Vawiin chu zing lamah a that tehchiam loh nen, chhunlamah a lum hle mai! Chutih rual erawh chuan ni a sa lemlo thung a. Khua chuan han that chian a tumin a lang hran lo!
Thawhlehni hi a mak ngawt nia, karin hian a tharin awm thin mahse, a hma- a mi a ang ngai lova, a hnua lo la awm tur nen pawh a inang dawn chuang lo. Hemi ni hi mi tamtak tan chuan hlima lawmna ni a ni ngei ang. Chutih rual chuan mi tamtak tan tahna ni a ni bawk awm e. Mi tamtak chuan lei hringnun kalsana chatuan hmun lam pana anmahni ngai tute an chhuahsanna ni a ni ang. Tin, thenkhat tana khawvel eng hmuh tanna ni a ni bawk ngei ang le.
Nia, vawiin ni, Thawhlehni ti a Mizo ten kan koh, Vai hovin Mangalwar an tih, English hovin Tuesday an tih hi Isua ringtute chhiar dan chuan chawlhkar khata a ni hnihna a ni a. Isua ringtu rau rau zingah Seventh Day / Sabbath ho tan erawh a ni thumna a ni thung. Hemi zan lampang hi Mizoram Presbeterian Kohhran Hmeichhe ho chuan inkhawm hun a tan an hmang thin bawk.
He ni hi mi tamtak tan chuan ni chhinchhiahtlak a ni thei ang. A chhan chu, nakinah Thawhlehni dang lo inherchhuak mahse, a hma-a Thawhlehni a lo nih tawh dawn avangin a hnulama lo awm tharte lakah chuan hluiin lang mahse, khami ni chhinchhiah tlak a nihna kha a hrereng dawn a ni.
Thenkhat chuan he mi ni hian nupui pasal an neiin, thenkhat an intitlan a ni thei e. Thenkhat erawh an inngaihzawnna kawngzawh mek an titawp a ni thei, Thenkhat an zawhtan mek laiin!
Kar khata ni sarih (7) awmah hian pawimawh bik a awm lemlo va. Mahse, a hmangtu leh a hmandan a zir khan a pawimawh thei thung riau si a ni. Thenkhat chuan khawvel hriata a tha zawnga an hming an phochhuahna ni a nih laiin, a then tan chuan a chhe zawnga an hming an tarlanna ni a ni ve thei thung. Chuvang chuan he mi ni leh ni dang zelahte pawh i nun i fimkhur a ngai a ni.
I nun i fimkhur chuan Vawiin ni (Thawhlehni) ang hi hun dangah pawh lo thleng leh se, i tan hman a nuam sarh mai ang. Entirnan, ni thenkhat- Thawhtanni angah Ruk lo ru ta la, man che se, mi hriatah phochhuakin timualpho ta che se la. Chu Thawhtanni chu i damchhungin i hrereng tawh ang. Thawhtanni alo thlen apiangin i rhiltih khan a vawlet ziah bawk ang che. Rhiltha tiin, Inkangah mi chhanchhuak ta ni thung la. Midang lakah i hming puanzar ni lemlo mahse, mi nunna i chhanhim avang khan Thawhtanni lo thlen chang apiangin i hlim deuh ziah ang.
I hun leh nun i vawn uluk chuan, i tana thalo chu u kalsan theih na chance a awm zel. I kalpelh chuan a siamtha tura damchhunga beih a ngai tawh thin. Chuvang chuan vawiin khan engnge i tih a, engnge i thawh? Midangte tan i tangkai nge, tangkai lo? Mi pawi i sawi nge sawilo? Mi te tana hlawkna nge i zawn, nangma hlawkna? tihte i inngaih fo dawn nia. A chhan chu, vawiina i tihkha naktukah a siamthat theih tawh si lohva!
Vawiin hi i tan a hlu a, hun kaltawhten i tan hlutna chin nei mahse, i damchhunga i hun pawimawh bet chu Vawiin- ni a i hun zawng zawng kha a ni. Niin a tlakpui tawh chuan thil a fello vek thin.
Aw..Vawiin, i va lo duhawmin i va lo tangkai tak em! i tih theihnan i chhia leh tha hriatna hmangin Thawhlehni a lo thlen a paingin mi dangte tana thiltha pakhat tal tih tum thin ang che. Ka lawm e.
Thubelh:
A lum lutuk a, ka type hleithei der lo. Ka thlan zawih zawih thei. Vawiin chu kawipawh Chanmari- ah Arsa ka lei a, chumi zawha ka haw a, eirawng bawl pahin hethu hi ka han thai thuak a ni e.
0 comments:
Post a Comment