FELFELI

    1

     18th April, 2018 a ni. A zan chu Pastor bial Inkhawmpuia kal turten hla zir tur anih avangin kei pawh kal ve ka tum avangin hla zir turin hla zirna hmun ka pan a.

Kan tan dawn hnaih chuan midangte pawh an lo thleng tak tak a. Nakinah chuan tleirawl pakhat hi a rawn lut a, ka thutna piah deuh lawkah chuan a thu a.

***

Zirna leh hnathawhna avangin ka dam loh hma chu kan khuaah 2001 atangin ka awm lo a. Ka dam loh vanga kan khuaa ka awm pawh ka teichhuah ngai vak loh avangin tumah vak ka hre lo.

***

Chu tleirawl chu ka vawikhat hmuhna a ni. A hming leh khawiah nge a awm tih chu ka rilrua zawhna lian ber a ni. A khat tawkin ka en leh thin a. Ani erawh chu min hmu awm pawhin a awm lo. A khabe invuah dan te, a changa a nui saih te chu hmuhnawm ti takin ka en leh thin a.

Zai kan zir tan a. Tha takin zai chu a zir a. A khat tawkin a thiante nen an inbia a. Engemaw chen hnuah kan tin a hun ta der mai. 

Ka rilrua thil awmte chu a chhanna ka hre chak hle. Mahse, tumah zawh ka ngam si lo! Khami zan atang khan ka rilruah a awm ta a, tun thlengin ka theihnghilh ta lo a ni.

***

    A tuk leh zan chu hla zir ka phur hle. Hla zir tur chuan a zirna hmun ka thleng hmasa ber a!

Hla zir a hun chuan ka thinlung lalnu pawh a thiante nen an rawn thleng ve ta. Hemi zanah hian thlenpui  turte kan tihfel dawn avangin a hming chu hriat ka tum ran a.

Midang nena han inbia a, mi chanchin sawi hi ka tihngai lem loh avangin leh ka thinlung lalnu chu  chanchin mi zawh zah avangin ka rilru chuan zawhna a ngah viau a ni.

Kan hlazir chhung chuan a khat tawkin ka en thin a. Ani chuan ka en tih pawh a hre kher lo maithei.

Nakinah thleng tlang turte chu an han ruahman a. A hming chu ka hre ta! Hming mawi tak, tun thlenga ka rilru leh thlarau thlenga chawkbuai pha a ni! Mahse, tufa nge, khawia awm nge anih ka la hre lo! An thlenna tur chu ka First Love-te In a ni a!

---

Kan kal tur hun alo thleng a. Lirtheiah kan han chuang a. Ka Felfeli chu a thlenpui tur a thiannu nen an Motor hmangin an kal a. Chuvangin, ka hlim kim lo.

Kalkawngah kan chawl det a. An Motor pawh a rawn chawl ve. Mahse, hmuh ka tum viau na a, ka hmu lo.

Inkhawmpuina tur hmun kan thleng a. Ka thleninah tukverha ka dah mai mai lai chuan kawmthlang kawngpuiah a thlenpui a thiannu nen an rawn kalphei a.

A vawikhat nan ka Felfeli chu ka be ta a:

Felfel, khaw nge in thlen a?

= An thlenna hmun a sawi a.

Khawiah nge in kal dawn?

= An kalna tur a sawi a.

Helai hi ka thlenna a nia. Lo leng ve ula?

= An hman hunah an rawn len tur thu a sawi a. An naupang hruai nen an pathum chuan ka thlir liam a.

Pathianni Chawhma Inkhawmah kan Kohhran Zaipawl chu kan zai dawn a. Zingkarah hla kan ennawn a.

Inkhawm dar alo rik chuan Inkhawm turin Biakin kan pan sang sang a. Ka vanneih asiamin ka Felfeli chu ka hma tlara ka hmaah chiah a thu a! Ka marphu ava rang chiang!

Ka kal dawnah Phone ka neih loh lai anih avangin Felfeli thlalak ka neih theih hlauh takin tiin ka nu Phone ka keng a. Chutia ka hmaa a thu chu a hranpaa thlalakpuiah ka sawm ngam loh avangin a thla laksak tumin ka rilru ka siam a.

Tanna hun hmangtu tawngtai laiin a thla chu ka laksak ta a. Chumi chu tun thlengin ka dah tha a ni.

Hemi hun bak hi chu kan haw nia Motor-ah kan chuang tlang leh tih loh chu ka hmu ngai ta lo!

--

Bial Inkhawmpui a tiak a, mahni saseh muala kan haw alo hun ta. Thawhtanni zingkar a ni a. Ka Motor chuanna tur awmna thleng thlenna nuin min thlah a.

Ka Motor chuanna hi Pickup a ni. Felfeli chu rawn chuang vein a hnungah a thu a. Ka thutna atanga hawiletin a hmuhchian theih hle.

A khat tawkin ka hawilet thin a. Ani pawhin ka en chu min hmu ve thinin ka hria! Kan mit a intawng thinin ka hria! Nuam ka ti veng veng!

Chung hun laite chua ka thinlungin ka hmangaih thu ka hrilh mawlh mawlh a.

2

Kan khua kan thlen chuan a zan chu KTP-te a Group anga Inkhawm tur a ni a. Chauin peih lo viau mah ila ka Felfeli a inkhawm beiseiin inkhawm ka tum ruh hle.

Kan thenawma  rawlthar ka sawm a.. Ani chuan kan In atanga hla tak, kan Group inkhawmna turah chuan min hruai a.

Kan va thlen chuan an lo tan fel deuh chiah hi a ni a. Inkhawmna kan neih lai chu ka mit ka’n len thin a. Mahse, ka Felfeli ka hmu ve lo.

Inkhawm ban chuan a thiannu chu ka ko a. Engvanga rawn inkhawm lo nge anih ka zawt a. Ani chuan a chauh deuh vanga rawn inkhawm lo anih a rin thu a sawi. 

Tichuan, hun leh nite ka hmang liam ve zel a. Felfeli Phone No chu engtin tin emaw ka nei thei ta. Ka phone chawt ngam lo a!

---

Rilrua vei, hmuh chak, be chakin hun engemaw chhung chu ka awm a.

KTP Conference chu kan khua atanga hla lutuk loah a thleng a.

Chumi tum chuan ka lo va phei hmasa a. Mikhual thlenkim niah mikhual hmuaktu pawlah ka tang a.

Chumi ni chuan ruah a sur a. Motor-a rawn kalte chuan Motor chungah Silpouline an zar a. Pickup pahnihin kan khuate chu an rawn kal a. Chung zingah chuan Felfeli chu a tel ve a.

Mikhual hmuahnaah thingpui an in lai chuan vawikhat ka hmu a. A hnu, Conference zawh; kan zawh, haw hunah bak ka hmu leh ta lo.

chhunzawm tur