HMANGAIH BER HNENA LEHKHATHAWN HNUHNUNGBER

Dated Aizawl,
The 26th July, 2010

To,

Ka hmangaih leh ka duhber, ka lei lawmna pangpar mawi ber ni thin X,

A hmasa berin he lehkha ka ziakna ka kut dinglam ngei hian vawnloh chibai duhthawh takin ka buk a che. Khawngaih taka ka lehkha hi min lo chhiar chhuahsak turin ka ngen tak meuh meuh a che. I dam lai a nih ka beisei a, kei pawh tisa lama ka dam lai a ni e.

Awle, kar lam a hla a, intawn leh inhmuh te a khat hle mai! Nang nena kan intawnlohna pawh a lo rei ta hle mai! Nang chuan lengdang tawnah, min liamsan ta si a! Mahse, kei chuan ka theihnghilh ngai lo che tih i hrereng fo dawn nia. Nang pawhin min theihnghilh ngai lo tih ka hre fo thin a, ka lawm e! Mahse, nangin min then ta mia hi hriatthiam har ka ti a, ka lung a awi thei mawlh lo a ni.

Ihmaw, Sms ka thawn chang che pawhin nang chuan, sms min thawn pawhin tawi te, a rul tawk lekin min chhang a. Ka biak hmasak loh che chuan min biak hmasak i tum heklo. Mahse, thil inphum ru a lo awm reng si!

Ka Sms pawh i Inbox ah a leng ve ngang lova, rawn thlen chakin tum sa teh thin mahse, a awmsa paihthen a ngaih miau thin avangin ka sms te chu sirah an inhnawh khawm tun a, a hnu fe ah a rawn thleng chauh thin a nih kha. Chuvanga, 'I Inbox kha ti ruak thuai thuai rawh' ka tih thin che ni! Mahse, nang chuan ka sms ai chuan i la hriat ngailoh khawilai mi fa te emaw Sms kha i dawng chak zawk a, i Inbox luahlum tur khan i duhzawk daih si a ni!

I tan ka theih ang tawkin ka bei a. Min biak duha min biakna i neihloh hlauvin Sms Pack an tihte, Top Up an tih te, a..Recharge Coupon thlengin ka tihsak thin che a nih kha! Mahse, nag chuan chung chu ka tan hmang lovin ak sawitak ang khan lengdang mi hersan nan i hmang thin zawk a ni reng si a!

A chang chuan nawmsam loh te ka nei thin a. Ka mu- hma duh fo thin. Chungah chuan nangma hmakhaw ngaiin keima lam en miah lovin min tihtauh khum a, min be tha peih lo thin. Zankhat pawh kan inman chian hle kha tiraw?

Keichuan a chang chuan peihlo chung chungte, neilo chung chungte, nuamsam lo chung chung te in zinglam Dar 2 thleng rawkte ka men pui thin che a. Mahse, khan kha chuan tunah chuan mual min laimsan ta hlauh va, a tihzia angreng phian mai! Mahse, kan intawn chhunga hlimna min siam avang khan ka lawm tak meuh a ni.

I tan Chanchinbu- ah engengemawte ka han thailang ve a. mahse, nang chuan zah lama lo la in, midang lakah min zahpui thin zawk leh si a!

I chhungte chuan kan chungchang an hria a. Ka chhungte ngei pawhin an hria! Vawikhat pawh Damdawi In- a kal turin ka ngen che a, i kal duh lova, mahse a hnuah i va kal leh lawi si a! Khangte kha a inzahloh thlak angreng phian a ni. Thinlung inhliamsak hnua intih lungawi tum leh si hi chu a lawmawm dan a nep tawh tlat thin tih i hre ve tho si a!

Pathian thu chhuanlamin midang i Sms tlut tlut a. Mi pa te i Sms a. Ka duhloh zia hrereng chungin leh ka thikthu chhiat zia hrereng chungin midang i be reng a. Khangte khan ka thinlung hi vawitam a hliam thin a. I tan hlawkna a awm pawh ka hre nek lo ve.

I thiannu hming ilam fo va. Ka benghriatah hian 'vawikhat' pawh, a ngena ngen chhuah kher ngai lovin, 'ka hmangaih che' pawh min la ti hek lo! Ka tur che a, harsa takin Sms hmangin 'k hmagaih ltk c' i rawn ti thei tawk a! Ka tan he thu hian awmzia a nei lo!!

Ka sawi fo thin a, ka ngen fo thin che. A theih hram chuan Sms pakhatah hian thumal 120 dawn a leng a. Sawi teuh theih a ni, vawikhat thawnah hian. Tin, khitiang ang thupuifun lutuk ang chi te phei khi chu ziahpum ngei ngei tur a ni! 'Ka hmangaih lutuk che' han tih mai tur kha i thei ta lo tlat thin a! A harsa lam chu a ni e, tiraw?

Chawlhni hi nang nena hun kan hmandun awmchhun kha a nih avangin chawlhni tinin i hming hi ka thinlungah a thar reng thin. Kan hun hmandun dan kha a thianghlim tawk em em a, tufa tan pawh a pawilo chin a nih avangin i hmalam hun pawh a eng khawp mai!

Mahse, kan kalna hnuhma leh hmun, tlng leh ruamte khan ka lung a tileng fo dawn a ni! In khawhming an lamrik apiangin, 'i hming' ka rhinlungah a lo lang leh thin ang a. 'I la dam leh damloh te, Pasal i neihtawh leh tawhlohte thlengin' hriat chakin ka phi sek fo ngei dawn a ni!

Vawi tamtak kan inthen a, kan inngaidam leh thin a. A bul pawh, ka duh anga i awm theihloh vang a ni deuh ber. Ka duhte kha tun thleng pawhin i la hrechiang si lova, ka han sawi nawn leh ang e aw: 'I Inbox kha tiruak vat zel a, a theih hram chuan ka Call la la, Call Waiting leh Busy ah min dah suh. I Phone Switch Off lo la, i Off dawn chuan min hrilh hmasa thin ang che. Ka Sms leh Call te reply in min chhang ve thin la. Tawi te nilo, sei deuh takin Sms te pawh min thawn ve thin ang che aw? Zingah i thawh hamsak chuan min Wish la, Zanah, i mut dawnah min mangtha thin ang che aw?' tih a nih kha!

Mahse, mi nazawng leh mi ngaihsam, thikthu chhe lo, hmangaih tak tak lo tu che ni ila chuan maw- khing khi ka ngen kher lovang che. Ka ngen che a, i tihhlawhtlin loh pawhin, 'E' ka ti ngei ang! Tin, ka kawp ngei bawk ang che.

I duh duh danin min treat thei e. Mahse, kei chuan ka hmusit lo che a, ka ngaina em em che a. I hnen atanga chhuak- Nangman min hmangaihna kha ka dilin ka ngen zawk che a ni.

Mahse, Sim Card hralh buaiin i buai a, i Phone i han Off vang vang a. Sms min chhang lo char char a. Call pawh min Call ngai lova. mahse, a hnufe ah Chanchin Lamdang ka hre ta: Inhlawhna hmunah chu mi chu a chesual a, a thi' tih hi! Nangmah chu i ni lo. Mahse, an phumna thlanmuala a thlan mawngah chuan i thinlung chu an phum tel ve daih tawh a lo ni reng mai!

Min hmangaih ber emaw tia ka hlim lai khan i Ex kha i lo hmangaih zawk a. I tana tangkai tawhlo kha i tana tangkai zawk aiin i la ngai pawimawh a, i tap ta a! Pialral hming chhalin, Hawilopar thiah sak tur che in i ti ta hial a nih kha!

Kha thu tenawm leh thinthawng khan ka nun hi a zahve a eichhia a. Tunah chuan mut hma- a inngaihtuah fe hnua mittui nena mut bak tihtheih ka nei ta lo!

Ka Romal pawhin ka mittui a hru seng lova, ka Lukham hial a luanzawr ta mai! E, taka, hmanah khan kan fa hming turte kha kan sam chiam tawh tiraw? Nangkha- 'B-i Nu'. Kei kha 'M-a Pa' kan ti niin ka hria! (Mimal zalenna humhalh nan hming lem hman vek a ni.)

Ka thiamlohna em em ka hre lem lova. I thiamlohna em em awmin nag chuan i hrelo mai thei. mahse, min hmangaih nia insawi si khan engvanga i bialpa hlui kha i thinlung hlan nge i nih si le?

A...Ka tawng thui ta lutuk tlat mai. Duhtawk dawn hnai teh ang. Ka Mautuai chhum pawh a so tan ta. Ka ril a tam ta riau mai! Mahse, 'chawei tui' min titu kha ka nei tawh si lo che a, ka eipuar pawh ka ring teh hrep lo ve!

Ka nupui atana ka hual, ka hmelhriatte zawng zawngin min hriatpui-i kha tunah chuan 'midang' i ni tawh si a. Tunhma- a 'Ka Duati' ni thin kha tunah chuan 'Nula hnahkhat' mai i ni ta!

Tunah chuan i lawina Run te kha eng ang pawhin mawi ti mah ila, ka tan rawn lawi ve fo a rem tawh lo! Min duhlo tu te Inah engvanga lenfo nge a tul ang le? Min hmangaih lo tute chu ka biak fo pawh a ngai dawn em ni? Ka lawmna aia midang lawmna ngaipawimawh leh biak chak zawk tlat si chu engtinnge ka chhai reng ang ni?

Nang pawn tuna chinah chuan min rawn tibuai tawh lo la. Min rawn biak apianga tap ziah thin hi min hahdam tir ve tawh ang che. I duh a, i ti a, i thlang a, i kal ta alawm!

A tawpberah chuan, a bul ka tan ang ngei khian ka hmangaih reng che a, ka theihnghilh ngai lovang che. I lo let leh a, ka duhte i tihhlawhtlin theih chuan chu aia beisei leh lawmna tur dang ka nei lovang! Ka leilawmna pangpar mawi ber i ni miau si a!

Awle, tunah chuan 'Zan tin atan Mangtha, muttui. Zingtin atan zingthawh nuam', tiin ka thlah ang che. Keima laka i awmdan anga midang bula i awm chuan in inkawp rei ngai lovang. Chuvang chuan an lakah fel leh tha, ngainatawm takin awm ang che.

NB: Ka lehkhathawn min chhiarchhuahsak avangin ka lawm e. I mitmeng mawi tak kha a kham awm si a, ka khawngaih ngawt mai che. mahse, atul miau si a tiraw? I lairil a tina a nih ngai chuan i lam thin Pathian hminga min ngaidam turin ka ngen a che.

Nangmah vanga hreawm reng thin,
Y

(Ziaktu thu hnuhnung: Hmangaihna hi a mak khawp mai. Kan hmangaihten min hmangaih lova, kan duh ten min duhlo fo. Mahse, min lo Accept ve hlauh thin.

Hmangaihna hi la na kan awm a, la na lo kan awm. Thikthu chhia kan awm a, thikthu chhe lo kan awm bawk.

Hmangaihna a awm tawhna ah chuan thikthu hi a tel ngei turah ka ngai.

Mahni hmangaih berte nena inthen ta mi zawng zawngte tan he thuziak hi ka hlan e.)