Khawinge tun tum chu Mizote hnam ziarangkawng hrang hrangin i ngaihtuah ho teh ang u.
a. Chhiatni ah:
Mizote hi hmanlaia kan pi leh pute tihdan chhawmnun duh kan nih avanga hman deuh a ta tawh, kan pi leh pute lotih dan leh an thiltih kalhmang tamtak la chhawmnung kan nih avangin tunlai khawvel changkang chho zelah hian thildangte leh thilthleng dang avangin chutiang zulzuia kal rengtheih loh hunte, kan tihdan thin ngai ang renga tihtheih loh hunte a lothleng leh zauh thin. Hmanlaia khawhar chhungten an thlamuanpui thin khawhar inriak te pawh veng thenkhatah chuan kawng hrang hranga khaikhin anih hnuah bansan a ni. Chutiang bawk chuan inbiakpawh a lo awlsam tak avangin khawkar inkara Zualko tlan thinte pawh titawpin, a aiah Mobile Phone leh Landline te kan hmangchho tan ta mek. Chumai pawh la ni lovin thlanlaih nikhua ah thlanlai turin tlawmngai thawhchhuah awm tawh lohna vengte awmin, chung chuan Hlawhfa te an chhawr nghe nghe a. Hei hi ka sawisel a ni hauh lova, diktak chuan hei hian kawng tamtakin kan khawsak dan atih nawm phahin atih awlsam phah khawp mai. Mahse, heihian zawi zawiin kan hnamzia hi kan kalpen san tan ta a ni tih a tilangin ilo ngaihtuah ve ngai em? Heng bakah kan hma lawka la bansan theih la awm chu khawhar chhungte lenpui hi a ni. Kan la bansan hial ta ve ang! Diktak chuan heng kan bansan takte hi a ngai anga kan kalpui lai khan Mizote zingah inkungkaihna tha zawk leh in-unauna bakah, thenawmte nena inpawhtawnna tha a siam asin.
b. Aia upa zahna kawngah:
Tunlai thangtharte ti ve tawh mai ila, 90's chho ho hian aia upa zah nachang an hretawh lo emaw tih maitur a ni. Inchhung khurah aia upa zah thiam thatzia hi kan inzirtir ngai em? Tunlai thangthar ho chu an than a tha a, an hmelpawh a tha. Mahse, aia upa zahna an tlachham tlatin ka hria. Heihi lo chik ve mahteh! Khawlaiah pawh naupang te tein an aia rual u ngawih ngawihte pawh Meizial an pak khum hlat hlat tawhna ram kan nihtawh hi! Hman deuh khan School naupang Uniform ha hian Lighter min rawn dil a: 'Thianpa, Zial ka lo tan lawk thei ang em?' min ti a. Ka lo hauhzek kha!
c. Midangte tan malsawmna nih:
Midangte tana malsawmna nih hi malsawm dawnna hnar a ni asin. Mahse, i ni thei kher lo maithei. Chutih hunah chuan an tan anchhia erawh ni lul suh ang che. Kan pi leh pu te nundan mawi kan chhawmchhoh kalzel kha 'midangte tana malsawmna nih' a ni. Kha an nundan kha i chhawmnung zel ang u. Hei hian 'Tlawmngaihna' pawh a sawitel thei ang.
Tawk phawt se, duhthawh taka ka ngaihdan leh hmuhdan ka rawn ziah hian tuma thinlai tina lul suh sela, nguntakin lo ngaihtuah ve thung ang che. I hnam hian a au che a, hnamdang lakah a hmel amawi leh mawi loh chu i nunah a lang ang. Ka lawm e.
0 Comments