Ka tawnmang

Nizan ka tawnmang chu a va mak ve tehlul em! Nidang leh zandangah pawh ka tawn ngai lohthil a nih bakah, a tak phei chuan khatiang khawp a nuam ang kha ka la tawng ngailo! Ka tawn pawh ka ring tawh nek lo, kei ve tehlul hian!

Mami Varte hlasak, 'Nizan ka tawnmang chu e, Duhten tangah beiin, hmangaih biahthu minlo hlan a. Mahse, zingtian khua varin, thamral leh si..', tih ang deuh kha a ni awm e tuna ka rawn ziah tur hi!

Nia, ka tawnmang chu a pui khawp mai! A chiri nuaih mai bawk a. A chang leh Mizoram Governor Pu M.M. Lakhera te ka hmu thul. US Defence Secretary hnenah te min lo inhmelhriat tir vel bawk a! Khawi khawiah emaw Hotel nuam deuhvahte hian Excursion anga zinin kan lo thleng bawk a! Chutiang karah chuan ka nuamtih em em, ka theihnghilh theihloh tur thil hi a lo inzep tel ve mauh mai!

A pa damlai khan a fanu hmeltha ka tih em avangin zah pawh dawn lovin a thlalak en ka dil a. Mahse, a mah a awmloh lai a nih avangin ka en ta lova. Ka kal leh chuan ama phalna ngeiin ka ensak a, a phalna ngeiin pakhat ka laksak nghe nghe.

Chumi kum chu 9/11 vel hunlai kha a ni a. Zah pawh sawi theilovin, ka vawikhat hmuh na- a hmeltha ka tih em avanga ka vei zui tak reng, biahthu Di pawh thingtlang lama kan uar Lehkhathawn hmangin ka hlan ve ngat tawh hi an inah zankhat chu ka zu leng ve rawih mai a! Chumi tum chuan a lo awm nghe nghe a. Hmun te a phiat sarh sarh a, a nui sen sen a, a hmel a tha thlawt a ni! Thingpuite min lumsak a, chutih lai chuan amah pawh a la tleirawl hle.

Aizawl atanga ka hawchhoh chang hian X-Mass dawn a nih thin avangin an Inah ka kal deuh ziah thin a. Vawikhat pawh an chhunga hmundanga an lo zin avangin X-Mass Card ka hawn te chu an kawngkharah ka dah ringawt nghe nghe. E, taka, a chhiartur hian vawi engemawzat Tinkle Digest te ka thawn tawh nghe nghe.

An In Phone No kha 9/11 vel atang khan ka la theihnghilh ngai lo. 03831- 2..... a ni. (Ka tarlan loh hian an mimal zalenna ka tichhe lo zawk ang!). A chang chuan ka han Phone ve thin a. Kan inbe tam em em hran lo. I tawn tawh a nih chuan i beisei i hmuh leh dawnloh na kha biak chakawm viau mahse, i be chak lutuk lo thei. Tin, an lo be chak lo viau thei bawk che.

Zirna lamah hian a pa boral avang khan a hnufum phah deuhva. Reitak chhung chu a nu nen Thingpui Dawr an siam a, an dawr chu Bethel Kawnah khian a awm nghe nghe. Chutah chuan ka kal chang hian ka chawl ve fo thin a. Kan inhmuh chhunah pawh ka chezia leh tawngkain sawi mah ila, engmah lawmna tur ka nei hran ngai lemlo. A nu pawhin a fanu ka duhzia a hrechiang khawp ang! A u chuan a hria!

A u hian pasal a nei daih tawh a. Fa pawh pakhat an nei tawh nghe nghe. Vengsang lamah a pasal te nen chuan an awm thin.

Hun engemawchen ka hmuh loh hnuah kan han inhmu hi chu tah te hi a chhuak zawk thin nia! 'Z, ka ngai lutuk che asin', han tih a, va kuah ngawih ngawih mai te hi ka duh thin. Mahse, a rem mawlh si lo!

Nula leh Tlangval dang- inhmangaih let ve ve ni ila chuan tuna a ziaktu tan hian heng thu hi ziah a ngai lemlo vang! Khuavel hian par a chhuang dawn si a! Kan inhmuh chang pawhin, nawmchenna thianghlim hmangin nuam kan chen thei dawn si a! Mumang lamah chauh chupawh tunah rih chuan ka la dawng thei tawk si a ni!

9/11 vela a thlalak ka neih kha Bike bula a ding (?) lai thla a ni a. Tunah hian ka nei tawh lo. A hmel leh pianhmangte chu ka mitthla- ah kum engemawzat hmu tawhlo mah ila, nizana ka mumang ah khan fiah takin ka hmu a, tun thleng hian a la fiah zel a nih hi!

Nia, ka sawikual duah tawh lo ang a, kan thupui ah i lut dawn teh ang:

Ka tawnmangah chuan a nu hian Bluetooth Ear Phone hmang hian chu ka sawi tleitiri, (phai lama Nurse zir, rawn zo tep tawh, a awmna Hostel te an khirh em avanga amah (a nu) chauhvin a phone theih, chupawh zan lamah chiah phone theih) chu a be mawlh mawlh a. A sawi pakhat ka hriatchian em em chu, 'Khawiah nge i awm tak ang?' tih hi a ni. Ka hmuh leh hriat laia ka ngaihdan chuan awmna tur hranpa an ngaihtuah mek niawm tak a ni.

Kei ta pek chuan, 'Ka nu, ka lo be ve?' ka va ti. A ni chu a lo teu hlar mai a! A lo phal awkawng lo mai! A fanu hming hi ka hriat chu Z.. a ni a, mahse a nu hi chuan ka tawnmangah chuan, 'Chutiang hming nei fanu ka nei lo', a lo ti mauh mai bawk si! Huiha! Mumangah pawh ka buai lutuk!!

Ka mumangah vek chuan ka mangang, ka ngaih em em biak chak bawk si chu ka lo tap ta a. Ka tapchhuak a, ka inhnit hlawp hlawp a! Mahse, a hnu deuhva la man zui zel ka inbeisei avangin ka muzui leh a. Ka mang chhunzawm reng bawk a!

Ka mumang chuan a thiante nen kan inhmu a. An ni pawh chuan, an inhmuh ngai hlawmloh avangin a awmna chin an hriatloh thu te, a hming a thlak tawh nia an hriat thute min hrilh a. An sawi dan hmang chuan, 'Lily Hnahlan' ti in a hming a thlak niawm tak a ni!

Ka tawnmangah chuan engtik lai nge tih ka hre thei ta lo. Engtinnge kan intawn pawh ka hrechhuak zo tawh lo. Ka sawi tleitiri ngei mai chu ka hmu thut mai a! Kan lo inhmangaihin kan inngai em em a. Kan inkuah a. Ka chuks ta a.

A ni pawh chuan min kuah a, min chuks let ve a. A nuam khawp mai.

Ka hmangaih em em, ka ngaih em em, ka duh em em, ka lo tah ve nachhan nifo tawh he tleitiri nen hian nizan ka tawnmangah chuan kan lo inchuks vel a nih chu!

A satliah mai pawh a ni lova. Ka type mek lai pawh hian a Rau chuan min la manin ka hria! Ka duhtawh lutuk te khan a thawte pawh a chham ang tih ka hlau hnuhnawh! (he he).

Mahse maw, chutia hlim taka kan inchuks a, kan hmui hmanga hmangaihna par kan tlan dun lai chuan Chanchinbu sem naupang pakhat hian kan kawngkhar a lo kik vak vak a. Ka harh ta ringawt a. Ka thova, Chanchinbu sem naupang chu ka melh rang nasa hle. Thla 4 (Aug-Nov) vel zet min rawn tihbuai tawhloh nan November thla thleng Chanchinbu man ka pe nghal nghe nghe! (Het sala!!)

(Ka mi sawi khi vawikhat mah a chungchang ka la ziak ngai lova. Dam tea ka awm a, Lehkhabu ka ziah theih hun a awm chuan a Changtunu hming atan ka la hmang ngei ang! Tunah hian phai lamah Nursing College- ah a kal niawm tak a ni. Champhai Bethel vengah khian an awm a. A pa hian a boral san tawh a, a nu hovin, a naute- mipa pakhat leh hmeichhe pakhat nen an la khawsa ho. A u hmeichhia hian pasal a nei tawh. A nu pawh hmeltha tak a ni.)

9:00 Chawhma 01-Aug-10