- Ngurthansangi Pa
Mizote hi mahni hnam tawng humhalh tulna leh pawimawhna hre lo hnam kan niin ka hria. Tunlaia thiamna lo sangchho tial tialah hawrawp kim pawha thuziak zo hleithei ta lo te, SMS pawh type hleithei lo te leh, hnamdang hawrawp mahni hminga lo vuahta chawtte kan kat ta nuk mai! Kan hming han ziahdan hrim hrim atangte pawh hian a hriat hle hi! Tun tumah chuan ka vei ni lovin; ka ngaimawh em em mai 'hming ziahdan leh lamdan' chungchang; a bik takin Mizo Pasaltha hmingthang Vana Pa (Ka sawisel turte chuan Vanapa in ti!) hi han thlurbing ta ila.
Mihring hian inhriathranna turin hming kan nei vek a. Chu kan hming chu hming atana lo hmang ve midang awm mahse, kan hming a nih loh na a awm chuang lo. Khawvela mihring hmasa ber kha Pathian chuan Adama tiin a kova, Adama'n ama anpui hmeichhia chu Evi tiin a ko tih kan hriat kha.
Mihringin Fa a neih chuan, a fa hming chawiin thenkhat chu kan inko thin a. Entirnan: Zova fapa chu Mawia a ni a, ‘Zova’ tia ko lo khan ‘Mawia Pa’ tiin ko ta ila, ‘Zova’ a nihna a bo chuang lova, Zova fapa chu Mawia a ni tih pawh a tilang chiang hle. Chutiang bawkin ‘’Thangzachhinga’ fapa chu ‘Vana’ a ni a, a fapa hming behchhana kovin, 'Vana Pa' an ti a ni.
Mizorama Hall lar ber chu 'Vana Pa Hall' hi a ni awm e. Mahse, a hming hi an ziakdik lo thin a, a pawi hle. Vanapa (Va-napa) hi a awm lova, Vana Pa @ Thangzachhinga erawh chu a awm. Chumi hming chawia he Hall hming an phuah hi a hlut rualin, a hming hi a dik lo tih kan hriat a tul ka ti a ni. Thangzachhinga hriatreng nana he Hall hi a hming kan phuah a nih chuan, ‘Vana Pa Hall’ kan ti tur a ni.
State Sawrkar hian hmun hming leh kawng hming te, khua leh veng hmingte a phuah thin a. 'Vana Pa Hall' tiin tuna mi tamzawkin 'Vanapa Hall' an tih saw thlak se ka duh a, chu chu ka rawn auchhuah pui a ni e. Tin, Vanapa tia kan ziah thin leh koh thin pawh a dikzawk: Vana Pa tia hmang turin Mizo Ziakmi dangte pawh ka sawm che u a ni. Mizo tawng hi namnul a, tihdazat mai atan chuan a uiawm lua e!
1 Comments