Tawntirh Hmangaihna

1:1

Tawntirh hmangaihna lo tawng tawh te chuan hmangaihnaa kan luh hmasak ber tum hian hlimna leh beiseina sang tak kan nei thin. Hetianga hlimna hi tleirawl lai leh rawlthar lai nunah hian a awm nghet tlat. Hringnun kawng kan zawh mekah rahbi pawimawh tak kan kaina a nih avangin he kan Tawntirh hmangaihna hmanga kan hmangaih hmasa berte chu tumahin kan theihnghilh thei lo tih pawh a chiang viau.

Hmangaihna leh Hlimna hi hringnunah hian a tel loh chuan khawvel hi hremhmun tenau a ni ringawt mai! Mitin hi kan nu leh pa te karah, an hmangaihna thlazar hnuaia pianga seilianin, hma kan sawn zel a. Kan nunkawng zawhte a lo thui ve tial tial a, hmangaihna kawngte pawh kan daichho ve tan ta.

He kan zawh tan hmangahna kawng hi thenkhat chuan kan dai bawrh bawrh a, thenkhat chuan kan daitha ngam mang lo bawk a. Fimkhur taka dai te pawh kan awm. Dim lo baksaka dai tute chuan heng- Nau tihtlak te, Fahrah siamte kha a rah kan seng chu a ni. Dimte leh fimkhur taka zawhtute chuan a rah tha kan lo nge nge thin.

Tawntirh hmangaihna hi mi pangngai chuan kan tawng vek. La tawng lova inngai te pawhin an la tawng dawn chauh! Tichuan, he thu ka ziah hi a dikzia pawh an la rawn manchhuak ve ngei ang!

Hmangaihna hi a nihna taka hrilhfiah zo hi kan Pathian Lehkhabu Thianghlim chauh hi a niin ka ngai.

1:2

Thil maktak pakhat chu Tawntirh hmangaihna hmanga hmangaih kan neih leh min hmangaihtute nen hian kan innei vek kher lo. Innei chu an awm pheuh pheuh awm e. Chu tak chuan rilru- ah hliam a siam thin, a dam mawh viau lehnghal! Hmangaih eng angin, duh engang mah ila, an tan enganga nasa pawhin inhlanin in pe mah ila, an Hmangaihna kan hnen a ta lakkian a nih tawh chuan rilru nat bak tihtheih kan tan avang thin hle ta ve ang! Khuanun kan tana a ruat loh mi chu khawvel tawp thleng pawhin nghak mah ila, thih pawh thihphah hial mah ila, kan nei thei dawn lo. Mihring te min tihlim leh tilungngai thintu chu Mihringin kan sawi fo thin, he lei hringnuna bet tlat, 'Hmangaihna' hi a ni.

1:3

Mihring te hian kan hmangaih te hi hmangaih chhan kan nei theuh. Chhan awm lovin tumah kan hmangaih ngai lo. Pathian pawhin chhan awm lovin min hmangaih bik lo. Kan hmangaihte leh kan ngainat em em te nunah khan anmahni kan duhriauna leh kan va duh ngawih ngawihna eng emaw 'riau' a awm thin. 

1:4

Tawntirh hmangaihna kan chunga a lo thlen thin nachhan pakhat nia lang chu, hmangaihtu mamawh riauva kan inhriat thin avangte, min hmangaih duhtu leh kan hmangaih tur- kan duhthusam ang mi kan zawn ruk reng thin vang a ni. A nihna takah chuan mi pangangai chuan mi anglo te chu an va hmangaih thei ngawt dawn lova. Hmelchhiat thana thangte pawhin duhtu an hmu zo kher lo maithei. Hmangaihna hi chhan avangin a awm thin ka tihna a nih chu. Midang te kan hmangaih theihna chhan tlangpui chu an aw atang te, an mizia atang te, an taksa atang te leh, an chetzia atang te a ni fo.

(to be continued..)