AIZAWLAH KA ZIN

Kamkeuna

7th Nov, 2025 khan Co-operation Department hmalaknain Mizoram Cooperative Apex Bank Ltd. leh Common Service Centre (CSC), e-Governance Services India Ltd.-te chuan, Udit Prakash Rai, Commissioner & Secretary Office chamber-ah thawhhona thuthlung an ziak a; Apex Bank aiawh Pu A. Lallungmuana, Chief Executive Officer leh CSC aiawh Shri Mohammed Azeez Udin, Principal Consultant, Regional Office, Guwahati-ten thawhhona thuthlung hi an ziak a ni.

MoU-a tarlan angin Apex Bank hnuaia Business Correspondent-te chu CSC lamin an enkawlzui tawh dawn a, Business Correspondent tam zawk neih theihna tur leh thingtlang kilkhawr ber ber thlenga Bank inzarpharhna theihna tur a nih dawn avangin Apex Bank tan rahbi thar pawimawh tak a ni. (Thu lakna: DIPR)

Kal lam

Common Service Centre (CSC) leh Mizoram Cooperative Apex Bank-ten thawhhona thuthlung an ziah hnu lawkah Mizoram chhunga CSC zingah, Champhai District CSC zinga Business Correspondent atan thlan ka nih thu ka hria a. Chumi hnu lawkah chuan Micro ATM dawn paha Training tur a ni tih ka hria a. Chumi hun atan chuan 5th December ruat a ni. Hemi hma hian Bank Account hawn vek tur a ni a. Ka link Branch: Champhai Branch-ah ka va hawng fel tawh a. Amaherawhchu, remchan zawkna avangin Training hun hi 8th December: 01 p.m-ah Programme sawn a ni. Mahse, ka lo inruahman lawk angin, a hmaa Sumo kaltur Seat ka hauh lawk tawh avangin ka kal tumni Nilaithawhṭanni (4th Dec) chuan Bawitlung Famly (Family) Sumo Seat No-1 chuan ṭhuin Driver nen mi 5-te chu 06.30 a.m pelhah Aizawl panin kan chhuak ta a. Kan khaw kawtchhuah Ṭawngṭaina hmunah chuan keiman ṭawngṭaina hun ka hman zawh hnuah Champhaiah ATM hman tumin Bethel kawna SBI ATM Booth kan pan a. Kan thlen chuan nidanga inhawng ṭhin kha a lo inkhar a. New Champhai kawnah ATM Booth inhawng a lo awm hlauh a. Chuta ṭang chuan pawisa hman tur ka lachhuak a. A piah deuha Hotel-ah tukṭhuan kan ei. Chair-a ka ṭhut theih loh avangin a hrangin ka ei a. Hotel neitute an fel khawp mai. Chawei man hi ₹150 a ni.

Tukṭhuan kan eikham chuan Aizawl panin kan tlan leh ta a. Puilo Bazarah rei lote kan ding. Kan tlan leh a. 12. 45 p.m chuan kawng chhaka Dawr pakhat kawtah kan ding zawk a. Nimbu an zuar a. Keichuan pakhat ka dil a. A nghaktute chuan vel sain, Disposable Cup-in min rawn pe a. Ka lawm hle mai. Selinga Apple ka lei.

Tuirial fu tui zawrhna hmunah kan ding a. Fu tui no 2 ka in. Fu tui man pawh a lo sang tawh a. Kumin kum tir lama No khat, ₹10 ni kha ₹20 a lo ni tawh.

03 p.m velah Aizawl kan lut. Ka chuanpui pakhat, Armed Veng Presbyterian Biak In bula thleng tur chu kan thlah a. A chhuk tur berin a hmun a hrechiang si lo, keini lah hrechiang hek lo; Armed Veng pan chuan kan tlanthla a. Google Map leh a chhuk turin phone hmanga a zawh te, mi kan zawh te hmang chuan kawngbo em lovin a chhukna tur chu kan thleng ta a. A chhuk zawh chuan ka thlenna tur In lam kan pan ta a.

Kum tir lamah khan ITI Vengchhakah hian ka kal tawh a. Mahse, a kalkawng ka hrechiang hauh lo mai a. Mi zawt chawpin ka thlenna tur hmun ITI Vengchhak chu kan thleng ta a.

Ni khatna

Zirtawpni chu Inah ka awm a. 

Ni hnihna

Inrinni chu ka zin khat avangin khaw hawi ka duh a. Ka leng chhuak a. City Bus pakhat chuan Zemabawk kawn aṭanga Bawngkawn Fare min free. Kulikawn aṭanga Zemabawk kawn thleng City Bus-ah ka chuang (Ka chuang khat si a!) Bawngkawnah hian kum engemawzat ka lo awm tawh avangin ka awm ṭhinnate tlawh ka duh a.

Bawngkawn rawlthar pahnih (an hming ka theihnghilh)-in min hruai a. ZN Higher Secondary School Building-ah min hruai a. An awmna chiah kan hriat loh avangin Step-ah kan chhuk a. Mahse, a lo dik lo a; kan chho leh a. Rei lote kan awm hnuah kan chhuak a.

Taxi tlan lai kan lo phar a. Mahse, Traffic-in muang min ti deuh nge, Taxi chu an man ta tlat mai! A mantu hnenah Taxi Driver chuan mahnia kal thei lo ka ni tih a'n sawi tak na a, an khauh lai anih avang nge awmzia a awm lo. Kei chuan ka Disability Certificate (UDID Card) ka phawrh a, Traffic chu en tir turin Driver chu ka ti a. Traffic-in a'n en chuan min rawn pan a. Aizawl North High School-a ka Cl-X zirpui (a hming ka hre ta lo) a lo nia! Kan inchibai a. Harsatna nei loin kan tlan thei ta a ni.

Ni thumna

Pathianni chu Inah ka awm.

Ni lina

Ka kalchhan ber Training chu vawiin Thawhṭanni a lo nih chuan a hmaa ka biak lawk Taxi Driver Sangtea chuan 9 a.m velah ka thlen inah min rawn lam a. Training-naa min hruaitu tur chu Israel Point-ah kan inbiak angin ka lo nghak a.

10 a.m hmain min hruaitu tur chu a rawn thleng a. Footpath-ah, Lianchhungi Book Store pheiah chuan kan kal a. Phone Cover kan en phei a, Lipglose nen. Mahse, a duhthusam ang kan hmuh loh avangin kawng kan kan a. Civil Hospital Gate thlangah chuan kan ding a. Min hruaitu chuan Lipglose va zawng ṭha se ka tih avangin Lipglose a zawn chhung kawngpui sir hmun remchang laiah ka lo ṭhu a, nakinah chuan a rawn let a.

Kei chuan, 'Millenium Centre i hmu duh em? I kal chak em?' ka ti a. Ani chuan hmanah ka kal tawh a. Kal leh ka duh khawp mai a tih avangin Millenium Centre-ah kan kal a. Elevator (Lift)-ah kan chuang a. Elevator-a ka chuan khat em avangin ka lu a hai deuh. 

Millenium Centre-a a duhzawng a lei hnu chuan Dawrpui Multipurpose Centre (DMC) kan pan a. Kalkawngah Apple kan lei.

DMC kan thlen chuan kan training-na tur hmun kan zawng ṭan ta a. Helai vel amite hian MCSU Conference Hall awmna an hre miah lo nia!

WhatsApp-ah a ṭhenin Dawrpui School chungah an ti, a ṭhenin DMC bul lawkah an ti. Kan kal kawi kan kal kawi a. Ka chau takzet a ni. A tawpah WhatsApp-ah chuan 'Lianchhungi Book Store (LBS) Opposite-ah Step chhuk thla a awm a, in rawn chhuk ang a; in hmu mai ang' tih chu ka hmu ta a. Dawrpui School, Zion Street thlenhma kawt aṭang chuan kan chho leh tur chu ka chauh tawh em avangin Taxi rawn tlan pakhat chu ka vai ding a, a chhungah kan lut a. 'Lianchhungi Book Store kawtah i ding dawn nia' ka ti. Kan tlan, Traffic a Jam; Mandir bul kan thlen dawn chuan kan lo chhuk ang e ka ti a. Kan chhuk chuan thui fe kan tlanpel tawh a lo nia! Kan let leh a. LBS Opposite kan thlen chuan mi 2 hi an lo ding a. Kan insawi chuan Training ve tur tho an lo ni. An pahnih chuan min kuahthla a. Building kan thlen chuan pakhat chuan ka lo pua ang che a ti a. Chhawng thumna-a kan training-na tur hmun thleng chuan min paw ta a ni.

Training

Training-na tur hmuna kan thlen hian Programme-a ṭan hun 1 p.m vel a ni a. Mahse, hun min hmanpuitu tur Secretary chu kalkawnga Traffic-ah a tan avangin a hnuah kan ṭan.

Training ka han ti hluai a, Micro ATM semna hun a ni mah a. He training hi Apex Bank Manager Pu Lalnunsanga'n a kaihruai a. Introduction a neih zawh hnuah Mizoram hmun hrang hranga Common Service Centre enkawltute leh rawn kal thei lovin aiawh an tirh 24-te chuan Self Introduction kan nei a. Pu Udit Prakash Rai, Commissioner and Secretary, Cooperation Department leh Pu John LT Sanga, RCS-ten thu an sawi zawhah Micro ATM an sem. Ka aiawhin min hruaituin a dawng. Thla lakhona kan nei a. Hemi hnu hian Refreshment kan ei/in hnuah kan khawl dawn hman (operate) dan kan Training. Training min petu hi Pu Anthony Laldintluanga, IT Department, Apex Bank a ni. 2026 Calendar an sem. Rei vak lo zawhna leh chhanna hun kan hman hnuah kan hun hman chu kan bang. He hun hi Pu Lalsawmliana, Assistant Manager, Apex Bank leh Pu A Lallungmuana, CEO, Apex Bank-ten min hmanpui bawk.

Kan ban hian thimhmul a ni tawh a. Ka training pui zing ami chuan min paw thla a. Taxi phar din mai tur kan hmuh loh avangin Traffic hnenah ka sawi a. Min hruaitu chu a haw dan tur ka hrilh a. Tichuan, min hruaitu nen chuan kan awmna hmuna kal turin kan inṭhen ta a ni.

L-R: Pu Vanlalremkima Ralte (CSC), Kei, Dr H Ramchhanliana (Apex Bank)

Ni ngana

Training kan zawh tawh avangin ka Training puite chu mahni khaw lam panin an haw tawh hlawm a. Mahse, kei chu hawna mai tur Sumo a remchan loh avangin ka cham hrih a. Thawhlehni chu Inah ka awm.

Ni rukna

Nilaini chuan a tuka haw ka tum avangin ka College kalchhuahna Govt Zirtiri Residential Science College Campus thar leh ka lo thawh tawhna Govt Republic Higher Secondary School-ahte kal ka duh a.

09.30 a.m-ah chuan Taxi Driver-in min rawn lam a. Govt Republic Higher Secondary School lam panin kan chhuak a. (Ka thawhpui ṭhin Miss Malawmi hnenah a hma zanah a tuka kal ka tum thu ka hrilh lawk a)

Lecturer awm remchang thenkhatte nen

L-R: Miss Maria-i, Sir Chama, Kei, Miss Malawmi, Miss Papari, Sir VK-a

School kan va thlen chuan ka thawhpuite chuan hmel hlim takin min lo dawngsawng a. Ka thawh laia thawk thenkhatte chu Principal-ah kaisangin an lo awm tawh lo a. Zirtirtu thar an tam. School Uniform an lo thlak bawk. Lecturer Common Room chu zau halh a lo ni tawh a, Principal thar an lo nei tawh. Rei vak lo kan titi chuan thla la ang u ka ti a. Thla kan lak hnu chuan ngai tak chungin School chu kan tlansan.

Ka sawi hmaih loh tur chu Govt Republic Higher Secondary School chhakah hian tun hma khan Govt Zirtiri Residential Science College a awm ṭhin a. Tunah erawh chuan insawnin Durtlang Leitan aṭanga hla loteah an insawn tawh. Building chu midang: Sawrkar Department pakhatin an luah tawh a lo ni.

Durtlang Leitan aṭanga dinglama kawi, thui lutuk lo tlan chuan College Building chu a lo ding a. University Exam vuak vet anih avangin tuvakmah an lo awm lo a.

Govt Zirtiri Residential Science College

Office kawta Nu Zoi, Librarian kal lai chu ka au a. Ani nen chuan Office-ah kan lut a. Sangpuii a lo awm bawk a. Kan inchibai zawh chuan thla la ang u ka ti a, thla kan la a. Nu Zoi hnenah chuan khawilai nge tiin ka hriat duhho chu ka zawt a.

L-R: Sangpuii, Kei, Nu Zoi

Pawnah kan chhuak a. Building hrang hrang chu min hrilh a. Home Science Department Building lam kan pan a. Mahse, a inkalh. Nu Zoi chuan Chahbi kawltu a zawng a, a hmu lo. Chuvangin, a Gate-ah chuan thla ka la a. Rei vak lo kan awm hnuah Govt Zirtiri Residential College tia Google Map-a awm, Govt Zirtiri Residential Science College tia a hming ka thlak; kum 3 lai Campus hluia ka lo kal tawhna, Twinkle avanga ka ngainat zual; ka chanchin an sawi apianga tel ve tur College chu ngai tak chungin ka thlir liam ta a ni.

College kan tlansan hnu hian Taxi Driver chu Lower Zarkawta Tuma Glass Centre neitute fapa Tetea bulah ka in-drop tir a.

Pizza hi a hming ka hre fo tawh a. Mahse, ka la ei lo. Tetea hian thingpui leh Pizza min hlui a. Govt Mizo Higher Secondary School-a kan XII Sc zirpui ṭhenkhatte kan WhatsApp Video Call a. Tawk fang kan inkawm hnu chuan Taxi-in ka thlenin lam ka pansan ta a ni. 

Aizawl ka cham chhung hian kan te ber Nuteite nupain min duat hle a. A pasal u Siama chuan Hruizik te, Sachek tui te ka ngaina a ni tih hriain min leisak a. An nupa chungah ka lawm em em a ni. Tin, Taxi Driver u Sanga chungah lawmthu ka sawi bawk nise.

Haw ni

Nilaithawhtanni tuk a lo inherchhuak ta a. 5 a.m-ah chuan Sangpuii Sumo Driver/Owner ka Phone a. Load a ngah deuh avangin a dahthen hnu 6 a.m pelhah ka thlennaah min rawn lam a. Bethlehem atanga Bawngkawn panna kawngah tlanin Industry pengah kan tlan chho a. Bawngkawn-ah Motor ke siamin kan ding. An siam zawh hnuin kan tum ram pan chuan kei, Driver leh kan thenawmte nau; kan 3-in kan chuang a.

Driver chu Tuirial-ah a Bazar zawh hnuah kan tlan lehnghal a. Keifangah 09.35 a.m-ah Greenhills Hotel-ah chaw kan ei a. Kei chu Chair-a ka thut ngam loh avangin Motor-ah ei tur min rawn pe. Chawei man hi ₹200 a ni. Kan inhnawhpuar hnuah kan tlan leh chuan 10.44 a.m velah Puilo Bazar (kan Driver chuan Dulte Bazar a ti maiin ka hria) kan thleng. 12 p.m pelh hnu velah Champhai kan lut a. Tluang taka tlanin kan khua chu 03.30 p.m velah kan thleng.

Tlipna

Tun dinhmun min hruaithlengtu Pathian chungah lawmthu ka sawi mawlh mawlh a ni.