Ka Diary during 2009 - 2010 in GRHSS

- Jonathan Lianhmingthanga Sailo (Hmingtea Sailo)
First Appointed Lecturer, Computer Software Application (Vocational Stream)

Parda hlihna:

(Deuh kher a! Thenkhat chuan 'Khuhhawnna' an ti a. Thenkhat chuan, 'thuhmatheh' an ti. A then chuan 'thuhma' te pawh an ti ang. Vawikhat Anniversary Magazine-a thuziah ve manah reng reng, 'Parda hawnna' ka han ti ve mauh teh ang. A tum chu a sual chuang lo. Lemchang turin lemchanna dawhsan an rawn pan laiin Parda anmahni hliahtute kha hlih a ni thin a. An rawn lang ta thin a nih kha...Nia, hei ka rawn lang a lawm hei..kut i beng beng..beng beng..beng beng..)

Pawl khat vel kan nih laia kan hlasak thin pakhat kha ka la hre deuh rei ruai. Pu PS Chawngthu phuah a ni nghe nghe:


Sikul ka luhtirhin, mikhual ang ka ni A!

Ka pawl min siamsak in...ka hming an han lam chuan....(ka hrechuak zo tawh lo!) tih vel a ni. A AW B hla a ni tak e!


Pu PS Chawngthu kha la dam nise chuan tuna kan lawm tur Jubillee Hla pawh hi mawi takin a phuah thei ngei ang mawle! Keive lah chuan thiam leh thiamlovin, a hlachham zawngin:

Govt School zawng zawng zingah,
O, i ropui ber asin!
Vuak, hauh leh zilh ngai zirlaite,
Tumah thleibik lovin duatten ilo chherchhuak thin!

Ropui..ropui..chawimawi tlak GRHSS,
Enru hmalam panin a kal mek e.
Phunnawi lovin hnutiang chhawnin,
Unau anga leng za Zirtirtute leh Zirlaite;
Buai leh chhiatna thlen hlauthawnawm karah,
Lungmuang takin,
Induhsak leh inlungrualin,
Chhuihthangvala leh Lengi te i kal zel ang.

Hun kha leh chen min lo hruaitu,
I sakhming atan Sap pachal chuan,
'God' tiin i sakhming a chawi e.
Hei leh chen min kaihruai hi,
Ebenezer, kan lawm e,
Ropui ber aw nang kan Pathian i ni si!

School hmuntha tak neite zingah,
Er neilo nang Zirna Run
Concreate Building chhungah;
O! Zirtirtuten an naupangte,
Nun puitlin zirtir zelin,
Damlai Pialral an chen e,
A ni, hlim tein an kal dial dial,
Raltiang ram kai tum Zirlai rualte,
Youth For Jesus tiin kan intiam e.

Shalom....Hmalam panin,
Chawl mai lovin, hlawhtlinna lamtluang zawhin,
Hnutiang hawi lovin, hmalam en in;
O! I kal zel ang u!
Omega chuan kan hnu a dalzel dawn,
Leiah hian GRHSS hi thangmawi se.

Govt Republic Higher Secondary School- ah hian kum 2009 June 10th atang khan Pathian leh kan hotute duhsakna avangin ka lo thawk ve tan a. Ka thawh chhung zawng hian ka thawhpuite nena kan inkarah inhriat thiam lohna engmah a awm lova, hlimtlang tak leh lungrual, inpawh tawn takin kan thawkho thei a, ka lawm khawp mai. Chumai bakah, ka thawhchhunga hetiang hun awm zen zen lo, mang lamah pawh ka la man phak loh Jubillee te ka han nang ve hman te hi ka lawm takmeuh a ni.

Ka thawh tantirh vel hmadeuh, ka interview vel atanga tun thlenga ka hun hmantawh, zahthlak deuhva ka chetna te leh hlimawm ka tih deuhte ka han thai ve nial nual teh ang, ve reng reng a!

June 10th a ni ta in ka hria, ka thawh tanna ni kha. Khami hma kartawp Zirtawpni- ah khan Principal Room- ah kan Senior Lecturer ten min Interview a. An duhzawng ka lo ni ve tehchek a niang chu, min la ve ta nawlh mai a. Ka Interview result ka hriat chuan ka lawm teh asin aw!

Tichuan ka han Office ve tan ta a. Ka dawhkan turte min kawhhmuh a. Tichuan, ka nu leh pa ho rual kiangah chuan anmahni level pui angin ka han thu ve ta a nih chu! A tirah chuan a zamawm ve khawp mai. Mahse, ka thawhpui dangte an lo fel a, mi han chhawnchhaih dante an thiam a, reilote mai pawh nilo, khami ni atang khan ka tlangnel nghal a ni ber!

Tichuan Class- XI Computer Software Applications zirlai 17 vel zet chu keimahin ka han enkawl chho ta a. English Subject- ah Miss Bsi te, Miss Ztp-i te, Miss Hmingthani ten min pui a. General Foundation Course- ah Sir Mawitea leh Sir Ruatan min pui bawk a. Mathematics- ah Sir JT-a leh Miss Maria-i ten min pui bawk. A bakzawng Computer Subject kaihhnawih zual chu keiman ka khawih thung a. Tichuan School pawisa hmangin min han ruai chho ta a ni.

Sawrkar lam a che muang deuh va, Zirtirtu an rawn dah mai loh avangin ka awm ta reng a. SCERT lama an hotute nen pawh kan inbe deuh reng a, 'kan rawn pe tep e' an tihloh leh 'lo la nghah deuh a ngai ang' an ti bawk a. Sawrkarin zirtirtu a dahloh rau rau chuan luh theihdan a awm lo maw, tiin ka buai ve hle thin.

Pu Beiseia nen phei chuan kan inhriat phah ve ringawt nia! An Inah vawikhat chu ka va leng roh pek a! Tichuan a hnu deuhvah Sawrkar chuan November 2009- March 2010 thlenga he School- a thawk tur hian Appointment Order min siamsak ta a ni. Hemi kawngah hian kan Principal a fakawm hle. A ni hian nasa takin hma min lakpui a. Sawrkarin min drop hnu thlenga min la chhawr duhte hi ka lawm takmeuh va, a bik takin a hnenah lawmthu ka sawi duh a ni.

Tichuan, ka thawh hnu rei lutuk lohvah chuan Tele- Education lam atangin Computer bungrua kan dawng chho va. Tuna kan Laboratory- a Computer Flat Screen leh Table te, Lecturer Common Room- a Tv te bak a dang heng- Projector  te, Microphone, Webcam, Printer- 3, Printer/Scanner- 1, Amplifier ang te hi ka awm hnua kan dawn vek a ni. A changin kan Principal hian Aizawl DC Compund- a awm, Aizawl District NIC Office atangin Taxi ten a rawn phur thleng a, amah pawh a buai ve thei khawp mai heng thil te avang hian!

Hun engemaw chen hnuah Internet Connection pakhat kan dawng a. Hei hi a hmantlak em em lo. A chhan chu, NIC lamin Website dang an Block vek vang leh Zirlaiten Online- a lehkha an lo zir na tura min pek a nih vang a ni. VPN Connection an ti a. Cisco hmanga Internet min pek tum khan a Cisco khawl ber kha a chhiat avangin BSNL Line kaltlangin min rawn pe a. A tangkaina pakhat awm chu keini Vocational Stream ten Land Line Phone kan kawltheih phah hi a ni. Hei hi hengthil avang liau liauva kan dawn a ni nghe nghe.

Chulam chu duhtawk phawt ila atha awm e. Kan thupui kaihhnawih ni si, kawngdang daih han sawi leh teh ang: Mizoram Higher Games chu a vawikhat nan, a Zirtirtu te zinga tel angin ka hmang ve ta reng mai! A hawnna inkhawmah Betsy Lalrinsangi a zai a. Chumi tum chuan Sir Ruata bulah ka awm a. Sir Ruata chuan a va chibai a. Keipawh chuan chulai huntha chu bawhpelh loh hram ka tum a. Ka va  chibai ve ta nghe nghe a nih kha! A live in ka la hmu ngai meuh lova, chuvang chuan chutia ka chibai ve thei chu ka lawm ve khawp mai!

He Higher Games- ah hian kan Editor hi Judo Item- ah kan School Convener a ni a. Miss Maria- i nen an ni nghe nghe. Kan Editor phurna leh hmalakna a zarah leh Miss Maria-i lo puihbawmna vangte, Zirlaiten an phurpui avang te in Judo Item- ah kan Schpool Judo Team chu Team Champion kan ni ta nghe nghe a. Judo Final khelhvel laia Zemabawk Indoor Stadium- a kan chak changa kan han lam te, kan han khek vel te kha a ropui riau a ni. Te-i (Class XII Arts) te ho nen kan han zuang vel tak tak mai a nih kha! Kei phei chu ka lawm lutuk kha ka hnuk a ulh thei hial nia mawle! Hemi Team uaptute zingah hian Miss Papari pawh a tel ve a. Mahse, ani erawh chu an chhungkaw lam rokhawlhna avangin a rawn tel ve hman ta lo.

Thil dangah ka pakai kual rei ta hle mai, tunah chuan kan thupui lamah lo lut leh tawh ila: Govt Republic Higher Secondary School- a ka thawh hnua ka thil tawn san ber leh nuam ka la tih ber chu Teacher's Day, 2009 September thla- a kan hman kha a ni awm e. Kan Magazine Editor hian a Video Camera hmangin a lo Capture thlap mai a. Tun hnuah pawh 'kan hunlai khan' tih turte ka nei ve ta reng mai!

Nia, khami ni khan kan naute khan a nmahni Zirtirtute chawimawina hun kha an hmang a. An tihlimawm thiam khawp mai. Zirtirtu zawng zawng kha thilpek min dawn tir vek a. A indawt te te in kan thil tur kha kan thlang a, a nuam khawp mai. Khatia thilpek kan thlan lai khan kan naupangte leh midangte khan an kut an lo bengdar dar a. A nuamin a hlimawm a sin aw!

Thil pawimawh leh hlimawm tak pakhat la ziah loh ka nei tlat mai! Chu chu Lecturer's Picnic, Coconut Roof- a kan nei kha a ni. A nuam hle. Kei chu Miss Rinpuii te Motor- ah ka chuang a. Miss Rinpuii pasal a felkhawp mai. Hemi ni hian Lecturer kan kim deuh vek a, a hlimawm hle.

Kan Lecturer thenkhat chuan an fate an rawn hruai a, chung chuan mi an tiphuisui hle. Kan Principal pawh a lo tel thei a, tuna min chhuahsan ta Sir JT-a (Saiha lamah Vice Principal turin sawn a ni) te pawh a lo tel thei a. Mahse, kan Discipline lam incharge Sir Zd-a erawh chu a unaupa fanu Lucy-i (Lucy- i hi ka thiannu pakhat a ni) pasal neih ni (man inhlan ni) a nih avangin a lo kal ve ta lo.

Hemi ni hian kan Miss te ho pawh Swimming Pool- ah an inliluh vel a! Miss Lc-i te, Miss Malawmi te, Miss Rsi te pawh an khek ring thei khawp mai. Miss Rp-i chenin tui kan cheng. Mahse, kan Principal erawh chu a cheng ve ta lo in ka hria! Sir Mawitea te pawh Sir Pc-a te nen, Sir Chhuanmawia te nen tui an inhleuhsiak a, kan hlimtlang a ni.

Tlaiah, puar el euhvin chaw kan ei a. Thim dawn ruaiah kan haw. Hemi ni hi ka tan chuan theihnghilh a har tawh ngawt ang! Hemi ni hian tuna Chaltlang North Branch YMA President nibawk, kan thawhpui Sir Chhuantea erawh chu a lo kal ve ta lo. Pu Mavena a lokal ve lo erawh chuan khua a tihar reuh khawp mai!

A chang chuan nu leh pa, pi leh pu te rual bula awm chu a hreawm! A chhan chu, an thiltawn tawh ang ka la tawng vek lova, an sawiduh ang ka sawi ngam vek lova, an awmdan angin ka awm ve ngam kher lo! A awmzia chu, an zahawm a, an puitling! Chutih rualin min ngainep lova, an Level puiah min dahthiam thung! Chu erawh chu an bula awm a nawmna a ni thung!

Thildang han sawikai ta zel ila: He School- a ka thawh hnu, he Jubillee kan hman hma si hian kan School aiawh hian I&PR Auditorium- ah kan naute chu Icfai University Organised PowerPoint Presentation 2010 intihsiakna- ah ka kalpui ve a. Tuna kan Souvenir Editor nen hian kan kal nghe nghe.

Kan School atangin Group 3 kan kal a, 1 tlingin 3- na kan ni, Govt Mizo HSS nen. Hemi ni hian St. Pauls HSS aiawha an Participant zinga a Presentation petu chuan a hnehsawh hle nghe nghe.

Chulam chu han duhtawk dawn phawt teh ang, kan Editor hian sei te hi a lo ti lutuk ang e! Ka sawilan duh pakhat chu He School hminga Facebook- a Community Page ka siam, GRHSS- ah Member 75 zet an in- register ve tawh nghe nghe.

Engpawhnise, he School chhuak chu ka ni lo. Mahse, ka thawh tawhna School a ni a. Nitin ka tha leh zung, ka theihna te ka lo hmang ve tawh thin. Chunga vangte chuan ka damchhungin ka School a ni tawh dawn a. He School kaihhnawih thil reng renga mi te chu ka unau leh chhungte vek in ni rengtawh dawn a ni tih inhriat atan ka han thailang tel hram a ni e.

Long Live Govt. Republic Higher Secondary School. Jai Hind.

(Thubelh: Kei hi he School- a Vocational Stream- a thawk hmasa ber, lut hmasa ber leh a bultantu ka ni)

Ziaktu Address:

Web: http://www.hmingteasailo.blogspot.com
E-mail: hmingteas@gmail.com