Tribal Certificate hi SVAMITVA SCHEME-a In neituten Document an thehluh ngai zingah a tel avangin a nei lo mi engemawzat an awm a. Chung a mamawhtute tana siam drive chu kar hnih chhung ka bial chhung khua 4-te: Hnahlan, Khuangphah, Vaikhawtlang leh N Diltlangahte ka nei.
SVAMITVA SCHEME chu Survey of Villages and Mapping with Improvised Technology in Village Areas tih lamtawi a ni a. Khawchhung in hmun neite In hmun neih dan Drone hmanga chhinchhiahna a ni.
Hnahlan (A vawi khatna):
18th July, 2025 (Zirtawpni) chu Chhim Veng Branch YMA, Hnahlan huamchhunga awm, Tribal Certificate mamawhte tan a siam hun ka hawng a. 19th July, 2025 (Inrinni) chu Hmar Veng Branch YMA, Hnahlan huamchhung amite tan.
21st July, 2025 (Thawhṭanni), 01 p.m velah ka pa nen Hnahlan aṭangin Khuangphah khaw panin kan tlanchhuak a. Ruah a sur leh zauh thin. Khuangphah khua thlen hma Quarry-ah kan Motor chu minute 5 vel a tang a. Mahse, engti tiin emaw a chhuak thei ta hlauh! Helai hmun hi a chhak lamah lei tawlh mai thei a intiang ur a, a thlanglam ko sang tak a ni!
Khuangphah:
Khuangphah khua chu rei lutuk loah kan thleng a. Khuangphah VCP Laltirhchhuaha (A nupui hi ka nu lama ka Cousin a ni) Inah ka mutbu leh thawmhnaw kan dah hmasa a. Chumi hnu chuan chawhma lam atanga minlo nghaktute awmna DC Rest House-ah kan lut a. Hetah hian ka pa’n thingpui a in zawh hnuah min hawsan.
Kei chuan darkar chanve vel ka hahchawlh paha ka insingsak hnuah ka kalchhan ber Tribal Certificate siam hna chu ka ṭan ta a. VC Treasurer Mawitei leh YMA Secretary Mapuia'n min pui a. 6 p.m thleng hun kan hmang a. Chumi zawhah Khuangphah VC-ten chawhlui min buatsaihsak ei turin VCP In lamah kan phei ta hrih a.
A hmain e nge ka ei duh zawng min zawt a. Kei chuan hautak taka thil tih a ngai ka tih loh avangin thlai hnah- Anṭam leh Maian vel awm thei se ka ti a. Anni chuan ‘Ar kan lo talh ang che. Engtia siam nge i duh?’ min ti a. Kei chuan chutia an tih dawn rau rau chuan a chhumin nise ka ti a. An lo chhum ngei a. YMA Secretary Mapuia te, VC Secretary Pu Rsa te, VC Treasurer Mawitei te leh VCP-te nupa nen chuan zanriah kan ei ta a. Chair-a ka ṭhut ngam loh avangin ṭhutthlengseiah ṭhuin ka bulah Dawhkan an hung a. Tah chuan ka chawei tur an rawn siam a.
Zanriah kan eikham, darkar chanve vel kan ṭhut hnu chuan 8 p.m velah DC Rest House lamah kan phei a. 11 p.m vel thleng hun kan va hmang leh. In lama kan haw chu VCP nupui chuan ka mutna turin khum a lo siam fel diam a. Tah chuan mu nghal lovin Tribal Certificate dilnate chu ka thliar fel a, portal-ah ka upload nghal a. Rei lote tal chin ka duh avangin 5 a.m velah ka chin sek tumin ka mu a.
22nd July, 2025 (Thawhlehni), 6 a.m pelhah chuan ka pum a nawm vak loh avangin inthiar turin ka tho a. Ka tho chu a ni der. Mi an lokal ṭak ṭak a. DC Rest House-ah 10 a.m vel atanga ṭan kan tum thu kan lo hrilh zel a. Tukṭhuan kan ei fel hnu, 09.45 a.m velah chuan DC Rest House lamah kan phei leh ta a.
Tichuan 3 p.m hma zawng chu kan chhunzawm leh a. Tlai lamah Vaikhawtlanga chhuk ka duh avangin 3 p.m thleng hun ka hawng a. 3 p.m pelhah VCP leh VC Secretary chuan VCP Motor-in Vaikhawtlangah min thlah. Kan chhuah hma leh chhuah lai vel hian ruah a sur deuh seng seng.
Vaikhawtlang:
Vaikhawtlang chu rei vak loah kan thleng thla a. Ka nu Ngaiite Inah ka innghat a. Zanriah ei zawhah kan titi pahin Khuangphah Tribal Certificate chhuakho chu ka Printer ken hmangin kan Print a. Ka mut fel hian 12 a.m a pel tawh.
23rd July, 2025 (Nilaini) Zingkarah chuan Vaikhawtlang VC Secretary ka Call a, Tribal Certificate siam tura ka thlen tawh thu ka hrilh a. Rei lutuk loah Tlangau chuan Community Hall-ah 7 a.m aṭanga Tribal Certificate a siam theih tur thu a rawn puang a. Min puiturin ka Cousin fanu Sangsangi ka sawm a. Ani hi 8 a.m velah min hruai turin ka thleninah a rawn kal a. Ani nen chuan Community Hall lam kan pan a, Kalkawnga kan kal lain Call a lo kal zut a, Kal pahin ka chhang zel a. Community Hall kan thlen chuan kan ṭhutna turte kan remfel a. Sangsangi chuan an inah min hawsan zawk a. A lolet leh chuan mi pawh an lo kalkhawm ṭan a, hna kan ṭan ta a. Sangsangi hian tukṭhuan a ei loh phah. Kei chu ka thleninten Tiffin-in Chaw min rawn pe a. Sangsangi’n a Rawtuai bai tui lutuk chu min suah ṭeuh a. 9 a.m velah tukṭhuan ka ei a.
12 noon-ah Break kan nei a. Ka thlenin panin kan inkuah chhuak a. Dawrah Wai Wai kan lei a, ka thleninah kan chawl zawk a. Wai Wai kan ei a.
1 p.m-a ṭan leh kan tum avangin Community Hall panin kan inkuah chhuak leh a. Kalkawng hi a lungṭhil deuh bawk a, kal thlen ka huphurh hle mai! Ṭhenawma Bike awm hman mai tur ka melh pah a. Vanneihthlak deuhin Community Hall thlenga min thlah theitu tur ka hmu ta hlauh a. Community Hall pan huan kan in-trible phei ta a!
Ti duh la awm mahse 4 p.m thleng chu hna kan thawk a. Nichina min dahtu khan min thlah phei leh a! A va lawmawm tak! A hming kha Thanghluna a ni.
Ina kan haw hnuah thil ṭulte kan singsa a. 6 p.m velah Sangsangi chuan min tinsan ta a. Zanah hnathawh ka tum viau na a, ka awm a nawm chiah loh avangin ka mu.
A tuk, 24th July, 2025 (Nilaithawhṭanni) chuan chawhma lamah kan khaw pana haw ka duh avangin Private Motor ka bia a. Tukṭhuanah nimina ka Vawksa lei kan chhum a, Tukṭhuan ei turin Sangsangi kan sawm a. Tukṭhuan eikhamah ka inbual a. 11 a.m velah kan khaw panin kan tlanchhuak. Ruah a si deuh.
Tluang takin kan tlan a, Khuangphah khuaa ka thlenina ka thil theihnghilh kan la zawk leh kawng laka zunram kan thiar tih loh chu kan din loh avangin kar lovah Hnahlan khua kan thleng.
N Diltlang:
Zanah chuan kar kaltaa Hnahlan khua Tribal Certificate apply-hote ka print a, ka awm loh laia an lam theih turin ka chhungte kutah ka dah a. A tuk 25th July, 2025 (Zirtawpni) chu N Diltlanga phei ka tum a, 8 a.m vela hna ṭan hman tumin. 6 a.m velah kan khua atangin kan chhuak a. Tluang takin kan thleng a. Ka pa’n thingpui a in zawhah min hawsan.
N. Diltlang VC-te chuan tukṭhuan min lo buatsaih sak a. Arsa, a kan leh a chhum; Maian sih thar nen. Mautuai chum te. Arsa chhum leh Maian bai tui chu a tui hle. Mautuai chum tlem ka ei bawk. Tukṭhuan ei law law kha a finthlak a ka hriat avangin 08.30 a.m velah YMA Office-ah hna chu ka tan a. He hunah hian YMA Secretary Nl Dinpuii leh min puitu tur Amy-te chu kar loah an rawn thleng a. Dinpuii hian nilengin min ṭawiawm a ni. Ṭhutnate kan remfel hnuah hna kan ṭan.
Internet Signal a ṭha lo. Current lah a awm lo deuh char char bawk 12 noon velah kan Break a. YMA Office bul lawka Inah kan chawl. Amy chu a fel reuh khawp mai. Ka sam hi a ṭuak nasat avangin samṭuak min pawhsak a.
1 p.m chuan hna kan ṭan leh a. Tlai lamah chuan ruah a sur ta deuh char char a. 4 p.m velah ka pa’n min rawn phone chuan rawn kal tawh turin ka hrilh a. A rawn thlen lai pawh chuan ruah a la sur char char. A rawn thlen aṭanga rei vak loah chuan kan haw ta a ni.
Hnahlan (A vawi hnihna):
26th.08.2025 (Inrinni) alo thleng a. A nawlpui tihtheih hun atan ka ti a ni. Mahse, ka beisei loh deuh maiin an ṭhahnem a. Min puitu tur ka lo sawm si lo. Ti hman ve ta lo pawh an awm nual. Ka inbual hmasak avangin 06.30 a.m – 04 p.m thleng hna ka thawk.
Hnahlan (A vawi thumna):
02nd Aug, 2025 (Inrinni) a lo thleng a. Tribal Certificate nei lo, mamawhtuten TRIBAL CERTIFICATE an siamna hun kan nei leh a. Hemi hni hian kan in piah lawka awm Nl Duati min pui turin ka sawm a. Tribal Certificate siam nan 6 a.m – 4 p.m hun kan hmang.
Lawmthu:
Khual ṭha ang maia min lo dawngsawng a, chawei tur mi buatsaih saktute chungah lawmthu ka sawi mawlh mawlh a ni. Tin, ka thiltihnaa min tawiawmtute leh min puitute chungah lawmthu ka sawi bawk a ni.
030820251035
){kind=link}
0 Comments