Mihring hian kan piantirh aṭangin midang nena kan hriathran theihna turin hming bik kan nei ṭheuh a. Chu kan hming bakah chuan kohna hran kan nei deuh vek. Chu kohna hran chu mi ṭhenkhat chuan an lai-ah hming aiin an larpui zawk.
Mi nena kan khawsakhonaah hian an hming emaw kohna emaw ni loa a vangtlangina kohna kan nei. Tin, chhungkhat inkoh dan pawh.
Mi puitling tak taka kan ngaihte hi heti lama harh lo an awm ṭeuh nia! Midang kan kohdan hian kan mihring mizia a tilang ṭhin.
Ka pa/nu pa rual chu 'A pu/ Pu/ Ka pu' kan ti a, ka pa/nu nu rual chu 'A pi/ Pi/ Ka pi' tiin kan ko. Ka pa rual chu 'A pa/ Pa/ Ka pa' tiin kan ko bawk. Ka nu rual chu 'Nu/ A nu/ Ka nu' tiin kan ko. Ṭhenkhat chuan 'Pi/ A pi/ Ka Pi/ Pu/ Ka pu' ti mahse a sual lo. Chutiang bawkin 'A u/ U/ Ka u' kan tih chuan keimahni aia upate an ni. Mi ṭhahnem tak chuan mawl biak hi an duh miah lo nia!
Tin, hming phela inkoh hi ṭhenkhat chuan an duh vak lo. Naupangtein a pa rual kha 'Pa Zik' (Zika ko dawn ta se) tiin ko ta se, a ngeiawm letling mai thei. Chu ai chuan 'Ka pa Zik' tiin zawk ta se, a dawngsawngtu tan a lawmawm ang. Mahse, vangtlangin an kohdan anih chuan a hriatthiam theih ang chu. Mi ṭhenkhatin an ṭhiante nu leh pa an nu leh pa duh lo a, ka sawi anga hming phela an ko tlat ṭhin hi a mawi lo khawp mai!
Naupang zawk tih hriatrengin anmahni aia ute an u duh lo ṭhin hi ka ngaimawh khawp mai! Hriatna ka hloh avanga keimah aia upa ka u loh pawh ka hriatchhuah hnuah ka inthiam lo khawp mai. Keimah aia khawvela hun alo hman tam tawhna kha ka zahsak tur a ni. Chuvangin, keimah aiin lo lian lo zawk pawh nise ka U mai tur a ni.
Ṭhenkhat chuan inkohna hi kan ngaipawimawh lem lo tih a hriat. Vawikhat chu kei aia naupang hian a fa a rawn lenpui a. A fa hnenah chuan, 'A u tirawh. I u anih kha!' a ti a. Kei chuan, 'A u rual pawh ka ni lo e!' ka ti! Vawikhat leh pawh ka tu (ka cousin hmeichhe fa) hi a pain, 'I u anih kha!' a'n ti chu 'A u tur ka ni lo a, a pu tur ka nia!' ka ti a, a pa chu a inthiam lo khawp mai!
Nia, vangtlangin mi koh dan kan nei a, chhungkhat inkoh dan kan nei leh a ni tih i hria ang u. I fate hnenah i hrilh ngai loh chuan an len hunah miin 'a mawl mang e' an ti ru maithei asin!
1 Comments