Zirtawpni, 4th March, 2011 thlirletna

Thlirletna han tih lemah han thlirlet tur ka nei tehchiam hran lo! Mahse, ka thiltawn thenkhat ziak ila a thui thei deuh awm e:

In atangin ka chhuak:
Bawngkawnah City Bus changin darkar 1 dawnlai kawngsirah ka ding a. City Bus- ah thutna chan ngei ka duh avangin a Stand pangngai lovah ka chang a. Mahse, a rawn tlanchhun pawh a khat theiin, a khat lem lo pawh khawi emaw veng YMA ten an hmang hlawm a. Chuvang chuan a nghah pawh ka nghah rei phahta a ni.

Tichuan, ka nghak rei viau dawn nia ka hriat avangin Bawngkawn to Lunglei Road- ah ke in ka phei char char a. J. Thankima College pengah ka lo chang ta ngawt a! Tlema thawl deuh Bus chu ka lo phar ding a, ka lawn ve ta a! Mahse, thutna tur a ruak a awm lo. Bawngkawn thlen hma chu ka ding ta a.

Bawngkawnah vanneihthlak takin mi engemawzat an chhuk a. Non- mizo pawh an chhuk teuh mai! Tichuan, tleirawl chhe vak lo bula thutna ruakah chuan intithei takin ka va thu ta a. A ni chuan Mobile Phone hmangin mi tuemaw a be mawlh mawlh a. Ka thutna- a ka len vak loh avangin, inla polite tawkin, 'Ka rawn nek deuh ang che aw?' ka ti a. Ka han nek salh a. Ani pawh a tawlh tha ve mai a. Ka inla Polite zel, Sachin ka kheh a, han pek ka tum chuan, 'Ka lawm e. Ka ei ngai lo', a ti a. Tichuan, engdang sawi lem lo chuan kan thu ta ngawih ngawih ngawih a.

City Bus Conductor chuan Passenger chu a tawt a tawtin a rawn bengbelh zel a. A ding te chu ka lainat rualin, ka lu a nawm vak loh avangin ka inla tlawmngai peih ngang lova, ka thu tluan ta.

He ka Bus chuanna- ah hian ding zinga mipa pakhat chu a hahchhiau thut mai a. A chil chuan min rawn per chuaih mai a! Ka thin a va han rim miah miah em! 'E heu!' tih pahin rum lutukin chupa chu ka va melh pah a. A ni chuan, 'Sorry' a lo ti a. Ka inbengdai thei ta hram a. Vawiin ni ka hman nawm loh phah tep a ni!

Kan tlanzel a. Khawpui kawngtawt chu thuhran, kawngsira Motor Park te avang chuan Traffic a Jam leh thin a. Tichuan, darkar chanve dawn hnuah Zodin Square City Bus Stand chu kan thleng ta. Mipui an va thahnem tak em!

Artificial Grass:
A hmuh a nuam. A live- a ka vawikhat hmuhna a ni. Han inbingbilaileh nan ka han hmang chak khawp a! Chu phaitualhnim, mihring siamchawp chungah chuan Tleirawl te, Nula leh Nute, Nuthlawi te, Tlangval leh Rawlthar te, Pa te leh Pathlawi te chenin, a..naupang chenin Cheraw kan turte leh tur lote pawh an lo zi mur mur a.

Gate- ah ka luh dawn lai tak chuan, Police tiang keng pakhat hian min kuai vir nawk a. Ka han enchian chuan Putar Tianghawl hi a lo kai dat dat a! 'E!", tichungin ka thlir liam ta a. Tichuan, balh pawisa miah lo chuan Lammual Gate- ah chuan ka lut tlang ta a. Security a tha lo bawk a, Bomb tihpuahtur keng ila chuan aw...

Amah Zosangpuii Sailo:
Chapchar Kut Miss atan Diktawn Magazine- in a lo thlan tawh a ni. Ka hnampui a ni a. Facebook- ah pawh kan inbe fo. Mahse, a live- in ka la hmu lo! Vawiin ah pawh ka hmuh chiah ka hre lo! Mahse, thlalak ka han en a, 'amah ngei a lo ni!'.

A unaunu Lalthakimi Sailo nen hian SMUDDE- ah kan zir hova. (Anin MBA, keiin MCA) Kan inhmu fo. Tichuan, ka Mobile Phone ka phawrh a. A thiannu chuan kan pathum chuan thla min laksak ta a. Ka lawm khawp mai.

L-R: Lalthakimi Sailo, J. Lianhmingthanga Sailo, Zosangpuii Sailo

Tichuan, amah Zosangpuii Sailo, Nula hnahkhat, hmeltha bawksi chu live ngeiin ka va hmu hlauh mai a nih chu!

Seat ka chang lo:
Sawmbik zinga tel ka ni lova. Mi tumahin (ti mai ang!) min hre lo. Chuvang chuan zah pawh dawn lem lovin mi sawmbikte thutna lam Pavillion ka pan phei a. Thutna ruak a lo awm tawh lova. Tichuan, Ground sira a hungna bul lawka mi thutna bulah chuan hreawm pawi sa lovin ka va thutung a. Ramhlun North YMA ten Chapchar Kut tannan Zaipawl an rem nghal.

Hemi hnu MKHC Chairman- in Hunserh a hmang a. Mipuite ding vek tura a han ti kha chu ngai ka ti lem lo khawp a, ka thu tho! Hemi hnu hian PC. Zoramsangliana, Kut thlengtu chuan Welcome Speech a sawi. Hemi hnu hian Kut pa Lalthanhawla, Chief Minister in thu a sawi bawk.

Chief Minister thusawi lai hian ka kalsawn a, Lammual a tawt bakah, thutna chan loh nen Tuikual lama ka thianpa, BCA ka zirpui Ngengpuia te Inah Movies la turin chhuk ka tum.

Lammual ka chhuahsan hmain Cheraw lam ropui leh nalh tak YMA Branch 38 chuangin an entir a. Mahse, Sound lam a tha lem lo.

Cheraw an kan lai

Tichuan, Lammual ka chhuahsan ta a. Lammual Gate bulah chuan...

Amah hriat loh chhingkhual Lenmawii:
Nidanga ka la hmuh ngai loh Nula pakhat hian Mobile Phone a lo hmang mawlh mawlh a. Ka Mobile Phone ka phawrh a. A bulah ka va kal a. 'Khawngaih takin thla min lakpui ta che?' ka va ti a! Mak a tih hmel viau naa, ka dem hran lo!

A bulah chuan Mizo mipa incheina- a inchei Mipa pakhat hi Kut Kuangkuahin a ding a. 'Thla min lo laksak' tia ka ngenna chu, min thik tih hriat em em hian, 'Ka hman lova!' a ti! Ka va han ten tak em!!

Kan bulah chuan Traffic Police a lo Duty a. A tul hle. Keichuan lakpui ngei ka duh si! 'Ka pu, khawngaihin thla min lo laksak' ka va ti leh. A buai lutuk a, min chhang hman lo! A thiannu chuan min lainat ve ta a niang, 'Khawi, ka lo hmeh ang che u!' a ti a. Ka Mobile chu ka pe a. Hnai em em maiah min dinchilh a. A hmet ta a!!

Kan lakzawh chuan, chu Nula hmeltha hnenah chuan, 'Ka lawm e', ka ti a. Zaktak, hlim ru tak siin ka kalsan ta!

Hming hriat loh Tleitir

A hmel kha a tha siah mai! A no chek mai bawk si a! Ka hlawhtling viauin ka hria vawiin ka chhuak chu! Mahse, ka Mobile Phone Camera hi a tha tehchiam lova, a fiahvak lo mai thei.

Hei hi ka Blog chhiar a, tlawhtute ka zawt duh che u: He nula hi tunge a hmingpum? Khawi venga mi nge? tih hi. Min chhantheih chuan ka lawm ngawt ang. A lakah vanduaina thlentir ka tum lo bawk e.

Tuikual South:
Tichuan Lammual atang chuan ke in Bazar Bungkawn lam panin ka phei a. Aizawl Watch House thlen hma Step- ah ka chhukthla a, ka thianpa te Inah chuan Movies hrang hrang: The Crew te, A Dangerous Man te, Homecoming te, The Stanger 2010 te leh Daybreaker te ka la. Net ka Browse a, Facebook- a ka Status Comments ka chhanglet. Thingpui tui tak Mrs. Ngengpuia (Maruati)'n min siamsak a, Chhang ka hmeh.

Hemi hnu hian Bazar thleng ke- a kal lehin, Bazar atangin Bawngkawn thleng City Bus- ah ka chuang a. Chawhmeh te Bazar- ah ka lei hnuin, Inah ka haw a, eirawng ka bawl.

3rd March, 2011 Nilaithawhtanni

Hemi ni hian DOEACC Society Centre, Zuangtui- ah Library Caution Money ka Deposit Widthdraw tumin ka kal a. Nimin lamah ka va kalthlawn (an Chawlh) avang va kalnawn ka ni.

Ka duh anga awlsamin a lo tih theih lohva. Ka che buai tep. Mahse, thawktute an fel a, ka tifel thei ta hram a. Ka haw lam chu kan venga mi Taxi lo tlan ka phar fuh hlauhva. SMUDDE Centre, Bawngkawn thleng, Zuangtui DOEACC Centre atangin pawisa nawi ka neih loh vangin Rs. 10 in ka kalthlang. Kha Taxi Driver kha a lakah lawmthu ka Blog kaltlangin ka hrilh mawlh mawlh e.

SMUDDE Centre- ah ka han lut a. Lalthakimi Sailo te ka hmu a. Kan inchibai a. Tichuan ka Zirlaibu lo thleng ka va lam a. Hmei hnu hian Centre hnuai lama Restaurant- ah Rice tui lo zet mai, Plate 1 @ Rs. 20 man ka ei.

Tichuan, ka hawtlang a. In ka thlen hnu deuhvah eirawng ka bawl. Parawl nih chu eirawng bawl reng a ngai a, a hahthlak khawp mai!

Thubelh: DOEACC Society, Zuangtui Centre kawng hi tunah hian a lei tlahniam thin lai kha siamthat tumin an bei mek a. A hnuaiah hian thlalak fiah vak lo ka dah e. Nakin lawkah chuan kawng nuam takah kan la tlan ngei ka beisei.

Zuangtui kawng siamthat hna tan a ni

2nd March 2011 Nilaini

Hemi ni hian DOEACC Society Centre, Zuangtui- ah Library Caution Money ka Deposit Widthdraw tumin ka kal a. Mahse, an lo chawl. Ka haw leh lam chu NIC, Mizoram State Centre, Assembly House kawtah ka leng.

Ka haw lam chu Bazar- a City Bus Stand atangin Vai pakhat leh a nupui hi an lo chuang ve a. Ka thutna bul hi a awl a. Vaipa chuan an nupa- a thut a duh a niang, ka darah a rawn beng a. 'Bacha..' min ti! Keichuan, thinrim engphiarin, 'NAHI' ka ti. A nui suk a. Ka thlanga thutna awlah chuan a thu. Ka thinrim a reh mai lo!

A lam ka zu hawi a. 'Hei' ka zu ti a. Ka kut chu ka lek a, 'F**K YOU' ka zu ti leh a. Ka thawl huai mai! Ka hnungchiaha thu nu pakhat chuan, 'Duhtawk rawh' a lo ti a. Ka ngawi zui ta.

Ka thinrimna chhan chu:
a. Ka thu hmasa zawk a, a duh duhna- a thu tur ka ni lo.

b. Mizo ka ni. Ka ram a ni.

c. Vai ka haw hrim hrim!!

Govt. Mizo HSS leh Kei

Pathian khawngaihna dawngin a hmingin Class- IX chu Govt. Hnahlan High School atangin ka passed a. Tunhma- in kan khaw High School- ah First Division- a pass an awm ngai lova. Chuvang te pawh a ni mahna, Class- X chu Aizawl lamah zir ka chak ve tho bawk avangin ka chhungte chuan Aizawl- a ka zirna chhunzawm chu min remtihsak a. Tichuan, buai phili takin Govt. Hnahlan High School atang chuan Transfer Certificate kan la chawp chuk chuk a, Aizawl lam panin kan kalta rawih a. Hetih lai hian kan khua- ah hian tun anga kawngpui tha leh zau, mar tha la awm hek lo, Jeep kha a awmchhun a nimai a. Tichuan, Champhai chu a 'sawh gear' takmeuhvin kan thleng phei a. Chhungte Inah zan kan riak a. A tukah Bus (nita in ka hria) in kan kal ta a. Tichuan damtakin beiseina hrang hrang nei chungin kan thleng ta a.

Admission tih Vawikhatna:
Ka aim in life zinga pakhat, Govt. Mizo HSS- a School kal ve chu tihhlawhtlin tum chuan ka pa nen chuan Govt. Mizo HSS- a School- ah Principal chhuak ta, Pu K. Zaluta kan va pan chawt mai a. A han remti lo viau dawn dawn a, mahse thingtlang atanga rawn pan ve vang vangtu nafam chu min khawngaih ta deuh a niang, 'Seat a awm tawh lova, a Seat tur erawh chu kan lo dahbelh ang e' tiin Admission tih chu min phalsak ta a! Ka va han lawm tak em e aw! Tichuan Admission a vawikhat nan kan han ti nghal a. Admission kan tihfel hnu chuan Hnahlan lam panin ka pa a haw a, kei ka nu nau, Sangpuii Vaiphei W/o Zoduha, Lily Veng te inah ka awm rih a. Engnge ka hma- ah lo thleng dawn ka hre hauh lo!

Chutia Govt. Mizo HSS- a School a kan in Admit fel, ka pa han hawchho chu Lehkhathawn dangdai tak mai, 'School- a lut a, a thlawn veka enkawl' tura sawmna chuan a lo hmuak ta mauh mai a! Chu lehkhathawn chu Aizawl North High School- a thawk, U Sangtei lehkhathawn lo ni rengin! (U Sangtei hi Hnahlan- ah a unaupa Pro Pastor awmpuiin a rawn awm reng tawh a. Govt. Hnahlan High School- ah pawh Geography Teacher kum 2 chhung zet a ni hman a ni.)

Tichuan, a thlawn veka awm theih na hmun na na na chu tiin, Admission Re- imburse lovin tichuan ka tum lohna zawkah Class- X chu ka kal ta a. Lung erawh kim chiah lo mahse, a lo rei deuhva, ka theihnghilh zui ta mai in ka hria. Harsatna ka neichho lo. Kum 2001, World Trade Centre sutchhiat a nih kum khan Aizawl North High School neitu Pi K. Zachhungi leh a pasal Pu C. Lalbiakthuama te chuan tichuan an School- ah Class- X chu min enkawl tluan ta a. Anmahni vang liau liauva hetiang dinhmun thleng thei hi ka nih avangin henga an hming ka tarlante chungah hian lawmthu ka sawi tak meuh meuh vek a ni e. Hemi kum vekah hian Pu Faktea a rawn larchhuak bawk a. Ka tan chuan theihnghilh theih rual a ni lo.

Tichuan a vawikhat nana Govt. Mizo HSS- a ka in Admit chu a thlawn ta phawt a!

Interview Board hma- ah teh ka ni a, ka tlingzo lo:
Pathianin min hruai a, Class- X ka passed a. Class- XI chu va luh leh ka tum ta alawm! Ahma kumah min admit thlawn tawh a, a hminga First Division- a passed ve hram hram chu min lo admit duh ang chu maw? Ka lakduh lah, ka thiamvang ni miah lo leh ka tui vang ni lovin, 'Miten a har an tih avang' a Science laktum ka ni si a!

'Bei nge sei, Rundung?' tiin ka pa nen bawk kan va kal leh a. Interview kan nei ta! Ka pian a hnu lama Interview ka hmachhawn hmasak ber tum a ni. ni thiPrincipal Room- ah Science Department Lecturer ho leh Principal an lo thu thap a. Ka hming an han lam a.  Zam loh hram tumin leh theih ang tawka puam thain, 'May I come in, Teachers?' ka'n ti ve a. Principal chuan, 'Yes, come in. Please take a Seat', a lo ti a. Midang chuan ka mitah tak an lo en thap hlawm a!

Khami ni khan ka thawmhnaw azawnga mawi leh nalh ve ber kha pheikhawk dum nawhtlet var bun chungin ka ha a ni a! Tichuan, thutna an lo ruatah chuan ka thu a. Thu min zawt tan ta:

'Engvanga Science lak duh nge i nih? tihte, 'I mit a tha si lova, Science te chu ila thei dawn em ni?' tihte, 'Mathematics i man em?' tihte leh, ka chanchin tlangpui min zawt a. Ka chhan chak ber leh khang hun laia ka hnarkua aia ka Knowledge a zauna, GK lam min zat miah lova! Tichuan, beiseina nei chungin Principal Room chu, 'Thank you, Teachers' ti chungin ka chhuahsan ta!

A tukah kan interview Result a chhuak dawn tih min hrilh hnu chuan kan thlenna lamah kan haw a. A zan chu muttui a har khawp mai. 'Ka tling ang em, tling lo ang em?' tih ringawt ka ngaihtuah a. Ka lo tlin chuan, tleirawl chhe lo deuh deuh bulah kan leng ve ziai ziai ang a, ava nuam dawn em! Zawlkhawpui Tleirawl hmeltha, duhawm leh nuimawi tak mai te khan min han bia ang a! Ka tlin loh erawh chuan, hmun danga ka kal a ngai dawn si! Hui ha!! Ka lo muhil ve thei ta hram a.

A tukah kan interview Result kan va en a, rilru na takin kan haw ta a nih kha. Chanmary kawna ka pa rilru hah hmel te, ka rilru na in Govt. Mizo HSS lam hawi vang vang chunga 'Class- XII Sc chu ka rawn kal dawn khawp' ka tih lai te kha aw!!

Tichuan, Mt. Carmel School lam kan hawi chhova. Mahse, Seat an lo nei tawh lova. A hrim hrim thuin kan Sailo pui School mah nise, khatih lai kha amah a awm lo a niang, min lo be tha vak lo! Tichuan, Synod HSS lamah ka phei leh a. Kan Sailo pui tho Mangchhuana Principal a nih lai a ni a. Amah a lo awm ngei a, mahse min Admit ta lo!

Kan bei a dawng a. Private School, Science lak theihna hmun kan rilru chuan a dap ta rawih a. Chanmary- a Mary Jones HSS, Pu JH. Ramnghinglova School- ah chuan Class- XI Science la tur chuan kan in Admit ta a. Class- XI Science ka zir lai hian Maths ka la tel lo. Class- X Maths nen a inthlau Over lutuk a, ka man hlawl lo! Hemi kum hian Chaltlang atanga rawn chhukthla Truck Brake Failed in Traffic Jam lain Motor a hnawl(su) vak mai a. A hnawl(su) thui khawp mai. Chanmary atanga Methodist Kohhran Biakin phei vel thleng sawn Motor a insu phei thup mai a. Taxi 2 a chhia a. Bike leh Bike te a chhe nasa hlawm hle.

Class- XI Science ka zirchhung kum chanve vel chu Vaivakawna ka pa u Lalramthanga Sailo te inah ka awm a. A hnu hian Bawngkawna City English Academy tuna nita, ahma- a Hostel ni a, City Educational Hostel ni thinah ka awm. Tichuan CLass- XI Science chu ka passed ve leh ta a.

Admission tih Vawihnihna:
Amah Pu K. Zaluta hi ka ngaina em em lo na a, ama zara ka aim-in-life pakhat hi hlawhtling thei chauh a ni tih ka hai lo. Class- XI Science ka pass hnu chuan Mary Jones HSS neitu Pu JH. Ramnghinglova'n min ui chung chung Govt. Mizo HSS- a CLass- XII Science zir ka tumruh em avang chuan ka chhuahsan ta a. Govt. Mizo HSS- a Class- XII Science lak tum chuan ka nutei pasal, ka patea (Zoduha) nen Pu K. Zaluta te Inah, ka Marksheet nen chuan kan va leng ta a. Ani chuan min lo hre nghal mai a. Harsatna vak awm lovin tichuan School kal tan ni- a Admission ti turin min ti a. Kan haw leh ta a.

School luh tanni chuan Admission kan han tifel a. Tichuan, a vawihnih nan, Govt. MIzo HSS- ah ka in Admit leh ta a. Ka aim-in-life chu pakhat ka Complete ta a ni.

My Life at Govt. Mizo HSS:
Govt. Mizo HSS- a ka luh kum hi 2003 a nih chu. Hemi kum hian Science Stream ho chu kan awmna hmun tuna Vocational Building atang hian Pu Siamhranga te inbul lawkah kan insawn phei a. Hemi kawtzawlah hian Teachers' Day kan hmang nghe nghe. He Teachers'Day ah hian QUIZ ka Organised a. Tin, K. Vanlalmuansangi D/o K. Sanglawma, Taxation- a a hotu lampang te nen hian Drama kan chang a. MUansangi nen kan innei a. Lianmawia ka thian a ni a. Anin Durtlanga a thiannu, Sylvia- i a hmang.

'Inti Science la' takin ABC Chemistry bu chhahpui mai, School Bag- a dah lovin kan han leng lang ngei a. Physics bu te thlengin khawlaiah kan keng lawrh lawrh fo!

Class- XI Science ka zirlai khan Maths ka la lo ka tih tawh kha. Govt. Mizo HSS- ah erawh chuan ka Subject ka thlak hlauhva! Mathematics ka han la ve rawp mai a! Tichuan, Sir Ruata leh Sir KT-a te chuan Differentiation te, Integration te, Limit te min han zirtir chhova. Thiante chuan Trigonometry te chu an man si! Kei atan chuan 45 Degree Sin in a tlukte te mai mai pawh a har a nia!

Physics chu Miss Muanpuii of Head, Science Department leh Sir BK- a te chuan Physics min han zirtir bawk a. Prism hman dan te kan han zir a. Refraction of Light Experiment te kan han bei zak zak a. Chemistry chu Sir Taitea leh Sir RM- a ten min zirtir a. Test Tube 2 ka tikeh nghe nghe. Titration kan tih thin lai te kha ka ngai ta hle mai! Mizo chu Miss Mabiaki W/o CN. Sailo (Ka U) in min zirtir a. Sir Hmingtea a lo kal zeuh zeuh bawk. Ama Note siam kha kei phei chuan Guide- ah ka hmang nghe nghe. English chu Miss Ruth- i ten min zirtir a. Kei phei chuan Miss Ruth- i hi 'Fatima- i'ka ti hmiah!! Laboratory- a kan kal dawn leh Practical kan khawih dawn chuan Doctor Uniform ngei mai kha kan nei a, kan han ha tham mai a. Doctor tak tak kan ni ta emaw tih mai a awl rum rum thin. Khawlaia khami Uniform ha- a kalte kha a nuam ka ti thei khawp nia!!

Kan hunlai hian Club hrang hrang din niin, Adventure Club te phei chu Reiek tlangah te an va lawn ni awm tak a ni. Kei erawh ka tuina lam, Literature Club- ah ka tel a. Kartin, Zirtawpni chawhnu hian Home Science ho Class Room, Main Office bulah hian kan lutkhawm thin a. (Miss C. Lalthangpuii, tuna ka thawh mekna School- a Vice Principal hi a Convener a ni nghe nghe.) Literature lama Mizo mi hmingthate kan sawm thin. Pu Lalthangfala Sailo leh Pi Lalsangzuali Sailo kan kawm nghe nghe a. Pi Lalsangzuali chuan, a hlaphuah, Class- XII Mizo Core bu- a mi kha a Guiter perhin a sa nghe nghe. A ngaihno bei khawp mai. Kawm a nuam. Pu Lalthangfala Sailo kan kawm tum chuan, 'Engvanga Tragedy- a Liandova leh Tuaisiala te unau lemchan thawnthu titawp kher nge i nih? tiin ka zawt nghe nghe. Hetih lai hian a nupui Pi Lalziki Sailo pawh High School- ah a la thawk mek nghe nghe.

Kan hunlai (2003- 2004) hian Science zirlaite chuan Tuirialah Field Trip kan nei a. A nuam khawp mai. Tlai lamah chawte kan ei a, manhla tak a ni. Lecturer ho te nen tui te kan cheng a, kan nui nasa!

Hemi kuma ka zirpui thahnem tak tunah hian chu BSc. MLT(Alan- a) te, MBBS(Lalnunpuii), B.E. Comp Sc (MUansangi), Sepoy(Thanmawia) te an ni tawh hlawm a. Thenkhat chuan an la zir chhunzawm zel a, ka sawilan tak loh thahnem takin hnathawkin, an in zirchhuak tawh hlawm.

He ka School luh kum hian Science Building thar hi Commerce ho awmna thin thlangah RCC- in sak tan a ni a. Kan luah hman ta lova, ka ui khawp mai! Tuna mi te hi chu vannei tak an ni.

Ngai ve tak che u maw, hmana kan tuanna Govt. Mizo HSS, Hlim taka zai kan vawrna! Kan Junior- te Class Room- a lehkhachhia kan thlawh luh thin laite! A ni, Teachers'Day kan hman tuma Quiz ka siam ka Host lai te kha! Hna kan thawh laite, Kan awmna Building hlui atanga hmun danga kan insawn a, kawngchhak lam rawngvar kan hnawih laite. Practical kan tih lai te, Camera kenga thla ka lak vak vak laite kha ka ngai e!

Hnukharna:

Hemi kum hian Star ka nei a. Home Mission School- a kal a ni nghe nghe. A school kaltur hi ka lo chang thin a. High Field- a an in- line te hi ka han thlir thin. Ka Classmate hmeichhe thenkhatte nen kan Score ho thin a. Amah avang khan ka moral pawh a danglam nasa a, ka chhiatphah ta reng bawk a ni. (Amah vang nilov, amah- ah ka rilru ka pek avangin!)

School Session tawp a lo ni a. Pathian remruat a ni chek ang a. Board kan han exam a, mi 2 chiah Mathematics- ah kan Compartment a. Kei chu 7 marks in! Tichuan he ka School ti- a ka chhal hlen ve tawh tur hi Govt. Gandhi Memorial HSS, Champhai lamah ka herliam san ta a ni.

8:24 PM 2/27/2011

A Review: Kristian Chhungkaw Film

Film hming    :     Ka Idol
Studio:         Dove Audio Visual Inc.
            Chawnpui, Aizawl

Production    :     2010
Script        :     H. P. Lalremtluanga
Changtute    :
        Mipa        :     Zothansanga Khiangte (Sangmama)
        Hmeichhia    :     Mimi Lalrawngbawli (Rampuii)

Editor & Director of Photography:
            C. L. Zohmingthanga
Director    :    Lalhunruata

Film Duration    : 1Hr 38Sec. ( Hun bituk zat: 1 Hr)
Reviewed By    :     Jonathan Lianhmingthanga Sailo,
            Committee Member, Abrahama Group,
            Lily Veng Branch KTP, Aizawl.

A Film tlangpui:
A changtunu Rampuii nu Pi Rini (R. Lalthanpari) chuan a Spinal a sawhchhiat avangin ke in a kal thei lova. Greenwood Hopsital an panpui hnuah, thi em lovin, Bed Rest- in a awm a. A changtupa (Sangmama) pa Pu Nuna chu Politician niin, inthlan boruakin a hmuak mek bawk a. Chutih lai chuan Lily Veng Branch KTP te chuan Idol an lo thlangchho ve mek bawk a. Chutah chuan a changtunu pawh hi intihsiakna beitute zingah telin, hla a sak laklawh lai takin a sa sual (theihnghilh?) ta hlauh mai pek a! Tichuan, Jenny Lalchhanhimi aka Chhanchhani (Misual Nu), Modelling lampanga inhmang leh College Queen hial lo ni tawh, Isaak- a Group Member chu thlan a ni.

Rampuii pa Pu Hminga chu khawi emaw lai Sawrkar Office- ah a thawk a. Mahse, Political Party hruaituten midang duhsak zawk an neih avangin chhantha awm hauh lovin a dinhmun chu chhuhsak a ni a. Rampuii te chhungkaw chungah chuan chhiatna- in he Film bullam atangin a tuamchho char char a ni. Rampuii Nu chuan mittui tla chungin, a fate hnenah, 'Khawvel hi chu mi hausa te Lalna ram a ni a..', a ti nghe nghe.


Mahse, harsatna an tawh mek lai pawhin Mathaia 6: 25 chhiarin, Chhung inkhawm an la nei thei zel a. Pathian hnenah an intulut thei a ni. Harsatna chuan kiamlam pan lovin pun lam a pan zel a. Rampuii pa chu Kohhran hun ruat na- ah ruat a ni ve lova. Hemi tuma an Inkhawm bang chu Step- ah a tlusual ta nghe nghe. Hetia Rampuii pa chetsual avang hian Sangmama pawh Rampuii te Inchhungah a lut ve ta nghe nghe a. Tihian Sangmama chu Rampuii te chhungkua- ah a interview tan ta a ni.

Hemi hnu lawk hian Sangmama pa Pu Nuna te Inah Family Day hman ho a ni a. Hetah hian Rampuii chu Sangmama'n a zahpui deuh (?) avangin midang anga sawiin a nu leh pa te hnenah chuan a inhmelhriattir a. Mahse, thil pawi tak a thleng ta tlat! Rampuii lo hrechiang em em tu Pu BK- a, Rampuii lo ngaizawng ru em em tu a lo awm ve tlat mai! Rampuii chu zak takin a haw ta nghe nghe a. Chu chu Sangmama chuan zu umzuiin a thlah nghe nghe a ni.

A changtupa leh a changtunu te

Pu BK- a hi a sum hrawm a na khawp mai a. Rampuii te chhungkua chu sum leh paiin a vur nasa. Rampuii nu dam lo pawh pawisa tamtham takin a kan nghe nghe a. Rampuii chu Mobile Phone te a leisak na in, Rampuii chuan a laksak ta lo.

Vawikhat chu Pu BK- a (Biakkima) chuan Sangmama nu leh pa te chu Rampuii te Inah a lenpui a. Chutih lai chuan Sangmama chu a lo awm ve hlauh mai pek a! Chutah chuan Pu BK- a chu a chechhe ta hlauh mai a. Pu Nuna nupui kawrthar hak chu a tihbalhsak ta vek mai a. Chunga an buai lai chuan hmunhnawk tifai turin Sangmama chu Choka lam atangin a lo phei a. Mahse, a hmai tuamna a phelh ta hlauh mai! A nu leh pa te hma- ah tihmualpho a ni ta! Chutih rual chuan Pu BK- a zak thinrim inhrosa chuan Rampuii te chhungkaw laka a thatna te a sawi ta zar zar a. Mahse, anni chuan Pu Bk- a pawisa pek te chu an lo ei ralin, an lo hmang then si lo. A thil pektawhte chu Pu Nuna te nupa hmuhlaiin pek let a ni leh ta a ni.

Hemi hnu hian Pu Bk- a chuan a phakar a chhuah chho ta zel a. Chhanchhani hmangin tan a han la a. Mahse, a hlawhchham a. Hemi hnu hian a inrawlh zui ta em em lo. 'Harsatna kara leng kan ni' tih hla sa thei hial tur khawpa mawiin Sangmama chu a chhungten Chhanchhani an la duhpui leh ta zawk lehnghal a. Mahse, Rampuii chu Sangmama tan chuan a 'Thinlung Lalnu' a lo ni tawh si!

Rampuii hi a khawngaih thlak hle. Vawikhat Sangmama te Ina a va leng tur inthlan- a tlinloh vanga rilru na Pu Nuna te nupa Sitting Room- a lo te chu a va hmu a. Inchhung a lutchiah chu Sangmama nu chuan kawh sawk pahin, '..Chhuak nghal rawh...Engti kawng mahin ka fapa hi i nei dawn chuang lo', a lo ti a. Rampuii chu tap chungin a chhuak ta a ni. Hetia a chhuak lai hi Sangmama chuan a lo hmu a, a va umzui vat nghal a. A ma Room lamah a hruai a. Sangmama thusawi ka duh em em chu, 'Kan in hi chu ropui mahse, a chhung hi a hreawm a sin!', a tih kha a ni.

Sangmama chu Building Structure Designing Competition- ah, thawhpui nei lovin amahin a tel ve a. Mahse, a tel pali zingah a ni chiah chu a tling lo awmchhun a ni a. Eizawnna kawngah pawh Sangmama chuan harsatna a tawkchho ve ta a ni.

Hetih lai hian Rampuii u mipa Remmmuana (Lalzamlova Khiangte) chu a thawhna- hmunah Manager hna a kaisang a. An chhungkua an hlim chho tan hle. Chutih rual erawh chuan Sangmama te inchhung chu thimin a tuamchho tam ta thung a. Sangmama u Siama (R. Lalremruata) mipa chu zuruiin a tei a tei a. An in a chhuahsan nghe nghe.

Hemi thil thlen hnu deuh lawk hian Sangmama chuan a Design te lei tir turin Company a dawr a. Mahse, anlo leisak leh thei chuang ta lo fo!

Rampuii chuan an inkara boruak awm chu a la hrethiam chiah lo niin a lang a. Vawikhat Sangmama'n an in- a haw tawh lo tur a thlem a, inneih a rawt tum pawhin, 'kan inngai zawng si lova', a ti nghe nghe! Mahse, a chhungte hnena a han sawitakah chuan a rawn harhchhuak ve tan ta ni ngei tur a ni.

An inkar chu a nghet chho tial tial a. Nakinah chuan an pahnihin Pastor hmuin, an inkar thute an sawi a. Pastor chuan thutha tak takte a lo hrilh a. Hemi hnu hian a hma lawka a tlin lohna Competition- ah khan, a tling ho khan mi ta an ruk an lo show vel mai mai avangin an hrechhuak leh a. Sangmama chu an kova, tichuan Pathian zarah hna a hmu ta a ni.

Hemi hnu hian Rampuii leh Sangmama te chu an in nei a. Hemi an inneih ni hian Rampuii nu ke- a dingthei lo,, kal thei lo chuan damna a chang bawk.

Rampuii hi he Film- ah hian a mizia chiang taka langthei chu: Mi ti mai mai lo, mahni hna- a rinawm tlat a nihzia a langchiang hle. Bible Track sema KTP an hnatlan tum pawhin midangin pawlawh taka an sem kual vel mai mai laiin a ni chuan midang zawh vek hnuah pawh taima takin a lo la sem thei a. Inchhung hna nise, a thawk bawrh bawrh a ni.

Fakna:
a. He Film changtute zingah hian a mipui lamah ka tang ve a. Mipuiin kan Support na kha a tha thlawt a. Idol thlan zana kan performance te kha a mawi. (Ka lan ve nghe nghe kha!)

b. Harsatna karah pawh Pathian hmachhuan tlat tute chu a tawpah Pathianin mal a sawm thin tih he Film hian min kawhhmuh thei a.

c. Elreltute leh Itsiktute chu hnuhhniamin an awm thin a. Mi inngaitlawm leh midangte itsik lo mi chu chawisanin an awm thin tih min hrilh bawk a.

d. Thianghlim taka inngaihzawn hi NUla leh Tlangvalte hian kan tihtur a ni tih leh, Pathian leh a Kohhran remtihna ang thlapa Dan Khatna- a Inneih hi a hlu tih min zirtir bawk a.

e. Sum leh pai hian hmangaihna a lei theih loh tih chiang takin a tarlang bawk.

f. Hun bituk a ni chunga hetianga Film tha tak, Mizoram pum huapa 4th position ni thei an chang chhuak thei hi a changtute an fakawm ngawih ngawih!

Selna:
a. A Film hi a tir lamah a muang a. A tawpna a zuih.

b. A tir phatah a chetsual lai lang lovin Rampuii nu a tlusual a. Damdawi In an hmachhawn nghal. Rampuii pa tlusual lai ang khan han lang se a hmuhnawm zual ngei tur.

c. A chan hun chhung tur hi bithliah a nih avang hian a inphaman zat lo a tih theih. A hmasa bera ka sawi tak ang khian,  Rampuii leh Sangmama te hi palai vel intirh pawh awm mumal lovin, an nu leh pa te pawh inbe mumal lovin, Sangmama hna hmuh ve leh an innei chawih a ang.

A behbawm:
Director a tul bawk a, a hah ngawtin ka ring. A changtute mai nilo, Branch KTP OB te pawh an tul. Zan pawh mu hman lo khawpin an buai a. Thenkhatte phei chu Editing tih laiin an thutthleng seiah an lo hnar bawrh bawrh a. (A nia lawm, u Achhuan!)

Kohhran puipate an tang a. KTP ten kan thiltih nasa taka min tawiawmin min phurpui a. Exam lai Mimi- i a fakawm hle bawk. In Exam (Selection Exam) nei chunga Film chang a nih avangin a zirna lamah a bahlah lo turah ka ngai a, ka duhsak bawk.

Kohhran Nu leh Pa te an fel a, Film buaipuituten tul leh tha nia an hriat an hnial mai lo te kha an va fakawm em! Engpawhnise, he Film hi kan Kohhran, Lily Veng Kohhran kutchhuak, kan hnathawh rah a ni a. Kohhran mipui, a te ber atanga a lian ber thlenga kan thawhrah vek a ni tih chiang takin a sawi theih.

He Film kan chanin, Family Guidance & Councelling lam huaihawta Mizoram pum huapa in elna- a kan va thehluh ve, 4- na hial a thleng thei hi Pathian hnathawh tih chiang takin a lang. Pathian hming chu fakin awm rawh se.