Thawnthu tawi: CHANTAWK KHUAREL

CHANTAWK KHUAREL

J LIANHMINGTHANGA SAILO
(Ngurthansangi Pa)

1

Mizoram Higher Secondary School Games, Aizawla neihah chuan Mizoram School Education Dept. aṭanga thuchhuak angin Mizoram chhunga Higher Secondary School zawng zawng tel vek tur a ni a. Keini Beezet Higher Secondary School, Bawngkawn pawh Private School nimah ila kan tel ve a ngai a.

Ka ṭhianpa nen chuan School hmunkhata kal, Class inang kan ni a. Kan inkawp deuh chawt a. Kan Zirtirtute pawhin 'Nangni nupa hi chu in inkawmngeih mang e' an ti ṭhin.

Ka ṭhianpa nen chuan Class- XII (Arts) kan ni a. Class-a kan ṭhut tlan an phal lova! Kan Class-ah chuan hmeichhe hmelṭha leh duhawm ka tih deuh Remi tia an koh ṭhin hi a awm a. Chu nu chu ka Star ta tlat mai!

Remi (Remsangpuii) chu Pu Lalrosanga (Sanga) leh pi Thankimi (Thani)te fanu, Unau pathum zinga a laia mi a ni. Amah chiah hi an unauah hmeichhia a awm. Zemabawkah an awm a, anmahni tawkah an khawsa thei ve viau.

Ka ṭhianpa Kima (Zothankima) chuan Bike a nei a. An chhungkuain Ṭhuampuia anmahni Inah an cheng. An unauah a tlum ber a ni a, a farnu pathumte chuan pasal an nei tawh a.

Kan School-ah Remi chuan kawm bik ṭhin pakhat a nei a, an hming a inang ṭep; a hming chu Sangpuii (Ramsangpuii) a ni. Kan Class a inang a. Bawngkawn Chimvengah an awm. Kei chu Chaltlang Dingdi Vengah kan awm.

Mahni Classmate Star ka nei chu a ṭha lamah ka chhawr a, ka zirnaah hma ka sawn hle. A chhan chu, Remi hriata a ber nih chu ka tum a.

Remi chu a ṭhiannu Sangpuiite inah a leng fo a. Ani hi Remi chanchin min sawipui theitu a ni a, a bulah Remi ka Star thu ka sawi a.

***

Vawikhat chu Break laiin Class-ah ka ṭhu a. Sangpuii pawh chhuak lovin thil a ziak a. Remi erawh chu pawnah a chhuak a, Kima pawh.

"Sangpui, i va ṭul ve? E nge i ziah a?"

"Ṭul hran lo e. Engemawni ka thai mai mai."

"I bulah kalo ṭhu dawn?"

"Lo ṭhu rawh!"

"I ṭhiannu kha tu nge a hming?"

"Tu kha nge?"

"I ṭhutpui. Samsei, a bianga khuavang awm kha."

"E, ka hria. Remi a nih kha."

"E nge a hming pum?

"Remsangpuii."

"A hmelṭha ka ti!"

"Midang pawhin min ti chawk!"

"A luck viau lo maw?"

"Luck khawp mai!"

"Chuti, ngaihzawng a nei nual ang a!?"

"Ka hre lo."

"Tak tak?"

"Ngaizawngtu chu an awm alawm! Ngaihzawng a neih leh neih loh ka hre lo!"

"Admission ka tih niin Remi chuan Admission a ti ve a. A hmelṭha ka ti khawp mai. Ka be ngam lo!" ka ti a.

"Mai mai ṭhin a! Hmeichhiate chu pasal kan beih hma chuan tuta bik mah kan ni hlei nem!"

"Hmeichhiate hian zûn in nei a!"

"Haha!"

"I nuihza mahse a dik tlat si a!"

"Remi chu kalo tihpui dawn che ami?"

"Sangpui, ka lawm e. Mahse, ka phu si lo!"

"Hmangaihnain phu loh a nei lo!"

"An ti chawk a. Ṭhenkhat chungah chuan a dik ang a, ṭhenkhat chungah a dik lo!"

"I hria a mi?"

"Hria e!"

"Engtin nge i hriat?"

"A taka tawngtu i nih loh chuan i hre lo ang!"

"Remi chu ka biak dawn che nia?"

"I thu thu."

"Inbiak tih vel hi sual a ni hlei nem!"

"A zahthlak alawm!"

"I ngaihdan a nih chu!"

"Minlo biak dawn nia!"

"Chanchin kan inhrilh leh dawn a nia!" a ti a.

Sangpuii hnena ka thil sawi avang chuan ka thaw a veng huai a.

***

Sangpuii hnena ka thil sawi avang chuan Remi lakah ka inkiltawihna leh inthlahrunna chu a zual sawt a.

A hmaa be ve zeuh zeuh ṭhin pawh khan ka phu lo ni a ka hriat avangin ka insit chuan ka be hmasa ngam lo.

Vawikhat chu Sangpuii nen inkawmna hun remchang ka nei hlauh a.

"Sangpui, Remi chu i hrilh em?"

"Hrilh e."

"Engtin nge a tih?"

"Engtin mah. Ih, ngaihzawng a nei a!"

Chu thu ka hriat chuan mak ka ti hran lo. Mahse, min khawih ve deuh.

"Sangpui, ka lawm e."

"Engvangah maw?"

"Remi minlo biak a."

"Bialnu ṭha deuh i nei dawn a nia!"

Tunah chuan Class kal nuam ka tihchhan, Class-a awm nuam ka tihchhan chuan Bialpa a nei. Min biak ka beisei ṭhin. Mahse, a tan chuan awm ve lo ang ka ni!

Kan mit a intawn chang pawhin min hre lo ang maiin hmun dang a melh daih ṭhin. Ka chanah chuan lungawi ka tum a. Kima nen kan inkawm ṭhin tih lovah chuan School-ah kawm ṭhin ka nei lo. School Hour chhung chu zunram thiara ka chhuak tih loh chu Class Room-ah ka awm chawt a. Ka khua a har thei em em a ni.

2

Kan School chuan Brigade Field-ah Annual Sports kan nei a. House hrang hrangah kan inṭhen a. Kima nen chuan House khatah Sangpuii leh Remite nen kan awm a. Ka nuam tihna leh nuam tih lohna chu a inzatin ka hria!

Remi chu hlim deuhvin nui mahse ka va en a min hmuh chuan a nui lai chu a tawp chawt ṭhin. Huat ena min en nia ka hriat avangin amah chu theihnghilh tumin nasa takin ka bei a. Class-a awm ve lo anga ngaiin, ngaihtuah loh hram ka tum ṭhin.

A tirah chuan harsa ka ti khawp mai. School hmun khat, Class inanga kal kan nih avangin inhmuh te, lohtheih loha inbiak te a ngaih chang a awm ṭhin. Sangpuii chuan ka chan chu a ngaihtuah thiam avangin min kawm hlim a tum ṭhin a. Mahse, ka hlim tak tak thei lo.

Remi'n min duh theih nan nasa takin ka zirlaiah chuan ṭan ka la a. Nuam ka tih loh avangin Annual Sports chu a ṭan niah ka tel a, ni dang chu kan zirtirtute hnenah chawlh ka dil a.

School ka chawlh lai chuan theih ang angin kan zirlai chu ka zir lawk a, kan zir tawh hnute chu ka ennawn a. First Term-ah chuan Pakhatna ka ni. English Subject-ah Mark ka hmuh san ber avangin Suject Teacher hnen aṭangin JF Dictionary ka dawng. Kima leh Sangpuii chu an nihna ka hrechiang tawh lo, Remi chu 13-na a ni.

Kan Zirtirtute chuan Board Exam dawnah Study Camp min neihpui a. Mahse, in lama ka zir ṭhat zawk ka rin avangin Study Camp-ah ka tel ve lo. Ka tel loh nachhan pakhat hi Remi ka hmuh hreh vang a ni. Kan Class-a mi chu an Camp vek a.

Board Exam alo hun a, Govt. Chaltlang HSS-ah kan in-exam a. Chu mi kan Exam ṭum chuan Remi nen tlar khatah kan ṭhu a.

Remi chuan kan inhmuh pawhin min be hmasa ngai lo.

Vawikhat chu Public Administration Subject kan Exam dawn a. Chumi ṭum chuan min be tehmial a.

"Muante, kan Exam tawhho i chhang ṭha em?

"Ṭha ve tho chuan ka hria. Nang?"

"Ṭha thawkhat. Kan Exam turah huphurh i nei em?"

"Economics! Nang?"

"Geography."

"Ka ring chiah lo. Nang chu i thiam ngawt ang?"

"Ṭha deuhvin i chhang dawn a nia."

"Awle, nang pawh le."

Ka chhan zawh chuan ala chhang mek a. Ka intihuaisen a, 'Kalo nghak ang che." ka ti a.

Haw tlang lovin Remi chu kalo nghak a. A rawn chhuah chuan zahtheih loh chhuahin kalo be vat a.

"Remi, i chhang ṭha em?"

"Ṭha thawkhatin ka hria. Nang?"

"Kei pawh. Nang chu i tiṭha ngawt ang!"

"A awihawm lo e!"

Haw kawngah chuan kan titi a.

"Remi?"

"Eih, e nge ni?"

"Engati nge min huat viau a?"

"Ka haw hran lo che."

"Min hua a nih kha. Min hmuh a biak remchanga ka awm pawhin min be duh lo! I bula ka awm lai pawhin min hmu lo der ṭhin!"

"A ni lo asin!"

"A ni. I nuih laia ka en che i hmuh chuan i nui lai a tawp a, i tum hmak ṭhin!"

"I inngaihbel a nih chu!"

"Nih pawh a ni ang. Hmelṭha hi chu in bula awm hi a nuam hrim hrim a, min haw mahla!"

"Muante, bialpa ka nei tih i hria tiraw?

"Hria e. Chuvang chuan rilru khawharin ka awm fo ṭhin!"

"Ka bialpa tana inpumpek ka duh a. A tan ka thinlung ka hlan a ni. Mahse ..."

"Mahse, eng?"

"Midang nen minlo kawp a!"

"Chuan?"

"Chu thil ka hriat ve leh kan inzawmna ka chhuchat nghal a. Theihnghilh ka tum bawk."

"Chuan, engtin zel?"

"Hringnun a ṭhen tan hlimawm tak a ni, a ṭhen tan lungngaihna hlir!"

"I hlim ṭhin em kha!"

"Ni e tiraw?"

"Kha tih hun lai khan kei chu ka hlim lo asin!'

"Engati nge?"

"Midang ta i ni si a!"

"Min ngaidam rawh."

"Sangpuii'n 'min lo biak rawh' ka tih che kha a hrilh che em?"

"Hrilh e."

"Chuvang anih chu. Ka hlauh leh rinlawk ang ngeiin ka lak ata i hla sawt reng a!"

"Ka haw lo che ka tih tawh kha!"

"Alo nih chu mawle!"

"Muante, ka lakah hian i lungawi lo tiraw?"

"Lungawi e!"

Kan inṭhenna tur kan thleng ta a. "Remchangah kan inhmu dawn nia, Bye." a ti a. A kal liam tur chu ka thlir zui vawng vawng a.

School Uniform a inhmeh zia chu!

3

Board Exam kan zo a. School chawlh lai a ni bawk a, Kima nen chuan mi insaknaah kan inhlawh ṭhin a.

Ni khat chu kan inhlawh ṭhinaa kal lovin ka ni a dam ṭhat loh avangin an Pheikhawk Dawr, Bazar bul ami ka nghahsak a, min dawrtu an awm ve nial. Tleirawl pakhat a lokal a. Ka en chian chuan Remi alo nia! A zak deuh tih ka hre thei.

Zahtheih loh chhuahin Remi kut dinglam chu ka la a, amah pawh rawn lo chuan hun rangkachak-a ngaiin ka fawh sak a. A haw hran lo tih ka hria.

"Pheikhawk ka duh zawng in nei ang em aw?" a ti a.

"Zawng rawh, kalo enpui ang che aw?" ka ti a. A duhzawng ang chu a sawi a. Mahse, a man a neih daih lo! Chhuah leh mai a'n tum thut thut a. Mahse, a banah ka vuan a. "Remi, rei lote tal awm ve la?" ka ti a. Ani chuan, "In lamah tihtur pawimawhin min hmuak reng a!"a ti a.

"I pheikhawk duhzawng man chu i nei daih lo maw?"

"Umm."

"I neih zat zat min pe rawh. Keiman a bak chu kalo hnawhkhat mai ang." ka ti a.

"Tak tak maw? Ka va lawm!" a ti a, ka biangah chuan min rawn fawp a. Nuam ka va han ti chiang tak!

Pheikhawk a lei fel a, a haw hnu chuan a kut ka vawn lai; ka fawh sak lai chu ka dream veng veng a.

***

Bawngkawn Bazara ka kal ṭumin Sangpuii ka hmu a. Remi nen kan inhmuh thu ka hrilh a. Remi nen chuan anmahni (Sangpuii)te ina inhmuh ka duh thu ka hrilh a. Sangpuii chuan alo remti a, 'Remi chu kalo hrilh ang e' a ti a. Chanchin min rawn hriattir theih nan ka phone no ka pe a.

Zirtawpni tlai ṭum khat chu Sangpuiin min rawn bia a.

"Muante, Remi hnenah chuan 'lo hrilh rawh?' i tih kha ka sawi tawh a."

"Engtin nge a chhan che?"

"Awle a ti!"

"Tak tak?" Ka phur hle a. Naktuk ni vat vat se ka ti a ni.

"Dawt ka hrilh tawh che ami?"

"Ka lawm e aw, Sangpui?"

***

Inrinni alo inher chhuah chuan Sangpuiite inah ka kal a. A chhungte an awm lo a. Rei vak lo ka nghah hnuin Remi chu alo thleng ve ta a. Thawmhnaw suk tur a neih avangin, "Lo inkawm ula, ka'n insu lawk ang e. Min rel lo ula?" Sangpuii chuan a ti a.

Pawnfen a feng a, kawr sendang a ha a. Slipper a bun. A sam chu thlahin a dar a vaw siau a. A ban veilamah Sana a bun a, chu chuan a tinu sawtin ka hria!

"Muante, min nghahna a rei tawh em?"

"Rei tawh lutuk! Kum sangkhat a ni tawhin ka hria!"

Sangpuiite Sitting Room-ah kan ṭhu a.

"Remi, eng vanga hmanni khan kal leh mai nge i nih? I chhuanlam siam kha ka hre tho. Mahse, thil dang a awm a ni!"

"Ka zah che a!"

"A nih, tunah hian?"

"Ka zah tho che!'

"Thlahlel lo che ila, ka chelh lo ang che!"

"Ka hria alawm!"

"Remi, rem thei tawhla ka ti!"

"Mipa hi rin harsa ka ti tawh a ni!"

"Mipa zawng zawng kan inang vek hlei nem!"

"In inang lo tih chu ka hria!"

"Tu nen?"

"I ṭhianpa Kima nen!" a ti a, a nui a.

"Ka fiamthu lo a nia!"

"Umm."

"Remi, min ngei suh aw? Ka hmangaih che a ni!"

"Tak tak?"

A bulah chuan ka va ṭhu a. A insawn lem lo a. A kut ka la a, engtinmah minti lo. A kut chu ka fawp a, engtinmah ala ti chuang lo! Ka khawih ang angin a awm a.

"Min en teh?"

Min rawn en a. A mit meng chu a de sar a. A heh chu fawh chakawm tak a ni.

"Ka hriattirh aṭang che khan ka hmangaih che a, ka duh che a ni!" tih pahin ka kuah a, ka kuahna ata a tal lem lo a. Ka kuai dak a. Ka fawh hma chuan, "Muante, kei pawhin ka hmangaih che!" a ti a. Rawp leh duhthawh takin ka fawp a, ani pawhin min chhanglet a. Thawchham lek lekin kan inkeih a, ka thinlung hi a hlim a ni!

4

Remi nena kan inngaihzawnna pawh thla khat a ni ve ta. Kan inngaiin kan induhtawn em em a ni.

Board Exam Result a chhuah chuan ka ṭhianpa Kima, Remi leh Sangpuii chuan Division ṭha takah kan passed vek a. Kan vai chuan Govt. Aizawl College-ah Admission kan ti a.

Kan College-ah chuan Adventure Club a awm a. Chutah chuan ka tel ve. Reiek tlang te, Lamsiala Puk te kan tlawh.

***

Ṭum khat chu Kima, Sangpuii, Remi leh Kei chu Coconut Grove-ah kan picnic a. Tuia ben chi Volleyball kan beng a. He hun hi Kima tan chuan theihnghilh a har ngawt ang. A chhan chu, Sangpuii nen an inngaihzawn ṭanna ni a ni.

***

Class break laiin College Building bula Flyover-ah chuan Tiffin kan ei ṭhin.

Kima leh Sangpuii chu an inhmangaih niin ka hria, hauh pawh an inhauh ka hre ngai lo. Remi bula ka awm tawh chuan midang ka ngai lova, ka hlim em em ṭhin! Mi hmuha intitatu taka kaihte hi nuam ka ti a.

***

Second Semester kan nih chuan Student Election a awm a. Magazine Editor post ka chuh a, Kima chu ka Assisstant-ah ka hmang a. Remi pawhin Debating Secretary Post a chuh a, Sangpuii chu a Assistant atan a hmang ve bawk! Inthlanna a zawh chuan kan post chuhnateah chuan kan tling hlawm a.

College kal chu nuam ka ti khawp mai. Ka bialnu nen Class inangah kan awm a, SU-ah kan la awm dun bawk! Nitin mai hi ka tan chuan hlimna ni a ni.

Ṭum khat chu Student Union chuan Musical Fest kan huaihawt a. College dangte pawh kan sawm a. Solo te, Beat Group te an awm. Pawnlama mimal zaithiam leh Beat Group-te pawh kan sawm a. Programme chu LPS Vision leh Zonet-in Live-in min Cover sak. Announcer chu Remi leh Sangpuii an ni a. Music lam hi ka tuina a nih lih avangin a ṭul ṭul buaipuitu zingah chuan ka tel a.

***

Ṭum khat chu NSS-in Civil Hospital-a a mamawhten a thlawna an hman atan thisen kan pe.

5

Zan khat chu Kima nen kan in-text a.

"E nge i tih? Tihtur ṭul i neih loh chuan lengchhuak ila?" a rawn ti a.

"Khawiah?"

"Khawiah nge ni vak ang? Sangpuiite inah a ni mai alawm!"

"Sangpuii tih ṭuah hum reng mai. Remite inah leng ang ti ve la?"

"Ka la ti dawn alawm! Lo insiam la, ka rawn sawm ang che." a ti a.

"Awle." ka tih hnu chuan leng turin ka insiam a.

Bawngkawn Chhim Venga Kima ka lenpui tur thu Remi chu ka hrilh a. 'Naktuk zanah kanlo leng dawn a nia' ka ti a.

***

Bawngkawn kan thlenin Current a rawn thim a. Mahse, rei loteah a rawn eng leh thuai a. Sangpuiite in kan thlen chuan Kima chuan kawngka a han kik a. Inchhung lam aṭang chuan nutling aw hian, "Lo lut rawh u." a ti a. Kawngka chu a hawng a, kan lut ta a.

Pa pakhat, Sangpuii pa ni ngei tur chuan Television alo en a. "Kima, lo leng rawh u. Mami, hei Kimate anlo leng a nia." a ti a. Rei vak lovah Sangpuii chu Room aṭangin alo chhuak a.

"Zanriah in eitawh em, ka pa Hlun?" tiin Sangpuii pa chu Kima chuan a bia a.

"Ei tawh e. Zanin chu Committee-naa kal ka tum a. Hruaitu ka ni ve si a, tlai ka hlau deuh a!" a ti a. Pa Hluna hi an veng Joint Action Committee (JAC)-a an President nilai a ni.

Nakin deuhvah chuan, "Tikhan lo leng ula, Committee-naa ka kal a ngai tlat mai." tiin Sangpuii pa chuan min chhuahsan a. Sangpuii nu, pi Hlimi chuan, "Kei pawh, kawmchhakte inah an fapa State danga awm Sipai lo haw ka han hmuak ang e. Mami kha lo awmpui rawh u." a ti a, a chhuak ve a. An chhungkua hi pathum chauh an ni. Sangpuii nu leh pate hi fanauah an tluang lo a, Sangpuii chiah hi fa pali an neih zinga a damchhuak awm chhun a ni. Chuvangin, a duat pawh an duat a.

A nu leh pa chhuah chhung chu kan leng reng a. Fiamthute kan sawi a. Kan nui leh tlawrh tlawrh ṭhin.

Thingpuite kan in zawha a nu leh pa an rawn haw chuan keini pawh kan ṭin a. Haw kawngah chuan, "Naktuk zan chu Remite ina kan len a ngai ang. Ka book lawk vek tawh." ka ti a.

***

Tlaiah ruahhmite a tlak avangin khua chu a vawt deuh sur a.

Kan sawi lawk angin Remite inah kan leng a. Vanneihthlak takin a chhungte an awm lo hlauh!

Kima chuan Computer-ah Movie a en a. Television On chungin Remi nen Ṭhutthlengseiah kan ṭhu dun a. Remi chuan ka kut a khal niap niap a.

"Tuna kan awmdan hi mumang a ang e!" ka ti a.

"Ni e tiraw? Min duh lo la chu hetiang hian kan awm tawp awm si lo!" ka ti a.

"Nang pawhin min duh lo la chu?" a ti a.

"Khaw nge midangte hi?"

"An leng a."

"I lehkha zir tur kan rawn tibuai ang che a?"

"Ti buai lo e. In haw hunah ka zir mai ang."

"Ka ngai thei lutuk che a!"

"Kei pawhin ka ngai chein ka hria!"

Ka kuai dak a, duhthawh leh uar zetin ka fawp a.

"Engvang mahin min kalsan suh aw, Muante?"

"Awle, nang pawh aw?"

"Ka kalsan ngai lo ang che, Remi!"

6

Tunah chuan 4th Semester ka zir tawh a. Kan College-ah in-admit a hun hian zirlai hmel thar anlo lut zel a. Mahse, Remi anga hmelṭha tih ka hmu lo.

Vawikhat chu khawhar inah ka kal a. YMA Member kan kal ṭha hle. In chhungah kan ṭhu leng lo hial a.

Hmeichhe pakhat chu hmelṭha ka ti khawp mai. Mahse, Remi chuan ka thinlung a nei tawh a, midang ka ngaihsak zui lo.

Chu nu chuan puan a bih a. (College velah chuan hmeichhiain kekawr tlawn an hak an chin hi!) Ka va en lai chuan kan mit a intawng leh ṭhin a. Mahse, hmundang ka hawisawn daih zel a.

Nakinah chuan a ṭhutpui hmeichhia nen an inbia a, a ṭhutpuinu chuan min rawn en a. Ka sawi tawh angin thinlung a uire mai lohnan tawk fang chu ka maimitchhing ringawt a!

***

Thingtlang lamah an chhungte tlawhin Remi chu a zin a. Kar khat vel a thang hnuah a rawn haw leh a. Alo haw leh chu khawsik natnain a man ta tlat mai! A tirah an ngaizam deuh a. Mahse, College a ṭhulh zin takah chuan Bethesda Hospital-ah an admit a.

An admit a ni tih ka hriat rualin Bethesda Hospital-ah ka kal a. Remi Cabin-ah alo awm a. A nu leh hmeichhe dang pahnih anlo awm a.

A nuin min hmuh ve leh, "Muante, e lokal rawh. Remi hian a sawi reng che asin!" a ti a. Kei chuan Sangpuii hnen aṭanga hria ka nih thu leh ka hriat ve leh lokal nghal ka nih thu ka sawi a.

"Remi banah chuan Venflon a invuah a. A nu chuan, "An chiu mu a nih hi." a ti a. Remi alo muhil a. A hmai chu a dang bem a, ka lainat khawp mai.

A nu chuan, "Pathian zarah kan ṭha leh mai turah ngai ang." a ti a. "Dam vat se ka ti ngawt mai!" ka ti a.

Alo awmpuite chu Nu Thani (Remi nu) chuan min hmelhriat tir a. "Sangpuii pawh lokal a tum kha!" an zinga pakhat chuan a ti a.

***

Zanriah ei hun hmain Sangpuii a lokal a. Cabin anih avangin riahpui turin a rawn insiam a. Midang awmte chu Zanriah ei turin kan haw a.

Ka kal leh hnain Kima ka phone a. Remi kan ka tum thu leh kal ve a duh leh duh loh ka zawt a. Ani chuan kal a duh va avangin min rawn sawm turin ka ti a, alo thlen chuan Hospital chu kan pan a. Sangpuii chuan a ṭhiannu chu a riahpui a, kei pawh chu ka awm tlaivar a.

Zanlai velah Remi chu a rawn harh a. "Ka tui a hal lutuk!"

Kei chuan tui in tur ka pe vat a. A in zawh chuan, "Muante, i lokal a ni maw?" a ti a. Room chhung chu a en kual a, a maimitchhing leh vang vang a.

"Remi, a hreawm em? Vawt i ti em?" ka ti a.

"Hreawm ti lo e. Min ngaihtuah avangin ka lawm e."

Thawh a tum a, ka phal lo a. "Mu hahdam rawh." ka ti a.

Sangpuii chuan, "Remi, i rilru tihah reng reng suh. I damchhuak leh mai ang." alo ti a.

"Sangpui, Remi hi ka lo veng ang e. Lo muhil rawh." ka ti a, Remi khum bulah chuan ka ṭhu a.

***

Remi chuan ṭhat lam leh chhiat lam a pan tak tak thei lo. Kan Principal chawlh ka dil a, min phalsak avangin leh ka chhungten an remtih avangin Damdawiinah Remi nen chuan kan inawm chawt a. Class khata awm kan nih avangin lehkha zir pahin zirlaibu ka chhiar sak ṭhin a.

Ei leh in tur chu Remi chhungten min rawn pe ṭhin a. Ka lakah an ṭha khawp mai. Miin an rawn kan ṭhin a. 'Tu nge a ni hi?' an tih chuan 'Kan makpa tur, Remi pasal tur anih kha' an ti mai ṭhin. Chutiang ṭawngkam a chhungten an hman duh avang chuan ka lawm hle a.

7

Damdawiina Remi ka awmpui lai chuan Chawhnu Naupang Inkhawm, Bawngkawn Chhimvengten theitui an rawn sem a.

Ṭhat lam pan lo, chhiat lam pan lova Remi a awm lai chuan thil pakhat a rawn thleng ta! A nu leh a Cousin pahnihte rawn awm lai a ni. Ka inthiar zawk hlan a ni a.

Thawm ri deuh hut ka hria a. Aw hian, "Remi, engtin nge i awm?" hmeichhe mangang aw hian a ti a. A nu a ni chiang mai! Hmeichhe dang aw hian, "Nurse, Nurse. Lokal teh u?" a ti a. Ka inthiar zawh chuan hmanhmawh takin Remi awmna Cabin chu ka pan a.

Cabin ka thlen chuan mi anlo awm laih laih a. Nurse pakhat hian, "Damlo awmpuitu ni lo kha chu lova chhuak teh u." a ti a, an chhuak hlawm a. Cabin aṭang chuan Remi chu an nawrchhuak a, ICU-ah an nawr lut a. Remi chu engmah hre lo tih hriat takin a mu a. A marphu enna Monitor-ah chuan thil a kal zut zut a.

Ka rilruin ka ṭawngṭai a. "Lalpa, ka hmangaihi hi tidam leh rawh. A nat ai pawh min nat tir mai rawh." ka ti a. Sangpuii pawh a rawn thleng a. Ka bulah a rawn kal a. "Muante, Remi hi thi lo hram se ka ti e!" a ti a, a mittui a hru zauh a. Kei chuan, "Nia, dam leh thuai se ka ti ngei mai!" ka ti a. A thisen zawmpuite ai pawha dam leh se titu chu keimah ka ni ang! Dik tak chuan ka mangang ve khawp mai.

Remi chu ICU-ah nikhat leh zankhat a awm a. A rawn ṭhat deuhah chuan Cabin-ah bawk kan lut leh a. Tunah chuan ka zirlai pawh chu dahṭhain amah chu ka ngaihtuah tawp a. Lehkhabu ka chhiar sak ṭhin a. Sidney Sheldon Lehkhabute hi ngaihnawm atih avangin ka chhiarsak ṭhin. Ngun takin a ngaithla a ni tih hriat takin min rawn zawt leh zauh ṭhin a.

Tlema a changkan deuh chuan kan Classmate-te chuan an rawn kan a. Ka awmpui a ni tih an hriat chuan ''E nge i tih ve?' min ti hlawm a. Thil awmzia ka sawi chuan 'Dam leh vat se, innei rawh u' min ti hlawm.

8

Remi chu a ṭha chho ve hret hret a. Nakinah phei chuan a rawn ṭhuchhuak peih ta hial a. Amah ka enkawl nasat avang chuan a nu leh pa pawhin an fanu chu a damchhuah ve leh palai pawh tir loa innei turin min ti a. Kei chuan dankhatna ngeia Remi chu ka tum a.

***

Damdawiina kar thum a awm hnu chuan Damdawiin aṭangin Remi chu a chhuak ta a.

5th Semester chu kan in-exam theih loh avangin Final Semester-ah kan exam tel a. Pathian zarah har kan tih lem loh avangin kan tiṭha phian a, First Division-ah kan passed ve ve a.

Graduation result chhuah hma deuhvin Kima chuan Sangpuii a ru a. An insawirem a, an inkutsuihnaah chuan ṭhian atan min hmang ve ve a.

Remi chuan University-a Admission a tih hma lawkin Malaria PF natna a nei leh a. Nazareth Hospital-ah an Admit a.

An admit hlim chuan a nuin min rawn phone a, ka kal nghal a. Sangpuii chu ka phone a, ani pawh a lokal nghal.

A natna chu a rang chi anih avangin an dahluh fel hnu deuhvah Remi chu a kal ta!

Tawrhthiam har ka va ti tehlul em! A ṭawng pawh ka ṭawng peih lo a, chaw ka ei thei hek lo. Ka melh ngai hi ka melh reng mai a. Nakin lawka ka nupui tur chuan min thihsan ta si! Khawvelah hian dam reng chakna ka nei lo. Miin biak min tum mahse ka min be ṭawng zo lo! Ka ṭap thei bawk si lo! Kâ a ni deuh ber mai! Tun hnua ka hriat leh danin, khatia Remi a boral hnu khan buaipui ngaiin ka awm a ni.

A thihni chuan kan College chu an chawl a, zirlaite leh zirtirtute chu a vuinaah an rawn tel vek a. Mipui pawh an ṭhahnem khawp mai. Kima chuan a ruang min kilpui a. Awm ngaihna ka hre lo chuan Remi kut, engmah hre tawh lo; thihna kut vawtin a man tawh chu ka chul ka chul a. Sangpuii pawh a ṭap nasa, inhnem tur kan awm chuang lo.

***

Ka khawhar chang leh ka lunglen zual changin Remi thlanah ka kal fo a. A changin a thlana riah chang ka nei ṭhin. A nu leh pate chuan an fanu vanga ka awmdan mi kam aṭanga an hriat chuan an ina leng turin min sawm a.

9

An ina leng tura min sawm ni chuan an Pastor an losawm ve a. Ani chuan min councelling a, min ṭawngṭai bawk a. Chumi avang chu a ni ang, Remi ka ngaihna pawh chuan reh lam a pan tial tial a.

Tunah chuan M.A ka zir zo tawh. Kan venga mi Lalfakzuali nen dan khatnain kan innei a, in hrang ka chang tawh a. Mahnia ka awm mai mai changin Remi chu ka rilruah alo awm thut ṭhin. Kan hun kal tawhte ka ngaihtuah chhuak ṭhin a.

Kan inngaihzawn lai khan...

Vawikhat chu ka ṭhiante dawrah kan kal a.

"Muante, innei tawh ila?"

"I chhungten an remti dawn ami?"

"An remtih loh pawhin inru ang?"

"Ka chak khawp mai. Mahse, M.A hi zo phawt ila ka ti deuh."

"I chhuanlam mai mai a ni lo maw?"

"Ni lo e."

"Min hmangaih tak tak em?"

"Hmangaih tak tak e! Ka hmangaih che."

Kan in-Selfie a. "Nakinah kan la en duh ang." ka ti a.

"Ni chiah mai tiraw?"

"Remi, ka hmangaih reng ang che."

"Muante, kei pawhin."

"Kan inneih hunah fa engzat nge ka hrin sak che i duh?" a ti a.

"A theih chuan pali, mipa pahnih leh hmeichhia pahnih."

"Kan fa upa ber chu hmeichhia nise."

"Ni e, a hmingah Ngurthansangi kan sa ang a."

"A mawi ngawt ang."

"Muante, mi han fawp teh?"

Ka fawp a. A maimitchhing a, a thlamuangin a hlim hmel khawp mai. Minlo chhang let ve a.

"Thlamuang taka i bula awm a, i nupui nih ka chak tawh e!"

"I ni em em ang. Kei pawh i pasal nih ka chak tawh lutuk!"

Mahse, ka hmangaihi chu tunah chuan piallei thuahriat hnuaiah a zal tawh si! Ka nupui tura kalo suangtuah ṭhin chu thihna chuan min laksak tawh si!

Nupui nei tawh mah ila, Remi chu ka theihnghilh thei lo. Nghilh har Remi, nghilhni reng ka nei thei lo che a ni! 

***mm***