Kan Mizoram State Legislative Assembly Session 2007 neih zawh takah khan Bill pasarih pass tak zingah The Mizoram Liqour Total Prohobition Acts Amendment Bill 2007 chu pass a ni ve a. He Bill pass a nih takah hian tunhma zawnga MLTP Acts- in khati khawpa Grape chingtute laka harsatna a thlen chuan kiamlam a pan dawn ta. A biktakin he Bill putluh, pass a nih tak avanga Dan puitling loni ta hi keini Hnahlan leh a chhehvela Grape chingtute chuan kan nghakhlel in, hman theih a nih hun tur 'Tlumtea thlir taka kan lo thlirna' a rei tawh hle a. A thawm chauh kan hriat thin chu tunah chuan a ruangam kan hmu thei tan ta.
He danthar pass a nih takah hian Hnahlan leh a chhehvel a Grape chingtute aiawhin kan Mizoram Sawrkar chungah te, he dan hi siamthat a nih theih nana tha leh zung, ngaihtuahna lo seng tawhtute lakah lawmthu ka sawi tak meuh meuh a ni e.
He danthar pass a nih takah hian Hnahlan leh a chhehvela Grape chingtute tan chuan lawma koki thleng bawp khai vaw vaw na tham a tlingin ka hria. Achhan chu hahtaka an thawhchhuah sa, Grape rah- a rah ngau ngau dahthatna tur hmun awmloh avanga a tui an siam, 'Juice' tia kan hriatlar, mi thenkhatten 'Wine' an lo tih bawk chu Aizawl leh Mizoram hmun hrang hrangah hralhchhuah a harin, engemaw lai phei chuan a thawkchhuaktute hah dan leh thawhrimdan ngaihtuahpui hauh lova mansak an ni hlawm a. Y.M.A.-in Ruihhlo a rawn do atang phei kha chuan Grape tui pawh hi ruih ve theih thil, hmaihtheih a nihloh avangin a zuartu tan pawh mantheih a nih avangin hlauthawng taka zawrh a ngai a. Veng thenkhat phei chuan an vengchhunga zawrh leh lakluh, kawl an khap hial a nih kha!
Ruihhlo chi khat ni ve mahse, Mizoram khawchhak tlangdung- Hnahlan leh a chhehvela mi tamtak eizawnna hnar a nih avang a hetianga kan ram hruaituten min ngaih pawimawh sak a, dan awmsa- hun engemaw chen hman tawh hnu siam danglam a ni ta mai hi mumang ram pawh a ang rum rum mai. Kan Excise Minister te, kan Chief Minister te leh NGOs hruaitute hmalakna avanga hetiang dinhmun ding thei kan nih avang hian an chungah thiam lotakin lawmthu ka sawi mawlh mawlh a ni.
Engpawhnise, he danthar hi engtik atang innge kan hman dawn tih erawh a la hriat chiahloh a vangin a hma thei ang bera hman theih tura hmalak ni se a lawmawm ngawt ang. Achhan chu hetia Mizoram-in MLTP Acts kan hman avang hian Grape chingtuten an tana tanpuina awm thei chi hrang hrang tun hma-a an lo dawn tawh thin tamtak an dawn tawhloh vang a ni. Chuvang chuan tanpuina an dawn chhunzawm a, tam zawk tharchhuak a, Festival hial hmang leh thei tura kan beihtlan a tha viauin ka hria.
0 Comments