Govt. Hnahlan Middle School in Diamond Jubillee a lawm dawn tih ka hriat veleh Souvenir- a thu engemaw thailan ve ngei chu ka duh hle a. Ka batchmate- te thu han ziak chi vak an awm loh avangin tlem azawng ka han thailang ve ang e.
Middle School- a ka kal lai 2006- 2008 chhung khan thil tawn tam tak ka nei ang a. Mahse, ziaka thil chhinchhiah thlip thlep ka chin loh avangin leh thluak lama harsatna ka tawh avangin ka hre mumal thei tawh lova, a tahrik ni diktak ka ziak thei dawn lova, thu pawh a inkalhthelh nuaih dawn a, chhiartuten inlo hriatthiam mai ka beisei.
Khatih laia ka kal pui ṭhenkhat te leh thawktu ṭhenkhat chuan mual an liam tawh a. Ṭhenkhatin nupui fanau an nei tawh a, ṭhenkhat chu khawdangah an pem tawh bawk.
Govt. Middle School- a ka kal lai hian Sir Lalramliana (L) chuan Parade hi min kaihruai ṭhin a. Kan Marchpass chu School bul atanga Field thleng hian a ni ṭhin a. Ani erawh chu School
bulah alo awm a. Kan thleng thui tawk ta maw tihah Office lamah min kalsan daih a, kan tlanlet hum hum ṭhin.
Vawikhat chu A.O (Administrative Officer) in min awp laiin Volleyball Court, Ramtharah Independence Day kan hman ṭumin kan School Contingent Parade ka hruai ve nghe nghe.
Vawikhat chu School pumpuiin Picnic kan nei dawn a. Sangha vuakna turin RU thing kan la a. Chumi chuan kan picnic a. Kei chuan Sangha ka ei ngai loh avangin Artui kan ka pai a. A va nuam e aw! Khua atangin kan picnic na tur hmun chu ke ngatin kan kal a, ke bawkin kan haw leh a, tumahin chauh thu kan sawi lova, kan hlim em em a ni.
A changin kan khuaah hian Sawrkar mi pawimawh an lokal ṭhin a. Chung chu LAL tiin kan sawi ṭhin. Community Hall- ah kan hmuak a, chungah chuan Kawngpui ṭha leh Electrict eng tiin kan au rual ṭhin a ni.
Class VII kan nih laia Pu Auva'n Health Education Subject a lak laia kan Byeheart sa kan inzawhtir dan kha ka la mitthla thei. A inzawt hmasa te hnenah khan kan va inzawhtir leh chhawng a. Annin lehkhabu kha kan chhiar theih turin an keng a. Tichuan, thiam awm ṭakin kan sawi ṭhin.
Class VII ka zir laiin CHK (Champhai - Hnahlan - Khuangphah) Road chu BRTF in lai turin an ruahman mek a. Test Path an laih dan te, kalkawng awm dan tur te ṭawnglettua an hman Sir C Remmawian Class- ah a sawi ṭhin.
Kumtin Zonal Sport kan nei ṭhin a. Kan khaw chhehvel atangin School naupang leh an zirtirtute an lokal ṭhin. Kei erawh chu Sport lam ka tui loh avangin engmahah ka chhuak ngai lo.
Middle School ka luh tirh deuh hian tun hma a awmna ṭhin Ringaihna tlanga School Building chu ṭhiah a ni a, Govt Hnahlan High School Buiding pathum chu luah hawh a ni. Tunah hian tunhma Education Rest House awmna ṭhinah RCC in compound mumal tak neiin a awm ta a, a lawmawm hle.
Ka kal ve lai khan High School lam hnaih ber hi Office atan hman a ni a. A bul Building-a High School lam hnaihtu hi Class V room niin a dawtah Class VI an awm a. Building mal hi Class VII ho awmna a ni thung.
Ka sawi hmaih hauh loh tur chu Hmeichhe ho siam TUITHAK a ni. School- ah chuan engtiang pawhin siam se a tuina kha a bang chuang lova. an tuithak kha kan dil chamchi ṭhin.
Theihmu Sawhdawnga sawh te pawh kha kan uar khawp mai. Kartin Zirtawpni chawhnu hian Game hun kan nei ṭhin a. Chung hunah chuan kei chuan Lehkhabute ka lo chhiar ṭhin. Khang lai kha chuan thawnthubute kha a lar a, a nei ngah chu an vannei a ni mai khan ka hria.
Govt Middle School- ah hian Class- V (First Term), Class- VI (Second Term aṭangin), Class- VII (Kum 2) = Kum 3 ka kal a ni.
0 Comments