District Library ka tlawh

Dt. 18.02.2025 (Nilaini) chu ka Laptop kawpza chhiat avang leh a Screen a thim avangin JK Business Centre, Champhai-a entir turin 06 a.m velah Vaiphei Sumo Counter atangin kan chhuak a. Tluang takin Champhai chu 9 a.m velah kan thleng.

Ka kalchhan ber Laptop chu ka entir nghal a. Ka lei tirh aṭanga la hawn miah loh kha kan hawng a. Ani, a kawpza inkilhna awm kha a tla lo niin! Chuvang chuan a kawpza a lawr ta a, chu chuan a Screen pawh a tithim tel alo ni a! A LCD a chhe lo hlauh chu ka vannei a ni! Ka mamawhin zan khat pawh ka nghak hman si lo a, temporary-a hman theih turin a Screen leh Keyboard inzawmna chu min char sak a. Ka thaw huai mai.

Hemi zawh hian Mizoram Cooperative Apex Bank, Champhai Branch-ah ATM dilna Form ka lei a. Chumi zawhah ka Seal a fiah tawh loh avangin Ink ka thun tir a, nghah chhungin kan round kual a. Ka XII Science kalna GM Higher Secondary School-ah kan kal zawk a. Chumi zawhah District Library-ah kan kal a. 2003 kuma XII Science zira Champhaia ka awm lai khan Library Member niin he Library avang hian Sidney Sheldon lehkhabu te, James Hadley Chase lehkhabute ka chhiar chhuah phah a ni.

Librarian Nu Muantei pawh a lo damin min lo la hria a. A lo la danglam lo hle. Lehkhabu hawh turte min zawnpui. Lehkhabu ka hawh. Thlalaka ka hnunga lehkhabu inrem hi Mizo ṭawnga ziak an ni. Nu Muantei nena kan thlalak hian ka Blog hi luahlum se ka tih avangin nimina ka thiltih report ka'n pe zuai a ni.

District Librarian Nu Muantei nen

Bawngsa Chek tui ₹ 50 man ka lei hnuah 3 p.m dawnah kan haw a, 6 p.m pelh hretah tluang takin kan In ka thleng.