International Day Against Drug Abuse and Illicit Trafficking 2011 hmanna-ah ka kal ve!

Chief Minister Pu Lalthanhawla chuan ‘ruihhlo hi Lal Isua tello chuan do hneh chi a nilo’ a ti. He thu hi vawiin-a ‘International Day Against Drug Abuse and Illicit Trafficking 2011’ hmanna Vanapa Hall-a a sawi a ni.

Pu Lalthanhawla CM

Chief Miniater chuan ruihhlo in pawi a khawih nasatzia chu a hretu vek kan ni tiin, mi tam takin eizawn nan an hman avangin buaina kan neih tam phah hle a ni a ti a. Ruihhlo hi setana hmanrua a ni a, a hmang sual leh zuartute hi hrem leh tan tira tih reh theih a ni loh avangin, dan hmanga kan do bakah Lal Isua nen a do hneh chi a ni a ti. A hmang sualtu te enkawlna leh a hmunte a beitham avangin an hun hmasa lama an siam, Sethawn ami chu chei thata tangkai thei ang bera hman tum a ni,' a ti.

Lehkhabu a tlangzarh

Power presentation hmanga Dr. Eric Zomawia’n chipchiar taka ruihhlo tobul, hman sual hlauhawmzia leh nghawng a neih dan te leh a enkawlna lam thlenga hrilfiahna arkar chanve chuangzet a nei chu, Chief Minister chuan zirlaite fuankhawmna, School leh College ah te tih ni thei zawk se awmze thui zawk a neih a beisei thu a sawi a.Ala tilo te tan a tobul atanga ven dan ngaihtuah a pawimawh a ni a ti a. Thalai ten thil thalo lama ngaihtuahna an hman loh nan sorkar chuan skill development a ngaihtuah a ni a ti. Pu Hawla chuan ruihhlo lo luhna ber chu khawchhak lam anih avangin border a Assam Rifles duty te chu uluk taka venhim hna thawk tura a chah thin thu a sawilang bawk a. Mizoram chu hmun ralmuang anih avangin ruihhlo tawlhru thin ten bihruk nana an hmang thin chu a dona kawngah mitin kan tanrual a pawimawh a ni a ti.

Chief Minister chuan ruihhlo zuar an man te chu rei tak an tan theihna turin dan khauh tak siam a tul thu sawi bawkin, tuna dan kan neihna hnuaia reilote chauh tan tir an ni thin chu pawi a tih thu a sawi bawk a ni.

Hei hi kan School Trophy dawn

He huna khualzahawm Pu P.C.Lalthanliana, Minister of State for Social Welfare chuan vawiina school 12 tel ten slogan writing competition an neih, an pholan te chu tehfung hrang hrang hmanga a ti tha zual 3 thlan te hnenah trophy, certificate leh Rs.1000/- theuh a hlan a, abak zawngte hnenah certificate a hlan bawk a ni. 1st-na dawngtu hi Govt Mamawii Girls’ HS, 2nd -na hi Govt KM HSS leh 3rd -na St.Paul’s HSS te an ni. He hunah hian ka thawhna School Govt. Republic HSS pawh tel vein Rs. 1000 + Certificate +Trophy kan dawng ve nghe nghe. Certificate hi keiman ka la a, kan naupang pakhatin trophy a la thung. He hunah hian Sir Lalhmingmawia Ralte leh Sir ZD. Lalhriat te nen kan 3 in naupang 50 vel kan hruai. Minister hian thusawina a nei bawk.

Hei hi kan School Certificate dawn

‘Damdawi hmansual leh Tawlhruk Dona Ni’ hi UNO in kum 1987 June ni 26 khan alo hmang tan a, Mizoramah chuan kum 1991 khan kan hmang tan ve a ni. Kumin 2011 ah he ni hi Mizoramah chuan chawlhni anih avangin vawiin ni 27 June, thawhtanni hian hman a ni ta zawk a ni. Thupui atan ‘ Ruihhlo nilovin Hriselna ngaihven zawk rawh’ (Global Action for Healthy Community without Drugs) tih a ni.

Fiona Lalmalsawmi Pachuau (the Chosen)

He hunah hian Fiona Lalmalsawmi Pachuau chuan Hla 2- Hruaitu Ropui tih leh Broken Wings tih hla a sa. Tin, SORA lam tangin Testomony lam hawi deuhvin Ruihhlo Dona kawng leh Ruihhlo tite enkawlna kawnga an duhdante an aiawha lokal Tv. Vanlalvuana, Treasurer chuan a sawi nghe nghe.

Hemi ni hian Catapasca Damdawi chungchang sawilan a ni zing hle. Hmeichhe hunbi neih laia ei thin nachhawkna a ni a, chu chu School naupangten ruihnan an hman thin thu sawilan a ni.

(Source: I&PR, tlem ka Edit bakah ka ziahbelh bawk.)