Essay: Ram leh Hnam humhalh

‘Ram’ kan tih chuan thil chi hnih: Political boundary (sawrkarin fel taka ram luah tur chin a siam) leh Cultural boundary (pi pute aṭanga kan hnam chên tawhna ṭhin zawng) a huam thei ang. Mizo ‘hnam’ kan tih chuan khawilai hmun pawha Mizo hnahthlâk ni tawh phawt chu a huam ang. YMA hian ram leh hnam humhalh a ngaihpawimawh em avangin kum engemawzat chhung chu kumpuan thupui atan alo hmang tawh a ni.

Eng vangin nge kan ram leh hnam humhalh a ṭul? ‘India mi’ ni mah ila, tlâng mite hi hi India ram laipui (mainstream India) hian kan chhiat kan ṭhatah ‘ka ui ka âr’ min ti tak tak lo. Kan Indian pui tam tak hian India leilung fa ni theiin min ring tak tak lo. Chuta kârah India hmar chhak mite hi kan tlem hle.

Ram leh hnam kan humhalh dawn chuan kawng hrang hrangah tih tur kan nei nual mai. Keini, a neitu; a ram chhunga cheng ngei ngei te hian kan humhalh tawk lo ṭhin hle. Chumi kawngah chuan mimal tinin tihtheih kan nei a, chungte chu:

1. Mizo hnahthlak hnam hrang hrangte inpumkhatna atana hmalak: Duhlian ṭawng hmang chauh hi Mizo hnahthlak kan ni lo. Ṭawng dang hmang, kan Mizo hnahthlakpuite nena kan inpumkhatna turin hnam hrang hrangte hian theihtawp kan chhuah a ngai a ni. Chi binga inlakhranna leh indaidanna hi kan ṭhiah a hun ta hle mai.

2. Nungcha, thing leh mau humhalh: Kan rama nungcha te, thing leh mau te hi kan humhalh tlat loh chuan ala chereu mai dawn.

3. Sual do: Khawtlangah sualna, a bikin Ruihtheih thil hian Mizote nunna hi a va la hnem tawh tak em! Chuvangin hnam hmelma dik tak a ni. A awm zel loh nan kan do rem a ngai a ni. Ruihhlo mai bakah khawltlanga sualna dang- rukruk te, eiruk te, tual thah te, pawngsual te a hluar hle tih kan hria. Tumah hian ru lo ila, ei ru lo ila, tual that lo ila, pawngsualah inhnamhnawih lo ila ram leh hnam kan humhalh a ni mai tur! 

4. Tlâwmngaihna leh aia upa zahna vawn nun a ngai: Tlâwmngaihna (a lang chauhvah ni lo) leh aia upa zahna te hi kan vawn nun tlat a ṭul. Tlâwmngaihna chu mi taima, inngaitlâwm tân lo chuan vawn nun har tak a ni. ‘Tlâwmngaihna’ tih ṭawngkam nei hran ve lem lo hnam tam tak, tlâwmngaihna vawng nung ṭha tak sawi tur an tam hle! Upa zâwkten ‘ṭhangtharten aia upa zahna in nei tlem ta’ an ti fo, ṭan lak a ngai. Tu emawin a pumrua a len avang emaw a thluak a hriam deuh avang emawin a aia upa, pumraw te zawk, fing lo zawk a zah lo a nih chuan ‘hnam phatsantu’ a ni.

5. Kan intodelh a ngai: Ram a hausak chuan hma a sawn a, ngaihsan a ni ṭhin. Tu hnam mahin a chimral thei lo. Hausa tur chuan taihmak a ngai ta phawt mai. Kan ram leh hnam hi hnam dangte laka kan chawisan zelna tur chuan kan intodelh a ṭul hle mai. Intodelh tur chuan taihmak a ngai. Hnathawh hreh nei lo ila, eng hna pawh hi thawk bawrh bawrh ila kan va intodelh dawn chiang em! Ram a retheih tlat chuan ram dangte lakah kan tlawm lo thei lo. Kutdawh hnam kan nih chhûng chuan kan ram leh hnam hi kan humhalh thei dawn si lo.

6. Kan hnam ziarang, ṭawng leh hawrawp te kan humhalh a ngai: Mahni hnam culture leh incheina zahpui a, hnamdang tih dan kan ngaihsan chhung chuan hnamah kan la chiang lo hle a ni. Hnamah kan chian miau loh chuan engtin nge kan humhalh theih teh lul ang ni? Kan ṭawng te, hawrawp te pawh a nihna anga hman kan tum loh tlat chuan ṭhangtharten kan hawrawp zingah a tel a ni tih an rawn hre lovang. Ram leh hnam humhalh nan tak tak chuan ṭawng vawn him a, tihlar a pawimawh. Chuvangin, Eight Schedule-a kan ṭawng hi thun a ngai.

7. Kristian nun dan ṭha ngaihsan: Mizote chu Kristian ṭheuh kan nih vangin he kan nihna hi a taka kan nun chhuahpui theih nan ṭan lak a ngai.

8. Nupui pasal chungchang: Ram leh hnam humhalhna kawng pawimawh tak pakhat chu hnam dang nupui pasala neih loh hi a ni. Nupui pasala inneihna hian hnam hlawm hnihte suihfinin chhungkuate inkungkaihna nghet a neihtir ṭhin. A bikin kan Mizo hmeichhiate kan fimkhur zual a ṭul. Hnamdang pasal a nei kan ṭhahnem hle a, chu chuan harsatna min thlen mek a ni. Hei hi kan hriat a ṭul, hnamdang pasal a kan neih hian kan fate hi Mizo an ni thei tawh lo tih hi. Mipate pawhin hnamdang nupui a tan a neih hi Ram leh Hnam tan a him chuang lo tih hriat nawn fo ṭha.

9. Ram hralh/ In luah tir: Hnamdangin kan Mizo puite lei ngamna aia tova an lei ngam pawhin an hnenah kan hralh loh ngam a ngai. Chutiang bawkin man to zawkin luah ngam mahse, tlawm zawka kan Mizo puite kan luah tir ngam a ngai a ni.

10. Tihdam theih loh natna laka inven: A tihdamna Damdawi la hmuchhuah loh HIV/ AIDS laka tun aia nasaa kan inven a ṭul hle. A awm theihna kawng hrang hrang laka inthiarfihlim tura mitin kan inzirtir a ngai a ni. HIV/AIDS a darh zel loh nan ṭan lak thar a ṭul hle mai.

11. Zirna: Ram leh hnam humhalhna ṭha ber pakhat chu zirna kawng hrang hrang uar chhunzawm zel hi a ni. Kan rama sawrkar hna lian leh pawimawh zawng zawngte luah khat vek thei tura inbuatsaih hi kan tih makmawh a ni.

12. Electoral Roll: Kumtina sawrkarin a buatsaih ṭhin electoral roll-ah hian ramdang mi/hnamdang mi an awmve a thiang lo a, an awm kan phaltur a ni hek lo. An lo awm palh a nih ngat phei chuan dodalin kan paih ngei tur a ni.