Nia"

"Thudik alawm ka sawi."

"E nge i tih ṭhin?"

"A Aw B ka zir ṭhin, nitin School-ah!"

"College ila rap lova?"

"Nia. Govt. Mizo Higher Secondary School-ah XII (Sc) ka zir mek."

"Ngaihzawng i nei em?"

"Nei em aw? Min ngaizawngtu chu an awm!"

"Ka rawn text che hi a pawi em?"

"Pawi lo e."

"Kum engzat nge i nih tawh?"

"18. Nang?"

"21"

"I hmingpum min hrilh ve la?

"Lalruatkima, Kima tiin min ko ṭhin."

"Ruatte, thil pakhat sawi ka duh a. Min ngei phah nan hmang suh aw?" tih chu ka text zui a.

"Ngei lo e. E nge ni, sawi la?"

"Ruatte, ka hmuhtirh aṭang che khan ka hmangaih chein ka hria!"

"Min bawl!"

"Bawl lo. Ka bawl phal lo che!"

"Bawl bawk!"

"Ruatte, ka ti tak tak. Ka bawl lo che!"

"Kan la hria ang chu."

"Ruatte, i thinrim em? I thintim chuan min hrethiam ang che aw?"

"Thinrim lo e. Khawi vengah nge i awm?"

"Aizawl Venglaiah."

"In i luah ami?"

"Aih, luah lo e. Ka pateate bulah ka awm. Unau engzat nge in nih?"

"Pathum. Ka u leh ka nau hi phai lamah an awm a, kan vaiin hmeichhia vek kan ni."

"Ruatte, ka mangṭha phawt ang che aw?" tih ka text zui nghal a. "Awle, nang pawh mangṭha." min rawn tih chuan ka mumanga Ruattei hmu tura beiseina nei chungin mutmu ka tuah ve ta a.

 

 

 

 

 

 

2

Pathianni zan alo thlen chuan a hmaa kan intiam lawk angin Lr-a nen chuan Ruatteite ina leng tur chuan kan in aṭangin a Bike-in kan kal a.

Dingdingi kan va hmu zawk a. 'Min lo biak ta em? Engtin nge a chhan che?' tia Dingdingi ka zawh chuan, "'A ni pawh le!" a ti a nih kha!" tiin min chhang a. Lr-a chuan Ruattei hnenah, "Nakin deuhvah ka rawn kal leh ang. Ṭhianpa hi ka va hruai lawk ang e." a ti a.

Ruatteite in kan thlen chuan amah chauh alo awm a.

Lr-a chuan, "Ṭhianpa hian a sawi a sawi che a. 'Min lenpui rawh' a ti reng mai a, kan rawn leng chawt a nih hi!" a ti a.

Ruattei chuan, "Keini inahte inlo leng duh a, in ti lawmawm khawp mai!" a ti a. Kei chuan, "In inahte keini ang min lentir duh avangin kan lawm khawp mai!" ka ti a.

Lr-a chuan, "Tak takin, Kima hian a sawi reng che a!" a ti a. "Eng kawng zawngin maw?"

"I hmel ṭha a tih thu te, a duh zia che thu te."

"A ti mai mai anih chu!"

"Ka ti mai mai lo!" ka lo ti khauh a. A chezia chu kalo en reng a. Lr-a chuan a bialnute ina va lengzawk turin min chhuahsan a.

"U Kim, kei aia ṭha an awm si!" a ti a, a thaw deuh hak a.

"Ka hmuh tawhah chuan tluktu che an awm lo!"

"Tak tak a nih chuan ka va'n lawm!"

"Dingdingi'n thil hrilh che a nei em?" ka ti a.

"Aw, nei e. Tukin zing khan min hrilh a."

"Mak i ti em?"

"Ti lo e."

"I thu hmu hmasa lovin ka lo leng ringawt a. I pawi ka sawi chuan min ngaidam dawn nia."

"Ka pawi i sawi lo."

Ngam leh ngam lovin a bulah ka ṭhutna chu ka sawn a. Ka kuah a. Ka kut chu a dahthla ém lo e.

"Ruatte, ka thinlung zawng zawngin ka hmangaih che.' tih pahin ka kuaidak a. "Kei pawhin ka hmangaih che." a tih lai chuan a hehah duhthawh takin ka fawp a. A sam chu ka chul a, a rimtui hle.

Ka hmangaihi kiangah chuan lungmuang takin ka ṭhu a. Ani chuan ka kut a khal niap niap a.

Ka malchungah ka kuai mu a.

Rei lutuk loah Lr-a pawh a rawn let a. Kawngka chu kan kalh lo nain a rawn kik a. Keini chu kan ṭhu ṭha vat a.

"E nge inlo sawi?"

"Nangmah!"

"Engtin?

"Dingdingi i duhzia!" Ruattei chuan nui ar ar chungin a ti a.

"Nia, Dingdingi chu ka hmangaih alawm! Ruatte, khaw nge i chhungte hi an awm a?" a ti a.

"An lengchhuak vek."

"An lo haw dawn tawh em?"

"Haw dawn tawh mai thei. Haw in tum hnai ami? La ṭhu rawh u."

"Kan tlaivar law law dawn a mi, Kima?" Lr-a chuan a ti a.

Tlaivara Ruattei bula awm chu ka chak lutuk. Mahse, nula rim tlaivar ngawt thu a awm si lo.

Lr-a chuan Television a On a, Inkhel a en a. Ruattei nen chuan a khat tawkin kan inen leh veng veng ṭhin.

A hnu deuhah chuan Ruattei nu (Pi Hmangaihi) leh Ruattei pa (Pu Ramthanga) te chu anlo haw a. Keini ṭhiandun pawh chu ṭhu khawmuang tawh lovin kan haw a. Kan haw tur chu Ruattein min thlah a. An Varanda Light-in a chhun phak loh chin kan thlen chuan Ruattei chu a kawnga kuahin ka fawp a. Kan inmangṭha ta a.

 

 

 

 

 

 

 

 

 

3

Ka nau E.M-i hnenah ka bialnu neih chungchang chu ka hrilh a. Ruattei chu alo hre em em a. A School banglai alo hmu fo tawh a. Hmelṭha a tih thu leh an College amite pawhin hmelṭha an tih thu a sawi a.

Ruattei nen kan inngaihzawn ni hi 26^th January a ni. India ram Republic Day anih avangin hriat a awl hle.

Valentines Day hi tunhma chuan ngaihhlut nachang ka hre lo ṭhin a. Mahse, Ruattei nen kan inngaihzawn aṭang hian ka tan hlutna a nei ve ta. Kan hma lawka Valentines Day chu kartawp emaw Holiday a nih koh avangin Class Off-in kan bialnute ve ve nen Blood for your Valentine Programme-ah Lr-a nen kan tel a. Restaurant-ah kan chawl a. Ruattei chuan nuam a tiin a hlim viauin ka hria. Ani aiin ka hlim zawk a, nuam ka ti bawk.

City Park-ah kan kal a. Pipuah kan inthen a. Nuam kan ti khawp mai.

City Park-a ṭhutna an siamah chuan Ruattei nen kan ṭhu dun a.

"Ruatte, vawiin ni hi eng ni nge?" ka ti a.

Ani chuan, "February ni 14!"

"Chu lovin?"

"Thawhlehni"

"Chu lovin?"

"Valentines Day"

"Chu lovin?"

"Ka hre tawh lo. Nangman sawi la?"

"Nang leh Kei te, Lr-a leh Dingdingi te ni!"

"E, ni dawn tak! U Kim, ka hmangaih che!"

"Ruatte, kei pawhin ka hmangaih che. Min kalsan miah suh aw?"

"Umm. Ka kalsan lovang che!"

"Min kalsan chuan ka tuarna ngawt ang!"

"Kei pawhin!"

"Mahni awmna hmun a piangah rinawm takin kan awm dawn nia aw, Ruatte?"

"Awle."

A biang chu a no chek mai a, a kut pawh. Hna rim a thawk ṭhin tho nain a intifai peih tih a hriat a. Lr-a leh Dingdingi pawh kan piah lawkah chuan an titi melh melh a. Kan pahnih ang bawkin midang an ngai bik lo.

Kan haw lam chu Millenium Center-ah kan kal pah a. Ka pateate dawrah chuan kan lut zawk a. Ka nutei alo awm a. Kan pali chuan thingpui min intir a. Chumi zawhah tlereuh zawrhnaah kan kal a. Ka patea'n Pocket Money min pek ka khawl aṭangin Zungbun ka leisak a, ka bun tir a.

Ruattei chu a lawm thiam khawp mai.

 

 

4

MZP Organised-in Inter College Quiz a awm a. Chutah chuan Lr-a nen kan College aiawhin kan tel ve a, Dingdingi chuan min rawn ṭawiawm ṭhin.

Round hmasa berah chuan Govt. Aizawl College te, Govt. Champhai College te, Mizoram Law College te kan tum a, kan chak a.

Second round-ah chuan, T Romana College te, Govt Lunglei College te, Johnson College te nen kan intum leh a, kan chak a.

Semi Final-ah Govt Aizawl West College te, Khawzawl College te nen kan intum leh a, kan la chak a.

Final Round chu Vana Pa Hall-ah kan nei dawn a. Hemi ṭum hian E.M-i chu Dingdingi leh Ruattei nen min rawn ṭawiawm turin an lokal a.

Hemi hunah hian Pachhunga University College nen kan intum a. Vana Pa Hall kan khat.

Zawhna chu chhan theih loh kan nei tlem khawp mai. Result an puan hmain a duh duh tan chhan theih turin zawhna pakhat an siam a, chu chu 30 Secs chhunga chhan tur a ni. Chumi zawhna chu Ruattei'n a chhang a, lawmman a la a. Zawhna chu 'Author of Tintin' tih a ni.

Ruattei chhiar turin Comics leh Chanchinbu chi hrang hrang Dingdingi ka thawn zauh zauh a. Adventure of Tintin te, Tinkle Digest te, Times chanchinbu te ka thawn tlangpui. XII (Sc) zirlai anih avangin ka leng ngun lutuk lova, phone hmangin kan inbe ṭhin.

Zomuanpuii'n 'Ka hmangaih che asin' tih hla a sa a, a aw a mawi bawk a; a zai ṭha khawp mai.

Result an puan chuan PUC-in min phak lohna chu 40 Points a ni a. Tichuan, MZP Inter College Quiz Competition-ah Pakhatna kan College chuan kan la ta a.

Ka patea chuan kan chak chu chawhluiin min lawmsak a. Ruattei leh Dingdingi pawh an sawm tel a.

Chumi tlaia chawei tur an lokal chu an nalh dun hle mai. Ka pateate nupa hnenah chuan E.M-i chuan a inhmelhriat tir a. "Tarmit vuah lo zawk hi Dingdingi, Lr-a bialnu a ni a." a tih chuan Dingdingi zak chu a biang a sen ṭan ṭan a. "Tarmit vuah zawk hi kan mo ni mai thei tur dinhmun a ding mek Ruattei a nih hi." a tih chuan Ruattei zak chuan, "Ani hi a nei chhe lo teh mai a nia!" a lo ti a. Kan vai chuan kan nui a.

Chaw kan eikham a, kan nulaten chaweina vel an tihfel hnu chuan ka room bathlarah kan ṭhuho a. Dingdingi chuan, "Quiz chu inlo thiam nupa hle mai!" tiin Ruattei chu a fiam a. Ruattei chuan, "An chhanna hriat lohte kha ka hre vek asin!" a ti a, a ṭhiannu chu a sik a. Fiamthu sawiin kan nuiho dar dar a.

Zan anih hma chuan Lr-a nen an inah ve ve kan thlah a.

 

 

 

 

 

 

5

Kan College NSS chuan Champhai District-a awm, Vaphai khuaah Special Campaign kan nei dawn a. Chuta kal tur zingah Lr-a nen chuan hming kan pe lut ve a.  Heta tel tur hi kan vaiin mi 20 (Lecturers 2 leh Programme Officers 2 nen) Kan kal dawn ṭepah Hmeichhia 10 an rawn tel belh.

Thawhlehniah Bawngkawn aṭangin kan chhuak a. Kan kal hma zanah Ruattei inah kan ṭhian dunin kan lut zawk a. Ruattei chu kan kalna tur chungchang ka hrilh a. "Ka ngai dawn hle mai che. Thil min rawn hawn dawn a nia. Tluang deuhvin kal ang che u. Rinawm takin kalo awm ang." a ti a.

***

Aizawl aṭanga kan chhuah chuan ni chhuah ala hun chiah lova. Ka Junior ami Maliani ka ṭhutpui a, Lr-a'n a Junior tho Remsangi a ṭhutpui bawk. Kan vai chuan Driver leh Conductor nen 32 kan ni.

Kan tlan tluang hle a. A changin kan zai a. Muthlu pawh kan awm lo.

Tluang takin Seling kan thleng a. Tukṭhuante kan ei zawh hnuin a ṭhente chu kan bazar a. Theihai vel sa leh Lakhuihthei vel sate ka lei a.

Tluang takin Vaphai kan tlan lut a. Community Hall-ah kan thleng a. Y.M.A Member-ten minlo hmuak a, an fel hle.

Vaphaiah hian Zunin kan siam dawn a, Tuikhur pakhat nen. Kan thiltih tur kan zawh hunah Fiara tui kan tlawh dawn a ni. Ruattei ka hawn sak tur Fiara Tui thunna tur Bottle ruak pawh ka keng a. Kan thlen zan chuan Public Awarness Campaign kan nei a, mipui an lokal ṭha viau.

A tuk zingah hmun thumah inṭhenin hna kan thawk ṭan a. Lr-a nen chuan kan awmna a inang a. Remsangi leh Malianite pawh kan pawlah an tel a. Fiamthu an thiamin min chawk hlim khawp mai.

A ni khatnaah chuan lungrem leh Cement works kan zo a. A ni hnihna chu awm awl pahin kan lengkual a. Holiday a nih avangin Ruattei chu School a kal lova, phone-in kan inbe thei a.

A ni thum niah chuan kan thil Remi chu rawng kan hnawih a. An Y.M.A Member-te nen Football kan pet hova. Volleyball kan bengho bawk. A hlimawm hle.

A nilinaah chuan Fiara Tui kan tlawh a. Ka hmangaihi ka hawn tur ka la bawk. Hemi ni hian Mobile Network a chhia a, nileng leh zankhuain kan inbe thei lova. A hreawm ka ti khawp mai. Hun kan ngah avangin Ṭhasiama Seno neihna hmun te, Hla kungpui mual te kan tlawh bawk. 'Rihdil tlawh in duh em?' tia kan hotuten min zawhna chu kan duh hlawm avangin Rihdil kan tlawh bawk.

Ni a la tlangsan avangin kei chuan ka pate sawi fo ṭhin Vana Pa Thlan tlawh ṭha dawn riauin ka hria a. Kan hotupa ber hnenah chuan 'hun kan la ngah tho a, i tlawh ve ang u' ka ti a. Kan hotute chu an inrawn a. 'Hnahlan Branch YMA Secretary emaw President emaw biak theih dan i hria em?' tia min zawhna chu ka thil sawi a hlawhtling dawna ringin anmahni biak theihna phone no chu ka theih ang angin ka dapkual a. Rei loteah Hnahlan Branch Y.M.A Secretary phone no chu ka nei thei ta a. Kan hruaitute ka pek chuan an inbe ta a.

Hmanhmawh taka Tuiṭhoh Leia minlo chang turin an ti a. Chhun thingpuite kan inzawh hnu chuan Vana Pa Thlan en tur chuan kan kal leh ta a.

Tuiṭhoh kan thlen chuan nichina an biakte niawm tak chuan minlo tiding a. Kan chhuk sang sang a. An hruaina lam pan chuan kan kal leh ta a. A hmun kan thlen chuan Hnahlan Branch Y.M.A Secretary chuan Vana Pa chanchin tlangpui leh a thlan chungchangte chu a han sawi a. Ngaihnawm ti takin kan lo ngaithla a. Rabung khuain Vana Pa thlan awmna hmun an chuh thute leh helai hmun chauh hi Vana Pa thlan hmun anih thute a sawi a. Thlate kan lak sap sap hnu chuan Aizawl lam panin kan chhuak ta a.

Kan haw thu Ruattei chu ka hrilh duh lawk lova. A chhan chu, surprise ka duh a ni. Dingdingi leh Lr-ate chu hrilh lo turin ka ti a. Tluang takin Aizawl chu kan thleng a.  Ka nau E.M-i chuan, "E nge minlo hawn?" a ti a. Kan haw lama Selinga ka balhla lei chu ka pe a, ka pateate nupa pawh ka pe ve ve bawk a. Ka inbual fai a, ka muzal a. Zan alo nih chuan keimahin Ruatteite inah ka leng a.

***

Ruattei chu a nu MHIP Commitee-naah leh a pa chu Kohhran Pavalai Pawl Committee-naah an kal avangin lehkhazirin amah chauhin alo awm a. Kawngka ka kik a rawn hawn a min hmu chuan, "U Kim, engtikah nge in rawn thlen a?" a ti a. Kei chuan a biang lehlam lehlama dawm chungin, "Ka Savate, vawiin tlai khan kan rawn thleng. Nangmah hmuh chak avangin zanriah eikham ve leh kalo kal nghal a ni." tih pahin a hehah chuan duhthawh takin ka fawp a. Ani pawhin a thiam ang tawka uarin minlo chhang let ve a.

Inchhungah kan inkai lut a. Ṭhutthlengseiah kan ṭhu a. A mit ka hup sak a, "E nge ka hawn che ring rawh le?" ka ti a. Ani chuan, "Ih, Grape Wine a ni ang!" a ti a. "Ni lo. Grape Wine chu i in ka phal lo!" ka ti a. Ani chuan, "Ka hre tawh lo!" a tih avangin a mit ka hup ka phelh a, Fiara Tui ka hawn chu ka pe a. "Fiara Tui anih kha. I tana ka rawn hawn theih chhun a nih hi!" ka ti a.

Ani chuan, "U Kim, ka lawm lutuk aw? Ka beisei phak bak a ni." tih pahin min rawn hnaih a, min rawn fawp a.

"Ruatte, ka ngai thei lutuk che. Thawkkhat Mobile Signal a ṭhat loh laia ka khawhar dan chu nasa tak a ni!' ka ti a. Ani chuan, "U Kim, kei tak hian a nia ngai che. Ka mittui a tla fo!" a ti a. "Thla lehah Selection Test kan nei dawn a, chumi chhung chu hmuh loh hram che ka duh. Lehkhazira insawrbing ka duh a. Ka khua a har ngawt ang!" a ti leh a.

Ni e, XII (Sc) zir lai mai a la ni a, a chhungte pawhin inleng neih an la phal tak tak lovang tih ka hria. A duhdan chu zahawm ka ti a, "Kei pawhin ka ngai ngawt ang che. In Test zawh veleh ka rawn leng dawn a nia. Ṭha takin i zir ang a, ṭha taka i pass theih nan kalo ṭawngṭaipui ṭhin ang che." ka ti a.

A lehkhazir lai chu Dawhkanah a inpharh niaih a. Physics-a a chawh chi alo chawk a ni tih ka hria. Ka ensak thuak a. "I thiam loh a awm chuan min zawt hreh suh aw?" ka ti a. Ani chuan, "Awle. Selection Test han zo ila, ka tlin hlauh chuan min zirpui tur lai hual ka nei tawh!" a ti a. A hmel chu a hlim sarh mai a, lungkham a nei loin ka hria.

"Ruatte, i nu leh pate Committee chu anlo haw dawn tawh ang em?" ka tih chu, "An rawn haw ṭep tawh ang." a tih avangin ngai leh thlahlel em em chungin thawchham lek leka kan infawh hnuah ka hawsan a.

Ka haw hnu chuan Lr-a pawh a bialnu rim zovin min rawn tlawh zawk a. Chumi hnuah chuan rilru hlim takin mumang lamah ka Sava khawilai hmuh tum chuan ka muhil a.

***

Ruattei chuan Selection Test a hmachhawn dawn avangin keipawh chu a ṭula ka chhuak tih loh chu ka chhuak ngai lova, ka lung a leng thei hle. Lr-a erawh chu a bialnute inah a leng deuh fo tih phone-a min rawn biak aṭangin ka hria.

***

Ruattei'n Selection Test a zo tawh tih Dingdingi'n min hrilh a. Chumi min hrilh zan chuan Dingdingi leh Lr-a nen an inah kan leng a. Lehkha a zir nasa tih a hriat khawp mai, a mit chu a bui deuh a.

“U Kim, kan zawh hma zan hnih ka tlaivar. Mathematics leh Chemistry kan exam dawn vang a nia. Ka chak lohna Subject a nia." a ti a. Dingdingi chuan, "Tlaivar hi chu ka la pumpelh!" alo ti a. "Nangte chu i thatchhe em alawm. Ka rawn len pawh hian ka haw hnuah i mu nghal hmak ṭhin tih ka hria!" Lr-a'n alo ti zauh a. "Teuh nang aw! Lehkha zir hian ka mengrei ve thei lutuk!" Dingdingi chuan a ti a.

"Mitthi inah i tlaivar tawh em?" Lr-a'n a tih chuan Dingdingi chuan, "Tehreng mai. 2 a.m-ah ka haw." alo ti a. "I va tlaivar chiang em em!" Lra'n a tih chuan kan lo nui a.

"In sual!" Dingdingi chu a tum der vel a. Lra-a'n, "Bazara kan kal hunah Lapaw Chini leh Ice Cream bakah Vaipa Mix ka lei ang che. Tum tawh suh!" a ti a. Ruattei chu alo nui a. "Ruattei chu ka leisak miah lovang!" a tih chuan, "Min lei lo vaih!" a ti a, Dingdingi chu a nui a.

Hemi zana kan leng chuan kan hmaa Inrinnia Tlawng luia insuk kan ti a. Ka nutei Car a remchan chuan chumi chuan kan kal dawn a ni.

***

E.M.i hnenah kan thil tum ka sawi chuan kal ve a duh a. Chu chu ka ṭhianteho ka hrilh chuan anlo remti tlang a. E.M-i nen, kan pangain kan kal ta a. Ka bul Seat-ah chuan E.M-i leh Ruattei an inpawm a, ka hnungah Lr-a leh a bialnu. Tichuan, hlim takin kan insukna lai tur kan thleng a.

Kan insu zo thuai a. Kan insuk zawhchuan tui kan cheng a. Lr-a chuan Dingdingi a kokichhuan a, tuiah a tlukpui a. Dingdingi chu a ṭe vak a, midangho chuan kanlo nuih a. Tawk fang tuia kan chen hnu chuan kan thawmhnaw suk zarte chu a ro tawh hlawm avangin kan seng a, kan haw ta a.

 

6

Selection Test an neih takah khan Ruattei chu Pakhatna a ni a. A lawmpuinan Zikpuii Pa (KC Lalvunga) Lehkhabu ziah 'Nunna Kawng Ṭhuampuiah' ka pe a.

"Chhiar chhuak rawh aw?" ka ti a.

"Awle"

***

Ṭum khat chu Central YMA huaihawtin Inter Cultural Dance Competition a awm a. Cheraw, Sarlamkai leh Chheihlamahte inel tur a ni. Kan veng Branch pawh kan tel a. Cheraw khawngtu zingah ka tel ve a. E.M-i chu Sarlamkaiah a tel a, Lr-a pawh Sarlamkaiah a tel. Ruattei leh Dingdingi pawh an Branch telna Chheihlamah an tel.

Aizawl khawchhung chauh ni lo Mizoram pum anih avangin Aizawl pawn aṭangin Branch rawn tel nual a. He inelna hi an hlutin tel pawh an ṭhahnem viau a ni.

Result an puan chuan kan Branch chu Cheraw Kanah pakhatna kan ni a. Kan entir hi a hming chu 'Buhza aih Cheraw' a ni. Hei hi han sawi zau deuh ila. Ṭhenkhat chuan 'Bualpui Cheraw' an ti a. Mahse, a ni lo.

Vawikhat chu Mizoram pumpui huapin intihsiakna a awm dawnin Bualpui khua chuan Cheraw zirtir turin Hnahlan khaw mi an sawm a. Intihsiakna result puan anih chuan Bualpui khua chu pakhatna niin an Cheraw kan pawh chu Bualpui Cheraw tia sawi ṭhin alo ni zui ta a ni. Hnahlan khua 'Buhza aih cheraw dik tak' kan entir avangin hemi ṭum pawh hian pakhatna kan ni. Chheihlamah Ruatteite veng chu pakhatna an ni. Hmelṭha leh lam thiam tak mai chheih chu mipuiin an hmu duh khawp mai. Sarlamkaiah Lr-a te Branch chu pakhatna an ni bawk.

***

Hun a liam zel a. Krismass rim a nam ṭan ta! Ruattei chu 'Krismass leh kumthar vuakvet hi boruak a thianghlim lo' a nu leh paten an tih avangin thil lei tura a chhuak zawk tih loh chu pawnah a chhuak tam lo hle a. Ka len loh chang chuan phone-in kan inbe mai ṭhin a. Kei pawh chu ka nu leh pate'n, 'Krismass leh Kumthar chu rawn hmang rawh se, kan ngai ve tawh alawm." an tih avangin kan khuaa haw turin ka inbuatsaih a.

Ka hmuh duh avangin Ruattei chu 'Zawhtur ka nei' tih chhuanlam siama kan ina rawn kal turin ka Text a.

Keimah chauha ka awm lai a ni a. Alo thlen veleh ka Room-ah ka pawm lut a, kan inkeih mial mial a. Ka fawh hmasak ber ai chuan alo zei ve tawh hle. Tawk fang kan inkeih hnu chuan, "Ruatte, kan khuaa Krismass leh Kumthar ka hman a ngai tlat. Ka nu leh paten min rawn chah a!" ka ti a.

"Kal lo mai la?"

"Ka lei Pathiante thuawih loh chu ka ngam lo!"

"Engtikah nge i rawn chhuk leh ang?"

"Ka hre lo. Ka tum dan chuan Kumthar zawh veleh a ni ang."

"Min ngai ang em?"

"Lutuk. Nang zawk?"

"Kei pawhin ka ngai dawn che e!"

"Ruatte, inṭhen miah lovang aw?"

Kan zalen bawk a, kan inkuah a; kan infawp thul. A aia thui chu ka thlenpui duh miah lo a. Thlate kan la dun nasa ngei mai!

"U Kim, i chhungte minlo biak vek dawn a nia aw?"

"Tehreng mai"

"In thil neih zinga mi thei emaw pangpar emaw minlo hawn rawh aw? A awm loh chuan in khuaa pangpar?"

"Tehreng mai."

"U Kim, min rawn Phone ṭhin rawh aw?"

"Awle."

"Ka hmangaih che."

"Kei pawhin chu aia nasain ka hmangaih che."

A thang rei lutuk chuan a nu leh paten an hau ang tih ka hlau a. Ka rilru chuan a la ngai si!

"Kalo haw hunah chuan ka rawn hrilhlawk tawh ang che."

“Awle."

Ka haw hmaa a tawpna ni turin duhthawh takin kan inkeih leh a. A mittui chu a tling piau a, ka hrukfai sak a.

"Dam takin kan la inhmu leh dawn alawm."

"U Kim, ka ngai che em mai!"

"Ka aiawh turin Zungbun ka buntir che hi. Hei hi tibo miah lo ang che. Thlamuang takin loawm la, i ta ka ni reng dawn alawm!" ka ti a.

"A nih leh i chanchin min rawn hrilh ṭhin dawn a nia." a ti a. Chanmari Kawn thleng ka thlah a.

 

 

 

7

 

Kan khua hming chu Mualnuam a ni a. Champhai District-a awm a ni. In 150 vel a awm. Kohhran 2- Presbyterian Church leh Salvation Army a awm a. Sub Center a awm a. Zirna In hi P/S -1, M/S -1 leh Private English Medium Middle School a awm bawk. High School din tumin khawtlangin ṭan kan la mek a ni.

Ka pa hi Tlanglawma a ni a, Tlanga tiin an ko. Ka nu chu Lalhmunsiami a ni a, Hmuni tiin an ko. Kan unau hi 5 kan ni a, a tlum ber ka ni. Kan upa ber chu Mipa niin inhrang a chang tawh a. A chhang chu Hmeichhia niin Pasal a nei tawh. A milai chu Hmeichhia niin pasal ala nei lo, ka u chiah pawh.

Ka pa chuan Thir a deng ṭhin a. Buhdengkhawl leh Thingzaikhawl kan nei. Ka nu chuan eichawp dawr a siam a. Ka u hmeichhia upa zawk chu Health Worker a ni a, a naupang zawk chuan engmah thawh nei lovin In a nghak ṭhin. Kan upa ber hi Middle School Teacher a ni. Baptist Kohhran kan ni a. Ka u chiah hmeichhia chu kan khuaah Branch KṬP Treasurer a ni. Kan khuaah chuan a khawsa thei pawl kan ni.

***

Kan khua ka han thleng chu minlo ngai hlawm hle a. Kan chhungte an rawn lenglut ṭak ṭak hlawm a. Ka awmna leh zirna chanchinte min zawt hlawm a.

Ka inbual fel hnu chuan Ruattei chu kan khua ka thlen tawh thu leh ka chhungte anlo damṭhat thu ka hrilh a.

Krismass chu kan kawmthlang thlang lehah a thleng dawn a. Kumtin kan Branch ṬKP hian Winter Olympic kan nei ṭhin a. Tun kum pawh hian neih leh tur a ni. Advanced Krismass leh Gift Exchange te kan hmang a. Ka hlimlai ber pawhin Ruattei chu ka theihnghilh ngai lo.

Urlawk Zan alo thleng a. Ka lung alengin Ruattei ka ngai hle. Kan inpiah deuha kan khuaa ka awm laia ka kawm ṭhin Zaia nen kan kawmthlanga nula Lalhmangaihi (Angaihi)te Inah Ar kan kang a.

"Tun zan angah hian i kianga awm ve ka chak." tih chu Ruattei ka text a.

"Keipawh. Mite chu an kawppuite nen hun an hmang awm si a!"

"I bula awm angah min ngai rawh!"

"I taksa a awm si lova, a har a ni!"

"Ka ngai che."

"Tutenen nge i hman?"

"Ka ṭhianpa nen kan leng."

"Dingdingi'n min rawn zai miah lova, ka vui khawp mai. Mahniin ka room-ah ka awm. Love Song ka Play a, ka ngai lutuk che."

"I nu leh paten i chhuah an phal dawn lo tih a hriat vang a nih kha!"

"E, ka hrethiam e."

"I fel, muah."

"Nang zawk fe alawm fel."

"Ka lehkhabu pek che kha i chhiar tawh em?"

"La chhiar miah lo."

"Ruatte, lo chhiar la. Min ngaihtuah suh. Ka ṭhianpa ka'n lenpui ang e."

"Awle."

"Muah, muah. Ka hmangaih che."

"I love you too. Muah muah."

Kan Ar kan chu 2 a.m velah kan ei hnuah Zaia nen chuan mahni in lamah kan haw a.

 

 

 

 

 

8

Zing ka tho chu Sms pakhat hian min lo hmuak reng mai a.

"Duat, nizan i mutui em? Happy and Marry Chrismass" tih Ruattei hnen aṭangin alo ni a. Ka chhan let hnu chuan ka inphihfai a.

Chawhma ka inkhawm a, tlaiah ruai ka ṭheh a. Ka Ruattei a awm loh avangin tuvakmah ka kawm lo.

***

Kan Branch ṬKP hian harsatna kan neih loh chuan kumtin Krismas leh Kumthar inkarah Winter Olympic Games kan nei ṭhin ka tih tawh kha. Kuminah pawh Winter Olympic Games chu kan nei dawn a. Tlaiah ruai kan ṭheh a.

Recording Secretary-a min hman avangin infiamnaah ka tel lo. Items chi hrang hrangah kan inel a.

"U Kim, i thil record lai ka tibuai chak che" tih Ruattei chuan min rawn text a.

"Min tibuai hlei nem. Awm vela ka ti." tih ka thawn a.

"Engtin nge hun in hman?" tia min text-nachu ka chhan hnuin,"Insuk tur a awm a, ka'n insu lawk ang e." a ti a.

Items kan tih zawh hnu chuan intihsiakna result puanna leh lawmman semna te kan nei a. Chumi zawhah ruai kan ṭheh.

Zanah ka inkhawm a.

***

Kum thar ni chu ni hnih chauhvin a dang ta. Ruattei chu ka ngai thei em em a. Mumanga hmuh ka tum lahin ka hmu thei si lo. Ka phone-a amah nena thla kan dun te ka en ka en a. Ka text deuh reng bawk. Ani pawhin min ngai ve a ni ang, min rawn text awl lo a.

Ka hmaah chuan thil e nge lo thleng dawn tih ka hre lo!

Kumhlui thlah zan ni hma chiah a ni. Hemi ni hi eng ka ti nge maw ni, ka lu a rit riau a. Ka tluzal a. 'Emergency a awm e' ti niawm fahranin ka phone chu a rawn ri a.

Dingdingi alo ni a. Hlauthawng aw hian, "U Kim, Ruattei kha Taxi-in a su a! I theih anga rangin rawn chhuk rawh." a ti a.

Ka lu rit deuh chu a bo hmak mai. Ka bing mum mum a, ka khaw hmuh a fiah lo vek a.

Hetih lai hian ka u chiah Awmtei nen chauh inah kan awm a. Midang chu an lengchhhuak vek a.

Ka u hnenah chuan Ruattei nena kan chungchang zawng zawng ka hrilh a, min hrethiam hle.

Ka chhungte anlo haw chuan ka u Awmtei chuan thil awmdan alo hrilh zung zung a.

Motor kan neih tho avang leh ka khalh thiam a ni tih ka sawi avangin ka pa chuan kan Motor-a Aizawl lam pan turin min ti a. Ka u Awmtei leh kumhlui thlahzan ka hmanpui Zaia ten min zui.

9

Tluang takin Aizawl kan lut a. Ruattei an Admit-na Greenwood Hospital, Durtlang Road, Bawngkawnah chuan kan lut nghal a. (A hma hian Dingdingi hnen aṭangin a awmna Hospital hming ka hria a.)

Hospital pawnah chuan Dingdingi'n minlo hmuak a. A mittui a parawl ṭeuh mai a. ICU bul kan thlen chuan ICU-ah chuan ka hmangaihi chu alo mu bem a.

ICU bulah chuan mi anlo awm awmkhawm ṭeuh mai a. Ruattei nu chuan minlo dawngsawng a. Dingdingi chuan, "Ka nu Sangpui, heihi Ruattei hmangaih em em Kima a nia. An khua aṭangin chanchin a hriat veleh a rawn kal nghal a ni." a ti a.

Nu Sangpuii chuan a fanu nikhaw hre lova awm mek hnenah, "Harh teh, Mampui. I u Kimate pawh anlo thlen tawh hi!" a ti a. Ka hnenah chuan, "Kima, ilo thleng thei hi ka lawm tak tak a ni. A nu ka nihna angin lawmthu ka hrilh che anih chu." a ti a. A mittui a hru zauhva.

Dingdingi chuan Ruattei chu a en reng a. Kei chuan ka lainat lutuk avangin ka enrei ngam lo. Ka rilru a na lutuk a, mi hmuh loh turin inthiarna pindanah ka lut a, ka ṭap zawih zawih a. Hmangaih leh duh, thlahlel taka min pawmtu tawrhna chu chhawk ka duh a ni.

Tuemaw hian ka darah min rawn khawih a. Ka en chuan Lr-a alo ni a. "Kima, inti pachang hram hram rawh.' min ti a.

Kei chuan, "A damchhuah i ring em?" ka ti a.

"Pathian thu thu."

“E nge thil thlen dan Dingdingi hnen aṭangin i hretawh ngeiin ka ring!"

"A bazar haw lampang chu Taxi-in a su a lawm mawle!" a ti a.

"A nih chu. A sutu an man em?"

"Aw. Lockup-ah a chungthu an rel ngaichangin a awm mek!"

Ruattei mar phu lo chhinchhiahtu khawl chu a kiu a. Hmanhmawh takin Nurse pahnih Ruattei awmnaah chuan an tlanlut a. Kan hmuh theih loh turin parda an zar phui a.

Nu Sangpuii chu a mangang tih a hriat. Kei pawh zep lovah chuan ka mangang a ni.

Dingdingi chuan ka kut a rawn vuan a. A mangang tih a hriat hle.

"U Kim, Ruattei hi?"

"A tawrh ai tuar thei ila aw!" ka ti a.

Nurse pakhat a rawn tlanchhuak a, Doctor a au tuar(h) tuar(h) a. Doctor pakhat hi hmanhmawh takin Ruattei awmnaah chuan a tlanlut a.

Rei a awm lo, a rawn chhuak a. Kan hnenah chuan Ruattei chu chatuan ram a pan tawh thu min hrilh a. 'Theihtawp chhuahin chhan kan tum a, kan thei ngang lo a ni e!' tiin min hrilh. Dingdingi chu a ṭap hawm hawm a, ka muttui chu a luang zawih zawih mai! Ka u Awmtei pawh a mittui a parawl a ni tih ka hria! Lr-a chuan Ruattei chu ṭhianṭha nih tlin takin ka aiawhin a buaipui a.

Ka Sava ni ṭhin, tuna nunna nei ta lo chu an inah an phur phei a. A vuina inkhawmah chuan a ruang an dah a. Ka rilru a na ngawih ngawih a ni. Kan inah pawh kal chakna reng ka nei lo. Ka hmangaihi ruang bulah chuan ka tap chawt a. Duhthawh taka ka fawhna ṭhin a heh chu ka khawih ka khawih a. Ṭawng pawh ka ṭawng chhuak thei lo, ka rilru hi a rum tlawk tlawk a ni.

Ka nutei chuan E.M-i hnen aṭanga chanchin a hriat veleh min rawn text a. Zanah E.M-i nen an kal tur thu min rawn text a. Hlimna inchhung khur ni ṭhin chu ṭahnaah a chang zo ta a ni!

 

10

Ruattei chu Chanmari Bialtu Pastor-in a vui a. Zirlai anih avangin a School kalnaa a Classmate-te chuan Pawndum sinin an rawn thlah a.

Ka mualpho dawna ka hriat avangin ruang chu kil ka hreh ang reng viau nain Nu Sangpuii chuan kil ve tura min tih tlat avangin Lr-a nen chuan kan kil ve a. Insum har ka tiin ka mittui a dir reng mai. A hmel dang bem mai te chu ka en leh ngawih ngawih ṭhin. Thla lak hun alo thlen chuan Lr-a, Dingdingi, E.M-i nen thla kan lakpui ve a. Dingdingi chuan a BFF anih avangin a tuarna bawk a, a ṭap reng mai.

Kan vui zawh chuan ka u Awmtei leh Zaia'n ka pateate inah min hruai thla a. Zanah ka u Awmtei leh E.M-i chu Ruatteite inah an kal a. Zaian min awmpui thung. Keimah chauhva awm ka duh avangin ka Room-ah ka inkalhkhum a.

Ka mu a, muthilh ka tum nain ka thei lo. Ka mitthlaah Ruattei alo lang a. A SMS ka dahṭhatte ka chhiar a.

"U Kim, ka hmangaih che."

"Ka ngai che em mai, u Kim!"

Ka mittui chu a luang zawih zawih a. Ani nena kan hun hman tawhte ka mitthlaah alo lang zut zut a. A ha var rual ṭhat mai te, a bianga khuavang awm te kha! Duhthawh taka ka fawh ṭhini kha tunah chuan piallei thuah riat hnuaiah a zal ta si!

Chaw ka ei thei lova, lehkha ka zir thei lo.

Nithum an cham hnuah ka u Awmteite chu an haw chhova.

Ruattei thih aṭanga niruknaah Lr-a chuan Ruatteite ina leng tura min sawm avangin kan kal a. Hemi ṭum hian Dingdingi kan sawm a.

An in kan thlen chuan, "E, Kima. Lo leng rawh u " alo ti a. Sawi mai tur ka haihchham hle. A hnu deuhah Ruattei Room-ah min hruailut a. Nu Sangpuii chuan min ṭahkhum ta anih chu!

Mahni lo maha lungchhiat nen, chutia a han tih takah chuan ka mittui chu dan rual lohvin a sur a. Nakinah cguan a ṭap chu a bang ta a. Ruattei Album-te a rawn lachhuak a, min entir a. "Ka nu, Dingdingite kha va ko ve la?" ka ti a, a va ko a. An rawn luh chuan Ruattei thlalakho chu kan en a. Kan pahniha thlalak a awm nual a. Anu a awm ve nain ka zak duh lo. Thlalak pakhat chu engtika kan lak dun nge tih ka hriat mai loh avangin a awmna Album aṭangin ka lachhuak a, a hnunglam ka en chuan 18th July tih alo inziak a. An inchhunga kan lak a ni. Lr-a'n Ruattei phone-in kan thla a la a, chu chu Ruattei'n a print tir alo ni.

***

Ṭum khat chu Dingdingi alo leng a. Thil fun min pe a. Ka han phelh chuan Ruattei Mobile Phone alo ni a. Lehkhathem a awm bawk a. Lehkhaah chuan hei hi alo inziak a:

"Kima,

Kan fanu Handset hi keini ai chuan i hman ṭangkai kan rin avangin kan pe a che.

         Ruattei nu leh pa."

Dingdingi chuan engthawl taka awm turin min chah a, a haw a.

11

Dingdingi haw hnu chuan Ruattei Mobile Phone chu ka On a. Wallpaper-ah kan pahnih thlalak a hmang a. Valentines Day-a kan lak a ni.

Contact List ka'n en a. A ṭhianteho number a awm ṭhat a. Ka no chu "Duat" tiin alo save a, ka khi sak a. Gallery ka en leh a. Amah nena kan thlalak te, a Single thlalak te, an chhungkaw thlalak te a ni hlawm. Video-ah chuan kan insuk ho ni ami leh Valentines Day ami tih loh chu a awm lo. Thil dang engvakmah a awm lova, keimah amg bawkin Word Cookies a khel ve ṭhin a ni tih ka hre thei.

***

A nu leh pa chuan an ngaih ban loh zia entir nan City Bus an lei a, a hmingah Ruattei an vuah a. Tah chuan ka chuang fo.

***

Ruattei hian pianpui laizawn 2 a nei ka tih tawh kha. A u nen chuan Cotton College, Kolkata-ah an kal. (An ina an awm ngai loh avangin a tir lamah ka sawi lo a ni) An pahnih chuan Ruatteite ina kan len hnuah an rawn haw a. Ka chanchin an hriatin hmuh min duh a, Dingdingi'n a rawn hruai a.

Pakhat chu Lalnunfeli niin Feli an ti a. Ruattei u chiah a ni. Pakhat zawk chu Lalrempuii a ni a, Remi tiin an ko. Ani hi an unaua naupang ber a ni.

Anlo leng chuan ka chanchin chipchiar takin min zawt a. Kei chuan a theih ang angin ka hrilh a. Phai lama awm tawh lova Aizawla an awm tawh tur thu leh a u thihnia an tel theih loh chhan pawh Flight remchan loh vangin a ni ni tih Feli'n a sawi chuan Remi chuan an ina leng ṭhin turin min sawm a. "Ka u ang chuan kan kawmhlim thiam lo ang che tih ka ring. Mahse, lo leng ve ṭhin la kan ti khawp mai." Feli chuan a ti a. Remi chuan, "Ni e." alo ti ve a. An fel hmel unau khawp mai.

***

Final Semester chu December thlaah kan Exam dawn a.

12

Semester Exam kan zawh ni chuan Millenium Center-a ka pateate dawrah ka kal zawk a. Ka nutei'n dawr alo nghak a. Ka awmlai chuan College zirlai 2 hi thawmhnaw enin an rawn kal a.

"Ka pu, hei hi engzat man nge?" a sang zawk chuan a ti a.

Ka nutei'n a man zat a hrilh chuan, "Tlem min hniam thei lawm ni?" a ti a. Ka nutei'n a hniam hnu chuan an lei a. Dawr chhunga ṭhutthlengsei kan dah chu melh pahin a hniam zawk chuan, "Ka pu, rei lote kanlo ṭhu chawl thei ang em?" a ti a.

"Ṭhu chawl rawh u." ka tih chuan an ṭhu a. A sang zawk mit chu ka la deuh a ni ang, min en leh ṭhin a.

"Ṭhianite u, in hming han sawi ula?" ka ti a.

"A hniam zawk chuan, "A ni hi Tetei, kei hi Samantha-i." a ti a. "Nang ve?' a ti zui zat a.

"Kima ka nia. Khawi College-ah nge in kal?"

Tetei chuan, "Govt. Aizawl College-ah. Nang College nge i kal University?" a ti a.

"Govt. Zirtiri Residential Science College-ah B. Sc ka zir mek." ka ti a.

Samantha-i chuan, "A har awm!" a ti a.

Kei chuan, "Har hran lo e, ka zo ṭep tawh." ka ti a.

Samantha-i chuan, "Phone no in pe ila?" a ti a, kan inpe a. "Kan chhuak phawt ang e. Hun dangah kan la inhmu leh dawn nia." Tetei chuan a ti a, an chhuak ta a.

13

Ka mi hriattharte nen chuan kan in-text ṭhin a. Tetei khan ka mit a la zawk a, Samantha-i nen chuan kan in-text ngun zawk.

Kan Result chu alo chhuah chuan Distinction-ah ka passed a, Lr-a chu First-ah. Ka patea chuan ka passed chu min lawmsak a. Dingdingi leh Remi chu Lr-a nen kan sawm a.

Ruatteite chaw rawn ei ṭum a Ruattei Seat-ah Remi chu a ṭhu a. Ka lungleng hle mai.

Remi chuan, "U Kim, i zir zawm zel dawn nge; hna i zawng dawn?" min ti a.

"Zir zawm hrih ang."

"Khawiah nge i zir ang?"

"Mizoram University-ah a ni ang ka ring."

"Nang, e nge i zir a? Nge, hna i thawk tawh?"

"B.A (English) ka zo chiah a. Mizoramah zir chhunzawm ka tum.".

E.M.i leh Dingdingite hian Last Semester an zir dawn mek a ni.

Chaw kan eikham hnu chuan kan einate an tih fel hnuin kan nulate chu kan thlah a. Kan in kan thlen chuan, "Remi khan a u Ruattei a ang ka ti tak tak a ni!" Lr-a chuan a ti a.

"I mit vai a nih chu."

"Vai lo e. Ka hmu fiah alawm!"

"Tak takin, kei pawhin ang ka ti a lawm. A bula ka awm khan Ruattei bula awm ang tlata inhriatna ka nei!" ka ti a.

"I tan kan ti mai dawn em ni?"

"Unau naua ngaihzawnte chu!"

"A iai hmel loh che ka ti!"

"A u bialpa ka nia, min ngaina a nih kha!"

"Chu aia nasa chu anih ka ring!" Lr-a chuan a ti a.

***

M. Sc (Physics) Admission chu MZU-ah ka ti a. M. Sc (Gen) Admission chu Ruata pawhin a ti bawk a. Remi pawhin M.A (English) zir turin Admission a ti bawk.

University hial ka rah takah chuan Car ka keng mai ṭhin a. Lr-a'n min rawn sawm a, Remi kan sawm chhawng leh ṭhin a.

Remi chu a u Ruattei aiin a nû hret a. 5'3 ft a sang a ni. Ruattei nen an mitmeng an inang hle. Remi hian khuavang a nei ve a. Mahse, a khabeah a ni. A hmel chu ṭha tak a ni.

Min huat loh avangin leh kan inhmuh zin avangin ka thinlung khawhar tak chu a sawi che thuai a. Mahse, a u Ruattei thlarau ka zah avangin thutlukna siam harsa ka ti hle. Hemi chungchang hi ka pateate nupa ka rawn a. Anni chuan ka thu thu niin an sawi a.

Ruatteite inah chuan Remi awm loh laiin ka kal a. Zahtheih loh chhuahin a nu hnenah Remi min ngainat dan chu ka sawi a. A u thlarau ka zah vanga la aw lo ka nih thu ka sawi a. Ani chuan lo titipui min tiam a.

Ka len ni hi Pathianni a ni a. Thawhṭanni ka Class kal turin Remi ka sawm chu alo kal tawh a. Anuin alo titipui a ni tih ka hre mai a.

Campus-ah kan Break laiin Remi chu amah chauhva a awm lai ka hmu a. Thil awmdan hrilh ka duh avangin a bulah ka va kal a.

 

 

14

"Remi, kan rawn sawm che a. Mahse, ilo kal tawh a?"

"Ka hmanhmawh vang anih kha!"

"A ni lo. Ka laka i lungawi loh vang a ni!"

"Engah nge ka nu bulah i sawi kher?"

"Remi, i rilru ka tina a, min hrethiam hram rawh. I u tharau ka hmaizah vang a ni!"

"Ka u chu thlamuang takin a chawl tawh. A damte hi kan inngaihtuah tur a ni!"

"A nih, min hmangaih em?"

"Hmangaih e."

"A nih chuan min hmangaih thu min hrilh ta che?"

Ka mitah min en a. Ruattei mitmeng chiah chiah niin ka hria.

"U Kim, ka hmangaih che. Kawng engkimah ka u chu ka tluk lo ang tih ka hria. Mahse, ka theih ang angin i tan ka awm ang."

Ruattei lo chu hmeichhe dang ka la fawp lo. Remi chuan, "U Kim, min hmangaih ve em?" a ti a, min en kiau a.

Min hmutu an awm leh awm loh ka'n enkual te te a. Chutah, ka lamah ka pawt hnai a. "Remi, ka hmangaih che." tih pahin ka fawp a. Ani pawhin minlo chhang let ve a.

Chumi ni aṭang chuan ka nun chuan hlimni kawl eng a hmu leh ṭan ta.

Dingdingi leh E.M-i te pawh an Graduate ve tawh a.

***

A hma zawnga mipa ngaihsak ngai lo E.M-i chuan an Class ami chu a ngaizawng ta tlat mai.

Chupa chu lehkhathiam thei deuh mai a ni. Bike-in University a rawn kal ve ṭhin a. E.M-i chuan a kherh thlu a ni ang, a Class kal leh haw lam chu a phur ziah a.

E.M.i chuan a pianpui nuṭa angin min en a, a upa zawk ka nih avangin min zahthiam hle a.

University-ah Function chi hrang hrang a awm ṭhin a. 3rd Year kan nih phei chuan Remi nen chuan Best Couple of the year-ah min thlang a, Lr-ate chu thlang zawk se ka tih nen!

 

 

 

 

 

 

15

M.Sc (Phy), First Class-a ka zawh hnu chuan Quantum Fields-ah Research ka bei a. Ka Research chu ka bei ngawrh khawp mai. Remi nen pawh rei tawk tak inhmuh loh chang kan nei. University Convocation-a Doctorate Degree min hlan ni chuan ka pateate chhungkuain min ṭawiawm a. Ka nu leh pa an rawn chhuk bawk a.

Hemi ṭum hian Samantha-i leh Tete-i anlo kal ve a, an bialpate an rawn ṭawiawm hi alo ni a.

***

University ka chhuah hnu chuan kan khuaah ka haw zawk a. Ka chhungte chuan Vawk leh Bawngin ka Doctorate Degree hmuh chu min lawmsak a.

Chumi hnu chuan Govt. Zirtiri Rrsidential Science College-ah Assistant Proffessor-in ka awm a. Remi'n Master Degree a neih ve leh palai ka tir a. A rem avangin Dan khatnain kan innei dawn a ni. Ṭhianah Lr-a ka hmang dawn a, Remi'n thianah Dingdingi a hmang dawn bawk.

Kan inneih hun atan 14th December kan ruat a.

***

Lr-a nen ka room-ah kan awm a.

"Pathian thil rel dan hi a mak tiraw?" ka ti a.

"Nia, a mak ngawt mai. Ruattei nena in inneih kha a remti lo a ni ang!"

"A nau nena min inneih tir hi alo tum reng anih dawn hi!"

"Engtikah nge in tih ve dawn?"

"Nakum lamah a ni ang."

"In inneih ngei ka duhsak a che u."

"Nangni pawh le."

***

14th December alo thlen chuan kan khuaa inkutsuih lovin Venglai Presbyterian Church-ah a nuamah pawh a hreawmah pawh damchhunga awmdun turin kan inkutsuih ta a. Min inneihtirtuin 'Nupa-ah ka puang e' atih chiah chuan pa ka ni ve ta! Remi pawh nu a ni ve ta!

Kan inneih tuk tuk lehah kan khuaah kan chho va. Ka chhungte chuan an mo chu anlo lawm hle a.

Chung hun lai pawh chuan ka thinlungah RUATTEI chu a awm reng a!

***mm***